ജെ.എന്‍.യു ടീച്ചേഴ്‌സ് അസോസിയേഷന്‍ സംഘടിപ്പിച്ച സമാധാനപരമായ മാര്‍ച്ചില്‍ പങ്കെടുത്തതിന് കുറ്റപത്രം നല്‍കപ്പെട്ട 48 അധ്യാപകരില്‍ പെട്ട ഒരാളാണെങ്കിലും ഈ കുറിപ്പ് സര്‍വകലാശാലയുടെ ചട്ട-നിയമ വ്യാഖ്യാനങ്ങളുടെ അര്‍ത്ഥവിചാരങ്ങളെക്കുറിച്ചോ അതല്ലെങ്കില്‍ നിലവിലുള്ള അച്ചടക്ക-ശിക്ഷാസംവിധാനത്തെ സംബന്ധിച്ചോ അല്ല. മറിച്ച്, എന്റെ തികച്ചും സ്വകാര്യമായ വേദനയെയും നഷ്ടത്തെയും അവയുടെ വസ്തുനിഷ്ഠമായ കാരണങ്ങളെയുംകുറിച്ച് മാത്രമാണ്. ഒരു സ്വകാര്യാനുഭവം പങ്കുവെച്ച്‌കൊണ്ട് തന്നെ തുടങ്ങാം. കഴിഞ്ഞദിവസം ഒരു സുഹൃത്ത് തന്റെ മകള്‍ക്ക് ബിരുദാനന്തര ബിരുദ പഠനത്തിന് ജെ.എന്‍.യു പരിഗണിച്ചുകൂടെ എന്നാരാഞ്ഞപ്പോള്‍ നിസ്സന്ദേഹമായാണ് മറുപടി നല്‍കിയത്, ‘വേണ്ട, അവിടെ വേണ്ട’. ഇന്നലെവരെ എന്റെ ആവേശമായിരുന്ന ഈ സര്‍വകലാശാലയെക്കുറിച്ച് ഞാനിങ്ങനെ പറയുന്നത് ഇതാദ്യമായാണ്. മുമ്പൊക്കെ ഞാന്‍ ജനങ്ങളോട് ജെ.എന്‍.യുവിനെക്കുറിച്ച് വാചാലനായിരുന്നത് ഇപ്രകാരമായിരുന്നു: ജെ. എന്‍.യു ഒരു സ്വപ്‌നവും പദ്ധതിയും പരീക്ഷണവുമാണ്-മികവും സമത്വവും ഇഴചേരുന്ന, വിമര്‍ശനചിന്തകളുടെ വളര്‍ച്ചക്കും വിമോചനാശയങ്ങള്‍ക്കും ബദല്‍ ജീവിത പ്രയോഗങ്ങള്‍ക്കും തികച്ചും അനുകൂലമായ ഒരു സര്‍ഗാത്മക ഇടം.
