ഇത് തുടര്‍ച്ചയായ രണ്ടാം തവണയാണ് മേവാനിയെ വാദ്ഗാം മണ്ഡലത്തില്‍നിന്ന് തെരഞ്ഞെടുക്കപ്പെടുന്നത്. കഴിഞ്ഞ നിയമസഭാ തെരഞ്ഞെടുപ്പില്‍ കോണ്‍ഗ്രസ് പിന്തുണയോടെ സ്വതന്ത്രനായി മത്സരിച്ച് ജയിച്ച മേവാനി പിന്നീട് കോണ്‍ഗ്രസില്‍ ചേരുകയായിരുന്നു. സംസ്ഥാനത്തെ ദലിത് നേതാക്കളില്‍ ഒരാളാണ് ജിഗ്‌നേഷ് മേവാനി.

പ്രധാനമന്ത്രി എന്ന നിലയില്‍ മോദി വന്‍പരാജയമാണ്. വാചക കസര്‍ത്തു കൊണ്ട് പിടിച്ചു നില്‍ക്കുന്ന തന്ത്രമാണ് പ്രധാനമന്ത്രിയും പാര്‍ട്ടിയും ചെയ്യുന്നത്. മോദിയുടെ ജീവിതം ആസ്പതമാക്കിയുള്ള ചിത്രം തീര്‍ച്ചയായും ഒരു ബ്ലോക്ബസ്റ്റര്‍ ആയിരിക്കുമെന്നും, ഷാരൂഖ്‌സല്‍മാന്‍ആമിര്‍ ഖാന്‍മാരുടെ ചിത്രങ്ങള്‍ നേടുന്നതിനേക്കാള്‍ പണം ആ മോദി പടം നേടുമെന്നും മേവാനി പരിഹസിച്ചു.

2019-ലെ ലോക്‌സഭാ തെരഞ്ഞെടുപ്പില്‍ ബി.ജെ.പിയെ അധികാരത്തില്‍ നിന്ന് താഴെയിറക്കാന്‍ പ്രതിപക്ഷത്തിന്റെ വിശാലസഖ്യത്തിന് കോണ്‍ഗ്രസ് തയ്യാറായിരുന്നു. മായാവതിയേയും മമതയേയും ഉള്‍പ്പെടുത്തി ബി.ജെ.പിക്കെതിരെ നീങ്ങാനായിരുന്നു കോണ്‍ഗ്രസ് തീരുമാനം. എന്നാല്‍ ഇതില്‍ നിന്നും പിന്‍മാറിയിരിക്കുകയാണ് മായാവതി. മായാവതിയുടെ ഈ നീക്കത്തിന് പിന്നില്‍ സഹോദരന്‍ ആനന്ദ്കുമാറാണെന്നാണ് സംസാരം. അനധികൃത സ്വത്ത് സമ്പാദനക്കേസില്‍ ആദായനികുതി വകുപ്പ് 2017-ജനുവരിയില്‍ ആനന്ദ് കുമാറിനെതിരെ കേസെടുത്തിരുന്നു. 2007-14 കാലയളവില്‍ 1300 കോടിയുടെ ആസ്തിവര്‍ധന ഉണ്ടായെന്നും ഇത് സംശയാസ്പദമാണെന്നുമാണ് കേസ്. അതിനാല്‍ ബി.ജെ.പിക്കൊപ്പം മത്സരിച്ചാല്‍ സി.ബി.ഐ ഉള്‍പ്പെടെയുള്ള അന്വേഷണത്തിന് സാധ്യതയുണ്ടെന്ന് മനസ്സിലാക്കിയ മായാവതി സഖ്യത്തില്‍ നിന്ന് പിന്‍മാറുകയാണെന്നും അനുകൂലമായ രാഷ്ട്രീയ തീരുമാനം കൈക്കൊള്ളുകയാണെന്നുമാണ് കോണ്‍ഗ്രസ് ഉയര്‍ത്തുന്ന വാദം.

