jellikkettu – Chandrika Daily

മധുരയിൽ ജെല്ലിക്കെട്ടിനിടെ ഒരു കുട്ടിയടക്കം രണ്ട് പേർ കാളകളുടെ കുത്തേറ്റ് മരിച്ചു

webdesk14 — Thu, 18 Jan 2024 10:00:29 +0000

തമിഴ്നാട്ടിൽ ജെല്ലിക്കെട്ടിനിടെ ഒരു ആൺകുട്ടി ഉൾപ്പെടെ രണ്ട് പേർ കാളകളുടെ ആക്രമണത്തിൽ കൊല്ലപ്പെട്ടു. മധുരയ്ക്കടുത്തുള്ള സിറവയലിലാണ് ദാരുണമായ സംഭവം നടന്നത്. വലിയ മൈതാനത്തേക്ക് കാളകളെ അഴിച്ചുവിട്ട് അവയെ പിടിച്ചുകെട്ടുന്ന അപകടകരമായ വിനോദമാണ് ജെല്ലിക്കെട്ടും മഞ്ചുവിരട്ടലിലുമാണ് അപകടമുണ്ടായത്.

ശിവഗംഗ തിരുപ്പത്തൂർ ചിറവയലിലാണ് ആൺകുട്ടിയടക്കം 2 പേർ മരിച്ച അപകടമുണ്ടായത്. ചൊവ്വാഴ്ച മധുരയിലും മഞ്ചുവിരട്ടലിലും സമാനമായ അപകടമുണ്ടായിരുന്നു. കഴിഞ്ഞ ദിവസങ്ങളിലായി അവണിയാപുരത്ത് ജല്ലിക്കെട്ടിനിടെ 45 പേർക്കും പാലമേട് 42 പേർക്കും പരുക്കേറ്റിരുന്നു.

ജെല്ലിക്കെട്ടിനിടയില്‍ കാളയുടെ കുത്തേറ്റ് തമിഴ് നാട്ടില്‍ യുവാവ് മരിച്ചു

webdesk13 — Mon, 16 Jan 2023 13:17:04 +0000

ചെന്നൈ: തമിഴ്‌നാട്ടില്‍ ജെല്ലിക്കെട്ടിനിടയില്‍ കാളയുടെ കുത്തേറ്റ് യുവാവ് മരിച്ചു. മധുരയ്ക്കടുത്തെ പാലമേട്ടിലാണ് ജെല്ലിക്കെട്ട് നടന്നത്. മധുര സ്വദേശി അരവിന്ദ് രാജ് ആണ് മരിച്ചത്. കാളയെ മെരുക്കുന്നതിനിടെ അടിവയറ്റില്‍ കുത്തേറ്റാണ് 26കാരന്റെ മരണം.

കാളയുടെ കുത്തേറ്റ് ഗുരുതരമായി പരിക്കേറ്റ യുവാവിനെ മധുര രാജാജി സര്‍ക്കാര്‍ ആശുപത്രിയില്‍ പ്രവേശിപ്പിച്ചെങ്കിലും ചികിത്സയിലിരിക്കെ മരിക്കുകയായിരുന്നെന്ന് അധികൃതര്‍ അറിയിച്ചു. പാലമേട് ജെല്ലിക്കെട്ടിനിടെ നിരവധി പേര്‍ക്ക് പരിക്കേറ്റു. പരിക്കേറ്റവര്‍ വിവിധ ആശുപത്രികളില്‍ ചികിത്സയിലാണ്.

