അതേ സമയം, ടിപി വധക്കേസിലെ പ്രതിയായ ജ്യോതിബാബുവിന്റെ ജാമ്യാപേക്ഷ സുപ്രീംകോടതി ഇന്ന് പരിഗണിക്കും. ജസ്റ്റിസ് എം എം സുന്ദരേഷ് അധ്യക്ഷനായ ബെഞ്ചാണ് പരിഗണിക്കുന്നത്. ആരോഗ്യ-കാരണങ്ങളാലാണ് ജാമ്യാപേക്ഷ. ജ്യോതിബാബുവിന്റെ ജാമ്യാപേക്ഷ നേരത്തെ പരിഗണിച്ചപ്പോള്‍ സര്‍ക്കാര്‍ എതിര്‍ത്തിരുന്നില്ല. ഭരണ കക്ഷിയില്‍പ്പെട്ട ആളായതിനാലാണ് സര്‍ക്കാര്‍ എതിര്‍ക്കാത്തതെന്നും ജ്യോതിബാബുവിന് ജാമ്യം നല്‍കരുതെന്നും കെ.കെ.രമയുടെ അഭിഭാഷകന്‍ വാദിച്ചിരുന്നു.

ഇന്നലെയാണ് ജയിലിലെ മതില്‍ക്കെട്ടിനു പുറത്തുനിന്ന് മൊബൈല്‍ ഫോണും പുകയില ഉല്‍പന്നങ്ങളും ജയിലിനുള്ളിലേക്ക് എറിഞ്ഞു കൊടുക്കുന്നതിനിടയിലാണ് പുതിയതെരു പനങ്കാവ് സ്വദേശി അക്ഷയെ പൊലീസ് പിടിക്കൂടിയത്. കൂടെ ഉണ്ടായിരുന്ന രണ്ടു പേര്‍ ഓടിരക്ഷപ്പെട്ടിരുന്നു. തുടര്‍ന്ന് നടത്തിയ ചോദ്യം ചെയ്യലിലാണ് ജയിലിനുള്ളിലേക്ക് മൊബൈലും ലഹരി ഉല്‍പന്നങ്ങളും എറിഞ്ഞു നല്‍കുന്ന റാക്കറ്റിനെ കുറിച്ച് അക്ഷയ് പൊലീസിന് മൊഴി നല്‍കിയത്.

വാട്‌സ്ആപ്പ് വഴിയാണ് നിര്‍ദേശങ്ങള്‍ ലഭിക്കുന്നത്. സാധനങ്ങള്‍ എറിഞ്ഞു നല്‍കാന്‍ ആഴ്ചയില്‍ ഒരു ദിവസം തിരഞ്ഞെടുക്കും. ആര്‍ക്കാണ് എറിഞ്ഞു കൊടുക്കുന്നത് എന്ന് അറിയില്ല. എറിഞ്ഞു നല്‍കേണ്ട സ്ഥലത്തിന്റെ അടയാളം നേരത്തെ നിര്‍ദേശിക്കും. അവിടെക്കാണ് പൊതിക്കെട്ട് എറിയേണ്ടത്. ശ്രമം വിജയിച്ചാല്‍ ഗൂഗിള്‍ പേ വഴി പ്രതിഫലം ലഭിക്കും. സംഘത്തില്‍ രണ്ട് ഗ്രൂപ്പുകള്‍ ഉണ്ട്. ഒന്ന് തടവുകാരുമായി നേരിട്ട് ബന്ധമുള്ളവര്‍. രണ്ട് ജയിലിനുള്ളിലേക്ക് സാധനങ്ങള്‍ എറിഞ്ഞു കൊടുക്കുന്നവര്‍.

സംഘത്തിലെ ഒരു കണ്ണി മാത്രമാണ് അക്ഷയ്. രക്ഷപ്പെട്ട രണ്ടുപേരെ പിടികൂടാനുള്ള ശ്രമം തുടരുകയാണ്. ഗോവിന്ദച്ചാമിയുടെ തടവുചാട്ടത്തിനുശേഷം ജയില്‍ സുരക്ഷ കൂട്ടിയിട്ടുണ്ട്. ഇതോടെയാണ് പുറത്തുനിന്ന് എറിഞ്ഞു നല്‍കുന്ന സംഘം സജീവമാകാന്‍ കാരണമെന്നാണ് പൊലീസ് പറയുന്നത്.

ഗോവിന്ദച്ചാമിയുടെ ജയില്‍ചാട്ടം അന്വേഷിക്കുന്നതിന് വേണ്ടി സര്‍ക്കാര്‍ നിയോഗിച്ച അന്വേഷണ സമിതിയാണ് മൊബൈല്‍ ഫോണ്‍ പിടികൂടിയത്.

കാലപഴക്കം ചെന്ന സെല്ലുകളും, തകരാനായ മതിലുകളും കണ്ണൂര്‍ സെന്‍ട്രല്‍ ജയിലിലുണ്ട്. ഇത് സുരക്ഷ ഭീഷണിയാണെന്ന് ഗോവിന്ദച്ചാമിയുടെ ജയില്‍ചാട്ടം അന്വേഷിക്കുന്ന സമിതി ഉന്നത ജയില്‍ ഉദ്യോഗസ്ഥരുമായി ചര്‍ച്ച ചെയ്തു. ഉത്തര മേഖല ജയില്‍ ഡി ഐ ജി, കണ്ണൂര്‍ സെന്‍ട്രല്‍ ജയില്‍ സൂപ്രണ്ട് ഉള്‍പ്പടെ യോഗത്തില്‍ പങ്കെടുത്തിരുന്നു. വരും ദിവസങ്ങളില്‍ സംസ്ഥാനത്തെ മറ്റ് ജയിലുകളിലും അന്വേഷണ സമിതി പരിശോധന നടത്തും.