JJayalalithaa – Chandrika Daily

ശശികല ക്യാമ്പില്‍ നിന്ന് രണ്ട് എംപിമാര്‍ കൂറുമാറി പനീര്‍ശെല്‍വത്തിനൊപ്പം

chandrika — Sat, 11 Feb 2017 07:01:34 +0000

ചെന്നൈ: തമിഴ്‌നാട് രാഷ്ട്രീയത്തില്‍ ആര് അവസാനവാക്കാകുമെന്ന് അറിയുന്നതിന് പോര് മുറുകുന്നതിനിടെ ശശികലയെ പിന്തുണച്ചിരുന്ന രണ്ട് എംപിമാര്‍ കൂടി പനീര്‍ശെല്‍വം ക്യാമ്പിലെത്തിയതായി വിവരം. കൃഷ്ണഗിരിയില്‍ നിന്നുള്ള അശോക് കുമാര്‍, നാമക്കലില്‍ നിന്നുള്ള പി.ആര്‍ സുന്ദരം എന്നിവരാണ് കാവല്‍ മുഖ്യമന്ത്രിക്ക് പിന്തുണ അറിയിച്ചത്. എഐഎഡിഎംകെ പുതുച്ചേരി ഘടകവും പനീര്‍ശെല്‍വം പക്ഷത്തേക്ക് നീങ്ങുന്നതായി റിപ്പോര്‍ട്ടുകളുണ്ട്. പനീര്‍ശെല്‍വത്തെ പിന്തുണക്കുന്നത് സംബന്ധിച്ച് തീരുമാനമെടുക്കുന്നതിന് പുതുച്ചേരി മേഖലയില്‍ നിന്നുള്ള എംഎല്‍എമാര്‍ യോഗം ചേര്‍ന്നതായും അറിയുന്നു. തീരുമാനം ഉടനുണ്ടാകുമെന്ന് പോണ്ടിച്ചേരി എംഎല്‍എ അന്‍പഴകന്‍ പറഞ്ഞു.

അതിനിടെ ശക്തിക്കാട്ടി ശശികലയെ വിറപ്പിക്കുന്നതിന് തന്നെ അനുകൂലിക്കുന്നവരോട് ചെന്നൈ മറീന ബീച്ചിലെത്താന്‍ സമൂഹമാധ്യമങ്ങളിലൂടെ പനീര്‍ശെല്‍വം ആഹ്വാനം ചെയ്തിട്ടുണ്ട്. ജയലളിതയുടെ മുന്‍ സെക്രട്ടറി വെങ്കിട്ടരാമന്റെ നേതൃത്വത്തില്‍ യുവാക്കളെ സംഘടിപ്പിക്കാനുള്ള ശ്രമത്തിന്റെ ഭാഗമാണിത്.

പനീര്‍ശെല്‍വത്തെ എഐഎഡിഎംകെ ട്രഷറര്‍ സ്ഥാനത്തു നിന്ന് നീക്കി

chandrika — Wed, 08 Feb 2017 03:50:37 +0000

ചെന്നൈ: ശശികലക്കെതിരെ ആഞ്ഞടിച്ച മുന്‍ മുഖ്യമന്ത്രി പനീര്‍ശെല്‍വത്തെ എഐഎഡിഎംകെ ട്രഷറര്‍ സ്ഥാനത്തു നിന്ന് പാര്‍ട്ടി നീക്കി. പനീര്‍ശെല്‍വത്തിന്റെ വെളിപ്പെടുത്തലുകള്‍ മാധ്യമങ്ങള്‍ തത്സമയം സംപ്രേക്ഷണം ചെയ്തതോടെയാണ് അടിയന്തരമായി പാര്‍ട്ടി നേതൃത്വം നടപടി സ്വീകരിച്ചത്. ലോക്‌സഭാ ഡെപ്യൂട്ടി സ്പീക്കര്‍ തമ്പിദുരൈ അടക്കമുള്ള നേതാക്കള്‍ രാത്രി വൈകിയും പോയസ് ഗാര്‍ഡനിലെത്തി ശശികലയുമായി കൂടിക്കാഴ്ച നടത്തി.

