കലോത്സവ വിജയത്തിനായി പ്രയത്‌നിച്ച എല്ലാവര്‍ക്കും മന്ത്രി നന്ദി അറിയിച്ചു. സംഘാടകര്‍ മുതല്‍ ഗ്രീന്‍ പ്രോട്ടോക്കോള്‍ അടങ്ങിയ എല്ലാ അംഗങ്ങള്‍ക്കും നന്ദി അറിയിച്ച് കൊണ്ടാണ് മന്ത്രി സമാപന പ്രസംഗം നടത്തിയത്. അധ്യാപക സംഘടനകള്‍, റിസപ്ഷന്‍, രജിസ്‌ട്രേഷന്‍, താമസം, ഭക്ഷണം, പബ്ലിസിറ്റി, പ്രോഗ്രാം, ലൈറ്റ് ആന്‍ഡ് സൗണ്ട്, സ്‌റ്റേജ് ആന്‍ഡ് പന്തല്‍, ഗതാഗതം, വെല്‍ഫയര്‍, ലോ ആന്‍ഡ് ഓര്‍ഡര്‍, ട്രോഫി, ദൃശ്യ വിസ്മയം, ധനകാര്യം, സുവനീര്‍, സംസ്‌കൃതോത്സവം, അറബിക് കലോത്സവം, സാംസ്‌കാരിക പരിപാടികള്‍, എക്‌സിബിഷന്‍, മീഡിയ, ഗ്രീന്‍ പ്രോട്ടോകോള്‍ തുടങ്ങി എല്ലാ കമ്മിറ്റികള്‍ക്കും നന്ദി അറിയിച്ചു.

അടുത്ത കലോത്സവം മുതല്‍ നോണ്‍വെജ് വിളമ്പുന്ന കാര്യം പരിഗണിക്കുമെന്നും മന്ത്രി സൂചിപ്പിച്ചു.
വെജിറ്റേറിയന്‍ ഇഷ്ടമുള്ളവര്‍ക്ക് വെജിറ്റേറിയനും നോണ്‍ വെജിറ്റേറിയന്‍ ഇഷ്ടമുള്ളവര്‍ക്ക് നോണ്‍ വെജിറ്റേറിയനും കഴിക്കാനും സൗകര്യമൊരുക്കും. കലോത്സവ മാനുവല്‍ പുതുക്കുന്നതിലും ജഡ്ജസിനെ തിരഞ്ഞെടുക്കുന്നതിനും കൂടുതല്‍ പരിഷ്‌കരണങ്ങള്‍ കൊണ്ടുവരേണ്ടതുണ്ടെന്നും മന്ത്രി പറഞ്ഞു.

സ്‌കൂള്‍ കലോത്സവ ആഘോഷം കോഴിക്കോട് പൊടി പൊടിക്കുമ്പോള്‍ മത്സരാര്‍ത്ഥികളും കാണികളും ഉള്‍പ്പെടെ വലിയ ജനസമൂഹം കോവിഡിനെ മറന്ന സ്ഥിതിയാണ്. മാസ്‌കും സാനിറ്റൈസറും പോലുള്ള കോവിഡ് പ്രതിരോധ പ്രവര്‍ത്തനങ്ങള്‍ ഈ തിരക്കിനിടയില്‍ ആരും കാര്യമായി എടുക്കുന്നില്ല.

ചൈനയിലടക്കം കോവിഡിന്റെ വകഭേദങ്ങള്‍ റിപ്പോര്‍ട്ട് ചെയ്തതിന്റെ സാഹചര്യത്തില്‍ കലോത്സവ വേദിയിലും മാസ്‌ക് നിര്‍ബന്ധമായി ഉപയോഗിക്കണമെന്ന് മുഖ്യമന്ത്രി പിണറായി വിജയനും വിദ്യാഭ്യാസ മന്ത്രി വി ശിവന്‍കുട്ടിയും വ്യക്തമാക്കിയിരുന്നു. എന്നാല്‍ കഴിഞ്ഞദിവസം ഉദ്ഘാടനത്തിന് എത്തിയ മുഖ്യമന്ത്രി ഉള്‍പ്പെടെ വേദിയിലുള്ള ആരും തന്നെ മാസ്‌ക് ഇടാത്ത സ്ഥിതിയായിരുന്നു ഉണ്ടായിരുന്നത്.

മാസ്‌കും സാനിറ്റൈസറും ഉപേക്ഷിക്കാനുള്ള സമയം ഇതുവരെ കൈ വന്നിട്ടില്ലെന്നും നിലവില്‍ വിദേശ രാജ്യങ്ങള്‍ റിപ്പോര്‍ട്ട് ചെയ്യപ്പെട്ട പുതിയ വകഭേദങ്ങള്‍ ഇന്ത്യയില്‍ സ്ഥിരീകരിച്ച സാഹചര്യത്തില്‍ കൂടുതല്‍ ജാഗ്രത പുലര്‍ത്തണമെന്നും കേന്ദ്രസര്‍ക്കാര്‍ അടക്കം മുന്നറിയിപ്പ് നല്‍കിയിരുന്നു.