പക്ഷേ, ഇന്നെനിക്ക് ഈ വിശ്വാസങ്ങളെല്ലാം നഷ്ടപ്പെട്ടിരിക്കുന്നു. ജീവിതത്തിന്റെ നിഖില മേഖലകളിലേക്കും ഭയത്തിന്റെ മന:ശാസ്ത്രമോ അതല്ലെങ്കില്‍ ഭീഷണിപ്പെടുത്തുന്ന സര്‍ക്കുലറുകളോ കടന്നാക്രമണം നടത്തുന്ന ഒരു സര്‍വകലാശാലയിലേക്ക് തന്റെ മകളെ പറഞ്ഞു വിടാന്‍ എനിക്കെങ്ങിനെ എന്റെ സുഹൃത്തിനോടു പറയാന്‍ കഴിയും? തികച്ചും ഏകമാനമായ അക്കാദമിക് കൗണ്‍ സില്‍ യോഗത്തില്‍ വിയോജിപ്പിന്റെ ശബ്ദമുള മുതിര്‍ന്ന പ്രൊഫസര്‍ അപമാനിക്കപ്പെടുകയും മറ്റുള്ളവര്‍ മൗനം പാലിക്കുകയും ചെയ്യുമ്പോള്‍ അതൊരു വ്യക്തമായ സന്ദേശം നല്‍കുന്നുണ്ട്: ‘കൃത്യനിര്‍വഹണത്തിന് ചുമതലപ്പെട്ട അധികാരികളെ’ ചോദ്യം ചെയ്യരുത്. അനുഭവസമ്പത്തുള്ള ധാരാളം സീനിയര്‍ പ്രഫസര്‍മാര്‍ ഉണ്ടായിരിക്കെ, ഒട്ടും അനുഭവ പരിജ്ഞാനമില്ലാത്ത ജൂനിയര്‍ അധ്യാപകന്‍ സര്‍വകലാശാലയുടെ സാമൂഹ്യ ശാസ്ത്ര വിഭാഗത്തില്‍ ഡീനായി അവരോധിതനാവുമ്പോള്‍, സ്ഥാപന നിയമങ്ങള്‍ക്കോ, അക്കാദമിക കീഴ്‌വഴക്കങ്ങള്‍ക്കോ ഇവിടെ യാതൊരു വിലയും കല്‍പിക്കപ്പെടുന്നില്ലെന്നും, നടപ്പാക്കപ്പെടുന്നത് മേല്‍പറഞ്ഞ അധികാരികളുടെ ‘വിവേചനാധികാരം’ മാത്രമാണെന്നും എളുപ്പത്തില്‍ മനസിലാക്കാന്‍ കഴിയും. അതേപോലെ, ലാവണ്യ ധന്യവും രാഷ്ട്രീയ മാനങ്ങളുമുള്ള പോസ്റ്ററുകള്‍ ചുവരുകളില്‍നിന്ന് നീക്കംചെയ്യപ്പെടുമ്പോള്‍ വിദ്യാര്‍ത്ഥികളോടത് ഓര്‍മപ്പെടുത്തുന്നത് അവരുടെ ‘പരിധി’കളെക്കുറിച്ച് എപ്പോഴും ബോധവാന്‍മാരായിരിക്കാന്‍ വേണ്ടിയാണ്.
തീര്‍ത്തും സമാധാനപരമായ മാര്‍ച്ചില്‍ പങ്കെടുത്ത നൂറ്റമ്പതോളം അധ്യാപകരില്‍ 48 പേരെ മാത്രം തിരഞ്ഞുപിടിച്ച് കുറ്റപത്രം സമര്‍പ്പിക്കുമ്പോഴുള്ള തന്ത്രവും വളരെ വ്യക്തം: ചെറുകഷ്ണങ്ങളാക്കി ഭിന്നിപ്പിച്ച് അധ്യാപകരുടെ ആത്മവീര്യം കെടുത്തുക. ഇത്തരം വിഷലിപ്തമായ ഒരന്തരീക്ഷത്തില്‍ ഈ സര്‍വകലാശാലയില്‍ നടക്കുന്ന എല്ലാംതന്നെ കേവലം ഉപരിപ്ലവവും കപടവും അര്‍ത്ഥശൂന്യവുമായിമാറുന്നു. അത് ഗാന്ധിജിയുടെ നിയമ ലംഘന പ്രസ്ഥാനത്തെക്കുറിച്ചുള്ള പ്രഭാഷണമാവട്ടെ, അതല്ലെങ്കില്‍ ഫൂക്കോയുടെ ‘അച്ചടക്കവും ശിക്ഷയും’ എന്ന കൃതിയെ അധികരിച്ചുള്ള പ്രബന്ധമാവട്ടെ അതുമല്ലെങ്കില്‍ ‘പ്രാന്തവല്‍കരണവും പ്രതിരോധവും’ എന്ന ശീര്‍ഷകത്തിലുള്ള ഒരു സെമിനാറാവട്ടെ. ഞാനിതിനകം തന്നെ ഒരു ദോഷൈകദൃക്കായി മാറിയിട്ടുണ്ടെന്ന് എനിക്ക് തന്നെ ബോധ്യമുണ്ട്. എന്റെ വിദ്യാര്‍ത്ഥികളോട് പറയാറുള്ളത് എത്രയും പെട്ടെന്ന് അവരുടെ ഗവേഷണ പ്രബന്ധങ്ങള്‍ സമര്‍പ്പിക്കാനാണ്. കാരണം ഇന്നത്തെ ജെ.എന്‍.യു അവര്‍ സ്വപ്‌നംകണ്ട സര്‍വകലാശാലയില്‍നിന്നും വളരെയകലെയാണ്. ഒട്ടനവധി മഹാരഥന്‍മാര്‍ അവരുടെ ജീവിതോര്‍ജം മുഴുവന്‍ ചിലവഴിച്ച് പടുത്തുയര്‍ത്തിയ സര്‍വകലാശാലയെ കേവലം മൂന്ന് മാസം കൊണ്ട് നശിപ്പിക്കാന്‍ കഴിയുന്നു എന്നത് വിരോധാഭാസമായി തോന്നാം. നമ്മുടെ കാലഘട്ടത്തില്‍ സംഹാരകര്‍ക്കായിരിക്കാം സ്രഷ്ടാക്കളെക്കാള്‍ ശകതി. ഒരു കാര്യം കൂടി പങ്ക്‌വെക്കാം. ഈ സര്‍വകലാശാലയില്‍ ഒന്നും അത്ര എളുപ്പമല്ല. നാല് വര്‍ഷം പരിശ്രമിച്ച് ഗവേഷണ പ്രബന്ധം തയ്യാറാക്കുന്ന വിദ്യാര്‍ത്ഥിയെ ഏതെങ്കിലും ഓഫീസ് ഗുമസ്ഥന്‍മാര്‍ ഉണ്ടാക്കുന്ന ചെറിയ സാങ്കേതിക പിഴവിന് അധികൃതര്‍ വട്ടം കറക്കുന്ന കാഴ്ച ജെ.എന്‍.യുവില്‍ പതിവാണ്. പ്രബന്ധ ശീര്‍ഷകത്തിലെ ഒരു ചെറിയ അക്ഷര തെറ്റിന് എല്ലാ ഉദ്യോഗസ്ഥരുടെയും മുന്നില്‍ ഹാജരായി അപമാനിതരാവേണ്ട സ്ഥിതിയാണ് ഇന്ന് വിദ്യാര്‍ത്ഥികള്‍ക്ക്. ഇങ്ങിനെ പീഡിപ്പിക്കപ്പെട്ട ഒരു വിദ്യാര്‍ത്ഥിയെ സഹായിക്കാന്‍ അക്കാദമിക് മൂല്യനിര്‍ണയ വിഭാഗത്തിലെ ഉദ്യോഗസ്ഥരെ കാണാന്‍ ഞാനൊരെളിയ ശ്രമം ഒരിക്കല്‍ നടത്തി. അപ്പോഴാണെനിക്ക് മനസിലായത് കാര്യങ്ങള്‍ ഇവിടെ പരിധിവിട്ടിരിക്കുന്നെന്ന്. ഓഫീസ് നടയിലെ പാറാവുകാരന്‍ എന്നെ ആദ്യം ചോദ്യം ചെയ്തു. അതെ, നീണ്ട 29 വര്‍ഷത്തെ അധ്യാപന പരിചയമുള്ള, ഇന്ത്യയിലെയും ലോകത്തിന്റെ പല ഭാഗങ്ങളിലെയും സര്‍വകലാശാലകളില്‍ അധ്യാപനം നടത്തുന്ന മികവുറ്റവരെ വാര്‍ത്തെടുക്കാന്‍ സഹായിച്ച എനിക്കാണ് ഈ ദുര്‍ഗതി. ഇല്ല. ഇതെനിയൊരിക്കലും എന്റെ സര്‍വകലാശാലയല്ല. രജിസ്ട്രാര്‍മാരുടെയും റക്ടര്‍മാരുടെയും സെക്ഷന്‍ ഓഫീസര്‍മാരുടെയും പാറാവുകാരുടെയും കലാശാലയായി ജെ.എന്‍. യു. നിപതിച്ചിരിക്കുന്നു .
