അതേസമയം ജോഷിമഡിനെയും ഓലിയേയും ബന്ധിപ്പിക്കുന്ന നാലരക്കിലോമീറ്റര്‍ ദൈര്‍ഘ്യമുള്ള റോപ് വേയുടെ പ്ലാറ്റ് ഫോമില്‍ ഭീമന്‍ വിള്ളല്‍. ഇതേതുടര്‍ന്ന് റോപ് വേ പ്രവര്‍ത്തനം നിര്‍ത്തിവെച്ചു. ഭൂമി ഇടിഞ്ഞു താഴല്‍ പ്രതിഭാസത്തെതുടര്‍ന്ന് ജോഷിമഠില്‍ നിന്ന് കുടുംബങ്ങളെ ഒഴിപ്പിക്കുന്നതിനിടെയാണ് റോപ് വേക്കും ഭീഷണി ഉയര്‍ന്നിരിക്കുന്നത്. ജനുവരി 13ന് രാത്രിയാണ് റോപ് വേയുടെ ഒന്നാം നമ്പര്‍ തൂണിന്റെ പ്ലാറ്റ്‌ഫോമില്‍ ശക്തമായ വിള്ളല്‍ രൂപപ്പെട്ടതെന്നാണ് റിപ്പോര്‍ട്ട്. ഇതേതുടര്‍ന്ന് മുന്‍കരുതല്‍ നടപടികളുടെ ഭാഗമായി റോപ് വേ തല്‍ക്കാലത്തേക്ക് നിര്‍ത്തിവെച്ചതായി ഓപ്പറേഷനല്‍ മാനേജര്‍ ദിനേശ് ഭട്ട് പറഞ്ഞു. ഭൂമി ഇടിഞ്ഞുതാഴല്‍ പ്രതിഭാസം കൂടുതല്‍ പ്രദേശങ്ങളിലേക്ക് വ്യാപിപ്പിക്കുന്നതിന്റെ സൂചനയായും റോപ് വേ പ്ലാറ്റ് ഫോമിലെ വിള്ളല്‍ വിലയിരുത്തലുണ്ട്.

എന്നാല്‍ ജോഷിമഡില്‍ ഭൂമി ഇടിഞ്ഞു താഴുന്നത് സംബന്ധിച്ച വിവരങ്ങള്‍ മാധ്യമങ്ങളുമായി പങ്കുവെക്കുന്നതില്‍ നിന്ന് സര്‍ക്കാര്‍ ഏജന്‍സികളെയും സ്ഥാപനങ്ങളേയും വിലക്കി കേന്ദ്ര സര്‍ക്കാര്‍. സാറ്റലൈറ്റ് ചിത്രങ്ങളെ ആധാരമാക്കി കഴിഞ്ഞ ദിവസം ഐ.എസ്.ആര്‍.ഒ നല്‍കിയ മുന്നറിയിപ്പിനു പിന്നാലെയാണ് വായ്മൂടിക്കെട്ടാനുള്ള കേന്ദ്രത്തിന്റെ ശ്രമം. ആഭ്യന്തര മന്ത്രി രാജ്‌നാഥ് സിങിന്റെ അധ്യക്ഷതയില്‍ ചേര്‍ന്ന യോഗത്തിനു പിന്നാലെ ദേശീയ ദുരന്ത നിവാരണ സേനയാണ് ഉത്തരവിറക്കിയത്. വ്യത്യസ്ത ഏജന്‍സികള്‍ വ്യത്യസ്ത വീക്ഷണങ്ങള്‍ പങ്കുവെക്കുന്നത് ജനങ്ങളില്‍ ആശയക്കുഴപ്പം സൃഷ്ടിക്കുന്നതാണ് വിലക്കിന് കാരണമായി ചൂണ്ടിക്കാട്ടുന്നത്.