അതേസമയം, ശിവരാജ് ചൗഹാനേയും ദിഗ് വിജയ്‌സിങിനേയും വിമര്‍ശിച്ച മായാവതി സോണിയേയും രാഹുലിനേയും വിമര്‍ശിക്കാന്‍ തയ്യാറായിട്ടില്ലെന്നത് ശ്രദ്ധേയമാണ്. പ്രതിപക്ഷ ഐക്യത്തിനായുള്ള സോണിയാ ഗാന്ധിയുടെയും രാഹുലിന്റേയും സഖ്യശ്രമങ്ങള്‍ സത്യസന്ധമായിരിക്കാം. എന്നാല്‍ ചില കോണ്‍ഗ്രസ് നേതാക്കള്‍ ഇതിനെ അട്ടമിറിക്കാന്‍ ശ്രമിക്കുകയാണെന്ന് അവര്‍ പറഞ്ഞിരുന്നു. ബി.ജെ.പിയെ ഒറ്റക്ക് തോല്‍പ്പിക്കാമെന്ന അഹങ്കാരമാണ് കോണ്‍ഗ്രസിന്. ബി.ജെ.പിക്കൊപ്പം കോണ്‍ഗ്രസും തന്നെ കള്ളക്കേസുകളിലൂടെ ദ്രോഹിച്ചുവെന്നും മായാവതി ആരോപിച്ചു.

നേരത്തെ, മായാവതിക്കുനേരെ കോണ്‍ഗ്രസ് മുതിര്‍ന്ന നേതാവ് ദിഗ് വിജയ് സിങ് നടത്തിയ പരാമര്‍ശങ്ങള്‍ക്കെതിരെ രൂക്ഷ വിമര്‍ശനമാണ് മായാവതി നല്‍കിയത്. ദിഗ് വിജയ് സിങ് ബി.ജെ.പി ഏജന്റാണെന്ന് മാതാവതി തിരിച്ചടിച്ചിരുന്നു.

മായാവതിക്ക് കേന്ദ്രസര്‍ക്കാരിന്റെ ഭാഗത്ത് നിന്നും വലിയ സമ്മര്‍ദ്ദം നേരിടേണ്ടി വരുന്നുണ്ടെന്നും അതുകൊണ്ടാണ് സഖ്യത്തിന് കൂടാത്തതെന്നുമുള്ള ദിഗ് വിജയ് സിങിന്റെ പ്രസ്താവന അടിസ്ഥാനരഹിതമാണെന്നും അവര്‍ പറഞ്ഞു.

അതിനിടെ, പ്രതിപക്ഷഐക്യത്തിന് പിന്തുണ നല്‍കി കഴിഞ്ഞ ദിവസം ദളിത്‌നേതാവും ഗുജറാത്ത് എം.എല്‍.എയുമായ ജിഗ്‌നേഷ് മേവാനി രംഗത്തെത്തിയിരുന്നു. പശ്ചിമബംഗാള്‍ മുഖ്യമന്ത്രി മമതബാനര്‍ജിയുമായി മേവാനി കൂടിക്കാഴ്ച്ച നടത്തി. പ്രതിപക്ഷം ഒറ്റക്കെട്ടായി നിന്ന് ബി.ജെ.പിക്കെതിരെ പോരാടണമെന്ന് മേവാനി ആവശ്യപ്പെട്ടിരുന്നു.

രാജ്യത്ത് മോദിയുടെ കീഴില്‍ നടപ്പാക്കപ്പെടുന്നത് ഫാസിസ്റ്റ് ഭരണമാണ്. ഇതിനെതിരെ
പ്രതിപക്ഷകക്ഷികളൊന്നിച്ച് നിന്ന് പോരാടണമെന്ന് കൂടിക്കാഴ്ച്ചക്ക് ശേഷം മേവാനി പറഞ്ഞു.

നേരത്തെ, വരുന്ന ലോക്‌സഭാ തിരഞ്ഞെടുപ്പില്‍ ബി.ജെ.പിയെ നേരിടുന്നതിന് പ്രതിപക്ഷ നിരയില്‍ അഭിപ്രായ ഐക്യത്തില്‍ എത്തിയെന്ന് കോണ്‍ഗ്രസ് വ്യക്തമാക്കിയിരുന്നു. ഉത്തര്‍പ്രദേശ്, ബിഹാര്‍, മഹാരാഷ്ട്ര എന്നിവടങ്ങളില്‍ ബി.ജെ.പിക്കെതിരായി നിര്‍ണായകമായ ഇടപെടല്‍ നടത്താന്‍ പ്രതിപക്ഷ ഐക്യത്തിന് സാധിക്കുമെന്നാണ് കോണ്‍ഗ്രസ് പ്രതീക്ഷിക്കുന്നത്.