പ്രവേശന നടപടികള്‍ പൂര്‍ത്തിയാക്കി പുതിയ വിദ്യാര്‍ത്ഥികള്‍ എത്തിക്കഴിഞ്ഞു. പതിവ് പോലെ എന്റെ കേന്ദ്രം അവര്‍ക്കൊരു ഓറിയന്റേഷന്‍ പരിപാടി സംഘടിപ്പിക്കും. പോയ വര്‍ഷങ്ങളിലെല്ലാം പുതിയ വിദ്യാര്‍ത്ഥികളെ സ്വാഗതം ചെയ്തിരുന്നപ്പോള്‍ ഞങ്ങള്‍ പങ്കിടുന്ന ചില ധന്യമായ ഓര്‍മകള്‍ അവരോട് പങ്ക്‌വെക്കാറുണ്ടായിരുന്നു. റൊമീലാ ഥാപ്പര്‍ തുടങ്ങി ധാരാളം പ്രഗല്‍ഭമതികളെ കണ്ട ക്യാമ്പസിലെ പേരാല്‍ വൃക്ഷം, ഒരു കൂട്ടം വിദ്യാര്‍ത്ഥികളോടൊപ്പം ലൈബ്രറിയിലേക്ക് നടന്ന് പോവുന്ന പ്രൊഫ. ബിപിന്‍ ചന്ദ്ര, പ്രഫ. നാംവര്‍ സിംഗുമായും പ്രൊഫ. സുധിപ്ത കവി രാജുമായും പുതുതായി എത്തിയ പുസ്തകങ്ങളെക്കുറിച്ച് സംസാരിക്കുന്ന തൊട്ടടുത്ത വ്യാപാര സമുച്ഛയത്തിലെ പുസ്തകക്കച്ചവടക്കാരന്‍, അടിയന്തിരാവസ്ഥക്കെതിരെ ക്യാമ്പസില്‍ നടന്ന ഐതിഹാസിക പ്രതിഷേധ സമരങ്ങള്‍, 84-ലെ കലാപത്തിനിരയായ സിഖ് സമുദായാംഗങ്ങള്‍ക്ക് സംരക്ഷണം കൊടുത്ത വിദ്യാര്‍ത്ഥികള്‍, ഭോപ്പാല്‍ വാതക ദുരന്തത്തിന്റെ ഇരകള്‍ക്ക് നിസ്വാര്‍ത്ഥ സേവനം ചെയ്തവര്‍, മേധാപട്കറെപോലെ പ്രഗല്‍ഭമതികള്‍ സംവദിച്ചിരുന്ന ഹോസ്റ്റല്‍ തീന്‍മുറിയിലെ നിശാ സദസ്സുകള്‍…. തുടങ്ങിയെത്രയെത്ര ഓര്‍മകളാണ് കഴിഞ്ഞ നാളുകളില്‍ വിദ്യാര്‍ത്ഥികളുമായി പങ്ക്‌വച്ചിരുന്നത്!
പുതിയ വിദ്യാര്‍ത്ഥികളോട് എന്താണ് സംസാരിക്കേണ്ടത്? സിലബസിനപ്പുറം ചിന്തിച്ചുപോകരുതെന്നോ അതല്ല, ആള്‍ക്കൂട്ട കൊലകള്‍, കലാപങ്ങള്‍, പട്ടിണി, ദാരിദ്ര്യം ഇവയൊന്നും കണ്ടില്ലെന്ന് നടിച്ച്, അച്ചടക്കമുള്ള പട്ടാളക്കാരെപോലെ ബിരുദദാന ചടങ്ങില്‍ പങ്കെടുത്താല്‍മാത്രം മതിയെന്നോ? നല്ല പുസ്തകങ്ങള്‍ വായിക്കുന്നത് കര്‍ശനമായി വിലക്കുകയും പകരം സമയാസമയങ്ങളില്‍ സര്‍വകലാശാല ഇറക്കുന്ന സര്‍ക്കുലറുകളുടെ അര്‍ത്ഥങ്ങളും വിവക്ഷകളും വ്യാഖ്യാനിക്കാന്‍ അഭിഭാഷകരെ ചുമതലപ്പെടുത്താന്‍ ആവശ്യപ്പെടുകയോ? ഈ മഹത്തായ സര്‍വകലാശാലയുടെ പതനം എന്നെ അക്ഷരാര്‍ത്ഥത്തില്‍ തകര്‍ത്തു കളയുന്നു.
