Kannur bomb blast – Chandrika Daily

കണ്ണൂരില്‍ വീണ്ടും സ്‌ഫോടനം; പൊട്ടിത്തെറിച്ചത് പറമ്പില്‍ നിന്ന് കണ്ടെത്തിയ സ്റ്റീല്‍ ബോംബുകള്‍

chandrika — Sat, 05 Sep 2020 17:46:43 +0000

കണ്ണൂര്‍: തലശ്ശേരിയില്‍ ബോംബു നിര്‍മാണത്തിനിടെ നടന്ന സ്‌ഫോടനത്തിന് പിന്നാലെ കണ്ണൂരില്‍ വീണ്ടും സ്‌ഫോടനം. ശനിയാഴ്ച വൈകീട്ട് പാനൂര്‍ പടന്നക്കരയില്‍ കാഞ്ഞിരക്കടവ് പുഴയോരത്താണ് സ്‌ഫോടനം ഉണ്ടായത്. ആള്‍പാര്‍പ്പില്ലാത്ത പറമ്പില്‍ നിന്ന് കിട്ടിയ സ്റ്റീല്‍പാത്രങ്ങള്‍ ബോംബുകളാണെന്നറിയാതെ പുഴയിലെറിഞ്ഞപ്പോളാണ് വന്‍സ്ഫോടനമുണ്ടായത്.

വൈകീട്ട് 6 മണിയോടെയാണ് സംഭവം. പറമ്പ് വൃത്തിയാക്കുന്നതിനിടയില്‍ കിട്ടിയ സ്റ്റീല്‍ പാത്രങ്ങള്‍ കൂടോത്രം ചെയ്ത വസ്തുക്കളാണെന്ന് ധരിച്ചാണ് ഉപേക്ഷിക്കാന്‍ വീട്ടുകാര്‍ തീരുമാനിച്ചത്. പാനൂര്‍ നഗരസഭാപരിധിയില്‍ പടന്നക്കരയിലെ കൊളങ്ങരക്കണ്ടി പദ്മനാഭന്റെ പറമ്പ് വൃത്തിയാക്കുന്നതിനിടയിലാണ് രണ്ട് സ്റ്റീല്‍പാത്രങ്ങള്‍ കിട്ടിയത്. ബാംഗ്ലൂരില്‍ സ്ഥിരതാമസമാക്കിയ ഇവരുടെ വീട് അടച്ചിട്ടിരിക്കുകയായിരുന്നു. സ്റ്റീല്‍ ബോംബാണിതെന്നറിയാതെ കാറില്‍ കൊണ്ടുപോയി കാഞ്ഞിരക്കടവ് പാലത്തില്‍ നിന്ന് പുഴയിലെറിഞ്ഞു. തുടര്‍ന്ന് ഉഗ്രശബ്ദത്തോടെ സ്‌ഫോടനമുണ്ടാവുകയായിരുന്നു. ശബ്ദം കേട്ട ഭീതിയിലായ നാട്ടുകാര്‍ കൂട്ടത്തോടെ പുഴയോരത്തേക്കെത്തി. ചൊക്ലി പോലീസ് സംഭവസ്ഥലത്തെത്തി പരിശോധന നടത്തി. ബോംബ് സ്ഫോടനത്തെക്കുറിച്ച് സമഗ്രാന്വേഷണം നടത്തണമെന്ന് കരിയാട് മണ്ഡലം കോണ്‍ഗ്രസ് കമ്മിറ്റിയും പടന്നക്കര വാര്‍ഡ് കമ്മിറ്റിയും ആവശ്യപ്പെട്ടു.

തലശ്ശേരി ബോംബ് നിര്‍മ്മാണത്തിനിടെ സ്‌ഫോടനം; ടി.പി വധക്കേസില്‍ പ്രതിയായിരുന്നയാള്‍ക്ക് ഗുരുതര പരിക്ക്

chandrika — Fri, 04 Sep 2020 13:30:32 +0000

തലശ്ശേരി: കണ്ണൂര്‍ തലശ്ശേരിക്കടുത്ത് പൊന്ന്യത്ത് ബോംബ് നിര്‍മ്മാണത്തിനിടെയുണ്ടായ സ്‌ഫോടനത്തില്‍ പരിക്കേറ്റവരില്‍ ടി.പി വധക്കേസില്‍ പ്രതിയായിരുന്ന ആളും. ടി പി വധക്കേസില്‍ പ്രതിയായിരുന്ന രമീഷിനാണ് ഗുരുതരമായി പരിക്കേറ്റത്. ഇയാളുള്‍പ്പെടെ രണ്ടുപേര്‍ക്ക് പരിക്കേറ്റതായി റിപ്പോര്‍ട്ടുണ്ട്. ഒരാളുടെ ഇരു കൈകളും നഷ്ടപ്പെട്ടതായും റിപ്പോര്‍ട്ടുണ്ട്. ഇത് രമീഷാണെന്നും സൂചനയുണ്ട്.