കൂടുതല്‍ എംഎല്‍എമാര്‍ പനീര്‍ശെല്‍വത്തിന്റെ ഒപ്പം പോകാതിരിക്കാനുള്ള തന്ത്രങ്ങളാണ് യോഗത്തില്‍ കൂടിയാലോചിച്ചതെന്നാണ് വിവരം. നിലവില്‍ 40 എംഎല്‍എമാര്‍ പനീര്‍ശെല്‍വത്തിനൊപ്പമുണ്ടെന്ന് ചില ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ മുഴുവന്‍ എംഎല്‍എമാരുടെയും പിന്തുണ ശശികലക്കുണ്ടെന്നാണ് അണ്ണാഡിഎംകെ വക്താവ് അപ്‌സര റെഡ്ഡി പറയുന്നത്. അതേസമയം, ജനങ്ങള്‍ക്കിടയില്‍ പനീര്‍ശെല്‍വത്തിനാണ് കൂടുതല്‍ പിന്തുണ. ശശികല ജയലളിതയുടെ തോഴി മാത്രമായിരുന്നു. രാഷ്ട്രീയത്തില്‍ അവര്‍ക്ക് മുന്‍പരിചയമില്ല. മുഖ്യമന്ത്രി സ്ഥാനത്തേക്ക് ശശികല യോഗ്യയല്ലെന്നും പനീര്‍ശെല്‍വത്തിന് പിന്തുണ പ്രഖ്യാപിച്ച് അദ്ദേഹത്തിന്റെ വസതിക്കു മുന്നിലെത്തിയ പ്രവര്‍ത്തകര്‍ പറഞ്ഞു.
അതിനിടെ ഇന്നു രാവിലെ പത്തു മണിക്ക് അണ്ണാഡിഎംകെ എംഎല്‍എമാര്‍ യോഗം ചേരുന്നുണ്ട്. യോഗത്തില്‍ പനീര്‍ശെല്‍വം മുഖ്യമന്ത്രി സ്ഥാനത്തു നിന്നുള്ള രാജി പിന്‍വലിച്ചേക്കുമെന്നും സൂചനയുണ്ട്.

ശശികല തമിഴ്‌നാട് മുഖ്യമന്ത്രി! നാളെ എംഎല്‍എമാരുടെ യോഗം

chandrika — Sat, 04 Feb 2017 08:38:55 +0000

ചന്നൈ: മുഖ്യമന്ത്രി ഒ.പനീര്‍ശെല്‍വത്തെ മാറ്റി ജയലളിതയുടെ ഉറ്റ തോഴിയും എഐഎഡിഎംകെ ജനറല്‍ സെക്രട്ടറിയുമായ ശശികല തമിഴ്‌നാടിന്റെ ഭരണമേറ്റെടുത്തേക്കുമെന്ന് റിപ്പോര്‍ട്ട്. ഇതിനുള്ള നീക്കങ്ങള്‍ ശശികല ആരംഭിച്ചതായി പാര്‍ട്ടി നേതൃത്വത്തോട് അടുത്ത വൃത്തങ്ങള്‍ പറയുന്നു. ചെന്നൈയില്‍ പാര്‍ട്ടി ആസ്ഥാനത്ത് നാളെ രാവിലെ പത്തു മണിക്ക് എംഎല്‍എമാരുടെ യോഗം വിളിച്ചിട്ടുണ്ട്. യോഗത്തില്‍ ശശികലയെ മുഖ്യമന്ത്രിയാക്കാനുള്ള തീരുമാനമുണ്ടായേക്കുമെന്നാണ് വിവരം. ഈ മാസം ഏഴിനോ എട്ടിനോ സത്യപ്രതിജ്ഞയുണ്ടായേക്കുമെന്നാണ് സൂചന. നേരത്തെ സ്വത്തു സമ്പാദനക്കേസില്‍ വിധി വന്നതിനു ശേഷം മുഖ്യമന്ത്രിയായാല്‍ മതിയെന്നായിരുന്നു ശശികലയുടെ തീരുമാനം. എന്നാല്‍ ജെല്ലിക്കെട്ട് സമരത്തില്‍ വിജയിച്ചതോടെ പനീര്‍ശെല്‍വത്തിന്റെ പ്രതിച്ഛായ ഉയര്‍ന്നിരുന്നു. ഇതോടെയാണ് അതിവേഗനീക്കത്തിന് ശശികല മുതിര്‍ന്നത്. ജയലളിതയുടെ വിശ്വസ്തയായിരുന്ന ഷീല ബാലകൃഷ്ണന്റെ പേര് മുഖ്യമന്ത്രി സ്ഥാനത്തേക്ക് ഉയര്‍ന്നു കേട്ടിരുന്നെങ്കിലും അവര്‍ കഴിഞ്ഞ ദിവസം തമിഴ്‌നാട് സര്‍ക്കാറിന്റെ ഉപദേഷ്ടാവ് സ്ഥാനത്തു നിന്ന് രാജിവെച്ചിരുന്നു. ഇത് ശശികലയുടെ ഭരണപരിഷ്‌കാരങ്ങളുടെ ഭാഗമാണെന്നാണ് പൊതുവെയുള്ള ആക്ഷേപം. 13 ഓര്‍ഗനൈസിങ് സെക്രട്ടറിമാര്‍ ഉള്‍പ്പെടെ 23 സീനിയര്‍ അംഗങ്ങള്‍ക്ക് ശശികല പാര്‍ട്ടിയുടെ പ്രധാന ചുമതല നല്‍കിയിരുന്നു. ഇതില്‍ ഒമ്പതു പേര്‍ മുന്‍ മന്ത്രിമാരാണ്. മുഖ്യമന്ത്രി സ്ഥാനത്തേക്ക് തനിക്കെതിരെ ഉയരാനുള്ള വിമത ശബ്ദങ്ങള്‍ ഇല്ലാതാക്കാനും പാര്‍ട്ടിയില്‍ സ്വാധീനം ശക്തിപ്പെടുത്താനുമാണ് ശശികലയുടെ പുത്തന്‍ പരിഷ്‌കാരങ്ങളെന്നാണ് വിവരം.

