കോഴിക്കോട്: പരിസ്ഥിതി വിഷയത്തില്‍ മന്ത്രി എം.എം മണിക്ക് ദക്ഷിണ നല്‍കി പഠിക്കേണ്ട ഗതികേട് സി.പി.ഐക്കില്ലെന്ന് സംസ്ഥാന സെക്രട്ടറി കാനം രാജേന്ദ്രന്‍. നീലക്കുറിഞ്ഞി വിഷയത്തില്‍ സി.പി.ഐക്ക് ഒന്നും അറിയില്ലെന്ന മന്ത്രി എം.എം മണിയുടെ പ്രസ്താവനയോട് പ്രതികരിക്കുകയായിരുന്നു അദ്ദേഹം.
പ്രകൃതിസംരക്ഷണ വിഷയത്തില്‍ കമ്യൂണിസ്റ്റ് പാര്‍ട്ടിയുടെ വീക്ഷണമാണ് ഞങ്ങള്‍ക്കുള്ളത്. മന്ത്രി എം.എം മണിയെ പോലെ പല കാര്യത്തിലും പരസ്യമായി പ്രതികരിക്കാന്‍ താനില്ലെന്നും കാനം രാജേന്ദ്രന്‍ പറഞ്ഞു. ഗെയില്‍ വിഷയത്തില്‍ ജനങ്ങളുമായി ചര്‍ച്ച നടത്തി സമവായം ഉണ്ടാക്കണമെന്നാണ് പാര്‍ട്ടിയുടെ നിലപാട്. വികസനം വേണ്ട എന്ന നിലപാട് പാര്‍ട്ടിക്കില്ല.
വികസനം ഉറപ്പാക്കണം. എന്നാല്‍ സമരക്കാരുടെ ആവശ്യങ്ങള്‍ പരിഗണിക്കുകയും വേണം. എ.കെ ശശീന്ദ്രനെ വീണ്ടും മന്ത്രിസഭയില്‍ ഉള്‍പ്പെടുത്തുന്ന കാര്യം എന്‍.സി.പിയാണ് തീരുമാനിക്കേണ്ടത്. അവര്‍ തീരുമാനമെടുത്താല്‍ ഇടതുമുന്നണി ചര്‍ച്ച ചെയ്യും -കാനം പറഞ്ഞു. മുന്നണിയുടെ കൂടെ നില്‍ക്കുമ്പോഴും പാര്‍ട്ടി അഭിപ്രായങ്ങള്‍ പാര്‍ട്ടി വേദികളില്‍ പറയാന്‍ മടിയില്ലെന്ന് ഒരു ചോദ്യത്തിന് മറുപടിയായി കാനം പറഞ്ഞു.
റവന്യൂ സെക്രട്ടറി പി.എച്ച് കുര്യനെ മാറ്റണമെന്ന അഭിപ്രായം സി.പി.ഐക്കില്ല. ഏതെങ്കിലും ഉദ്യോഗസ്ഥനെ മാറ്റണമെന്ന അഭിപ്രായവും ഇല്ല. അതെല്ലാം ഭരണനിര്‍വഹണത്തിന്റെ ഭാഗമായി സര്‍ക്കാര്‍ ചെയ്യേണ്ടതാണെന്നുംകാനം പറഞ്ഞു. എം.പി വീരേന്ദ്രകുമാര്‍ ഇപ്പോഴും യു.ഡി.എഫിന്റെ ഭാഗമാണ്. യു.ഡി.എഫ് വിട്ടുവന്നാല്‍ സ്വാഗതം ചെയ്യുമെന്ന് എല്‍.ഡി.എഫ് നേതൃത്വം നേരത്തെ വ്യക്തമാക്കിയതാണ്. കാനം വ്യക്തമാക്കി.

രാജ്യത്തെ ബാധിക്കുന്ന പൊതു വിഷയങ്ങളില്‍ കോണ്‍ഗ്രസ് ഉള്‍പ്പെടെയുള്ള കക്ഷികളുമായി യോജിച്ച് പ്രവര്‍ത്തിച്ച് ബിജെപിയെ പ്രതിരോധിക്കുന്നതില്‍ തെറ്റില്ലെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്‍. സ്വന്തം സംസ്ഥാനത്ത് ഏഴു കൊല്ലത്തേക്ക് സുപ്രീംകോടതി വിലക്കേര്‍പ്പെടുത്തിയ അമിത് ഷായാണ് കേരളത്തെ അപകീര്‍ത്തിപ്പെടുത്താന്‍ യാത്ര നടത്തുന്നതെന്നും സിപിഐ സംസ്ഥാന സെക്രട്ടറി കാനം രാജേന്ദ്രന്‍ പരിഹാസിച്ചു. സൊഹറാബുദ്ധീന്‍ വധക്കേസില്‍ 2010 മുതല്‍ 2017 വരെ അമിത് ഷാക്ക് ഗുജറാത്തില്‍ പ്രവേശിക്കാന്‍ സുപ്രീം കോടതി വിലക്കേര്‍പ്പെടുത്തിയിരുന്നു.

സംസ്ഥാനത്ത് നുഴഞ്ഞുകയറി സംഘര്‍ഷളുണ്ടാക്കാനാണ് ബിജെപി ദേശീയ നേതാക്കള്‍ കുമ്മനത്തിന്റെ ജനരക്ഷാ യാത്രയിലൂടെ ശ്രമിച്ചതെന്നും കാനം ആരോപിച്ചു. സംസ്ഥാനത്തിനെതിരെ പ്രചാരണം നടത്തുന്നവര്‍ കേരളത്തിലെ ജനങ്ങളെ ഒന്നടങ്കം അപമാനപ്പെടുത്താനാണ് ശ്രമി ശ്രമിക്കുന്നതെന്നും കാനം രാജേന്ദ്രന്‍ കൂട്ടിച്ചേര്‍ത്തു.