ഇന്ന് ഉച്ചക്ക് രണ്ടരയോടെയാണ് കതിരൂരില്‍ ബോംബ് നിര്‍മ്മാണത്തിനിടെ സ്‌ഫോടനമുണ്ടായത്. മൂന്ന് പേരാണ് സംഘത്തിലുണ്ടായിരുന്നത് എന്നാണ് പ്രാഥമിക നിഗമനം. ഇതില്‍ മാഹി സ്വദേശികളായ എം.റമീഷ്, ഭീരജ് എന്നിവരെ തിരിച്ചറിഞ്ഞിട്ടുണ്ട്. ഇതില്‍ വടകര അഴിയൂര്‍ കളവറത്ത് രമ്യത നിവാസില്‍ കുട്ടു എന്ന പി.എം രമീഷ്, ടി.പി ചന്ദ്രശേഖരന്‍ വധക്കേസിലെ 24ാം പ്രതിയായിരുന്നു. അഴിയൂര്‍ സ്വദേശിയായ രമീഷിനതിരെ തെളിവ് ലഭിക്കാത്തതോടെ കോടതി വെറുതെവിടുകയായിരുന്നു. കൊടിസുനിയുമായി അടുത്ത ബന്ധമുള്ള ആളാണ് രമീഷ്.

തലശ്ശേരിയിൽ ബോംബ് നിർമാണത്തിനിടെ സ്ഫോടനം; സി.പി.എമ്മുകാർക്ക് പരിക്ക്

chandrika — Fri, 04 Sep 2020 11:05:58 +0000

തലശ്ശേരി: കണ്ണൂര്‍ തലശേരിയില്‍ ബോംബ് സ്ഫോടനത്തില്‍ മൂന്ന് പേര്‍ക്ക് ഗുരുതര പരിക്ക്. തലശ്ശേരി പൊന്ന്യംചൂളയിലാണ് അപകടം നടന്നത്. ബോംബ് നിര്‍മാണത്തിനിടയിലാണ് സ്ഫോടനമെന്ന് സംശയിക്കുന്നു. പരിക്കേറ്റവര്‍ സിപിംഎമ്മുകരാണെന്നാണ് വിവരം.

ഇന്ന് ഉച്ചയോടെയാണ് സംഭവം. പരിക്കേറ്റ ഒരാളുടെ നില അതീവ ഗുരുതരമാണ്. മാഹി സ്വദേശിയായ റെനീഷിന്റെ രണ്ട് കൈകളും അറ്റതായാണ് വിവരം. പരിക്കേറ്റവരുടെ കൈകള്‍ക്കും കണ്ണുകള്‍ക്കുമാണ് പരിക്ക്. പരിക്കേറ്റവരെ തലശ്ശേരിയിലെ പ്രധാന ആശുപത്രികളിലേക്ക് മാറ്റി.

കതിരൂര്‍ പോലീസ് സ്റ്റേഷന്‍ പരിധിയില്‍പ്പെടുന്ന സ്ഥലമാണിത്. പോലീസ് പ്രദേശത്ത് പരിശോധന നടത്തുകയാണ്. ഭക്ഷണം കഴിച്ചതിന്റെയുള്‍പ്പെടെ അവശിഷ്ടങ്ങളും ചോരപ്പാടുകളും മറ്റും സംഭവസ്ഥത്തുണ്ട്. പ്രദേശത്തുനിന്ന് നിര്‍മിച്ചുവെച്ച 15 ബോംബുകള്‍ കണ്ടെടുത്തു. സ്റ്റീൽ ബോംബുകളാണ് പൊട്ടിയത്. ജില്ലാ പോലീസ് മേധാവി ഉള്‍പ്പെടെയുള്ളവര്‍ സ്ഥലം സന്ദര്‍ശിക്കും.