ലോക്‌സഭയില്‍ 80 അംഗങ്ങളുള്ള യു.പിയില്‍ സമാജ് വാദി പാര്‍ട്ടി, ബഹുജന്‍ സമാജ് പാര്‍ട്ടി എന്നിവയുമായി ധാരണയിലെത്തിയതായിട്ടുണ്ട്. തിരഞ്ഞെടുപ്പില്‍ സീറ്റ് പങ്കുവെക്കുന്ന കാര്യത്തില്‍ ചര്‍ച്ചകള്‍ നടന്നുവരികയാണെന്നും കോണ്‍ഗ്രസ് വൃത്തങ്ങള്‍ വ്യക്തമാക്കുന്നു.

രാജസ്ഥാന്‍, മധ്യപ്രദേശ്, മഹാരാഷ്ട്ര, പഞ്ചാബ്, ഛത്തീസ്ഗഢ് എന്നിവടങ്ങളിലും പ്രതിപക്ഷ കക്ഷികളുമായി ചേര്‍ന്ന് നേട്ടമുണ്ടാക്കാമെന്നാണ് കോണ്‍ഗ്രസ് പ്രതീക്ഷിക്കുന്നത്. ഓരോ സംസ്ഥാനങ്ങളിലും സമാന മനസ്‌കരുമായി സഖ്യത്തിലെത്തുന്നതിന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ നേതൃത്വത്തില്‍ നീക്കം നടന്നുവരികയാണെന്നാണ് റിപ്പോര്‍ട്ട്. പരമാവധി പ്രതിപക്ഷ കക്ഷികളെ അണിനിരത്തിക്കൊണ്ട് മോദിയെയും ബി.ജെ.പിയെയും നേരിടുക എന്നതാണ് കോണ്‍ഗ്രസ് ആദ്യ ഘട്ടത്തിലുള്ള ലക്ഷ്യം. നേതൃത്വനിരയിലേക്ക് ആര് എന്ന പ്രശ്‌നം രണ്ടാം ഘട്ടത്തില്‍ തിരഞ്ഞെടുപ്പു ഫലം കൂടി കണക്കിലെടുത്ത് പരിഹരിക്കാമെന്നാണ് കോണ്‍ഗ്രസ് കണക്കുകൂട്ടുന്നതെന്നാണ് റിപ്പോര്‍ട്ട്.

” ബി.ജെ.പിയുടെയും സംഘ്പരിവാറിന്റെയും ആളുകള്‍ കഴിഞ്ഞ രണ്ട് വര്‍ഷമായി ഉമര്‍ ഖാലിദിനെതിരെ വ്യാജ ആരോപണങ്ങളും ഗൂഢാലോചനയും നടത്തി, അദ്ദേഹത്തെ രാജ്യദ്രോഹിയാക്കി ചിത്രീകരിക്കാനും ഇല്ലാതാക്കാനും ശ്രമം നടത്തി വരികയായിരുന്നു. ഇതിന്റെ തുടര്‍ച്ചയാണ് അദ്ദേഹത്തിന് നേരെയുണ്ടായ വധശ്രമം. ഞാന്‍ ഉറച്ച് വിശ്വസിക്കുന്നു, മുമ്പ് ഗൗരി ലങ്കേഷിനെയും കല്‍ബുര്‍ഗിയേയും പന്‍സാരെയേയും ധബോല്‍ക്കറെയും എല്ലാം ഇല്ലാതാക്കിയ അതേ ആളുകള്‍ തന്നെയാണ് ഇന്നുണ്ടായ സംഭവത്തിന് പിന്നിലും”- ജിഗ്‌നേഷ് പറഞ്ഞു.

സംഭവത്തില്‍ പ്രധാനമന്ത്രി മൗനം വെടിയണമെന്നും ഉമറിന് ആവശ്യമായ സുരക്ഷ നല്‍കണമെന്നും അദ്ദേഹം ആവശ്യപ്പെട്ടു. ‘കഴിഞ്ഞ മാസം നാല് തവണയാണ് എനിക്ക് വധഭീഷണിയുണ്ടായത്. സമാനമായ സംഭവങ്ങള്‍ ഉമര്‍ ഖാലിദിനും ഷെഹ്‌ല റാഷിദിനും ഉണ്ടായിട്ടുണ്ട്. ഈയൊരു അവസ്ഥയിലും ഞങ്ങളില്‍ ആര്‍ക്കും തന്നെ ആവശ്യമായ സുരക്ഷ അധികൃതര്‍ ഒരുക്കി തന്നിട്ടില്ല. പ്രതികരിക്കുന്ന സമരം നയിക്കുന്ന ആളുകളെയെല്ലാം കൊന്ന് ഇല്ലാതാക്കാം എന്നാണ് ഈ സര്‍ക്കാരും സംഘ്പരിവാറും കരുതുന്നതെന്നും ജിഗ്‌നേഷ് മേവാനി കുറ്റപ്പെടുത്തി.

7255932433 എന്ന ഫോണ്‍ നമ്പറില്‍ നിന്നും തന്റെ നമ്പറിലേക്ക് വന്ന കോളില്‍ തന്നെ വെടിവച്ചു വീഴ്ത്തുമെന്ന് ഭീഷണിയുണ്ടായതായാണ് മേവാനിയുടെ ട്വീറ്റ്. ജിഗ്നേഷിന്റെ നമ്പര്‍ ഇപ്പോള്‍ ഉപയോഗിക്കുന്ന സഹപ്രവര്‍ത്തകന്‍ കൗശിക് പാര്‍മറിനാണ് കോള്‍ ലഭിച്ചതെന്നും, കൗശിക് ഇപ്പോള്‍ തന്നെ വിളിച്ച് കാര്യം അറിയിച്ചുവെന്നും മേവാനി പറയുന്നു.

നേരത്തെ ഭിമാ കൊറേഗാവ് കലാപത്തിലെ പ്രതി മനോഹര്‍ ഭിഡെ കുറ്റവിമുക്തനായി നടക്കുകയാണെന്നും കേസില്‍ ദളിത് അവകാശ പ്രവര്‍ത്തകരായ സുധീര്‍ ധവാലെ, അഡ്വ. സുരേന്ദ്ര ഗാഡ്ലിങ്ങ്, റോണ വില്‍സണ്‍ എന്നിവരെ മാത്രമേ പൊലീസ് അറസ്റ്റ് ചെയ്തുള്ളുവെന്നും ജിഗ്‌നേഷ് ആരോപിച്ചിരുന്നു.

ജനുവരി ഒന്നിന് നടന്ന ഭിമ കൊറേഗാവ് കലാപത്തില്‍ ബന്ധമാരോപിച്ച് അഞ്ച് ദളിത് പ്രവര്‍ത്തകരെ മൂന്ന് വ്യത്യസ്ത നഗരങ്ങളില്‍ നിന്നും ഇന്നാണ് പൊലീസ് അറസ്റ്റ് ചെയ്തത്, ഇതില്‍ പ്രതിഷേധിച്ചായിരുന്നു ജിഗ്‌നേഷിന്റെ പ്രസ്താവന.

അറസ്റ്റ് ചെയ്ത അഞ്ച് പേര്‍ക്കും പൊലീസ് യു.എ.പി.എ ചുമത്തിയിട്ടുണ്ട്.

In Rajkot flogging and murder case, we have decided to return the cheque issued to victims by Rupani gov. Mr. Rupani, We want justice not your 8 lakh. Announce that chargesheet will be field in 3 weeks and trial will be completed in 4 months or will return your cheque.

— Jignesh Mevani (@jigneshmevani80) May 23, 2018

‘രാജ്‌കോട്ടിലെ ദണ്ഡന കൊലപാതക കേസില്‍ ഇരകള്‍ക്ക് രൂപാണി സര്‍ക്കാര്‍ പ്രഖ്യാപിച്ച ചെക്ക് മടക്കിനല്‍കാന്‍ ഞങ്ങള്‍ തീരുമാനിച്ചിരിക്കുന്നു. ഞങ്ങള്‍ക്ക് എട്ട് ലക്ഷംരൂപയല്ല, നീതിയാണ് വേണ്ടത്. മൂന്നാഴ്ചക്കുള്ളില്‍ കുറ്റപത്രം സമര്‍പ്പിക്കുകയും നാലു മാസത്തിനകം വിചാരണ പൂര്‍ത്തിയാക്കുകയും ചെയ്യുക. ഇല്ലെങ്കില്‍ ഞങ്ങള്‍ ചെക്ക് തിരികെ നല്‍കും.’ മേവാനി ട്വിറ്ററില്‍ കുറിച്ചു.

