സംഭവത്തില്‍ സുപ്രീം കോടതി ജഡ്ജിമാര്‍ക്ക് ശക്തമായ പ്രതിഷേധമുണ്ട്. തിങ്കളാഴ്ച ചീഫ് ജസ്റ്റിസിനെ നേരില്‍ കണ്ട് ജഡ്ജിമാര്‍ പ്രതിഷേധമറിയിക്കും. കെ.എം ജോസഫിന്റെ സത്യപ്രതിജ്ഞ ആദ്യം നടത്തണമെന്ന് ആവശ്യപ്പെടാനാണ് ജഡ്ജിമാരുടെ തീരുമാനം.

ജസ്റ്റിസ് കെ.എം ജോസഫിനെ സുപ്രീം കോടതി ജഡ്ജിയാക്കാനുള്ള കൊളീജിയത്തിന്റെ ശുപാര്‍ശ രണ്ട് തവണ കേന്ദ്രസര്‍ക്കാര്‍ മടക്കി അയച്ചിരുന്നു. കൊളീജിയം ശുപാര്‍ശയില്‍ ഉറച്ച് നിന്നതോടെ ഒടുവില്‍ കേന്ദ്രസര്‍ക്കാറി കീഴടങ്ങേണ്ടിവരികയായിരുന്നു.

ഉത്തരാഖണ്ഡിലെ കോണ്‍ഗ്രസ് ഗവണ്‍മെന്റിനെ പിരിച്ചുവിട്ട കേന്ദ്രസര്‍ക്കാര്‍ നടപടി ഉത്തരാഖണ്ഡ് ഹൈക്കോടതി ചീഫ് ജസ്റ്റിസ് ആയിരുന്ന കെ.എം ജോസഫ് സ്റ്റേ ചെയ്തിരുന്നു. ബി.ജെ.പി അധ്യക്ഷന്‍ അമിത് ഷാ ആസൂത്രിതമായി നടത്തിയ നീക്കത്തില്‍ ഹൈക്കോടതി ഇടപെടലുണ്ടായത് കേന്ദ്രസര്‍ക്കാറിനും അമിത് ഷാക്കും വലിയ നാണക്കേടുണ്ടാക്കിയിരുന്നു. ഇതിലുള്ള വിരോധമാണ് കെ.എം ജോസഫിനെതിരെ നിലപാടെടുക്കാന്‍ കാരണം.

ഉന്നത ജുഡീഷ്യറിയിലും ജോസഫിന്റെ നിയമനം വൈകുന്നതില്‍ പ്രതിഷേധമുയര്‍ന്നിരുന്നു. മദ്രാസ് ഹൈക്കോടതി ചീഫ് ജസ്റ്റിസ് ഇന്ദിര ബാനര്‍ജി, ഒഡീഷ ഹൈക്കോടതി ചീഫ് ജസ്റ്റിസ് വിനീത് ശരണ്‍ എന്നിവരും സുപ്രീംകോടതി ജഡ്ജിമാരാകും.

ചീഫ് ജസ്റ്റിസ് ദീപക് മിശ്രയെക്കൂടാതെ ജഡ്ജിമാരായ രഞ്ജന്‍ ഗൊഗോയ്, മദന്‍ ബി. ലൊക്കൂര്‍, കുര്യന്‍ ജോസഫ്, എ.കെ. സിക്രി എന്നിവരുമുള്‍പ്പെട്ട കൊളീജിയമാണ് ഇവരെ ശുപാര്‍ശ ചെയ്തിരുന്നത്. ജസ്റ്റിസ് ജോസഫിന്റെ പേര് പ്രത്യേകമായാണു ശുപാര്‍ശ ചെയ്തിരുന്നത്. കേരള ഹൈക്കോടതി ആക്ടിങ് ചീഫ് ജസ്റ്റിസ് ഋഷികേശ് റോയിയെ ചീഫ് ജസ്റ്റിസായി നിയമിക്കണമെന്നും പട്‌ന ചീഫ് ജസ്റ്റിസ് രാജേന്ദ്ര മേനോനെ ഡല്‍ഹി ഹൈക്കോടതി ചീഫ് ജസ്റ്റിസാക്കണമെന്നും ശുപാര്‍ശ ചെയ്തിരുന്നു.

മലയാളി കൂടിയായ ജസ്റ്റിസ് കെ.എം.ജോസഫിനെ സുപ്രീംകോടതി ജഡ്ജിയായി നിയമിക്കാനുള്ള കൊളീജിയം ശിപാര്‍ശ നേരത്തെ കേന്ദ്ര നിയമ മന്ത്രാലയം മടക്കിയിരുന്നു. എന്നാല്‍ ജസ്റ്റിസ് കെ.എം ജോസഫിനെ വീണ്ടും ശിപാര്‍ശ ചെയ്യാന്‍ സുപ്രീം കോടതിയിലെ അഞ്ച് മുതിര്‍ന്ന ജഡ്ജിമാരുള്‍പ്പെടുന്ന കൊളീജിയം മെയില്‍ തീരുമാനിക്കുകയായിരുന്നു.

ജസ്റ്റിസ് കെ.എം ജോസഫിന് പുറമെ മദ്രാസ്, ഒറീസ ഹൈക്കോടതികളിലെ ചീഫ് ജസ്റ്റിസുമാരെയും കൊളീജിയം സുപ്രീം കോടതി ജഡ്ജിമാരായി ശിപാര്‍ശ ചെയ്തു. ജസ്റ്റിസ് കെ.എം ജോസഫിന്റെ പേരടങ്ങിയ ഫയല്‍ നേരത്തെ കേന്ദ്രം തിരിച്ചയച്ചിരുന്നെങ്കിലും കൊളീജിയം വീണ്ടും ശിപാര്‍ശ സമര്‍പ്പിച്ചതിനാല്‍ ഇനി ശുപാര്‍ശ കേന്ദ്രത്തിന് അംഗീകരിക്കേണ്ടി വരും.

കെ.എം ജോസഫിനൊപ്പം സുപ്രീം കോടതിയിലേക്ക് പരിഗണിക്കപ്പെടേണ്ട മറ്റ് ജഡ്ജിമാരുടെ കാര്യത്തില്‍ തീരുമാനം ആകാത്തത് കൊണ്ടാണ് ശുപാര്‍ശ ചെയ്യല്‍ ജുലൈ വരെ നീണ്ടത്. നിയമ മന്ത്രി രവിശങ്കര്‍ പ്രസാദിന്റെ നിരീക്ഷണങ്ങള്‍ ശ്രദ്ധാപൂര്‍വം പരിഗണിച്ചെങ്കിലും ജസ്റ്റിസ് കെ.എം ജോസഫിന്റെ പേര് വീണ്ടും ശിപാര്‍ശ ചെയ്യുന്നതില്‍ യാതൊരു അപാകതയുമില്ലെന്നാണ് കൊളീജിയത്തിന്റെ തീരുമാനം.