(ജവഹര്‍ലാല്‍ നെഹ്‌റു സര്‍വകലാശാലയിലെ സാമൂഹ്യ ശാസ്ത്രം അധ്യാപകനാണ് ലേഖകന്‍)
കടപ്പാട്: ദി വയര്‍
മൊഴിമാറ്റം: ഉബൈദുറഹിമാന്‍ ചെറുവറ്റ

ജോഷ്വാ താമസിച്ചിരുന്ന മഹി മാണ്ഡ്​വി ഹോസ്​റ്റലി​​െൻറ വാര്‍ഡനാണ്​ ആത്മഹത്യ വിവരം പൊലീസില്‍ അറിയിച്ചത്. ലൈബ്രറി കെട്ടിടത്തിൽ ജോഷ്വ താമസിച്ച മുറി അകത്തുനിന്ന്​ പൂട്ടിയിരിക്കുകയായിരുന്നെന്ന്​ ഡൽഹി പൊലീസ് ​െഡപ്യൂട്ടി കമീഷണര്‍ ദേവേന്ദര്‍ ആര്യ പറഞ്ഞു.

മോദി സര്‍ക്കാറിനെതിരെ പൂനെ ഫിലിം ഇന്‍സ്റ്റിറ്റ്യൂട്ടിലും, രോഹിത് വെമുലയുടെ ആത്മഹത്യയെത്തുടര്‍ന്ന് ഹൈദരാബാദ് സെന്‍ട്രല്‍ യൂണിവേഴ്‌സിറ്റിയിലും, ജെ എന്‍ യുവിലും ഉയര്‍ന്നു വന്ന വിദ്യാര്‍ത്ഥി പ്രക്ഷോഭങ്ങള്‍ ദേശീയ ശ്രദ്ധ ആകര്‍ഷിച്ചതാണ്. ഇത്തരം സമരങ്ങളും, സംവാങ്ങളുമാണ് ജനാധിപത്യത്തെ സജീവമാക്കുന്നത്.വിദ്യാര്‍ത്ഥി സമരങ്ങളെ രാജ്യദ്രോഹ ചാപ്പ കുത്താന്‍ മോദി സര്‍ക്കാര്‍ ശ്രമിക്കുന്നത് ഭയം കൊണ്ടാണ്. നേരത്തെ രാജ്യത്തെ അറിയപ്പെടുന്ന ആക്ടിവിസ്റ്റുകള്‍ക്കും മനുഷ്യാവകാശ പ്രവര്‍ത്തകര്‍ക്കെതിരെയും സമാനമായ പോലീസ് നടപടികള്‍ ഉണ്ടായി. രാജ്യത്തെ നടുക്കിയ ആള്‍ക്കൂട്ട കൊലപാതകങ്ങളിലോ വര്‍ഗീയ കലാപങ്ങളിലോ ഈ ആവേശം കാണാനില്ല. എറ്റവുമൊടുവില്‍ ഉത്തര്‍പ്രദേശിലെ ബുലന്ദ് ശഹറില്‍ ഒരു പോലീസ് ഓഫീസര്‍ കൊല്ലപ്പെട്ടപ്പോഴും പോലീസ് നിഷ്‌ക്രിയമായിരുന്നു. ഇതേ ഉത്തര്‍പ്രദേശ് പോലീസിനെയാണ് തുടര്‍ച്ചയായ ഏറ്റുമുട്ടല്‍ കൊലപാതകങ്ങളുടെ പേരില്‍ സുപ്രിം കോടതി കഴിഞ്ഞ ദിവസം വിമര്‍ശിച്ചത്.