ജോഷിമഡില്‍ 12 ദിവസത്തിനിടെ ഭൂമി 5.4 സെന്റിമീറ്റര്‍ ഇടിഞ്ഞു താഴ്ന്നതായാണ് ഐ.എസ്.ആര്‍.ഒ വെളിപ്പെടുത്തിയത്. വൈകാതെ ജോഷിമഡ് പൂര്‍ണമായി ഇടിഞ്ഞു താഴുമെന്നും ഐ.എസ്.ആര്‍.ഒ മുന്നറിയിപ്പു നല്‍കിയിരുന്നു. ഹിമാലയത്തിലെ വന്‍തോതിലുള്ള നിര്‍മ്മാണ പ്രവര്‍ത്തനങ്ങളുമായി ബന്ധപ്പെട്ട് നേരത്തെ തന്നെ ബി.ജെ.പി നേതൃത്വത്തിലുള്ള കേന്ദ്ര, സംസ്ഥാന സര്‍ക്കാറുകള്‍ക്കെതിരെ ജനരോഷം ശക്തമാണ്. ഐ.എസ്.ആര്‍.ഒ വെളിപ്പെടുത്തല്‍ ഈ പ്രതിഷേധങ്ങള്‍ക്ക് ആക്കം കൂട്ടുമെന്ന വിലയിരുത്തലാണ് സ്വയംഭരണാധികാരമുള്ള സര്‍ക്കാര്‍ സ്ഥാപനങ്ങളൂടെ പോലും വായ്മൂടിക്കെട്ടാന്‍ കേന്ദ്രത്തെ പ്രേരിപ്പിക്കുന്നതെന്നാണ് വിവരം.

അതേസമയം കേന്ദ്ര സര്‍ക്കാര്‍ ഇടപെടലിനു പിന്നാലെ റിപ്പോര്‍ട്ട് ഐ.എസ്.ആര്‍.ഒ പിന്‍വലിച്ചു. തെറ്റായി വ്യാഖ്യാനിക്കപ്പെട്ടതിനാലാണ് റിപ്പോര്‍ട്ട് പിന്‍വലിച്ചതെന്നാണ് വിശദീകരണം. മേഖലയില്‍ ഒഴിപ്പിക്കല്‍ തുടരുന്നതിനിടെ പുറത്തുവന്ന ഐ.എസ്.ആര്‍.ഒ റിപ്പോര്‍ട്ടില്‍ സംസ്ഥാന സര്‍ക്കാര്‍ കേന്ദ്രത്തെ അതൃപ്തി അറിയിച്ചിരുന്നു. ഏപ്രില്‍ മുതല്‍ നവംബര്‍ വരെയുള്ള ഏഴ് മാസത്തിനിടെ ജോഷിമഡ് ഒമ്പത് സെന്റിമീറ്റര്‍ താഴേക്ക് പോയെന്നും എന്നാല്‍ ജനുവരിയില്‍ 12 ദിവസത്തിനിടെ മാത്രം 5.4 സെന്റിമീറ്റര്‍ താഴ്ന്ന്, ഇടിഞ്ഞു താഴലിന് വേഗം കൂടിയെന്നുമായിരുന്നു ഐ.എസ്.ആര്‍.ഒ വെളിപ്പെടുത്തല്‍. ജനുവരി എട്ടിനും 27നും കാര്‍ട്ടോസാറ്റ് 2 എസ് ഉപഗ്രഹം പകര്‍ത്തി ബംഗളൂരുവിലെ നാഷണല്‍ റിമോട്ട് സെന്‍സിങ് സെന്ററിലേക്ക് അയച്ച ജോഷിമഡിന്റെ ചിത്രങ്ങളെ ആധാരമാക്കിയാണ് ഭൂമി ഇടിഞ്ഞുതാഴുന്നതിന്റെ തോത് സംബന്ധിച്ച് ഐ.എസ്.ആര്‍.ഒ മുന്നറിയിപ്പുമായി രംഗത്തെത്തിയത്. ഈ റിപ്പോര്‍ട്ടാണ് സര്‍ക്കാര്‍ ഇടപെടലിനെതുടര്‍ന്ന് പിന്‍വലിച്ചത്.

ജോഷിമഡിലെ അവസ്ഥ പഠിക്കാന്‍ കേന്ദ്ര സര്‍ക്കാര്‍ നിയോഗിച്ച വിദഗ്ധസംഘം റിപ്പോര്‍ട്ട് സമര്‍പ്പിക്കും വരെ മറ്റ് ഏജന്‍സികളോ സര്‍ക്കാര്‍ സ്ഥാപനങ്ങളോ വിവരങ്ങള്‍ പങ്കു വെക്കരുതെന്നാണ് ഉത്തരവില്‍ പറയുന്നത്.