ഗുജറാത്തിലെ ഷപാര്‍ വെരാവലില്‍ പാഴ്‌വസ്തുക്കള്‍ പെറുക്കി ഉപജീവനം കഴിച്ചിരുന്ന മുകേഷ് വാനിയയെ അഞ്ചുപേര്‍ ചേര്‍ന്നാണ് അടിച്ചുകൊന്നത്. മര്‍ദനമേറ്റ ഇദ്ദേഹത്തിന്റെ ഭാര്യക്ക് ഗുരുതര പരിക്കുണ്ട്. ക്രൂരമായ സംഭവത്തിന്റെ സി.സി.ടി.വി ഫുട്ടേജ് വൈറലായിട്ടുണ്ട്.

റഡാദിയ ഇന്‍ഡസ്ട്രീസിനു സമീപമുള്ള മാലിന്യത്തില്‍ തിരയുന്നതിനിടെ മുകേഷിനെയും ഭാര്യയെയും അമ്മായിയെയും അഞ്ച് തൊഴിലാളികള്‍ മോഷണം ആരോപിച്ച് പിടികൂടുകയും കെട്ടിയിടുകയുമായിരുന്നുവെന്ന് പൊലീസ് പറഞ്ഞു. ദണ്ഡുകള്‍ കൊണ്ട് ക്രൂരമായ അടിയേറ്റ മുകേഷിനെ ഭാര്യ ജയ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു.

തെരഞ്ഞെടുപ്പ് കഴിയും വരെ പൊതുയോഗങ്ങളില്‍ സംസാരിക്കാന്‍ പ്രകാശ് രാജിനെയും മേവാനിയെയും അനുവദിക്കരുതെന്നാവശ്യപ്പെട്ട് ബി.ജെ.പി തെരഞ്ഞെടുപ്പ് കമ്മീഷന് പരാതി നല്‍കിയിരുന്നു. മേവാനി ദളിതരുടെ രോഷം ആളിക്കത്തിക്കുകയും പ്രകാശ് രാജ് ജനങ്ങള്‍ക്കിടയില്‍ ഭിന്നത സൃഷ്ടിക്കുകയും ചെയ്യുന്നു എന്നാരോപിച്ചായിരുന്നു ഇത്. ഇതിനിടയിലാണ് ഇരുവരും സംസാരിക്കാനിരുന്ന ചിക്മംഗ്ലൂരിലെ പൊതുയോഗത്തിന് പൊലീസ് അനുമതി നിഷേധിച്ചത്.

രൂക്ഷമായ ഭാഷയിലാണ് ഇതിനോട് ഇരുവരും പ്രതികരിച്ചത്.
‘നമ്മെ നിശ്ശബ്ദമാക്കാനുള്ള മറ്റൊരു ബാലിശമായ ശ്രമമാണിത്. ചിക്മംഗ്ലൂരില്‍ സംസാരിക്കാന്‍ എന്നെയും പ്രകാശ് രാജിനെയും അനുവദിച്ചില്ല. കാരണം എന്താണെന്ന് കര്‍ണാടകയിലെ കാവിവല്‍ക്കരിക്കപ്പെട്ട പോലീസിന് നന്നായറിയാം. ഞങ്ങളെ അവഗണിക്കാന്‍ അവര്‍ക്ക് കഴിയുന്നില്ല എന്നതാണ് യാഥാര്‍ത്ഥ്യം. തൊഴില്‍ അടക്കമുള്ള വിഷയങ്ങള്‍ ശക്തമായി ഉന്നയിക്കുന്ന പൗരന്മാരെ ബി.ജെ.പിക്ക് പേടിയാണ്.’ മേവാനി ട്വിറ്ററില്‍ കുറിച്ചു.