ജയലളിതയുടെ അപര പാര്‍ട്ടി പ്രഖ്യാപിച്ചു; പോസ്റ്റര്‍ തലൈവിയെ അനുകരിച്ച്

chandrika — Tue, 17 Jan 2017 08:09:24 +0000

ചെന്നൈ: ജയലളിതയുടെ സഹോദര പുത്രിയും അപരയുമായ ദീപ ജയകുമാര്‍ രാഷ്ട്രീയത്തിലേക്ക്. ചെന്നൈയില്‍ നടന്ന വാര്‍ത്താസമ്മേളനത്തില്‍ ദീപ പുതിയ പാര്‍ട്ടി രൂപീകരിക്കുന്നതായി പ്രഖ്യാപിച്ചു. ജനപിന്തുണ പിടിച്ചുപറ്റുന്നതിന് എംജിആറിന്റെ പ്രശസ്ത വാചകമായ എന്റെ രക്തത്തില്‍ രക്തമായ കൂടപ്പിറകളെ എന്നു പറഞ്ഞുകൊണ്ടായിരുന്നു ദീപ വാര്‍ത്താസമ്മേളനം ആരംഭിച്ചത്. ജയലളിത മരിച്ച് 40 ദിവസം പൂര്‍ത്തിയാകുന്നതിനിടെയാണ് ദീപയുടെ രാഷ്ട്രീയ പ്രവേശന പ്രഖ്യാപനം. ജയലളിതയെ അനുസ്മരിപ്പിക്കുന്ന രീതിയിലായിരുന്നു ദീപയുടെ നടപ്പും ചലനവുമെല്ലാം. കൂടാതെ ദീപയുടെ പോസ്റ്ററും ജയലളിതയെ ഓര്‍മിപ്പിക്കുന്നതായിരുന്നു. വസ്ത്രധാരണവും കൈവീശിക്കാണിക്കുന്നതുമെല്ലാം ജയലളിതയുടേതിനു സമാനമായിരുന്നു.

ജയലളിതയുടെ സ്ഥാനത്തേക്ക് മറ്റൊരാള്‍ വരുന്നത് തനിക്ക് അംഗീകരിക്കാനാവില്ലെന്നും തന്റെ രാഷ്ട്രീയ പ്രവേശനം പ്രവര്‍ത്തകരുടെ ആവശ്യമായിരുന്നുവെന്നും ദീപ പറഞ്ഞു. പാര്‍ട്ടിയുടെ ഭാവി പരിപാടികളെക്കുറിച്ച് ജയലളിതയുടെ ജന്മദിനമായ ഫെബ്രുവരി 24ന് പറയുമെന്നും അവര്‍ പറഞ്ഞു.
ജയലളിതയുടെ തോഴി ശശികല പാര്‍ട്ടിയുടെ നേതൃത്വമേറ്റെടുക്കുന്നതില്‍ അതൃപതിയുള്ള ഒരു വിഭാഗം നേതാക്കള്‍ നേരത്തെ ദീപയുമായി കൂടിക്കാഴ്ച നടത്തിയിരുന്നു.