സ്ഥിതിഗതികള്‍ വിലയിരുത്താന്‍ ചേര്‍ന്ന മന്ത്രിസഭാ യോഗത്തിലാണ് സുപ്രധാന തീരുമാനങ്ങള്‍. ദുരിതാശ്വാസ പാക്കേജിനായി കേന്ദ്രസര്‍ക്കാരിനെ സമീപിക്കാനും യോഗത്തില്‍ തീരുമാനമായി. സര്‍ക്കാര്‍ ഉടമസ്ഥതയിലുള്ള എന്‍ടിപിസിയുടെ ഹൈഡല്‍ പ്രോജക്ടിന്റെ ഭാഗമായി നടത്തുന്ന നിര്‍മാണ പ്രവര്‍ത്തനങ്ങളാണ് ജോഷിമഡിലെ ഭൂമില്‍ വിള്ളല്‍ വീഴാന്‍ കാരണമെന്ന് ആദ്യം മുതല്‍ ആരോപണം ഉയര്‍ന്നിരുന്നു.

കണക്കുകള്‍ വെച്ച് ഭൂമി ഇടുഞ്ഞ് താഴലിന്റെ വേഗം വര്‍ദ്ധിക്കുന്നതായും ഐഎസ്ആര്‍ഒ മുന്നറിയിപ്പ് നല്‍കുന്നു. ഐഎസ്ആര്‍ഒയുടെ നാഷണല്‍ റിമോട്ട് സെന്‍സിംഗ് സെന്ററാണ് ജോഷിമഠിന്റെ ഉപഗ്രഹ ചിത്രങ്ങള്‍ വിലയിരുത്തി പ്രാഥമിക റിപ്പോര്‍ട്ട് സമര്‍പ്പിച്ചത്.

അതേസമയം ജോഷിമഠില്‍ അപകടാവസ്ഥയിലുള്ള ഹോട്ടലുകളും കെട്ടിടങ്ങളും ഒരാഴ്ചക്കുള്ളില്‍ പൊളിക്കുമെന്ന് അധികൃതര്‍. വീട് നഷ്ടപ്പെട്ട ഓരോ കുടുംബത്തിനും 1.5 ലക്ഷം രൂപ നഷ്ടപരിഹാരമായി ഉടന്‍ നല്‍കുമെന്ന് മുതിര്‍ന്ന ഓഫീസര്‍ ഹിമാന്‍ഷു ഖുറാന പറഞ്ഞു.മാറിത്താമസിക്കുന്നതടക്കം അടിയന്തരാവശ്യങ്ങള്‍ക്ക് ആദ്യഘട്ടത്തില്‍ അമ്പതിനായിരം രൂപ അനുവദിക്കും. തങ്ങള്‍ക്ക് നോട്ടീസ് നല്‍കിയിട്ടില്ലെന്നും നഷ്ടപരിഹാരം നല്‍കണമെന്നും ആവശ്യപ്പെട്ട് പ്രദേശവാസികള്‍ കെട്ടിടം പൊളിക്കുന്നത് തടഞ്ഞിരുന്നു. ഇന്നലെ ജില്ലാ ഭരണകൂടം നാട്ടുകാരുമായി നടത്തിയ ചര്‍ച്ചയിലാണ് നഷ്ടപരിഹാരം സംബന്ധിച്ച് തീരുമാനമായത്. ഇപ്പോള്‍ ഹോട്ടലുകള്‍ പൊളിക്കുന്നില്ല. എന്നാല്‍ ഒരാഴ്ചക്കുള്ളില്‍ ഹോട്ടലുകള്‍ പൊളിക്കും. ഹോട്ടല്‍ ഉടമകളുമായി ചര്‍ച്ച നടത്തിയെന്നും അധികൃതര്‍ വ്യക്തമാക്കി.

