യുവ അഭിഭാഷകയെ മര്‍ദിച്ചതിന് ബെയ്‌ലിന് ദാസിനെതിരെ അച്ചടക്ക നടപടികള്‍ എടുക്കന്നതിനോടൊപ്പം പ്രാക്ടീസ് ചെയ്യുന്നതിനും ബാര്‍ കൗണ്‍സില്‍ വിലക്കേര്‍പ്പെടുത്തിയിരുന്നു. ഈ നടപടികളാണ് ബെയ്‌ലിന്‍ ദാസ് ഹൈക്കോടതിയില്‍ ചോദ്യം ചെയ്തത്. ബാര്‍ കൗണ്‍സിലിന്റെ അഭിപ്രായം തേടിയതിന് ശേഷമാണ് കോടതി നടപടികളില്‍ ഇളവ് നല്‍കി കൊണ്ടുള്ള തീരുമാനമെടുത്തിരിക്കുന്നത്.

അഭിഭാഷകയെ മര്‍ദ്ദിച്ച കേസിലെ ജാമ്യ വ്യവസ്ഥയില്‍ ഇളവ് നേടുന്നതിന് അനുസൃതമായി ആയിരിക്കും പ്രാക്ടീസ് ചെയ്യാനുള്ള അനുമതി.

കഴിഞ്ഞ മെയ് 13നാണ് വഞ്ചിയൂര്‍ കോടതിയിലെ അഭിഭാഷകയായ ശ്യാമിലിയെ വക്കീല്‍ ഓഫീസില്‍ വെച്ച് മുതിര്‍ന്ന അഭിഭാഷകനായ ബെയ്‌ലിന്‍ ദാസ് മര്‍ദ്ദിച്ചത്. കേസില്‍ പ്രതിചേര്‍ത്തതിന് പിന്നാലെ തിരുവനന്തപുരം ബാര്‍ അസോസിയേഷന്‍ ബെയ്‌ലിന്‍ ദാസിനെ അംഗത്വത്തില്‍ നിന്ന് പുറത്താക്കിയിരുന്നു.

ഇതിന് മുമ്പും സമാന രീതിയില്‍ അഭിഭാഷകന്‍ പെരുമാറിയിട്ടുണ്ട്. ഇന്ന് അടിച്ച ശേഷം തറയില്‍ തള്ളിയിട്ടു. എല്ലാവരും നോക്കി നില്‍ക്കെയാണ് സംഭവം. ഇതിന് മുമ്പും മുഖത്ത് അടിച്ചു. അന്ന് അത് കാര്യമാക്കിയില്ല. പൊലീസില്‍ പരാതി നല്‍കിയിട്ടുണ്ട്. കേസുമായി മുന്നോട്ട് പോകും- ശ്യാമിലി അറിയിച്ചു.
യുവതി ഇപ്പോള്‍ ജനറല്‍ ആശുപത്രിയില്‍ ചികിത്സയിലാണ്.