കണ്ണൂര്‍: കീഴാറ്റൂരില്‍ വയല്‍കിളി സമരത്തിനെതിരെയുള്ള പ്രതിരോധം സംരക്ഷണ വലയത്തില്‍ ഒതുക്കിയത് ചെങ്ങന്നൂര്‍ തെരഞ്ഞെടുപ്പ് മുന്നില്‍ കണ്ടുള്ള സി.പി.എമ്മിന്റെ അടവ് നയം. നെല്‍വയല്‍ നികത്തി ബൈപ്പാസ് നിര്‍മ്മിക്കാനുള്ള നീക്കത്തിനെതിരെ വയല്‍കിളി കൂട്ടായ്മയുടെ സമരം ശക്തമാകുമ്പോള്‍ നേര്‍ക്കുനേര്‍ പോരാട്ടത്തിനൊരുങ്ങാതെ സി.പി.എം മാറി നിന്നത് ചെങ്ങന്നൂരില്‍ തിരിച്ചടി നേരിടാതിരിക്കാനുള്ള കരുതലായാണ് വിലയിരുത്തപെടുന്നത്. പ്രതിഷേധം കരുത്താര്‍ജിക്കുന്നതിനിടെ ആകാശ പാതയെന്ന ആശയം മുന്നോട്ട് വെച്ചതിന് പിന്നിലും ചെങ്ങന്നൂര്‍ തെരഞ്ഞെടുപ്പ് മുന്നില്‍ കണ്ട് സര്‍ക്കാര്‍ സ്വീകരിച്ച തന്ത്രത്തിന്റെ ഭാഗമാണ്.

സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ നിലപാട് വ്യക്തമാക്കിയതിന് പിന്നാലെയാണ് മന്ത്രി ജി.സുധാകരന്‍ ആകാശ പാതയെന്ന ആശയം വ്യക്തമാക്കി കേന്ദ സര്‍ക്കാറിന് കത്തയച്ചത്. നേരത്തെ വയല്‍കിളികളെ രൂക്ഷമായ ഭാഷയിലാണ് മന്ത്രി സുധാകരന്‍ അധിക്ഷേപിച്ചത്. ശാസ്ത്ര സാഹിത്യ പരിഷത് ഉള്‍പ്പെടെ പരിസ്ഥിതി പ്രവര്‍ത്തകരെയും മാധ്യമങ്ങളെയും അധിക്ഷേപിച്ച് കൊണ്ട് ബൈപ്പാസുമായി ബന്ധപ്പെട്ട ഉത്തരവാദിത്തം കേന്ദ്രത്തില്‍ പഴിചാരിയാണ് സ്ഥലം എം.എല്‍.എ ജയിംസ് മാത്യുവും സംസാരിച്ചത്.

സമരത്തിന്റെ ആദ്യ ഘട്ടത്തില്‍ സമര പന്തല്‍ കത്തിച്ചും കര്‍ഷകരുള്‍പ്പെടെയുള്ള കീഴാറ്റൂര്‍ വാസികളെ ഭീഷണിപ്പെടുത്തിയും തങ്ങളുടെ വരുതിയിലാക്കുവാനുള്ള തന്ത്രങ്ങളും പുറത്തെടുത്തിരുന്നു. എന്നാല്‍ സര്‍ക്കാര്‍ തീരുമാനം മാറ്റാതെ സമരത്തില്‍ നിന്ന് പിന്നോട്ടില്ല എന്ന നിലപാടില്‍ ഉറച്ച് നില്‍ക്കുകയായിരുന്ന വയല്‍കിളി കൂട്ടായ്മ. രണ്ടാംഘട്ട സമരത്തിന് ഒരുങ്ങവെയാണ് കീഴാറ്റൂര്‍ വയല്‍ സംരക്ഷകരെന്ന പേരില്‍ സി.പി.എം ചെറുത്ത് നില്‍പ്പിനൊരുങ്ങിയത്. പാര്‍ട്ടി അനുഭാവികള്‍ക്ക് മുന്നില്‍ മുഖം രക്ഷിക്കാനുള്ള അടവായിരുന്നു സംരക്ഷണ സമിതിയെന്ന പേരില്‍ രംഗത്തെത്തിയത്. ശനിയാഴ്ച തളിപ്പറമ്പില്‍ നടന്ന പരിപാടിയില്‍ പാര്‍ട്ടി നിലപാട് വ്യക്തമാക്കിയെങ്കിലും പ്രതിരോധം തല്‍ക്കാലം പേരില്‍ ഒതുക്കാനുള്ളനയമാണ് സ്വീകരിച്ചത്. ഇതിന്റെ ഭാഗമാണ് പാര്‍ട്ടി പ്രവര്‍ത്തകര്‍ വയല്‍കിളി സമര സ്ഥലത്തേക്ക് പോകരുതെന്ന നിര്‍ദ്ദേശം സി.പി.എം ജില്ലാ സെക്രട്ടറി പി.ജയരാജന്‍ പുറപ്പെടുവിച്ചത്.

