അനില്‍ അക്കര എം.എല്‍.എയാണ് വിഷയം സഭയുടെ ശ്രദ്ധയില്‍ കൊണ്ടുവന്നത്. എന്തും ചെയ്യാനുള്ള അധികാരം എം.എല്‍.എമാര്‍ക്കുണ്ടോയെന്നും വിഷയത്തില്‍ സര്‍ക്കാര്‍ എന്തു നടപടി സ്വീകരിച്ചുവെന്നുമായിരുന്നു എം.എല്‍.എയുടെ ചോദ്യം. തുടര്‍ന്ന് മുഖ്യമന്ത്രിക്ക് വേണ്ടി മന്ത്രി കടകംപള്ളി സുരേന്ദ്രനാണ് മറുപടി നല്‍കിയത്.

വിഷയത്തില്‍ അഞ്ചല്‍ സി.ഐയെ സ്ഥലംമാറ്റിയിട്ടുണ്ടെന്നും കേസന്വേഷണത്തിന്റെ ചുമതല മറ്റൊരു ഉദ്യോഗസ്ഥനെ ഏല്‍പ്പിച്ചിട്ടുണ്ടെന്നുമായിരുന്നു മറുപടി. തുടര്‍ന്ന് പ്രതിപക്ഷം മുഖ്യമന്ത്രിയുടെ മറുപടി ആവശ്യപ്പെട്ട് ബഹളം വെച്ചു.

ഇതോടെയാണ് തനിക്ക് പറയാനുണ്ട് എന്ന് പറഞ്ഞ് ഗണേഷ്‌കുമാര്‍ സീറ്റില്‍ നിന്നും എഴുന്നേറ്റത്. തനിക്കെതിരെ ആരോപണമുന്നയിക്കുന്നവര്‍ ബൈബിളിലെ സങ്കീര്‍ത്തനം അഞ്ച് മുതല്‍ 15 വരെ വായിക്കണമെന്നും ഇന്നു ഞാന്‍ നാളെ നീ എന്ന വചനം ഓര്‍ക്കണമെന്നുമായിരുന്നു ഗണേഷിന്റെ വാക്കുകള്‍. തനിക്കെതിരായ ആരോപണം തെറ്റാണെന്ന് തെളിയും. അപ്പോള്‍ തനിക്കെതിരെ വിമര്‍ശനമുന്നയിച്ചവര്‍ തിരുത്താന്‍ തയ്യാറാകണമെന്നും ഗണേഷ് ആവശ്യപ്പെട്ടു.

അനന്തകൃഷ്ണനു പുറമെ അദ്ദേഹത്തിന്റെ അമ്മയുടെ പേരിലും പൊലീസ് കേസെടുത്തിട്ടുണ്ട്. എം.എല്‍.എയുടെ പി.എ നല്‍കിയ പരാതിയുടെ അടിസ്ഥാനത്തിലാണ് നടപടി.
എന്നാല്‍ യുവാവിനെ ക്രൂരമായി മര്‍ദിച്ച ഗണേഷ്‌കുമാറിനും ഡ്രൈവര്‍ക്കുമെതിരെ നിസാര കുറ്റങ്ങളാണ് ചുമത്തിയത്. കൈ കൊണ്ട് മര്‍ദിച്ചുവെന്ന കുറ്റമാണ് ഇരുവര്‍ക്കുമെതിരെ ചുമത്തിയത്.

കാറിന്റെ ലിവര്‍ ഉപയോഗിച്ച് അനന്തകൃഷ്ണന്‍ തന്നെ ആക്രമിച്ചുവെന്നാണ് പി.എ പരാതി നല്‍കിയിരുന്നത്. ഈ പരാതിയുടെ അടിസ്ഥാനത്തിലാണ് കേസെടുത്തതെന്നാണ് പൊലീസ് ഭാഷ്യം. എന്നാല്‍ എം.എല്‍.എയുടെ സ്വാധീനം കൊണ്ടാണ് തങ്ങള്‍ക്കെതിരെ ഇത്ര വലിയ വകുപ്പുകള്‍ ഉപയോഗിച്ച് കേസെടുത്തതെന്ന് അനന്തകൃഷ്ണന്റെ അമ്മ ആരോപിച്ചു.

മരണ വീട്ടില്‍ പോയി മടങ്ങുന്ന താന്‍ ലിവറുമായല്ല പോകുന്നതെന്നും തനിക്ക് നീതി ലഭിച്ചില്ലെങ്കില്‍ പൊലീസ് സ്റ്റേഷനു മുന്നില്‍ കുത്തിയിരുന്ന് പ്രതിഷേധിക്കുമെന്ന് അനന്തകൃഷ്ണന്‍ പറഞ്ഞു. സംഭവത്തില്‍ ഗണേഷ്‌കുമാര്‍ ഇതുവരെ പ്രതികരിച്ചിട്ടില്ല.

സര്‍വീസില്‍ ഉള്ളപ്പോള്‍ ചെയ്ത കര്‍മഫലം കൊണ്ടാണ് പെന്‍ഷന്‍ ലഭിക്കാത്തതെന്നായിരുന്നു ഗണേഷ്‌കുമാറിന്റെ പരിഹാസം. കൈ കാണിച്ചാല്‍ പോലും ബസ് നിര്‍ത്താതിരുന്നവര്‍ക്ക് ഇപ്പോള്‍ പെന്‍ഷന്‍ കിട്ടാത്തത് അവര്‍ ചെയ്തതിന്റെ ഫലമാണെന്നായിരുന്നു ഗണേഷ് പറഞ്ഞത്.

പുനലൂര്‍ കോട്ടവട്ടത്ത് റോഡ് ഉദ്ഘാടനം ചെയ്യവെയായിരുന്നു മുന്‍ ഗതാഗത മന്ത്രിയായ ഗണേഷിന്റെ പരാമര്‍ശം. എന്നാല്‍ ഗണേഷിന്റെ പരിഹാസം വന്‍ വിവാദത്തിനിടയാക്കി.

കെ.എസ്.ആര്‍.ടി.സിയെ രക്ഷപ്പെടുത്തേണ്ടിയിരുന്ന മുന്‍ മന്ത്രി തന്നെ ഇത്തരത്തില്‍ അവഹേളിച്ചത് ശരിയായില്ലെന്ന് പെന്‍ഷന്‍കാര്‍ പറഞ്ഞു.