january – Chandrika Daily

ശബരിമല നാളെ നട തുറക്കും; തീര്‍ത്ഥാടന ഒരുക്കങ്ങള്‍ അവസാനഘട്ടത്തില്‍

webdesk17 — Sat, 15 Nov 2025 06:24:24 +0000

പത്തനംതിട്ട: ജനുവരി 20 വരെ നീളുന്ന തീര്‍ഥാടന സീസണിന് മുന്നോടിയായി ശബരിമല ശ്രീധര്‍മശാസ്താക്ഷേത്രം ഞായറാഴ്ച വൈകീട്ട് വീണ്ടും തുറക്കാനിരിക്കെയാണ് പമ്പ, നിലയ്ക്കല്‍, സന്നിധാനം എന്നിവിടങ്ങളിലെ ഒരുക്കങ്ങള്‍ അവസാനഘട്ടത്തിലേക്ക് കടന്നിരിക്കുന്നത്. ദര്‍ശനത്തിന് ഓണ്‍ലൈന്‍ ബുക്കിംഗ് നിര്‍ബന്ധമായതിനാല്‍, ഭക്തര്‍ www.sabarimalaonline.org വഴി മുന്‍കൂര്‍ സൗകര്യം ഉറപ്പാക്കണമെന്ന് അധികൃതര്‍ അറിയിച്ചു. ദിവസേന 70,000 പേര്‍ക്ക് ഓണ്‍ലൈന്‍ ബുക്ക് ചെയ്യാം. കൂടാതെ പമ്പ, നിലയ്ക്കല്‍, എരുമേലി, വണ്ടിപ്പെരിയാര്‍ സത്രം, ചെങ്ങന്നൂര്‍ എന്നിവിടങ്ങളില്‍ സ്‌പോട്ട് ബുക്കിംഗ് സൗകര്യവും ഉണ്ടായിരിക്കും. ഞായറാഴ്ച വൈകിട്ട് 5 മണിക്ക് കണ്ഠര് മഹേഷ് മോഹനരുടെ സാന്നിധ്യത്തില്‍ മേല്‍ശാന്തി അരുണ്‍കുമാര്‍ നമ്പൂതിരി നട തുറക്കും. തുടര്‍ന്ന് പതിനെട്ടാംപടിയിറങ്ങി ശ്രീകോവിലിലെ ദീപംകൊണ്ട് ആഴിജ്വലിപ്പിക്കല്‍ ചടങ്ങും നടക്കും. ഇരുമുടിക്കെട്ടുമായി കാത്തുനില്‍ക്കുന്ന നിയുക്ത മേല്‍ശാന്തിമാരെ മേല്‍ശാന്തി സന്നിധാനത്തിലേക്ക് ആനയിക്കും.ഏകദേശം 6.30ഓടെ തന്ത്രി ശബരിമല നിയുക്ത മേല്‍ശാന്തി പ്രസാദ് നമ്പൂതിരിയെ അഭിഷേകം ചെയ്ത് അവരോധിക്കും. തുടര്‍ന്ന് മാളികപ്പുറം നിയുക്ത മേല്‍ശാന്തി മനു നമ്പൂതിരിയുടെ അവരോധനച്ചടങ്ങും നടക്കും. ഞായറാഴ്ച പൂജകളില്ല.തിങ്കളാഴ്ച പുലര്‍ച്ചെ 3 മണിക്ക് വൃശ്ചികപ്പുലരിയോടനുബന്ധിച്ച് പുതിയ മേല്‍ശാന്തിമാര്‍ ശബരിമലയും മാളികപ്പുറവും നടകള്‍ തുറന്നതോടെ തീര്‍ഥാടനം ഔദ്യോഗികമായി ആരംഭിക്കും. പുലര്‍ച്ചെ 3 മുതല്‍ ഉച്ചയ്ക്ക് 1 വരെ, ഉച്ചകഴിഞ്ഞ് 3 മുതല്‍ രാത്രി 11 വരെ ദര്‍ശന സമയം അനുവദിച്ചിട്ടുണ്ട്.പമ്പയില്‍നിന്ന് നിലയ്ക്കലേക്കുള്ള ബസ് സ്‌റ്റോപ്പിന് സമീപം തിരക്ക് നിയന്ത്രിക്കാന്‍ ഈ വര്‍ഷം സ്ഥിരം ബാരിക്കേഡ് ഏര്‍പ്പെടുത്തുന്നു. നിലയ്ക്കലിലും പമ്പയിലും 3000 പേര്‍ക്ക് പ്രവേശിക്കാവുന്ന ജര്‍മന്‍പന്തലുകള്‍ പണിതു. നിലയ്ക്കലിലെ പുതിയ പാര്‍ക്കിംഗ് ഗ്രൗണ്ടിന്റെ നിര്‍മാണവും പുരോഗമിക്കുന്നു.