ജയലളിതയുടെ വിയോഗത്തില്‍ മനംനൊന്ത് മരിച്ചത് 470 പേര്‍

chandrika — Sun, 11 Dec 2016 10:56:23 +0000

ചെന്നൈ: തമിഴ്‌നാട് മുന്‍ മുഖ്യമന്ത്രി ജയലളിതയുടെ വിയോഗത്തില്‍ മനംനൊന്ത് മരിച്ചവരുടെ എണ്ണം 470 കടന്നതായി അണ്ണാഡിഎംകെ നേതൃത്വം അറിയിച്ചു. 280 പേര്‍ തലൈവിയുടെ രോഗത്തിലും മരണത്തിലും മരിച്ചതായി സൂചിപ്പിച്ച് പാര്‍ട്ടി നേതൃത്വം ഇന്നലെ വാര്‍ത്താകുറിപ്പ് ഇറക്കിയിരുന്നു. എന്നാല്‍ ഇന്ന് പുറത്തിറക്കിയ വാര്‍ത്താകുറിപ്പിലാണ് 470 പേര്‍ മരിച്ചതായി അറിയിച്ചത്. ചെന്നൈ, വെല്ലൂര്‍, തിരുവല്ലൂര്‍, തിരുന്നാമാലൈ, കുഡല്ലൂര്‍, കൃഷ്ണഗിരി, ഈറോഡ്, തിരുപ്പൂര്‍ ജില്ലകളില്‍ നിന്നുള്ളവരാണ് മരിച്ചതെന്നാണ് പാര്‍ട്ടി വിശദീകരണം. അമ്മയുടെ മരണത്തില്‍ മനംനൊന്ത് മരിച്ചവരുടെ കുടുംബാംഗങ്ങള്‍ക്ക് മൂന്നു ലക്ഷം രൂപ വീതം നല്‍കുമെന്ന് പാര്‍ട്ടി നേതൃത്വം പ്രഖ്യാപിച്ചിരുന്നു. ആസ്പത്രിയില്‍ ചികിത്സയില്‍ കഴിയുന്നവര്‍ക്ക് 50,000 രൂപ വീതം സഹായധനം നല്‍കും.
ജയലളിതയുടെ മരണം സ്ഥിരീകരിച്ച സമയത്ത് തന്നെ മൂന്നു പേര്‍ ആത്മഹത്യ ചെയ്തതായി റിപ്പോര്‍ട്ട് വന്നിരുന്നു. പിന്നാലെ സംസ്‌കാര ചടങ്ങുകളില്‍ ഹൃദയാഘാതം സംഭവിച്ചും കുഴഞ്ഞുവീണും 77 പേരുടെ മരണവും റിപ്പോര്‍ട്ട് ചെയ്തിരുന്നു. ആരോഗ്യനില വഷളായതിനെത്തുടര്‍ന്ന് സെപ്തംബര്‍ 22നാണ് ജയലളിതയെ ആസ്പത്രിയില്‍ പ്രവേശിപ്പിച്ചത്.

ശശികലക്കു വെല്ലുവിളിയായി ജയയുടെ ‘അപര’; പാര്‍ട്ടിയെ നയിക്കാന്‍ തയാര്‍

chandrika — Sun, 11 Dec 2016 07:21:37 +0000

ചെന്നൈ: മുന്‍ തമിഴ്‌നാട് മുഖ്യമന്ത്രി ജയലളിതയുടെ മരണത്തിനു പിന്നാലെ പ്രതിസന്ധിയിലായ അണ്ണാഡിഎംകെയുടെ നേതൃത്വം സംബന്ധിച്ച് തര്‍ക്കം രൂക്ഷമാകുന്നു. നേതൃസ്ഥാനം ലക്ഷ്യമിടുന്ന ഉറ്റതോഴിയും തമിഴ്‌നാടിന്റെ ചിന്നമ്മയുമായ ശശികലക്ക് വെല്ലുവിളിയായി ജയയുടെ സഹോദരപുത്രി ദീപ രംഗത്തെത്തിയത് പുതിയ ചര്‍ച്ചകള്‍ക്ക് വഴിവെക്കുന്നത്. ജനങ്ങള്‍ ആവശ്യപ്പെട്ടാല്‍ താന്‍ രാഷ്ട്രീയത്തിലിറങ്ങാന്‍ തയാറാണെന്നും പാര്‍ട്ടി നേതൃത്വം ഏറ്റെടുക്കാനുള്ള ശശികലയുടെ ശ്രമം ജനാധിപത്യ വിരുദ്ധമാണെന്നും ദീപ പറഞ്ഞു. അധികാരം പിടിച്ചടക്കാനുള്ള ശശികലയുടെ ശ്രമങ്ങളെ ജനങ്ങള്‍ പ്രോത്സാഹിപ്പിക്കില്ല. ജനങ്ങളാണ് പാര്‍ട്ടിയെ ആരു നയിക്കണമെന്ന് തീരുമാനിക്കേണ്ടത്. ജനാഭിപ്രായം അറിഞ്ഞശേഷം മാത്രമേ പാര്‍ട്ടി നേതൃത്വം ഭാവി നടപടികള്‍ കൈക്കൊള്ളാന്‍ സാധിക്കൂവെന്നും ദീപ പറഞ്ഞു. പ്രമുഖ ദേശീയ മാധ്യമത്തിനു നല്‍കിയ അഭിമുഖത്തിലാണ് ദീപ രാഷ്ട്രീയ പ്രവേശനത്തിലുള്ള സന്നദ്ധത അറിയിച്ചത്.