തങ്ങള്‍ക്കെതിരായ വിമര്‍ശന ശബ്ദങ്ങളെ പോലീസിനെയും, നിയമ വ്യവസ്ഥയെയും ഉപയോഗിച്ച് നിശബ്ദമാക്കുക, തങ്ങള്‍ക്കനുകൂലമായ കലാപങ്ങള്‍ക്ക് പോലും പിന്തുണ കൊടുക്കുക എന്ന ഇരട്ടനീതിയാണ് ബി ജെ പി തുടരുന്നത്. അതിര്‍ത്തി കടന്നുള്ള ഭീകരവാദം ഏറ്റവും ശക്തിപ്പെട്ട നാല് വര്‍ഷക്കാലമാണ് കഴിഞ്ഞു പോയത്. അപ്പോഴൊന്നും രാജ്യസുരക്ഷയെപ്പറ്റി ഒരു ആശങ്കയും കാണിക്കാതിരുന്നവരാണ് ബി ജെ പി. അഴിമതിയിലും, സാമ്പത്തിക തകര്‍ച്ചയിലും മുഖം നഷ്ടപ്പെട്ട മോദി സര്‍ക്കാറിന്റെ അവസാനത്തെ അടവാണ് വര്‍ഗീയ ധ്രുവീകരണവും തീവ്ര ദേശീയതയും ആളിക്കത്തിക്കുക എന്നത്. ഇന്ത്യയിലെ ദരിദ്ര ജനകോടികളുടെ ക്ഷേമം ഉറപ്പുവരുത്തുക, യുവാക്കള്‍ക്ക് തൊഴില്‍ നല്‍കുക, വിദ്യാര്‍ത്ഥികള്‍ക്ക് ആരെയും ഭയക്കാതെ പഠിക്കാന്‍ അവസരമൊരുക്കുക തുടങ്ങിയ കാര്യങ്ങളാണ് യഥാര്‍ത്ഥ രാജ്യസ്‌നേഹിയായ ഒരു ഭരണാധികാരി ചെയ്യേണ്ടത്.പക്ഷേ നരേന്ദ്ര മോദിക്ക് രാജ്യസ്‌നേഹം ഒരു തെരഞ്ഞെടുപ്പ് അജണ്ട മാത്രമാണ്. ഈ തന്ത്രം എല്ലാ കാലത്തും വിലപ്പോവില്ല. ഇത്തരം കുതന്ത്രങ്ങളെ അതിജീവിക്കാനുള്ള കരുത്ത് ഇന്ത്യന്‍ ജനാധിപത്യത്തിനുണ്ട്. എതിര്‍ശബ്ദങ്ങളെ ദേശദ്രോഹമായി ചിത്രീകരിക്കുന്ന ഫാസിസ്റ്റ് അജണക്കെതിരെ യഥാര്‍ത്ഥ ദേശസ്‌നേഹികള്‍ ഒരുമിക്കണം. വിദ്യാര്‍ത്ഥികള്‍ക്കെതിരായ ഈ ഫാസിസ്റ്റ് അജണ്ട അനുവദിക്കാനാവില്ല. ഇതിനെതിരെ ശക്തമായ പ്രതിക്ഷേധം ഉയര്‍ത്തിക്കൊണ്ടുവരുമെന്നും പി കെ കുഞ്ഞാലിക്കുട്ടി പറഞ്ഞു.

