ആദ്യ സ്‌ഫോടനത്തില്‍ നാല് പേരാണ് കൊല്ലപ്പെട്ടത്. അഞ്ച് പേര്‍ക്ക് പരിക്കേല്‍ക്കുകയും ചെയ്തു. ബൈക്കിലെത്തിയ ചാവേര്‍ ആദ്യം പൊട്ടിത്തേറിക്കുകയായിരുന്നു. സ്‌ഫോടനം നടന്നയുടന്‍ ജനങ്ങള്‍ ചിതറിയോടി. പരിക്കേറ്റവരെ രക്ഷിക്കാനും രക്ഷാപ്രവര്‍ത്തനം നടത്താനും ആളുകള്‍ എത്തിയതോതെ തിരക്കേറി. ഒട്ടേറെ മാധ്യമ പ്രവര്‍ത്തകരും ഫോട്ടോഗ്രഫര്‍മാരും സ്ഥലത്തെത്തവെയാണ് രണ്ടാമത്തെ ആക്രമണം നടന്നത്. സ്‌ഫോടനം റിപ്പോര്‍ട്ട് ചെയ്തു കൊണ്ടിരുന്ന മാധ്യമ പ്രവര്‍ത്തകര്‍ക്കിടയിലേക്ക് രണ്ടാമത്തെ ചാവേര്‍ പാഞ്ഞു കയറുകയായിരുന്നു. ആദ്യ സ്‌ഫോടനം റിപ്പോര്‍ട്ട് ചെയ്യാനെത്തിയ മാധ്യമ സംഘമാണ് രണ്ടാമത്തെ സ്‌ഫോടനത്തില്‍ പ്രധാനമായും ഇരയായത്. ആക്രമണമുണ്ടായത് ശക്തമായ സുരക്ഷാ സജ്ജീകരണങ്ങളുള്ള സ്ഥലത്താണ്. സ്‌ഫോടനം നടന്നതിന്റെ ഏതാനും മീറ്റര്‍ അകലെയാണ് നാറ്റോ ആസ്ഥാനം. സ്‌ഫോടനങ്ങളുടെ പശ്ചാത്തലത്തില്‍ സുരക്ഷ ശക്തിപ്പെടുത്തിയിരിക്കുകയാണ് കാബൂളില്‍. കഴിഞ്ഞാഴ്ച വോട്ടര്‍ രജിസ്‌ട്രേഷന്‍ കേന്ദ്രത്തിലെ സ്‌ഫോടനത്തില്‍ 57 പേര്‍ കൊല്ലപ്പെട്ടിരുന്നു.

ഇന്റലിജന്‍സ് ഓഫീസിനു മുന്നിലായിരുന്നു മറ്റൊരു ആക്രമണം. ഒരു ഭീകരനെ പൊലീസ് വെടിവെച്ച് വീഴ്ത്തിയെങ്കിലും മറ്റൊരു ചാവേര്‍ പൊട്ടിത്തെറിക്കുകയായിരുന്നു. കൊല്ലപ്പെട്ടവരില്‍ കൂടുതലും പൊലീസുകാരും സൈനികരുമാണുള്ളത്. ആക്രമണത്തിന്റെ ഉത്തരവാദിത്തം താലിബാന്‍ ഏറ്റെടുത്തു. വിദേശ സൈനികരെ രാജ്യത്തു നിന്ന് പുറത്താക്കണമെന്നാണ് താലിബാന്റെ ആവശ്യം.