ജയലളിതയുടെ ഏക സഹോദരന്‍ ജയകുമാറിന്റെ മകളാണ് ദീപ. ജീവിച്ചിരുന്ന കാലത്ത് താല്‍പര്യമില്ലാത്ത കാലത്ത് ജയലളിത പല തവണ പാര്‍ട്ടിയില്‍ നിന്നും പോയസ് ഗാര്‍ഡനില്‍ നിന്നും പുറത്താക്കിയ വ്യക്തിയാണ് ശശികല. അവരെ തന്നെ രാഷ്ട്രീയ പിന്‍ഗാമിയാക്കാന്‍ ജയലളിത ആഗ്രഹിച്ചിരുന്നുവെന്ന് പറയുന്നതിലെ പൊരുത്തക്കേട് വ്യക്തമാണെന്നും ദീപ പറഞ്ഞു.

പാര്‍ട്ടിയോടും സര്‍ക്കാറിനോടും അടുക്കരുതെന്ന് ബന്ധുക്കളോട് ശശികല

chandrika — Sat, 10 Dec 2016 06:05:30 +0000

ചെന്നൈ: പാര്‍ട്ടിയില്‍ നിന്നും സര്‍ക്കാറില്‍ നിന്നും അകന്നു നില്‍ക്കണമെന്ന് അന്തരിച്ച തമിഴ്‌നാട് മുഖ്യമന്ത്രി ജയലളിതയുടെ ഉറ്റതോഴിയായ ശശികല ബന്ധുക്കള്‍ക്ക് നിര്‍ദേശം നല്‍കി. ജയലളിതയുടെ വസതിയായ പോയസ് ഗാര്‍ഡനില്‍ കുടുംബാംഗങ്ങളുമായി നടത്തിയ കൂടിക്കാഴ്ചയിലാണ് ശശികല താക്കീത് നല്‍കിയത്. സഹോദരങ്ങളും അവരുടെ മക്കളുമെല്ലാം കഴിഞ്ഞ ദിവസം നടന്ന കൂടിക്കാഴ്ച പങ്കെടുത്തതായാണ് വിവരം. ജയലളിതയുടെ മരണശേഷം എഐഎഡിഎംകെയുടെ നേതൃത്വപദവിയിലേക്ക് ശശികല എത്തുമെന്ന അഭ്യൂഹങ്ങള്‍ക്കിടെയാണ് ബന്ധുക്കള്‍ക്ക് ശശികല മുന്നറിയിപ്പ് നല്‍കിയത്. കുടുംബാംഗങ്ങള്‍ക്ക് താക്കീത് നല്‍കിയതിനൊപ്പം മന്ത്രിമാരോടും പ്രവര്‍ത്തകരോടും അവരുടെ നിര്‍ദേശങ്ങള്‍ അനുസരിക്കരുതെന്ന നിര്‍ദേശവും ശശികല നല്‍കിയിട്ടുണ്ടെന്നാണ് വിവരം.

ശശികലയും ബന്ധുക്കളും നിലവില്‍ പോയസ് ഗാര്‍ഡനിലാണുള്ളത്. ബന്ധുക്കള്‍ പോയശേഷം ശശികലയുടെ സഹോദരഭാര്യ ഇളവരശി പോയസ് ഗാര്‍ഡനില്‍ തുടരുമെന്നാണ് സൂചന. അതേസമയം ജയലളിതയുടെ മരണത്തോടെ പാര്‍ട്ടിയിലും സര്‍ക്കാറിലും പിടിമുറുക്കിയ ശശികലക്കെതിരെ അണികള്‍ക്കിടയിലും നേതാക്കള്‍ക്കിടയിലും അസ്വാരസ്യങ്ങള്‍ക്കിടയാക്കിയിട്ടുണ്ട്.