സംസ്ഥാനത്ത് വര്‍ഷങ്ങളായി നടക്കുന്ന നിര്‍മാണ പ്രവര്‍ത്തനങ്ങളും ആസൂത്രിതമല്ലാത്ത അടിസ്ഥാന സൗകര്യ വികസനവും കാരണം മലയോര നഗരത്തിലെ 731 വീടുകളിലാണ് വിള്ളലുകള്‍ ഉണ്ടായത്. ഇതോടെ അപകടാവസ്ഥയിലുള്ള കെട്ടിടങ്ങള്‍ പൊളിക്കാന്‍ സംസ്ഥാന സര്‍ക്കാര്‍ ഉത്തരവിടുകയായിരുന്നു. 131 കുടുംബങ്ങളെയാണ് ദുരിതാശ്വാസ ക്യാമ്പുകളിലേക്ക് മാറ്റിപാര്‍പ്പിച്ചത്. വാസയോ ഗ്യമല്ലാതായ 86 വീടുകളാണുള്ളത്.

സ്ഥിതിഗതികള്‍ നിരീക്ഷിച്ചുവരികയാണെന്നും ഹോട്ടലുകള്‍ പൊളിക്കുന്നത് സെന്‍ട്രല്‍ ബില്‍ഡിങ് റിസര്‍ച്ച് ഇന്‍സ്റ്റിറ്റ്യൂട്ടിന്റെ മേല്‍നോട്ടത്തിലായിരിക്കുമെന്നും ഉദ്യോഗസ്ഥര്‍ പറഞ്ഞു. അതേസമയം സംസ്ഥാനത്തെ മറ്റ് പ്രദേശങ്ങളിലും കെട്ടിടങ്ങളില്‍ വിള്ളല്‍ വീഴുന്നതായി കണ്ടെത്തിയിട്ടുണ്ട്. കര്‍ണപ്രയാഗിലും തെഹ്‌രിജില്ലയിലെ ചമ്പയിലുമാണ് വിള്ളല്‍ കണ്ടത്. തെഹ്‌രി തടാകത്തിന് സമീപത്തുള്ള ഗ്രാമത്തിലാണ് മണ്ണിടിച്ചിലും കെട്ടിടങ്ങളില്‍ വിള്ളലുകളു മുണ്ടായത്.

ചമ്പ തുരങ്കത്തിന് സമീപത്തും മുകളിലുമായുള്ള വീടുകളുടെ ചുമരുകളിലാണ് വിള്ളലുകള്‍ രൂപപ്പെട്ടത്. ഇവിടെ ആറോളം വീടുകള്‍ അപകട ഭീതിയിലാണ്. ചമ്പയിലെ 440 മീറ്റര്‍ ദൈര്‍ഘ്യമുള്ള ടണലിന്റെ നിര്‍മാണം തുടങ്ങിയതിന് ശേഷമാണ് പ്രദേശത്തെ വീടുകളില്‍ വിള്ളലുകള്‍ കണ്ടുതുടങ്ങിയതെന്ന് നാട്ടുകാര്‍ ആരോപിക്കുന്നു. സ്മാര്‍ട് സിറ്റി സ്‌കീമിന്റെ ഭാഗമായി നിര്‍മിച്ച പൈപ്പ് ലൈന്‍ ചോര്‍ച്ചയും വിള്ളലിന് കാരണമായി.

എന്നാല്‍ ജോഷിമഠിലെ പ്രശ്‌നങ്ങള്‍ സംബന്ധിച്ച് പ്രദേശ വാസികള്‍ കഴിഞ്ഞ മാസം മാത്രം മൂന്നു തവണ മുഖ്യമന്ത്രി പുഷ്‌കര്‍ സിങ് ധാമിക്ക് കത്തയച്ചതായാണ് വെളിപ്പെടുത്തല്‍. എന്‍.ടി.പി.സി ഹൈഡല്‍ പ്രോജക്ടിന്റെ ടണല്‍ നിര്‍മ്മാണവുമായി ബന്ധപ്പെട്ട സ്‌ഫോടനങ്ങള്‍ തുടങ്ങിയതു മുതല്‍ വീടുകളിലെ വിള്ളലുകള്‍ വര്‍ധിക്കുന്നതായും ഈ സാഹചര്യത്തില്‍ നിര്‍മ്മാണ പ്രവര്‍ത്തനങ്ങള്‍ നിര്‍ത്തിവെക്കണമെന്നും ആവശ്യപ്പെട്ടായിരുന്നു കത്ത്. എന്നാല്‍ സംസ്ഥാന സര്‍ക്കാര്‍ ഈ കത്തുകള്‍ അവഗണിക്കുകയായിരുന്നു.