ജനുവരിയില്‍ ആദ്യ ഖോ ഖോ ലോകകപ്പിന് ഇന്ത്യ വേദിയാകും

webdesk17 — Thu, 17 Oct 2024 03:44:53 +0000

ഖോ ഖോ ലോകകപ്പിന്റെ ആദ്യ പതിപ്പ് അടുത്ത വര്‍ഷം ജനുവരിയില്‍ ഇന്ത്യയില്‍ നടക്കും. ജനുവരി 13 മുതല്‍ 19 വരെ ത്യാഗരാജ് സ്റ്റേഡിയത്തില്‍ നടത്താനാണ് തീരുമാനം. 24 രാജ്യങ്ങളില്‍ നിന്നും ആറ് ഭൂഖണ്ഡങ്ങളില്‍ നിന്നുമായി 16 പുരുഷ-വനിതാ ടീമുകള്‍ പങ്കെടുക്കും. ബുധനാഴ്ചയാണ് ഖോ ഖോ ഫെഡറേഷന്‍ ഓഫ് ഇന്ത്യ (കെകെഎഫ്‌ഐ) ഇക്കാര്യം അറിയിച്ചത്.

‘ഖോ ഖോയുടെ വേരുകള്‍ ഇന്ത്യയിലാണ്, ഈ ലോകകപ്പ് കായികരംഗത്തെ സമ്പന്നമായ സാംസ്‌കാരിക പൈതൃകവും മത്സര മനോഭാവവും ഉയര്‍ത്തിക്കാട്ടും. ഇന്ന്, ചെളിയില്‍ ആരംഭിച്ച് മട്ടുപ്പാവില്‍ പോയ കായിക ഇനം 54 രാജ്യങ്ങള്‍ കളിക്കുന്ന ആഗോള സാന്നിധ്യമുണ്ട്. ലോകമെമ്പാടുമുള്ള കായിക,’ കെകെഎഫ്‌ഐ പറഞ്ഞു.

പ്രഖ്യാപന ചടങ്ങിനിടെ, ടീം മഹാരാഷ്ട്രയും റെസ്റ്റ് ഓഫ് ഇന്ത്യയും തമ്മിലുള്ള ഒരു പ്രദര്‍ശന മത്സരം നടന്നു, അതില്‍ മുന്‍ ടീം 26-24 വിജയികളായി. ലോകകപ്പിന്റെ ഔദ്യോഗിക ലോഗോയും #TheWorldGoesKho എന്ന ടാഗ്ലൈനും ചടങ്ങില്‍ പ്രകാശനം ചെയ്തു.

ഹജ്ജ് നറുക്കെടുപ്പ് ജനുവരി മൂന്നാം വാരത്തിൽ; ആദ്യവിമാനം മേയ് ഒൻപതിന്

webdesk13 — Sat, 30 Dec 2023 06:49:15 +0000

രാജ്യത്ത് ഹജ്ജ് തീർഥാടകരെ തിരഞ്ഞെടുക്കുന്നതിനുള്ള നറുക്കെടുപ്പ് ജനുവരി മൂന്നാം വാരം നടക്കും. ആദ്യഹജ്ജ് വിമാനം മേയ് ഒൻപതിനാകും പുറപ്പെടുക. അവസാന ഹജ്ജ്വിമാനം ജൂൺ 10-ന് പുറപ്പെടും. ജൂൺ 14 മുതൽ 19 വരെയാണ് ഹജ്ജ്കർമങ്ങൾ നടക്കുക. ജൂൺ 20 മുതൽ ജൂലായ് 21 വരെയാണ് തീർഥാടകരുടെ മടക്കയാത്ര നിശ്ചയിച്ചിരിക്കുന്നത്.