ജയലളിതയുടെ സ്വര്‍ണാഭരണങ്ങളും പട്ടുസാരികളും സുരക്ഷിതം

chandrika — Sat, 10 Dec 2016 02:27:27 +0000

ബംഗളൂരു: അന്തരിച്ച തമിഴ്‌നാട് മുഖ്യമന്ത്രി ജയലളിതയുടെ സ്വര്‍ണാഭരണങ്ങളും പട്ടുസാരികളും സുരക്ഷിതമാണെന്ന് അധികൃതര്‍. അനധികൃത സ്വത്ത് സമ്പാദനക്കേസില്‍ ജയലളിതയില്‍ നിന്ന് പിടിച്ചെടുത്ത ആഭരണങ്ങളും മറ്റും ബംഗളൂരു കോടതിയിലാണ് ഇപ്പോള്‍. കേസില്‍ സുപ്രീംകോടതിയുടെ ഉത്തരവ് വന്നതിനു ശേഷമായിരിക്കും ഇതുസംബന്ധിച്ച തുടര്‍നടപടി. പരമോന്നത നീതിപീഠത്തില്‍ നിന്ന് അനുകൂല ഉത്തരവ് പ്രതീക്ഷിക്കുന്നതായി എഐഎഡിഎംകെ നേതൃത്വം അറിയിച്ചു. ആഭരണം വിട്ടുകിട്ടിയാല്‍ ചെന്നൈയില്‍ മ്യൂസിയമുണ്ടാക്കാനാണ് അനുയായികള്‍ ശ്രമിക്കുന്നത്.

21.28 കിലോഗ്രാം സ്വര്‍ണാഭരണമാണ് ജയലളിതയുടെ പക്കലുണ്ടായിരുന്നത്. വെള്ളിയാകട്ടെ 1250 കിലോഗ്രാമും. രണ്ടു കോടി രൂപയുടെ വജ്രാഭരണങ്ങളും ജയലളിതയുടെ കൈവശമുണ്ട്. ഇതുകൂടാതെ വെള്ളിവാള്‍, പതിനായിരത്തിലധികം പട്ടുസാരികള്‍, 750 ജോഡി ചെരിപ്പുകള്‍, 50 വൈന്‍ ഗ്ലാസുകള്‍ എന്നിവയാണ് ആദായനികുതി ഉദ്യോഗസ്ഥര്‍ ജയലളിതയില്‍ നിന്ന് പിടിച്ചെടുത്തത്.

നേരത്തെ ആര്‍ബിഐയുടെ ചെന്നൈയിലെ മന്ദിരത്തിലായിരുന്നു ജയലളിതയുടെ സ്വര്‍ണവും മറ്റും സൂക്ഷിച്ചിരുന്നത്. എന്നാല്‍ ഇവയുടെ നിയന്ത്രണം കോടതി ഏറ്റെടുക്കണമെന്നാവശ്യപ്പെട്ട് പ്രതിപക്ഷം ശക്തമായ പ്രതിഷേധമയുര്‍ത്തിയതിനു പിന്നാലെയാണ് ഇവ ബംഗളൂരുവിലേക്ക് മാറ്റിയത്. അതേസമയം, മറ്റു പ്രതികള്‍ കൂടി കേസില്‍ ഉള്ളതിനാല്‍ വിചാരണ തുടരുമെന്ന് സുപ്രീംകോടതി പബ്ലിക് പ്രോസിക്യൂട്ടര്‍ ബി.വി ആചാര്യ പറഞ്ഞു.

ജയലളിതയുടെ മരണം: അന്വേഷണം ആവശ്യപ്പെട്ട് പ്രധാനമന്ത്രിയോട് നടി ഗൗതമി

chandrika — Fri, 09 Dec 2016 04:23:23 +0000

ചെന്നൈ: അന്തരിച്ച തമിഴ്‌നാട് മുഖ്യമന്ത്രി ജയലളിതയുടെ മരണത്തില്‍ പിന്നിലെ ദുരൂഹത പുറത്തുകൊണ്ടുവരണമെന്നാവശ്യപ്പെട്ട് നടി ഗൗതമി രംഗത്ത്. തന്റെ ഔദ്യോഗിക ബ്ലോഗിലാണ് നടി ഇക്കാര്യമാവശ്യപ്പെട്ടത്. ട്രാജഡി ആന്റ് അണ്‍ആന്‍സേര്‍ഡ് ക്വസ്‌റ്റൈന്‍സ് എന്ന തലക്കെട്ടില്‍ പ്രധാനമന്ത്രി നരേന്ദ്രമോദിയെ അഭിസംബോധന ചെയ്താണ് ബ്ലോഗ് സന്ദേശം. ജയലളിതയുടെ ചികിത്സയും മരണവുമായി ബന്ധപ്പെട്ട ചോദ്യങ്ങള്‍ക്ക് ഉത്തരം കണ്ടെത്തണമെന്നാണ് താരത്തിന്റെ ആവശ്യം. ജയലളിതയുടെ മരണത്തിലെ ദുരൂഹത തള്ളികളയാനാവില്ല. അവരെ ആസ്പത്രിയില്‍ പ്രവേശിപ്പിച്ചതു മുതല്‍ ചികിത്സയും രോഗം കുറഞ്ഞതായുള്ള വാര്‍ത്തയും അപ്രതീക്ഷിത മരണവുമൊക്കെ സംശയാസ്പദമാണ്. ചികിത്സയിലിരിക്കെ ജയലളിതയെ കാണാന്‍ ആരെയും അനുവദിക്കാത്തതില്‍ ദുരൂഹത ഏറെയാണ്. തമിഴ്‌നാടിന്റെ പ്രിയപ്പെട്ട ‘അമ്മ’യെ ഇത്രയധികം രഹസ്യസ്വഭാവത്തോടെ മറ്റുള്ളവരില്‍ നിന്ന് അക്റ്റി നിര്‍ത്തിയത് എന്തിനു വേണ്ടിയായിരുന്നുവെന്ന് ഗൗതമി ചോദിക്കുന്നു.