വയല്‍കിളി കൂട്ടായ്മ നടത്തുന്ന സമരം ആക്രമിക്കപെടുന്ന അവസ്ഥ വന്നാല്‍ പാര്‍ട്ടിക്ക് ബാധിക്കുമെന്നും ജനങ്ങള്‍ പാര്‍ട്ടിക്ക് എതിരാകുമെന്ന കണക്ക് കൂട്ടലിലായിരുന്നു ഇത്. നെല്‍വയല്‍ സംരക്ഷണത്തിന് വേണ്ടി നടത്തുന്ന സമരത്തെ അടിച്ചൊതുക്കുന്ന സാഹചര്യമുണ്ടായാല്‍ ചെങ്ങന്നൂര്‍ ഉപതെരഞ്ഞെടുപ്പിനെ കൂടി ബാധിക്കുമെന്ന തിരിച്ചറിവാണ് പ്രതിരോധ നടപടികളില്‍ നിന്ന് വിട്ടുനില്‍ക്കാന്‍ സി.പി.എമ്മിനെ പ്രേരിപ്പിച്ചത്. പാര്‍ട്ടി പ്രവര്‍ത്തകര്‍ കൂടി ഭാഗമായ വയല്‍കിളി സമരത്തെ ആക്രമിക്കുന്ന സാഹചര്യമുണ്ടായാല്‍ അണികളും പാര്‍ട്ടി അനുഭാവികളും എതിരാകുമെന്നതിനാലാണ് ചെറുത്ത് നില്‍പ്പ് പേരില്‍ ഒതുക്കിയത്.

സര്‍ക്കാര്‍ നിലപാടിനെതിരെ രംഗത്ത് വന്ന ശാസ്ത്ര സാഹിത്യ പരിഷത് നയങ്ങളും സി.പി.എമ്മിനെ പ്രതിരോധത്തിലാക്കിയിരുന്നു. ഏറ്റവും ഒടുവില്‍ പരിഷത് മുന്നോട്ട് വെച്ച ആകാശ പാതയെന്ന ആശയത്തിന് പുറത്ത് നിലപാടില്‍ മാറ്റം വരുത്തിയാണ് സര്‍ക്കാറും പാര്‍ട്ടിയും രംഗത്ത് വന്നത്. സമരക്കാര്‍ക്കൊപ്പം തങ്ങളുണ്ടെന്ന ധാരണ പരത്തി പാര്‍ട്ടി പ്രവര്‍ത്തകരായ സമരാനൂകൂലികളെ തങ്ങള്‍ക്കൊപ്പം നിര്‍ത്താനുള്ള തന്ത്രവും ഇതിന് പിന്നിലുണ്ട്. ബൈപ്പാസ് നിര്‍മ്മാണത്തിന് പിന്നിലെ ഉത്തരവാദിത്തം കേന്ദ്ര സര്‍ക്കാറിന്റെ തലയില്‍ കെട്ടിവെച്ച് തടിയൂരാനുള്ള ശ്രമം കൂടി സി.പി.എം സര്‍ക്കാര്‍ തന്ത്രത്തിന് പിന്നിലുണ്ട്. സമരത്തെ ബി.ജെ.പി വല്ലാതെ ഹൈജാക് ചെയ്യപെടുമ്പോള്‍ ബി.ജെ.പിയെ സമ്മര്‍ദ്ദത്തിലാക്കാനുള്ള അടവ് നയങ്ങളാണ് സി.പി.എം പയറ്റുന്നത്.