ഹജ്ജിന്റെ വിവിധ നടപടികൾ സമയബന്ധിതമായി ഉൾക്കൊള്ളിച്ചുള്ള കർമപദ്ധതി കേന്ദ്ര ഹജ്ജ്കമ്മിറ്റി പുറത്തുവിട്ടു. കർമപദ്ധതി പ്രകാരമാണ് ഹജ്ജ നറുക്കെടുപ്പ് ജനുവരി മൂന്നാം വാരത്തിൽ നിശ്ചയിച്ചത്. നറുക്കെടുപ്പ് കഴിഞ്ഞ് ഒരാഴ്ചക്കുള്ളിൽ ആദ്യഗഡു തുക അടയ്ക്കേണ്ടിവരും.

പാസ്പോർട്ട് ജനുവരി 30-നുള്ളിൽ നൽകണം. നിലവിൽ ഹജ്ജ് അപേക്ഷ സ്വീകരിക്കുന്നത് പുരോഗമിക്കുകയാണ്. ജനുവരി 15 വരെ അപേക്ഷ സ്വീകരിക്കും. ട്രെയിനർമാരുടെ തിരഞ്ഞെടുപ്പ് ജനുവരി ആദ്യവാരം നടക്കും. ഫെബ്രുവരി ആദ്യം ട്രെയിനർമാർക്ക് പരിശീലനംനൽകും.

ബിൽഡിങ് സെലക്‌ഷൻ കമ്മിറ്റിയുടെ മക്കയിലെയും മദീനയിലെയും കെട്ടിടങ്ങളുടെ ആദ്യഘട്ട പരിശോധന ജനുവരി, ഫെബ്രുവരി മാസങ്ങളിലും രണ്ടാംഘട്ട പരിശോധന ഫെബ്രുവരി, മാർച്ച് മാസങ്ങളിലുമായി നടക്കും. സൗദിയുമായുള്ള ഹജ്ജ് ഉഭയകക്ഷി കരാർ ജനുവരി എട്ടിനും പതിനൊന്നിനുമിടയിൽ ഒപ്പിടും. വിമാനക്കമ്പനികളുമായുള്ള കരാർ ഫെബ്രുവരി ആദ്യമായിരിക്കും ഉറപ്പിക്കുക.

കാത്തിരിപ്പുപട്ടികയിൽനിന്ന് അവസരം ലഭിക്കുന്നവരുടെ പട്ടിക ഫെബ്രുവരി 15- ന് പ്രസിദ്ധീകരിക്കും.

വിമാനക്കമ്പനികൾക്ക് സമയപ്പട്ടിക പ്രസിദ്ധീകരിക്കാനുള്ള സമയപരിധി മാർച്ച് 20 ആണ്. തീർഥാടകർക്ക് നൽകാനുള്ള പ്രതിരോധ കുത്തിവെപ്പ് മാർച്ച് അവസാനവാരം സംസ്ഥാന ഹജ്ജ് കമ്മിറ്റികൾക്ക് നൽകും.

കുത്തിവെപ്പ് ക്യാമ്പുകൾ ഏപ്രിൽ 15-ന് തുടങ്ങും. കേന്ദ്ര ന്യൂനപക്ഷ മന്ത്രാലയത്തിൻ്റെ ഹജ്ജ് ആപ്പ് മാർച്ച് 20-ന് പുറത്തിറക്കും. ഖാദിമുൽ ഹുജ്ജാജിമാരെ ഇതേദിവസം തിരഞ്ഞെടുക്കും. ഏപ്രിൽ 16-ന് ഇവർക്ക് പരിശീലനം നൽകും.