രാജ്യത്തിന്റെ വിവിധ ഭാഗങ്ങളില്‍ നിന്ന് പ്രമുഖര്‍ അവരെ കാണാന്‍ എത്തിയെങ്കിലും ഡോക്ടര്‍മാരുടെ സംസാരിച്ച് മടങ്ങേണ്ട അവസ്ഥയാണുണ്ടായത്. ഇതില്‍ ഏറെ വേദനാജനകമാണ്. ജനങ്ങള്‍ തെരഞ്ഞെടുത്ത നേതാവിനെ സംബന്ധിച്ച കാര്യങ്ങള്‍ അറിയാന്‍ ജനങ്ങള്‍ക്ക് അവകാശമുണ്ടെന്നും ഗൗതമി ബ്ലോഗില്‍ കുറിച്ചു. തമിഴ്‌നാടിനെ നിയന്ത്രിച്ച, തമിഴ്ജനതക്കു വേണ്ടി ജീവിച്ച ജയലളിതയെന്ന നേതാവിനുണ്ടായ ഇത്തരമൊരു ദുരന്തത്തിനു പിന്നിലെ കാരണം ചോദ്യംചെയ്യപ്പെടാതെ പോകരുതെന്നും പ്രധാനമന്ത്രി അടിയന്തര നടപടിയെടുക്കുമെന്നാണ് പ്രതീക്ഷിക്കുന്നതെന്നും ഗൗതമി പറയുന്നു.

ഔദ്യോഗിക ബ്ലോഗിലൂടെയാണ് സുപ്രധാന കാര്യങ്ങളെല്ലാം ജനങ്ങളുമായി പങ്കുവെക്കാറുള്ളത്. കമല്‍ഹാസനുമായി വര്‍ഷങ്ങള്‍ നീണ്ട ലിവിങ് ടുഗേതര്‍ റിലേഷന്‍ അവസാനിപ്പിക്കുന്നതായും ഗൗതമി ബ്ലോഗിലൂടെയാണ് അറിയിച്ചത്.

Tragedy tht musnt b deepnd by unanswrd Q’s Hon PMsir-a citizen’s request @narendramodi @rajnathsingh @MVenkaiahNaidu https://t.co/TFTlaVvtju

— Gautami (@gautamitads) December 8, 2016

Read blog:

December 8, 2016

TRAGEDY AND UNANSWERED QUESTIONS

The Honourable Prime Minister of India,

Shri Narendra Modiji

Dear Sir,

I write this letter to you today as an ordinary citizen of India. I am a homemaker, a mother and a working woman. My concerns and priorities in my life are those that are shared by many of my fellow countrymen, primarily to build a safe and nurturing environment for my family that will allow them to live a safe and fulfilled life.

I am also one among the crores who are mourning the recent shocking demise of our late Chief Minister, Selvi Dr. J Jayalalithaa ji. She was a towering personality in Indian politics and was a great inspiration for women from all walks of life. Her leadership of Tamil Nadu, over several terms in office, has brought us to the forefront in many spheres of development. Selvi Dr. Jayalalithaa ji’s undeniable strength and determination to persevere against all odds are a lasting legacy that will continue to inspire individuals of every gender to persist in pursuit of their dreams in life.

Her demise is all the more tragic and unsettling because of the circumstances over the past few months and the sheer volume of unanswered questions about our late Chief Minister’s hospitalisation, treatment, reported recovery and very sudden passing. There has been a near total blanketing of information regarding these matters. Nobody had been allowed access to her and many dignitaries who visited her with deep concern were denied an opportunity to convey their wishes in person. Why this secrecy and isolation of a beloved public leader and the head of the Tamil Nadu government? What/whose authority restricted access to the late Chief Minister? Who were the concerned persons who were making the decisions about Selvi Dr. J Jayalalithaa ji’s treatment and care when her health was apparently in such a delicate state? And who is responsible for these answers to the people? These and many other burning questions are being asked by the people of Tamil Nadu and I echo their voice in bringing them to your ears, sir.