പയ്യന്നൂരില്‍ റെയ്ഡ്; രണ്ട് സ്റ്റീല്‍ ബോംബുകള്‍ കണ്ടെടുത്തു

chandrika — Thu, 19 Jul 2018 17:42:11 +0000

പയ്യന്നൂര്‍: സംഘര്‍ഷ ബാധിത പ്രദേശമായ രാമന്തളിയിലെ കക്കംപാറ, ചിറ്റടി പ്രദേശങ്ങളില്‍ ബോംബ് സ്‌ക്വാഡ്, ഡോഗ് സ്‌ക്വാഡ്, പയ്യന്നൂര്‍ പൊലീസ് എന്നിവര്‍ ചേര്‍ന്ന് നടത്തിയ സംയുക്ത റെയ്ഡില്‍ ഉഗ്രസ്‌ഫോടന ശക്തിയുള്ള രണ്ട് സ്റ്റീല്‍ ബോംബുകള്‍ കണ്ടെടുത്തു.
കക്കംപാറ ചിറ്റടിയിലെ ആളൊഴിഞ്ഞ പറമ്പില്‍ കുറ്റിക്കാട്ടില്‍ ഒളിപ്പിച്ചു വെച്ച നിലയിലായിരുന്നു ബോംബുകള്‍ ഉണ്ടായിരുന്നത്. ഇന്നലെ രാവിലെ മുതല്‍ പയ്യന്നൂര്‍ സി.ഐ കെ.വിനോദ് കുമാറിന്റെ നേതൃത്വത്തില്‍ പയ്യന്നൂര്‍ പൊലീസും എസ്.ഐ ടി.വി.ശശിധരന്റെ നേതൃത്വത്തില്‍ കണ്ണൂരില്‍ നിന്നെത്തിയ ബോംബ് സ്‌ക്വാഡും ഡോഗ് സ്‌ക്വാഡും സംയുക്തമായി നടത്തിയ റെയ്ഡിലാണ് ബോംബുകള്‍ കണ്ടെത്തിയത്.മാരകശേഷിയുള്ള ബോംബുകളാണിതെന്ന് ബോംബ് സ്‌ക്വാഡ് എസ്.ഐ ശശിധരന്‍ പറഞ്ഞു. രണ്ട് ബോംബുകളും സംഭവസ്ഥലത്ത് വെച്ച് തന്നെ നിര്‍വീര്യമാക്കി.
ബുധനാഴ്ച രാത്രി ഈ പ്രദേശത്ത് നിന്ന് ബോംബ് സ്‌ഫോടനത്തിന്റെ ശബ്ദം നാട്ടുകാര്‍ കേട്ടിരുന്നു. വിവരമറിയിച്ചതിനെ തുടര്‍ന്നാണ് ബോംബ് സ്‌ക്വാഡും പൊലീസും റെയ്ഡിനെത്തിയത്. നേരത്തെ ഒരു സി.പി.എം പ്രവര്‍ത്തകനും ഒരു ബി.ജെ.പി പ്രവര്‍ത്തകനും കൊല്ലപ്പെടുകയും വലിയ തോതിലുള്ള രാഷ്ട്രീയ സംഘര്‍ഷം അരങ്ങേറുകയും ചെയ്തപ്രദേശമായതിനാല്‍ ബോംബ് കണ്ടെടുത്ത സംഭവം പൊലീസ് ഗൗരവത്തോടെയാണ് കാണുന്നത്.
പ്രദേശത്ത് ഇടക്കിടെ രാത്രി കാലങ്ങളില്‍ വന്‍ സ്‌ഫോടനങ്ങള്‍ നടക്കാറുണ്ടെങ്കിലും ഉറവിടം കണ്ടെത്താന്‍ പൊലീസിനു സാധിച്ചിരുന്നില്ല. സ്‌ഫോടനങ്ങളും ഇപ്പോള്‍ ബോംബ് കണ്ടെടുത്ത സംഭവവും നാട്ടുകാരെ ഭീതിയിലാക്കിയിട്ടുണ്ട്. ബോംബ് സ്‌ക്വാഡിലെ പി.പി ശിവദാസന്‍, സി.പി ബിനീഷ്, ദിനേശ് എന്നിവരും പയ്യന്നൂര്‍ എസ്.ഐ നിജീഷ്, എ.എസ്.ഐ ഗിരീഷ്, സീനിയര്‍ സിവില്‍ പൊലീസ് ഓഫീസര്‍ രാജേഷ് എന്നിവരും റെയ്ഡിനുണ്ടായിരുന്നു.

ബോംബ് നിര്‍മാണത്തിനിടെ സ്‌ഫോടനം: ആര്‍.എസ്.എസ് പ്രവര്‍ത്തകന് കൈപ്പത്തി തകര്‍ന്നു

chandrika — Thu, 12 Apr 2018 12:23:48 +0000

കണ്ണൂര്‍: കണ്ണൂരില്‍ ബോംബ് നിര്‍മാണത്തിനിടെയുണ്ടായ സ്‌ഫോടനത്തില്‍ ആര്‍.എസ്.എസ് പ്രവര്‍ത്തകന്റെ കൈപ്പത്തി തകര്‍ന്നു. പേരാവൂര്‍, കാക്കയങ്ങാട് സ്വദേശി സന്തോഷിനാണ് ഗുരുതരമായി പരിക്കേറ്റത്.

ഇയാളെ തലശ്ശേരിയിലെ സ്വകാര്യ ആസ്പത്രിയില്‍ പ്രവേശിപ്പിച്ചിരിക്കുകയാണ്. ഇന്നലെ രാത്രി 11 മണിയോടെയാണ് സംഭവം. വീട്ടിലെ മുറിയില്‍ വെച്ചാണ് സന്തോഷ് ബോംബ് നിര്‍മിച്ചത്. ഇതിനിടെ ഉഗ്ര ശബ്ദത്തോടെ ബോംബ് പൊട്ടിത്തെറിക്കുകയായിരുന്നു.

ശബ്ദം കേട്ട് ഓടിയെത്തിയ നാട്ടുകാര്‍ പരിക്കേറ്റ സന്തോഷിനെ ഇരിട്ടി സ്വകാര്യ ആസ്പത്രിയിലും തുടര്‍ന്ന് തലശ്ശേരിയിലെ സ്വകാര്യ ആസ്പത്രിയിലും പ്രവേശിപ്പിക്കുകയായിരുന്നു.