കഴിഞ്ഞ തിങ്കളാഴ്ച്ചയാണ് ഉമര്‍ഖാലിദിനു നേരെ വധശ്രമമുണ്ടായത്. തലസ്ഥാനത്തെ അതീവ സുരക്ഷാമേഖലയോട് ഏറ്റവും അടുത്തുനില്‍ക്കുന്ന റഫി മാര്‍ഗിലെ കോണ്‍സ്റ്റിറ്റിയൂഷന്‍ ക്ലബ്ബിന് മുന്നില്‍വെച്ചാണ് തോക്കുമായെത്തിയ അക്രമി ഉമര്‍ഖാലിദിനെ അപായപ്പെടുത്താന്‍ ശ്രമിച്ചത്. നിരന്തരം പൊലീസ്, സൈനിക സാന്നിധ്യമുള്ള റഫി മാര്‍ഗില്‍ പട്ടാപ്പകല്‍ തോക്കുമായെത്തിയ അക്രമി ഒരു പോറല്‍ പോലുമേല്‍ക്കാതെ ഓടി രക്ഷപ്പെടുകയായിരുന്നു.

ജെ.എന്‍.യു സമരവുമായി ബന്ധപ്പെട്ട് കനയ്യകുമാറിനൊപ്പം രാജദ്രോഹക്കുറ്റം ചുമത്തി അറസ്റ്റ് ചെയ്യപ്പെട്ടവരില്‍ ഒരാളാണ് ഉമര്‍ഖാലിദ്. ഈ സംഭവത്തിനുശേഷം ഉമര്‍ഖാലിദ് ഉള്‍പ്പെട്ട വിദ്യാര്‍ഥി നേതാക്കള്‍ക്ക് നേരെ വധഭീഷണികള്‍ ഉയര്‍ന്നിരുന്നു.

ലൗ ജിഹാദ് വിഷയത്തെ ആസ്പദമാക്കി എടുത്ത ഡോക്യുമെന്ററിയില്‍ കേരളത്തില്‍ ലവ് ജിഹാദ് വ്യാപകമാണെന്നും ഹാദിയയും ഷെഫിന്‍ ജഹാനും തമ്മിലുള്ള ബന്ധം ലൗ ജിഹാദായി പരാമര്‍ശിച്ചിരുന്നു. എന്നാല്‍ ഹാദിയ കേസ് ലൗ ജിഹാദ് അല്ലെന്ന് രാജ്യത്തിന്റെ പരമോന്നത കോടതിയായ സുപ്രിംകോടതി നേരത്തേ വ്യക്തമാക്കിയിട്ടും ഇത്തരത്തില്‍ അവതരിപ്പിക്കുന്നത് ഗൂഢാലോചനയുടെ ഭാഗമാണെന്ന് വിദ്യാര്‍ത്ഥി സംഘടനകള്‍ ആരോപിച്ചാണ് പ്രദര്‍ശനം നിര്‍ത്തണമെന്നാവശ്യപ്പെട്ടത്.

അതേസമയം പ്രതിഷേധിച്ചവര്‍ക്കെതിരെ എ.ബി.വി.പി ആക്രമണ നടത്തി. ജെഎന്‍യു വിദ്യാര്‍ത്ഥി യൂനിയന്‍ മുന്‍ അധ്യക്ഷന്‍ മോഹിത് പാണ്ഡേയെ കയ്യേറ്റം ചെയ്തു. മോഹിത് പാണ്ഡെ സഞ്ചരിച്ച കാറിനു നേരെയും ആക്രമണമുണ്ടായി സ്ഥലത്ത് സംഘര്‍ഷാവസ്ഥ നിലനില്‍ക്കുതകയാണ്. ഇടതുപക്ഷ വിദ്യാര്‍ത്ഥികള്‍ അവരുടെ അസഹിഷ്ണുത പ്രകടമാക്കിയതുവഴി സുരക്ഷാ വലയങ്ങള്‍ തകര്‍ന്നു എന്ന് വിവേകാനന്ദ മഞ്ചിന്റെ കണ്‍വീനര്‍ ഉമേഷ് കുമാര്‍ ഖൂട്ട് കുറ്റപ്പെടുത്തി. ലൗ ജിഹാദ് എന്ന പേരില്‍ രാജ്യത്ത് വെറുപ്പ് സൃഷ്ടിക്കുന്ന രാഷ്ടീയത്തിനെതിരെ വെള്ളിയാഴ്ച ഇടതുപക്ഷ സംഘടനകള്‍ പ്രതിഷേധം പ്രകടിപ്പിച്ചിരുന്നു. സമാധാനപരമായ പ്രകടനത്തിന് നേരെ മുട്ടയും കല്ലും ഉപോയാഗിച്ച് സംഘപരിവാര്‍ ശക്തികള്‍ ആക്രമിച്ചെന്ന് ഇടതുപാര്‍ട്ടികള്‍ കുറ്റപ്പെടുത്തി.