ഭൂമി ഇടിഞ്ഞു താഴുന്ന പ്രതിഭാസവും ഹൈഡല്‍ പ്രോജക്ടും തമ്മില്‍ ബന്ധമില്ലെന്നാണ് എന്‍.ടി.പി.സി അധികൃതര്‍ വാദിക്കുന്നത്. അതേസമയം സംഭവ സ്ഥലത്ത് പഠനം നടത്തിക്കൊണ്ടിരിക്കുന്ന റൂര്‍ക്കി ഐ.ഐ.ടി വിദഗ്ധര്‍ ഇതുവരെ പ്രദേശ വാസികളുടെ ആരോപണങ്ങള്‍ തള്ളിക്കളഞ്ഞിട്ടില്ല.

മുഖ്യമന്ത്രിക്കൊപ്പം ജില്ലാ കളക്ടറുടെ ശ്രദ്ധയിലും വിഷയം കൊണ്ടു വന്നിരുന്നതായി പ്രദേശ വാസികള്‍ വെളിപ്പെടുത്തി. ടണലുകള്‍ക്കായി സ്‌ഫോടനം നടത്തുമ്പോള്‍ പ്രദേശമാകെ പ്രകമ്പനം കൊള്ളുമായിരുന്നു. ഇക്കാര്യം കളക്ടറുടെ ശ്രദ്ധയില്‍ പെടുത്തി. സംഭവ സ്ഥലം സന്ദര്‍ശിച്ചതല്ലാതെ കളക്ടറും യാതൊരു നടപടിയും സ്വീകരിച്ചില്ല. നിര്‍മ്മാണ പ്രവര്‍ത്തനങ്ങള്‍ തല്‍ക്കാലത്തേക്ക് നിര്‍ത്തിവെക്കണമെന്ന തങ്ങളുടെ ആവശ്യവും അംഗീകരിച്ചില്ലെന്ന് പ്രദേശ വാസികളെ ഉദ്ധരിച്ച് ഒരു ദേശീയ മാധ്യമം റിപ്പോര്‍ട്ട് ചെയ്തു.

പ്രദേശ വാസികള്‍ ആശങ്ക അറിയിച്ച് തനിക്കും മുഖ്യമന്ത്രിക്കും കത്ത് നല്‍കിയിരുന്നുവെന്ന കാര്യം ജോഷിമഠ് ഉള്‍കൊള്ളുന്ന ചാമോലി ജില്ലാ കളക്ടര്‍ ഹിമാന്‍ഷു ഖുരാനാ പറഞ്ഞു. എന്നാല്‍ എന്താണ് ചെയ്യേണ്ടത് എന്ന് തനിക്കറിയില്ലായിരുന്നു. എല്ലാ മാനദണ്ഡങ്ങളും പാലിച്ചാണ് നിര്‍മ്മാണ പ്രവര്‍ത്തനങ്ങള്‍ നടത്തുന്നതെന്ന വിശദീകരണമാണ് എന്‍.ടി.പി.സി ജില്ലാ ഭരണകൂടത്തിന് നല്‍കിയിരുന്നതെന്നും അദ്ദേഹം കൂട്ടിച്ചേര്‍ത്തു.

അതേസമയം ഉത്തരാഖണ്ഡിലെ ‘മുങ്ങുന്ന ജോഷിമഠി’ല്‍ നിന്ന് കുടുംബങ്ങളെ ഒഴിപ്പിക്കാന്‍ അടിയന്തര നടപടി തുടങ്ങി സംസ്ഥാന സര്‍ക്കാര്‍. 600ഓളം കുടുംബങ്ങളെയാണ് മാറ്റിപ്പാര്‍പ്പിക്കുക. ചിലരെ നേരത്തെ തന്നെ മാറ്റിപ്പാര്‍പ്പിച്ചിരുന്നു. മറ്റു ചില കുടുംബങ്ങള്‍ സ്വയം കുടിയൊഴിഞ്ഞു പോയിരുന്നു. വെള്ളിയാഴ്ച വൈകീട്ടോടെ ഒരു ക്ഷേത്രം കൂടി തകര്‍ന്ന പശ്ചാത്തലത്തിലാണ് പുനരധിവാസം വേഗത്തിലാക്കാനുള്ള തീരുമാനം. വലിയ ദുരന്തത്തിലേക്കുള്ള മുന്നറിയിപ്പാണ് സംഭവമെന്ന് പ്രദേശ വാസികള്‍ നേരത്തെതന്നെ പറയുന്നുണ്ടെങ്കിലും ഇതുവരേയും സംസ്ഥാന സര്‍ക്കാര്‍ ഇത് അവഗണിക്കുകയായിരുന്നു.

