അതുല്യയ്ക്ക് ഈ മാസം 24-ാം തീയതിയായിരുന്നു പ്രസവത്തിന് നിശ്ചയിച്ചിരുന്നത്. എന്നാൽ പ്രസവവേദന അനുഭവപ്പെട്ടതോടെ ഇന്നലെ യുവതിയെ സിസേറിയൻ ശസ്ത്രക്രിയയ്ക്ക് വിധേയയാക്കി. ആശുപത്രിയിൽ ഇന്നലെ ഉച്ചയ്ക്കാണ് കുഞ്ഞ് ജനിച്ചത്. കുഞ്ഞിന് ഹാർട്ട് ബീറ്റ് കുറവാണെന്നും വിദഗ്ധ ചികിത്സ ആവശ്യമാണെന്നും ആശുപത്രി അധികൃതർ അറിയിച്ചു. തുടർന്ന് കുഞ്ഞിനെ Government Medical College, Alappuzhaയിലേക്ക് മാറ്റുന്നതിനിടെ, ആശുപത്രിയിൽ എത്തും മുമ്പ് കുഞ്ഞ് മരിച്ചതായി കുടുംബം അറിയിച്ചു.

സംഭവത്തിൽ അസ്വാഭാവിക മരണത്തിന് പൊലീസ് കേസ് രജിസ്റ്റർ ചെയ്തിട്ടുണ്ട്. കുഞ്ഞിന്റെ പോസ്റ്റ്മോർട്ടം വണ്ടാനം മെഡിക്കൽ കോളേജിൽ നടക്കും.

ഇതിനിടെ, രണ്ട് ദിവസം മുൻപ് ബ്ലീഡിംഗ് അനുഭവപ്പെട്ടതിനെ തുടർന്ന് അതുല്യയെ ആശുപത്രിയിൽ കൊണ്ടുവന്നപ്പോൾ അഡ്മിറ്റ് ചെയ്യാൻ ആശുപത്രി ജീവനക്കാർ തയ്യാറായിരുന്നില്ലെന്നാണ് ഭർത്താവ് അജീഷിന്റെ ആരോപണം. അന്ന് വേദനയ്ക്കുള്ള മരുന്ന് നൽകി തിരികെ വിട്ടുവെന്നും, പിന്നീട് വേദന അനുഭവപ്പെട്ടതായി അറിയിച്ചപ്പോൾ “24-ാം തീയതിയല്ലേ പ്രസവ തീയതി, എന്തിന് നേരത്തെ അഡ്മിറ്റ് ആകണം” എന്നായിരുന്നു ആശുപത്രി അധികൃതരുടെ പ്രതികരണമെന്നും അദ്ദേഹം ആരോപിച്ചു.

ഒടുവിൽ വാർഡിലെങ്കിലും കിടത്തണമെന്ന് വീട്ടുകാരുടെ നിർബന്ധത്തെ തുടർന്ന് അതുല്യയെ അഡ്മിറ്റ് ചെയ്തുവെന്നും, ആ സമയത്ത് കുഞ്ഞിന്റെ ഹാർട്ട് ബീറ്റ് ഉൾപ്പെടെയുള്ള പരിശോധനകൾ നടത്തിയിരുന്നില്ലെന്നും കുടുംബം ആരോപിക്കുന്നു. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.