കരുവന്നൂരില്‍ സിപിഎമ്മിന് രഹസ്യ അക്കൗണ്ടുകള്‍ ഉണ്ട് എന്നാണ് ഇഡിയുടെ കണ്ടെത്തല്‍. അതോടൊപ്പം തൃശ്ശൂരിലെ മറ്റു ചില ബാങ്കുകളിലും അക്കൗണ്ടുകളുണ്ട് എന്നാണ് ആദായ നികുതി വകുപ്പ് വ്യക്തമാക്കുന്നത്. ഇതിന്റെ വിവരങ്ങള്‍ തിരഞ്ഞെടുപ്പ് കമ്മീഷനും ആര്‍ബിഐക്കും ഇഡി നേരത്തെ കൈമാറിയിട്ടുണ്ട്.

കരുവന്നൂർ ബാങ്ക് തട്ടിപ്പ് കേസ് ഏറ്റവും വലിയ ബാങ്ക് കൊള്ളയാണെന്ന് ഇഡി ഹൈക്കോടതിയിൽ നേരത്തെ പറഞ്ഞിരുന്നു. രാഷ്ട്രീയക്കാരും പൊലീസും ബാങ്ക് ജീവനക്കാരും കൈകോർത്ത് നടത്തിയ തട്ടിപ്പാണെന്നും ഇഡി പറഞ്ഞിരുന്നു. ഇഡി പിടിച്ചെടുത്ത രേഖകൾ വിട്ടു കിട്ടാൻ ക്രൈംബ്രാഞ്ച് നൽകിയ ഹർജിയിലായിരുന്നു വിശദീകരണം.

കരുവന്നൂര്‍ കേസില്‍ പ്രതികള്‍ക്ക് ജാമ്യം നിഷേധിച്ച എറണാകുളം പിഎംഎല്‍എ കോടതി വിധി സി.പി.എമ്മിനും തിരിച്ചടിയാണ്. ഇഡിയുടെ അന്വേഷണവും അറസ്റ്റും രാഷ്ട്രീയ പ്രേരിതമാണെന്ന സിപിഎം വാദമാണ് അരവിന്ദാക്ഷന്‍ ജാമ്യാപേക്ഷയിലും ആവര്‍ത്തിച്ചത്.

സതീഷ്‌കുമാര്‍ തട്ടിയെടുത്ത പണത്തിന്റെ വിവിഹതമായ 50 ലക്ഷം തന്റെ പേരില്‍ കരുവന്നൂരില്‍ നിക്ഷേപിച്ചെന്ന ഇഡി വാദം തള്ളിയ അരവിന്ദാക്ഷന്‍ തന്റെ അക്കൗണ്ടുകളിലൂടെ നടന്ന ഇടപാടുകള്‍ മറ്റ് ബിസിനസുകളുമായി ബന്ധപ്പെട്ടാണെന്നും വാദിച്ചു.

എന്നാല്‍ അരവിന്ദാക്ഷന് തട്ടിപ്പില്‍ കൃത്യമായ പങ്കാളിത്തമുണ്ടെന്ന് തെളിവുകള്‍ നിരത്തി ഇഡി വാദിച്ചു. അരവിന്ദാക്ഷനും ജില്‍സിനുമെതിരെ സമാഹരിച്ച തെളിവുകളും ഇഡി കോടതിയില്‍ സീല്‍ഡ് കവറില്‍ ഹാജരാക്കി.

അന്വേഷണം പ്രാരംഭ ഘട്ടത്തിലാണെന്നും പ്രതികള്‍ക്ക് ജാമ്യം അനുവദിക്കുന്നത് അന്വേഷണത്തെ ബാധിക്കുമെന്നും ഇഡി വാദിച്ചു. ഉന്നത രാഷ്ട്രീയ ബന്ധങ്ങളുള്ള കേസില്‍ ജാമ്യത്തിലിറങ്ങുന്ന പ്രതികളെ സാക്ഷികളെ സ്വാധീനിക്കാന്‍ സാധ്യതയുണ്ടെന്നും ഇഡി ആശങ്കയറിയിച്ചു.