ഭൂമി പിളരുന്നതും കെട്ടിടങ്ങള്‍ക്ക് വിള്ളല്‍ വീഴുന്നതും അടക്കമുള്ള പ്രശ്‌നങ്ങളാണ് ജനജീവിതം ആശങ്കയിലാക്കിയത്. ജോഷിമഠ് മുനിസിപ്പാലിറ്റിക്കു കീഴിലെ ഒമ്പത് ഡിവിഷനുകളിലാണ് ഇത്തരമൊരു പ്രതിഭാസം. പലയിടത്തും ഭൂമി വിണ്ടു കീറിയിട്ടുണ്ട്. റോഡുകളിലടക്കം ഇത് കാണാം. ഭൂമിയിലെ വിള്ളലാണ് കെട്ടിടങ്ങളേയും ബാധിച്ചത്. ഏതാനും വീടുകള്‍ നേരത്തെ ഭാഗികമായി തകര്‍ന്നിരുന്നു. ഇതേതുടര്‍ന്നാണ് പുനരധിവാസം ആവശ്യപ്പെട്ട് ജനങ്ങള്‍ രംഗത്തെത്തിയത്. എന്നാല്‍ സര്‍ക്കാര്‍ കാര്യമാക്കിയില്ല. വെള്ളിയാഴ്ചയിലെ ക്ഷേത്രം തകര്‍ന്ന സംഭവത്തോടെ ജനങ്ങളുടെ ആശങ്ക ഇരട്ടിച്ചതായാണ് റിപ്പോര്‍ട്ട്. തകര്‍ന്നുവീഴുമ്പോള്‍ ക്ഷേത്രത്തിനകത്ത് ആരുമില്ലാതിരുന്നതിനാല്‍ ആളപായം ഒഴിവായെങ്കിലും വലിയ ഭീതിയോടെയാണ് സംഭവത്തെ ആളുകള്‍ കാണുന്നത്. 15 ദിവസം മുമ്പാണ് ക്ഷേത്രത്തിന്റെ ചുമരുകളില്‍ വിള്ളല്‍ പ്രത്യക്ഷപ്പെട്ടത്. ക്രമേണ വിള്ളല്‍ ശക്തമാകുകയും കേത്രത്തിന്റെ ചുമര്‍ ഇടിഞ്ഞു വീഴുകയുമായിരുന്നു.
ഭൂമിയില്‍ വിള്ളല്‍ പ്രത്യക്ഷപ്പെട്ട സ്ഥലങ്ങളിലും ഇതിന്റെ വ്യാപ്തി വര്‍ധിച്ചു വരുന്നുണ്ട്. കൂടുതല്‍ സ്ഥലങ്ങളിലേക്ക് വിള്ളല്‍ വീഴുന്നുമുണ്ട്. ആസൂത്രണമില്ലാത്ത വികസന പ്രവര്‍ത്തനങ്ങള്‍ സൃഷ്ടിച്ച പാരിസ്ഥിതിക ആഘാതങ്ങളാണ് ഭൂമി പിളരലിന് കാരണമെന്നാണ് പ്രദേശ വാസികള്‍ പറയുന്നത്.