തമിഴ്‌നാട് ജെല്ലിക്കെട്ടിന് തുടക്കം; ആദ്യമത്സരത്തില്‍ 22 പേര്‍ക്ക് പരിക്ക്

webdesk14 — Sun, 08 Jan 2023 10:34:04 +0000

ഇന്ന് തമിഴ്നാട്ടിലെ പുതുക്കോട്ട ജില്ലയില്‍വെച്ച് നടന്ന ജല്ലിക്കെട്ട് മത്സരത്തില്‍ കാളയെ മെരുക്കുന്നതിനിടയില്‍ 22 പേര്‍ക്ക് പരിക്ക്. കൊയ്ത്തുത്സവമായ പൊങ്കലിന് മുന്നോടിയായി മൃഗപീഡനത്തിന്റെ ആശങ്കകള്‍ക്കിടയില്‍ ജില്ലയിലെ തച്ചന്‍കുറിശ്ശി ഗ്രാമത്തില്‍ നടക്കുന്ന പരിപാടിയില്‍ 350 ഓളം കാളകളും 250 കാളകളെ മെരുക്കുന്നവരും പങ്കെടുത്തു. സര്‍ക്കാര്‍ പുറപ്പെടുവിച്ച മാര്‍ഗനിര്‍ദേശങ്ങള്‍ പാലിക്കാത്തതിനാല്‍ ഈ മാസം ആറിന് ആദ്യം നിശ്ചയിച്ചിരുന്ന പരിപാടി ജില്ലാ കലക്ടര്‍ കവിത രാമു മാറ്റിവച്ചിരുന്നു. കാളകളുടെയും കാണികളുടെയും സുരക്ഷ ഉറപ്പാക്കാന്‍ തമിഴ്നാട് സര്‍ക്കാര്‍ ഇരട്ട ബാരിക്കേഡിംഗ്, മൃഗസംരക്ഷണ ബോര്‍ഡ് നോമിനികളുടെ നിരീക്ഷണത്തിന് പുറമെ മൃഗഡോക്ടര്‍മാരുടെ പരിശോധന എന്നിവയുള്‍പ്പെടെയുള്ള സുരക്ഷാ നടപടികള്‍ ഏര്‍പ്പെടുത്തിയിട്ടുണ്ട്. പരിപാടിയില്‍ പങ്കെടുക്കുന്നതിന് മുന്‍കൂര്‍ വ്യവസ്ഥയായി കാളകളെ മെരുക്കുന്നവര്‍ വാക്സിനേഷന്‍ സര്‍ട്ടിഫിക്കറ്റ് ഹാജരാക്കേണ്ടതും സര്‍ക്കാര്‍ നിര്‍ബന്ധമാക്കിയിട്ടുണ്ട്. എന്നിരുന്നാലും ജനുവരി 17ന് മധുര ജില്ലയിലെ ലോകപ്രശസ്തമായ അളങ്കനല്ലൂരിലാണ് ഏറ്റവും വലിയ പരിപാടി നടക്കുക.

പരിപാടിക്കായി വൈറസ് പടരുന്നത് നിയന്ത്രിക്കാന്‍ ജില്ലാഭരണകൂടം നിരവധി നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. ഇതില്‍ 150 കാളകളെ മെരുക്കുന്നവരും ഗാലറികളില്‍ 50% മാത്രമെ സീറ്റ് ഉപയോഗിക്കാന്‍ പാടുള്ളു. വാക്‌സിനേഷന്‍ നെഗറ്റീവ് ടെസ്റ്റ് റിപ്പോര്‍ട്ടുകള്‍ എന്നിവ കാണികളും ഹാജരാക്കേണ്ടതുണ്ട്. മധുര ആവണിയാപുരത്ത് ജനുവരി 15നും പാലമേട്ടില്‍ 16നും ജെല്ലിക്കെട്ട് നടക്കും. ഒരുപാട് വര്‍ഷങ്ങളായി ഗ്രാമീണ കായിക വിനോദങ്ങളില്‍ പലരും കാളകളാല്‍ കൊല്ലപ്പെടുകയോ അംഗവൈകല്യം സംഭവിക്കുകയോ ചെയ്തു. കാളകളും പലതരം ക്രൂരതകള്‍ക്കും പീഡനങ്ങള്‍ക്കും വിധേയരായിട്ടുണ്ട്. ലഹരി, കാളയുടെ കണ്ണില്‍ നാരങ്ങപിഴിഞ്ഞ് ആക്രമണകാരികളാക്കുക, കാളയുടെ വാലില്‍ വലിക്കുക, കുന്തം കൊണ്ട് കുത്തുക.

ഈ കായിക വിനോദത്തിന് സുപ്രീംകോടതി നേരത്തെ വിലക്കേര്‍പ്പെടുത്തിയിരുന്നു. എങ്കിലും സംഭവം മതപരവും സാംസ്‌കാരികവുമായ പാരമ്പര്യമാണെന്ന് വാദിച്ച് 2017 ല്‍ സംസ്ഥാനത്ത് വന്‍പ്രതിഷേധത്തെ തുടര്‍ന്ന് നിയമം ഭേദഗതി ചെയ്തു. കേസിപ്പോഴും സുപ്രീം കോടതിയില്‍ നടക്കുന്നുണ്ട്.

ജെല്ലിക്കെട്ട്: തമിഴ്നാട്ടില്‍ പരിക്കേറ്റത് നൂറിലധികം പേര്‍ക്ക്, ചിലരുടെ നില ഗുരുതരം

chandrika — Thu, 17 Jan 2019 07:15:37 +0000

ചെന്നൈ: പൊങ്കലിനോട് അനുബന്ധിച്ചു തമിഴ്നാട്ടിലെ മധുരയില്‍ ആണ് തമിഴ്നാട്ടില്‍ ജെല്ലിക്കെട്ട് ആഘോഷങ്ങള്‍ക്ക് ഔദ്യോഗിക തുടക്കമായത്. ആദ്യ ദിനം തന്നെ ജെല്ലിക്കെട്ടില്‍ പരുക്കേറ്റവരുടെ എണ്ണം നൂറു കടന്നു. ആവണിയാപുരത്തും പാലമേടുമായി നടന്ന ജെല്ലിക്കെട്ടുകളിലാണ് കാളകളുടെ കുത്തേറ്റ് നിരവധി പേര്‍ ചികിത്സ തേടിയത്. ഇതില്‍ ഇരുപത് പേരുടെ നില ഗുരുതരമാണ്.