No doubt some might say that it is a moot point because it has happened as it has, but that, sir, is precisely my fear. I ask these questions now because it is a primary concern and right of every citizen of India to be aware of and informed about their democratically elected leaders. To be aware of their state of health and ability to perform their duties for the larger good of the people. To be concerned for the wellness and comfort of a beloved leader of the masses. And the fact that a tragedy of such tremendous scale should not go unquestioned and definitely, not unanswered, under any circumstances. If this be the case with a public figure of this magnitude, then what chance does the common citizen of India have when he fights for his personal rights? The confidence of every Indian in the democratic process that makes our nation so great is precious and must be protected against all odds.

I am writing to you now, sir, with the complete confidence that you share my anxiety and determination to uphold the rights of every Indian to be aware and informed of any factor that impacts our day to day life. You have proven yourself in many ways to be a leader who is unafraid to stand up for the rights of the common man and I am confident that you will heed the call of your fellow countrymen.

With my deepest respects and trust

Jai Hind!

Gautami Tadimalla

08.12.2016

4/472, Kapaleeswarar Nagar

Neelankarai, Chennai 600041

+917338713979

ജയലളിതയുടെ പിന്‍ഗാമി അജിത്ത്…! അഭ്യൂഹങ്ങള്‍ക്കിടെ താരം ചെന്നൈയിലെത്തി

chandrika — Wed, 07 Dec 2016 07:12:42 +0000

ചെന്നൈ: അന്തരിച്ച തമിഴ്‌നാട് മുഖ്യമന്ത്രി ജയലളിതയുടെ പിന്‍ഗാമി ആരായിരിക്കുമെന്ന ആശങ്കകള്‍ക്കിടെ തമിഴ് സൂപ്പര്‍ താരം അജിത്ത് സിനിമ ചിത്രീകരണം വെട്ടിചുരുക്കി ചെന്നൈയിലെത്തി. ബള്‍ഗേറിയയില്‍ ഷൂട്ടിങ് തിരക്കിലായതിനാല്‍ ജയലളിതയുടെ സംസ്‌കാരചടങ്ങുകള്‍ക്ക് അജിത്ത് എത്തിയിരുന്നില്ല. എന്നാല്‍ ജയലളിതയുടെ രാഷ്ട്രീയ പിന്‍ഗാമിയായി അജിത്തിനെ പ്രഖ്യാപിച്ചേക്കുമെന്ന വാര്‍ത്ത പരക്കുന്നതിനിടെയാണ് താരം ഷൂട്ടിങ് വെട്ടിചുരുക്കി നാട്ടില്‍ തിരിച്ചെത്തിയത്. ഭാര്യ ശാലിനിക്കൊപ്പമെത്തിയ അജിത്ത് ജയലളിതയുടെ മൃതദേഹം അടക്കം ചെയ്ത സ്ഥലത്തെത്തി ആദരാഞ്ജലി അര്‍പ്പിച്ചു.
ജയലളിതയുടെ അഭാവത്തിലെല്ലാം അണ്ണാഡിഎംകെയുടെ നേതൃത്വം ഏറ്റെടുത്ത പനീര്‍ശെല്‍വം നിലവില്‍ മുഖ്യമന്ത്രിയായി സത്യപ്രതിജ്ഞ ചെയ്‌തെങ്കിലും ഇത് താല്‍കാലിക മാറ്റമായിരിക്കുമെന്നാണ് തമിഴകം വിലയിരുത്തുന്നത്.

രാഷ്ട്രീയ പൊതുവേദികളില്‍ അധികം പ്രത്യക്ഷപ്പെട്ടിട്ടില്ലാത്ത അജിത്ത് അണികള്‍ക്കിടയിലും പ്രിയങ്കരനാണ്. എന്നാല്‍ അമ്മയുടെ സ്ഥാനത്തേക്ക്, പെട്ടെന്നുള്ള രാഷ്ട്രീയ പ്രവേശനത്തില്‍ അജിത്ത് മുഖ്യമന്ത്രിയാകാന്‍ തയാറാകില്ലെന്നാണ് വിവരം. ജയയുടെ പിന്‍ഗാമിയായി തോഴി ശശികലയുടെ പേരും ഉയര്‍ന്നു വരുന്നുണ്ട്. ജയലളിതയോട് വിശ്വാസവഞ്ചന നടത്തിയതിന്റെ പേരില്‍ പാര്‍ട്ടിയില്‍ നിന്നും പോയസ് ഗാര്‍ഡിനില്‍ നിന്നും പുറത്താക്കപ്പെട്ട ശശികലക്ക് അണികള്‍ക്കിടയില്‍ അത്ര സ്വീകാര്യതയില്ലെന്നതാണ് പിന്‍ഗാമി സ്ഥാനത്തേക്ക് അജിത്തിന്റെ പേര് ഉയരുന്നത്.