മുഖ്യമന്ത്രി പുഷ്‌കര്‍ സിങ് ധാമി ഇന്നലെ ജോഷിമഠില്‍ സന്ദര്‍ശനം നടത്തിയിരുന്നു. ഇതിനു പിന്നാലെയാണ് മുഴുവന്‍ കുടുംബങ്ങളെയും മാറ്റിപ്പാര്‍പ്പിക്കാന്‍ സര്‍ക്കാര്‍ തീരുമാനിച്ചത്. ആളുകളെ മാറ്റിപ്പാര്‍പ്പിക്കാനും അടിയന്തര വൈദ്യ സഹായങ്ങള്‍ക്കുമായി കോപ്റ്റര്‍ അടക്കം സജ്ജമാക്കിയതായി മുഖ്യമന്ത്രി അറിയിച്ചു. ജോഷിമഠിലെ പാരിസ്ഥിതിക മാറ്റങ്ങളെക്കുറിച്ച് പഠിക്കാന്‍ കേന്ദ്രം വിദഗ്ധ സംഘത്തെ അയച്ചിട്ടുണ്ട്. റൂര്‍ക്കി ഐ.ഐ.ടിയിലെ വിദഗ്ധര്‍ അടങ്ങിയതാണ് സംഘം.

ജോഷിമഠില്‍ സംഭവിക്കുന്നത് എന്ത്, കാരണങ്ങള്‍ എന്തെല്ലാം, പരിഹാര മാര്‍ഗങ്ങള്‍ എന്നിവ സംബന്ധിച്ചാണ് വിദഗ്ധ സമിതിയോട് റിപ്പോര്‍ട്ട് ആവശ്യപ്പെട്ടിരിക്കുന്നതെന്ന് മുഖ്യമന്ത്രി പറഞ്ഞു. മനുഷ്യരുടെ സുരക്ഷക്കാണ് പ്രഥമ പരിഗണന നല്‍കുന്നത്. ഇതിനായി പുനരധിവാസം വേഗത്തിലാക്കും. പ്രശ്‌ന പരിഹാരത്തിനായി സ്വീകരിക്കേണ്ട നടപടികള്‍ ഇതിന്റെ തുടര്‍ച്ചയായി കൈക്കൊള്ളും. ഇതിനായി പെട്ടെന്ന് നടപ്പാക്കേണ്ട കാര്യങ്ങള്‍, ദീര്‍ഘകാലാടിസ്ഥാനത്തില്‍ സ്വീകരിക്കേണ്ട നടപടികള്‍ എന്നിവ സംബന്ധിച്ച് വിദഗ്ധ സംഘത്തോട് വെവ്വേറെ നിര്‍ദേശങ്ങള്‍ സമര്‍പ്പിക്കാന്‍ ആവശ്യപ്പെട്ടിട്ടുണ്ട്. ദുരന്ത നിവാരണ വകുപ്പിന്റെ കണ്‍ട്രോള്‍ റൂമും പ്രവര്‍ത്തനം ആരംഭിക്കും.

ഇതിനിടെ ജോഷിമഠ് സംഭവത്തെ ദേശീയ ദുരന്തമായി പ്രഖ്യാപിക്കണമെന്നാവശ്യപ്പെട്ട് സുപ്രീംകോടതിയില്‍ ഹര്‍ജി സമര്‍പ്പിച്ചു. ശ്രീശങ്കരാചാര്യ മഠാധിപതിയാണ് ഹര്‍ജി നല്‍കിയത്. പ്രധാന ഹിന്ദു, സിഖ് തീര്‍ത്ഥാടന കേന്ദ്രങ്ങളായ ഭദ്രിനാഥിലേക്കും ഹേംകുണ്ട് സാഹിബിലേക്കുമുള്ള പ്രവേശന കവാടം ആയാണ് ജോഷിമഠ് കണക്കാക്കുന്നത്. ചാര്‍ധാം യാത്രക്കെത്തുന്ന തീര്‍ത്ഥാടകര്‍ക്ക് മലകയറ്റം ആരംഭിക്കുന്നതിന് മുന്നോടിയായുള്ള പ്രധാന വിശ്രമ കേന്ദ്രങ്ങളില്‍ ഒന്ന് കൂടിയാണ് ജോഷിമഠ്. ഇന്ത്യാ – ചൈനാ അതിര്‍ത്തിയോടു ചേര്‍ന്നുള്ള പ്രധാന സൈനിക താവളങ്ങളില്‍ ഒന്നും ജോഷിമഠില്‍ പ്രവര്‍ത്തിക്കുന്നുണ്ട്.