കാളകളെ കീഴടക്കാനിറങ്ങി കുത്തേറ്റു വീണ നൂറോളം പേരാണ് ചികിത്സയില്‍. ഇതില്‍ കാളക്കൊമ്പുകള്‍ ശരീരത്തില്‍ ആഴത്തില്‍ കയറിയവരുടെ നില ഗുരുതരമായി തുടരുകയാണ്. പാലമേട് ജെല്ലിക്കെട്ടില്‍ മാത്രം അഞ്ഞൂറ് കാളകളാണ് അണിനിരന്നത്.

ഏറ്റവുമധികം കാളകളെ കീഴടക്കുന്ന വീരന് ഓംനി വാന്‍ ആയിരുന്നു സമ്മാനം. രണ്ടും മൂന്നും സ്ഥാനക്കാര്‍ക്ക് സ്വര്‍ണമാലയും. ഇവിടെ ബിബിഎ ബിരുദധാരിയായ തിരുനാവക്കരശ് എന്ന യുവാവാണ് ജെല്ലിക്കെട്ടില്‍ വിജയിയായത്.

സുരിയൂര്‍, തിരുച്ചിറപ്പള്ളി, ശിവഗംഗ എന്നിവടങ്ങളിലും ജെല്ലിക്കെട്ട് നടന്നു. 2014 സുപ്രീംകോടതി ജെല്ലിക്കെട്ട് നിരോധിച്ചിരുന്നു. തുടര്‍ന്ന് തമിഴ്നാട്ടില്‍ വ്യാപക പ്രതിഷേധങ്ങളാണ് നടന്നത്. ഇതോടെ കേന്ദ്രസര്‍ക്കാര്‍ ഓര്‍ഡിനന്‍സ് കൊണ്ടുവരുകയായിരുന്നു.

തമിഴ്‌നാട്ടില്‍ ജെല്ലിക്കട്ട് മത്സരത്തിനിടെ 22 പേര്‍ക്ക് പരിക്ക്

chandrika — Sun, 14 Jan 2018 11:32:57 +0000

ചെന്നൈ: തമിഴ്‌നാട്ടില്‍ ജെല്ലിക്കട്ട് മത്സരത്തിനിടെ 22 പേര്‍ക്ക് പരിക്കേറ്റു. മത്സരത്തില്‍ പങ്കെടുത്ത ആറ് പേര്‍ക്കും കാണാനെത്തിയ 16 പേര്‍ക്കുമാണ് പരിക്കേറ്റത്. തമിഴ്‌നാട്ടുകാരുടെ കൊയ്ത്തുത്സവമായ തൈപ്പൊങ്കല്‍ ദിനമായ ഇന്ന് നടന്ന ആവണിയപുരം ജെല്ലിക്കെട്ട്് മത്സരത്തിനിടെയാണ് അപകടമുണ്ടായത്. പരിക്കേറ്റവരെ ആസ്പത്രിയില്‍ പ്രവേശിപ്പിച്ചു.

മധുരയിലെ ഏറ്റവും പ്രസിദ്ധമായ മൂന്ന് ജെല്ലിക്കട്ട് മത്സരങ്ങളിലൊന്ന് നടക്കുന്നത് ആവണിയപുരത്താണ്. ഈ ജെല്ലിക്കെട്ട് നടക്കുന്നതിനിടെയാണ് പരിക്ക് പറ്റിയത്. എന്നാല്‍ ആരുടേയും പരിക്ക് ഗുരുതരമല്ലെന്നാണ് വിവരം. മൃഗക്ഷേമ ബോര്‍ഡിന്റെ കര്‍ശന നിയന്ത്രണങ്ങളോടെയാണ് ഇത്തവണ ജെല്ലിക്കട്ട് മത്സരങ്ങള്‍ നടക്കുന്നത്. മത്സരാര്‍ഥികള്‍ക്കായി വേദിയില്‍ ചികിത്സാസൗകര്യങ്ങളൊരുക്കിയിട്ടുണ്ട്. 500 പൊലീസുദ്യോഗസ്ഥരടക്കം കര്‍ശനസുരക്ഷാ സന്നാഹങ്ങളും ഏര്‍പ്പെടുത്തിയിട്ടുണ്ട്.