ജനങ്ങള്‍ അര്‍പ്പിച്ച വിശ്വാസത്തിനും സ്‌നേഹത്തിനും നന്ദി പറഞ്ഞ കമല തുടര്‍ന്നു. ‘നമ്മള്‍ പ്രതീക്ഷിച്ചതിന്റെയോ പോരാടിയതിന്റെയോ ഫലമല്ല തെരഞ്ഞെടുപ്പില്‍ പ്രതിഫലിച്ചത്. എന്നാല്‍ തളരാത്ത കാലത്തോളം അമേരിക്കയുടെ വാഗ്ദാനത്തിന്റെ വെളിച്ചം അണഞ്ഞു പോകില്ല’. താന്‍ നടത്തിയ പോരാട്ടത്തിലും നടത്തിയ രീതിയിലും ഏറെ അഭിമാനമുണ്ടെന്നും കമല പറഞ്ഞു.

ഇരുണ്ട കാലത്തിലേക്കാണ് പ്രവേശിക്കുന്നതെന്ന് പലരും കരുതുന്നു. അങ്ങനെയാവില്ലെന്ന് പ്രതീക്ഷിക്കാമെന്നും കമല പറഞ്ഞു. ട്രംപിനോട് ഫോണില്‍ വിളിച്ച് സംസാരിച്ചെന്നും വിജയാശംസകള്‍ നേര്‍ന്നെന്നും സമാധാനപരമായ ഭരണകൈമാറ്റത്തിന് താന്‍ തയാറാണെന്നും കമല ഹാരിസ് കൂട്ടിച്ചേര്‍ത്തു.

സഹജീവി സ്‌നേഹവും കരുണയും മൂല്യബോധവും പരോപകാര ശീലവും തന്നില്‍ വളര്‍ത്തിയെടുത്തത് അമ്മ ശ്യാമള ഗോപാലന്‍ ആണെന്ന് കമല പറഞ്ഞു. ‘സമൂഹത്തെ സേവിക്കുമ്പോഴാണു ജീവിതം സാര്‍ഥകമാകുന്നതെന്ന് അമ്മയാണ് എന്നെ പഠിപ്പിച്ചത്. ഇപ്പോഴീ രാത്രിയില്‍ അമ്മ അരികിലുണ്ടായിരുന്നെങ്കിലെന്ന് ഞാന്‍ ആഗ്രഹിച്ചു പോകുന്നു.’ കമല കൂട്ടിച്ചേര്‍ത്തു.2009ലാണു ശ്യാമള മരിച്ചത്.

പാര്‍ട്ടി നാമനിര്‍ദേശം സ്വീകരിച്ചുള്ള പ്രസംഗത്തില്‍ തന്റെ തമിഴ് പൈതൃകം ചേര്‍ത്തുപിടിക്കാന്‍ കമല ഹാരിസ് മറന്നില്ല. കുടുംബമെന്നാല്‍ തന്നെ സംബന്ധിച്ചിടത്തോളം ഭര്‍ത്താവും മക്കളും അമ്മാവന്മാരും ചിത്തിമാരും (അമ്മയുടെ സഹോദരിമാര്‍) ആണെന്നാണു കമല പറഞ്ഞത്. ‘ചിത്തി’ എന്ന തമിഴ് വാക്ക് ഉപയോഗിച്ചതു ലോകമെങ്ങും തമിഴ് സമൂഹം ആഘോഷിച്ചു. അമേരിക്കയില്‍ ഇന്നലെ കൂടുതല്‍ പേര്‍ ഗൂഗിളില്‍ തിരഞ്ഞ വാക്കും ചിത്തി തന്നെ.