സുപ്രീംകോടതി വിധി നടപ്പാക്കാന്‍ ബാധ്യതയുള്ളതിനാലാണ് കോടതിവിധി നടപ്പാക്കുമെന്നും അതിനാവാശ്യമായ നടപടി സ്വീകരിക്കുമെന്നും പറഞ്ഞത്. എന്നാല്‍ സര്‍ക്കാറിന്റെ പ്രഥമ പരിഗണന ഭക്തരുടെ താല്‍പര്യങ്ങള്‍ സംരക്ഷിക്കുകയെന്നതാണെന്നും മന്ത്രി പറഞ്ഞു.

സുപ്രീംകോടതി വിധിയുടെ പേരില്‍ സര്‍ക്കാര്‍ നടത്തുന്നത് നാടകമാണെന്ന് പ്രതിപക്ഷം ആരോപിച്ചിരുന്നു. ഇത് ശരിവെക്കുന്നതാണ് ദേവസ്വം മന്ത്രിയുടെ നിലപാട്. മലയകയറാന്‍ ആഗ്രഹിക്കുന്ന ഏത് സ്ത്രീക്കും സര്‍ക്കാര്‍ അതിന് അവസരമൊരുക്കുമെന്ന് വീരവാദം പറയുമ്പോള്‍ തന്നെ മലകയറാന്‍ വരുന്ന സ്ത്രീകളെ ഭീഷണിപ്പെടുത്തി തിരിച്ചയക്കുന്ന രീതിയാണ് സര്‍ക്കാര്‍ സ്വീകരിച്ചത്. ഇത് ആസൂത്രിതമായിരുന്നു എന്ന് വ്യക്തമാക്കുന്നതാണ് മന്ത്രിയുടെ പ്രസ്താവന.

ആക്ടിവിസ്റ്റുകള്‍ക്കെതിരെ മന്ത്രി വിമര്‍ശനം ആവര്‍ത്തിച്ചു. ആക്ടിവിസ്റ്റുകള്‍ക്ക് പ്രവര്‍ത്തനമികവ് കാണിക്കാനുള്ള സ്ഥലമല്ല ശബരിമലയെന്നും മന്ത്രി പറഞ്ഞു. സംഘപരിവാര്‍ സംഘടനകള്‍ നടത്തിയ വ്യാജപ്രചരണങ്ങള്‍ മൂലമാണ് ഇത്തവണ തീര്‍ത്ഥാടകര്‍ കുറഞ്ഞതെന്നും മന്ത്രി പറഞ്ഞു.

സി.പി.എമ്മിന്റെയും മുഖ്യമന്ത്രിയുടേയും പ്രഖ്യാപിത നിലപാടില്‍ നിന്നുള്ള മാറ്റമാണ് ദേവസ്വം മന്ത്രിയുടേത്. ഏതെങ്കിലും സ്ത്രീ ശബരിമലയില്‍ ദര്‍ശനത്തിനെത്തിയാല്‍ സര്‍ക്കാര്‍ സംരക്ഷണം കൊടുക്കുമെന്നാണ് മുഖ്യമന്ത്രിയും സി.പി.എം സെക്രട്ടറി കോടിയേരി ബാലകൃഷ്ണനും പറഞ്ഞിരുന്നത്. എന്നാല്‍ വന്ന സ്ത്രീകളെയെല്ലാം പൊലീസ് സുരക്ഷാപ്രശ്‌നം പറഞ്ഞ് തിരിച്ചയക്കുകയായിരുന്നു.

ശബരിമലയില്‍ യഥാര്‍ത്ഥത്തില്‍ നടക്കുന്നത് സര്‍ക്കാറും സംഘപരിവാറും ഒത്തുകളിക്കുന്ന നാടകമാണെന്ന പ്രതിപക്ഷ ആരോപണം ശരിവെക്കുന്നതാണ് ദേവസ്വം മന്ത്രിയുടെ പുതിയ നിലപാട്.

അമ്മയില്‍ ഏത് എം.പിയും എം.എല്‍.എയും ഉണ്ടായാലും സര്‍ക്കാര്‍ ഇരക്കൊപ്പമായിരിക്കും. അമ്മ ഒരു സ്വതന്ത്രസംഘടനയാണ്. ദിലീപിനെ തിരിച്ചെടുക്കാനുള്ള തീരുമാനം അവരുടെ ആഭ്യന്തര കാര്യമാണ്. അവര്‍ക്ക് ഏത് നിലപാട് വേണമെങ്കിലും സ്വീകരിക്കാമെന്നും എന്നാല്‍ കേരളത്തിലെ സാംസ്‌ക്കാരിക പാരമ്പര്യം ഉള്‍ക്കൊള്ളുന്ന സമീപനമാണ് അമ്മയിലെ അംഗങ്ങള്‍ സ്വീകരിക്കേണ്ടതെന്നും മന്ത്രി പറഞ്ഞു. ഈ വിഷയത്തില്‍ സര്‍ക്കാരിനും പാര്‍ട്ടിക്കും ഒരേ നിലപാടാണന്നും അദ്ദേഹം കൂട്ടിച്ചേര്‍ത്തു.