താന്‍ പങ്കെടുത്ത പൊതുയോഗങ്ങളിലെ ചിത്രങ്ങള്‍ പങ്കുവെച്ചു കൊണ്ടാണ് പ്രകാശ് രാജ് പൊലീസ് നടപടിയോട് പ്രതികരിച്ചത്. ‘പൊതുമൈതാനങ്ങളില്‍ സംസാരിക്കുന്നതില്‍ നിന്ന് ഞങ്ങളെ തടയാന്‍ നിങ്ങള്‍ ശ്രമിച്ചേക്കാം. പക്ഷേ, തെരുവിലിറങ്ങി ജനങ്ങളിലേക്ക് ചെല്ലുന്നത് തടയാന്‍ കഴിയില്ലല്ലോ. നിങ്ങള്‍ക്ക് ഒരു വേദി നിഷേധിക്കാന്‍ കഴിയും. എന്റെ ശബ്ദം മൂടിക്കെട്ടാനാവില്ല.’ പ്രകാശ് രാജ് പ്രതികരിച്ചു.

‘എന്നെ നിശ്ശബ്ദനാക്കുന്നതില്‍ നിങ്ങള്‍ പരാജയപ്പെട്ടു. അതുകൊണ്ട് ഇപ്പോള്‍ ഞാന്‍ ജനങ്ങളിലേക്കെത്തുന്നത് തടയാന്‍ ശ്രമിക്കുകയാണ്. നിങ്ങള്‍ക്കൊരു നദിയെ തടഞ്ഞുനിര്‍ത്താനാവുമോ? തോല്‍വി നിങ്ങളെ തുറിച്ചു നോക്കുകയാണ്.’ പ്രകാശ് രാജ് ട്വീറ്റ് ചെയ്തു.

മോദിയുടെ സംസാരത്തെ കാര്യമായ വകവെക്കേണ്ടതില്ല. അദ്ദേഹം തൊഴിലില്ലായ്മ ഉള്‍പ്പെടെ രാജ്യത്തെ ജനങ്ങള്‍ നേരിടുന്ന പ്രശ്‌നങ്ങളെക്കുറിച്ചാണ് സംസാരിക്കേണ്ടത്. അധികാരത്തിലേറുന്നതിന് മുമ്പ് മോദി വാഗ്ദാനം ചെയ്തത് പ്രതിവര്‍ഷം രണ്ടു കോടി തൊഴിലവസരങ്ങള്‍ ഉണ്ടാക്കുമെന്നായിരുന്നു. ഇതുപ്രകാരം നാലു വര്‍ഷം കൊണ്ട് ഒമ്പതു കോടി തൊഴിലവസരം. എന്നാല്‍ വെറും ഒമ്പതു ലക്ഷം തൊഴിലവസരം പോലുമുണ്ടാക്കാന്‍ മോദിക്കായിട്ടില്ലെന്നും മേവാനി കുറ്റപ്പെടുത്തി.

കര്‍ഷകരുടെ ആത്മഹത്യ, കാര്‍ഷിക പ്രതിസന്ധി, ദളിത്-ന്യൂനപക്ഷങ്ങള്‍ക്കെതിരായ അതിക്രമം തുടങ്ങിയ വിഷയങ്ങളില്‍ പ്രധാനമന്ത്രി മൗനം പാലിക്കുകയാണ്. മോദിയുടെ ഒരു വാക്കു പോലും ഇതുവരെയും പാലിക്കപ്പെട്ടിട്ടില്ല. തൊഴിലവസരങ്ങള്‍ ഉണ്ടാക്കുന്നതിനു പകരം മോദി ഭരണഘടനയില്‍ ഭേദഗതികള്‍ വരുത്തി രസിക്കുകയാണ്. ചരക്കു സേവന നികുതി പ്രഖ്യാപിച്ചത് രാജ്യത്ത് തൊഴിലില്ലായ്മയുടെ തോത് വര്‍ധിപ്പിച്ചിരിക്കുകയാണ്. യുവജനത വരെ മോദിയുടെ മൗനത്തിനെതിരെ ശക്തമായി പ്രതികരിച്ചു തുടങ്ങിയിട്ടുണ്ട്. മോദിയുടെ വികസന മോഡല്‍ നാടിന്റെ നാശത്തിനാണെന്ന് സമീപകാല പ്രവര്‍ത്തനങ്ങള്‍ തെളിയിക്കുന്നതാണെന്നും ജിഗ്നേഷ് മേവാനി കുറ്റപ്പെടുത്തി.