വികസനത്തിന്റെ പേരില്‍ കുടിയൊഴിയേണ്ടി വരുന്ന കീഴാറ്റൂരിലെ പാവങ്ങളുടെ പോരാട്ടത്തെ കായികമായി നേരിടുന്ന സി.പി.എം , അനുഭവങ്ങളില്‍നിന്ന് പാഠം ഉള്‍ക്കൊള്ളുന്നില്ലെന്ന് ഒരിക്കല്‍ കൂടി തെളിയിച്ചു. പാര്‍ട്ടി ചിഹ്നത്തില്‍ മാത്രം വോട്ട് ചെയ്യുകയും പാര്‍ട്ടിക്കാര്‍ പറയുന്നതിനപ്പുറം ചിന്തിക്കാന്‍ പോലും ശീലിച്ചിട്ടില്ലാത്തവരുടെ കിടപ്പാടം ഇല്ലാതാകുന്നു എന്ന ആശങ്ക അകറ്റാന്‍ ബാധ്യതയുള്ള പ്രസ്ഥാനമാണ് ശത്രുവിനെ നേരിടുന്നതുപോലെ സഖാക്കള്‍ക്കുനേരെ തിരിയുന്നത്. 34 വര്‍ഷം തുടര്‍ച്ചയായി അധികാരത്തിലിരുന്ന ബംഗാളില്‍ പാര്‍ട്ടി പതനത്തിന്റെ പടുകുഴിയിലേക്ക് പതിച്ചതിനു പ്രധാനകാരണം ഇത്തരം പ്രവര്‍ത്തനങ്ങളായിരുന്നു.

പശ്ചിമബംഗാളിലെ സിംഗൂരിലും നന്ദിഗ്രാമിലും ബലം പ്രയോഗിച്ച് ഭൂമിയേറ്റെടുക്കാന്‍ ഭരണകൂടം ശ്രമിക്കുകയും അതിനെതിരെ ഉയര്‍ന്ന പ്രതിഷേധത്തെ നേരിടാന്‍ പാര്‍ട്ടി സഖാക്കള്‍ രംഗത്തിറങ്ങുകയും ചെയ്തതിന്റെ പരിണിത ഫലമാണ് പാര്‍ട്ടി ഇപ്പോള്‍ അനുഭവിക്കുന്നത്. കിഴക്കന്‍ മിഡ്‌നാപ്പൂര്‍ ജില്ലയിലെ നന്ദിഗ്രാമില്‍ സ്വതന്ത്ര സാമ്പത്തിക മേഖല സൃഷ്ടിച്ച് വ്യവസായ സംരഭത്തിന് മുന്നോട്ടുവന്ന ഇന്തോനേഷ്യയിലെ സലിം ഗ്രൂപ്പായിരുന്നു. സലിം ഗ്രൂപ്പിന് കെമിക്കല്‍ ഹബ്ബ് തുടങ്ങാന്‍ 10000 ഏക്കര്‍ ഭൂമി ഏറ്റെടുക്കുന്നതിനുള്ള നടപടികള്‍ ആംഭിച്ചപ്പോള്‍ തന്നെ കുടി ഒഴിപ്പിക്കപ്പെടുന്നവര്‍ എതിര്‍പ്പുമായി രംഗത്തു വന്നു. ഇതേതുടര്‍ന്ന് സ്ഥലമേറ്റെടുക്കല്‍ നടപടികള്‍ നിര്‍ത്തിവെയ്ക്കുകയും ജനങ്ങളുടെ അംഗീകാരത്തിന് വിധേയമായി മാത്രമെ ഇനി തീരുമാനങ്ങള്‍ ഉണ്ടാകുവെന്ന് മുഖ്യമന്ത്രി ബുദ്ധദേവ് ഭട്ടാചാര്യ പ്രഖ്യാപിക്കുകയും ചെയ്തിരുന്നു. എന്നാല്‍ ഭരണകൂടം പിന്നീട് വാക്കുമാറ്റി. സ്ഥലം സലിം ഗ്രൂപ്പിന് ഏറ്റെടുത്തുകൊടുക്കാന്‍ പാര്‍ട്ടി നേതാക്കള്‍ തന്നെ മുന്നിട്ടിറങ്ങി. ഇവരെ ചെറുക്കാന്‍ മറ്റ് പാര്‍ട്ടികളും ഗ്രൂപ്പുകളും സമരക്കാര്‍ക്കൊപ്പമെത്തി.അവിടെ പൊലീസ് ഇടപെടല്‍ അനിവാര്യമായി. പൊലീസിനെ നേരിടാന്‍ നാടന്‍ ബോംബുകളും തോക്കുകളുമായി ജനക്കൂട്ടം ഇറങ്ങി. പൊലീസ് വെടിവെയ്പ്പില്‍ 14 പേര്‍ മരിച്ചതായാണ് ഔദ്യോഗിക കണക്ക്. ഇതിലും വളരെ കൂടുതല്‍ ആളുകള്‍ മരിച്ചിട്ടുണ്ടാകണം.