ന്യുഡല്‍ഹി: ജവഹര്‍ലാല്‍ നെഹ്‌റു കേന്ദ്ര സര്‍വ്വകലാശാലയിലെ അധ്യാപകനെതിരെ പ്രക്ഷോഭവുമായി വിദ്യാര്‍ത്ഥികള്‍. നിരവധി വിദ്യാര്‍ത്ഥിനികള്‍ ലൈംഗികാരോപണമുയര്‍ത്തി രംഗത്തെത്തിയതോടെയാണ് ദില്ലിയുടെ പ്രധാന റോഡുകളിലൊന്നായ നെല്‍സണ്‍ മണ്ഡേല റോഡ് ഉപരോധത്തിലേക്ക് മാറിയത്. നൂറു കണക്കിനു വിദ്യാര്‍ത്ഥികള്‍ വസന്ത് കുഞ്ച് പോലീസ് സ്‌റ്റേഷനും നെല്‍സണ്‍ മണ്ഡേല റോഡും ഉപരോധിക്കുകയാണ്.ദക്ഷിണ ദില്ലിയില്‍ നിന്നും ഇന്ദിരാഗാന്ധി എയര്‍പ്പോര്‍ട്ടിലേക്കുള്ള പ്രധാന പാതകളിലൊന്നാണിത്. ലൈഫ് സയന്‍സ് അധ്യാപകന്‍ പ്രൊഫ അതുല്‍ ജഹ്രിക്കെതിരെയാണ് 9 ഗവേഷക വിദ്യാര്‍ത്ഥിനികള്‍ ലൈംഗിക അതിക്രമമടക്കമുള്ള ഗൗരവ ആരോപണമുയര്‍ത്തിയത്.
സയന്‍സ് ലാബില്‍ വച്ച് അധ്യാപകന്‍ ലൈംഗിക അതിക്രമത്തിനു മുതിര്‍ന്നന്നാരോപിച്ച് വിദ്യാര്‍ത്ഥിനി രംഗത്ത് വന്നതിനു പിന്നാലെ നിരവധി വിദ്യാര്‍ത്ഥിനികള്‍ സമാന ദുരനുഭവങ്ങള്‍ പങ്കുവച്ച് രംഗത്ത് വരികയായിരുന്നു.

പരാതി കൊടുത്തിട്ട് നാലു ദിവസമായിട്ടും അറസ്റ്റ് ചെയ്ത് ചോദ്യം ചെയ്യാന്‍ പോലീസ് തയ്യാറായിട്ടില്ല.പ്രൊഫസര്‍ അതുല്‍ ജഹ്രിക്കെതിരെ നടപടിയെടുക്കാന്‍ സര്‍വ്വകലാശാലയും തയ്യാറായിട്ടില്ല. സംഘപരിവാര്‍ പ്രവര്‍ത്തകനാണ് ആരോപണ വിധേയനായ പ്രൊഫ. അതുല്‍ ജോഹ്രി . ക്യാംപസില്‍ തുടര്‍ച്ചയായി യൂണിയന്റെ നേതൃതത്തില്‍ പഠിപ്പുമുടക്ക് സമരം നടക്കുകയാണ്. അധ്യാപകനെ സസ്പന്റ് ചെയ്യണമെന്ന് ജെഎന്‍യു അധ്യാപക സംഘടനയും ആവശ്യപ്പെട്ടു.