സംസ്ഥാന സ്കൂൾ കലോത്സവം കോഴിക്കോട് തകൃതിയായി നടക്കുമ്പോൾ ശ്രദ്ധേയമാവുകയാണ് ഓരോ ഇനങ്ങളും. വേദി ആറിൽ ഹയർസെക്കൻഡറി വിഭാഗം ചെണ്ടമേളത്തിൽ പങ്കെടുത്ത ഇരട്ട പെൺ കുട്ടികളാണ് ഇന്ന് താരമായിരിക്കുന്നത്.

അതുല്യ, ആതിര എന്ന പേരുള്ള ഇവർ പാലക്കാട് ഭാരത മാതാ ഹയർസെക്കൻഡറി സ്കൂളിൽ നിന്നാണ്. ഏഴു പേരടങ്ങുന്ന ടീമിൽ അതുല്യ ചെണ്ടയും ആതിര കുഴലുമാണ് വായിക്കുന്നത്. മത്സരത്തിന് സമ്പൂർണ്ണ പിന്തുണയുമായി അച്ഛൻ ബാബു സുരേഷും, അമ്മ സരിതയും വേദിയിൽ തന്നെയുണ്ട്.

മക്കൾ സ്വമേധയായാണ് കലോത്സവത്തിന് വേണ്ടി പഠിച്ചെടുത്തതാണെന്നും കേവലം മൂന്ന് മാസം സമയമാണ് എടുത്തെന്നും മാതാപിതാക്കൾ പറയുന്നു.

ചെണ്ടമേളത്തിൽ 20 വർഷത്തോളം പരിചയമുള്ള മഠത്തിൽ ഹരി, കല്ലേപ്പുള്ളി സതീശൻ, ഓലശ്ശേരി രാമദാസ് എന്നിവരാണ് സംഘത്തിന്റെ ഗുരുക്കന്മാർ.

ഒന്നുമറിയാത്ത കുട്ടികളിൽ നിന്നാണ് ഇവരെ വളർത്തിയെടുത്തതെന്നും പരിപാടിയിൽ ഓരോ വിദ്യാർത്ഥികളുടെയും മാതാപിതാക്കൾ തന്ന പിന്തുണ പറഞ്ഞറിയിക്കുന്നതിലും അപ്പുറമാണെന്നും ഗുരുക്കന്മാർ പറയുന്നു.

ഏഴു പേരടങ്ങുന്ന സംഘത്തിൽ അതുല്യയും ആതിരയെയും കൂടാതെ പെൺകുട്ടിയായി ഋഷികയുമുണ്ട്. അവിനാശ്, ആദർശ്, അനന്തകൃഷ്ണൻ ആനന്ദ് എന്നിവരാണ് മറ്റുള്ളവർ.

പൊതുവേ പെൺകുട്ടികൾ അധികം കാണാത്ത ചെണ്ടമേളത്തിൽ ഇവരെ ഇവരെ കണ്ടതിലുള്ള കൗതുകവും സന്തോഷവും കാണികൾ തന്നെ പങ്കുവെക്കുന്നുണ്ട്.

കോഴിക്കോട് : സംസ്ഥാന സ്‌കൂള്‍ കലോത്സവത്തിന് 61 വയസ്സ് തികയുമ്പോള്‍ 53 കലോത്സവത്തിലും പങ്കെടുത്ത ഒരാളുണ്ട് ഇവിടെ. കേരളത്തില്‍ മറ്റാര്‍ക്കും അവകാശപ്പെടാന്‍ ആവാത്ത ഈ അപൂര്‍വ നേട്ടത്തിനുടമ ഒരു സ്വാമിയാണ്. എറണാകുളം കൂവപ്പടിയിലെ ആനന്ദതീര്‍ത്ഥം മഠത്തിലെ സ്വാമി യതീന്ദ്ര തീര്‍ത്ഥ.

1962 മുതലാണ് കലോത്സവ നഗരിയിലേക്കുള്ള ഈ യാത്രയ്ക്ക് തുടക്കമായത്. ചങ്ങനാശ്ശേരി ഹിന്ദു കോളേജിലായിരുന്നു അന്ന് കലോത്സവം. ഈ 73 വയസ്സിലും കലോത്സവ നഗരിയില്‍ എത്താനും കലാകാരന്മാരെ അനുഗ്രഹിക്കാനും സ്വാമിക്ക് സന്തോഷമേയുള്ളൂ.

പ്രധാന വേദിയായ വിക്രം മൈതാനിയില്‍ കഴിഞ്ഞ ദിവസം രാവിലെ തന്നെ സ്വാമിജി എത്തിയിരുന്നു. കലോത്സവ നഗരിയിലുള്ള ഊട്ടുപുരയില്‍ നിന്നു തന്നെയാണ് ഭക്ഷണവും. ചന്ദ്രികയെ കുറിച്ച് പറയാനും അദ്ദേഹം മറന്നില്ല. ചന്ദ്രികയുടെ സ്റ്റാള്‍ സന്ദര്‍ശിച്ച അദ്ദേഹം കലോത്സവം വിശേഷങ്ങളും ജീവനക്കാരുമായി പങ്കുവെച്ചു.