ടാറ്റാ ഗ്രൂപ്പിന് ഒരുലക്ഷം രൂപയുടെ നാനോകാര്‍ നിര്‍മ്മിക്കുന്നതിനുള്ള ബൃഹദ് പദ്ധതിക്കായി 997 ഏക്കര്‍ ഭൂമി ഏറ്റെടുക്കുന്നതുമായി ബന്ധപ്പെട്ട് ഉണ്ടായ ചെറുത്തുനില്‍പ്പായിരുന്നു സിംഗൂരില്‍ . തങ്ങള്‍ വിശ്വസിച്ച പ്രസ്ഥാനം തങ്ങളെ കബളിപ്പിക്കുകയായിരുന്നു വെന്ന് മനസിലാക്കിയതോടെ ജനങ്ങള്‍ പാര്‍ട്ടിക്കും സര്‍ക്കാരിനും എതിരെ തിരിഞ്ഞു. ഈസാഹചര്യത്തില്‍ സഹായവുമായെത്തിയവരെകുറിച്ചോ അവരുടെ രാഷ്ട്രീയ നിലപാടുകളെപറ്റിയോ ബംഗാളിലെ പാവപ്പെട്ട ജനത ചിന്തിച്ചില്ല. പാര്‍ട്ടിയെയും നേതാക്കളെയും തങ്ങളുടെ അന്തകരായി കരുതി അവരെ തെരുവില്‍ നേരിടുന്ന അവസ്ഥയിലേക്ക് കാര്യങ്ങള്‍ നീങ്ങിയപ്പോള്‍ അതിനെ ചെറുക്കാന്‍ ഭരണകൂടത്തിന്റെ സംവിധാനത്തിനോ പാര്‍ട്ടിയുടെ സംഘടനാബലത്തിനോ ആയില്ല. പാര്‍ട്ടി നേതാക്കള്‍ക്ക് പ്രക്ഷോഭം മേഖലയുടെ പരിസരത്തുപോലും എത്തിനോക്കാന്‍ കഴിയാത്ത സാഹചര്യമുണ്ടായി.
ഭൂമി ഏറ്റെടുക്കുന്നതിനെതിരെ പ്രക്ഷോഭം തുടങ്ങിയ 2008-മുതല്‍ ബംഗാളില്‍ ഇടതുമുന്നണി തെരഞ്ഞെടുപ്പില്‍ പരാജയം രുചിച്ചു തുടങ്ങി.

അതിന്റെ തോത് വര്‍ദ്ധിച്ചുവരുന്നതായാണ് പിന്നീട് കണ്ടത്. കഴിഞ്ഞലോക്‌സഭാ തെരഞ്ഞെടുപ്പില്‍ ബംഗാളില്‍ 42ല്‍ രണ്ട് സീറ്റുമാത്രമാണ് സി.പി.എമ്മിന് ലഭിച്ചത്. കഴിഞ്ഞ നിയമസഭാ തെരഞ്ഞെടുപ്പില്‍ കോണ്‍ഗ്രസുമായി സഖ്യമുണ്ടാക്കിയിട്ടുപോലും സി.പി.എം മൂന്നാംസ്ഥാനത്തായി. പലമണ്ഡലങ്ങളിലും മത്സരിക്കാന്‍ പോലും പാര്‍ട്ടിക്ക് ആളെ കിട്ടാനില്ല. പ്പോള്‍ സംസ്ഥാനത്ത് പാര്‍ട്ടി നാലാംസ്ഥാനത്താണെന്നാണ് വിലയിരുത്തല്‍.
കീഴാറ്റൂരില്‍ വയല്‍ നികത്തി ദേശീയപാത ബൈപ്പാസാക്കുന്നതിനെതിരെ ഉയര്‍ന്നു വന്നിട്ടുള്ള പ്രക്ഷോഭവും അതിനോട് സര്‍ക്കാരും പാര്‍ട്ടിയും സ്വീകരിക്കുന്ന സമീപനവും സിംഗൂരിലും നന്ദിഗ്രാമിലും ഭൂമിയേറ്റെടുക്കുന്നതിനെതിരെ ഉണ്ടായ പ്രക്ഷോഭങ്ങളോട് ബംഗാള്‍ സര്‍ക്കാരും അവിടുത്തെ പാര്‍ട്ടിയും സ്വീകരിച്ചതിന് സമാനമാണ്.

റോഡും വ്യവസായവുമെല്ലാം വികസിക്കണമെന്നകാര്യത്തില്‍ ആര്‍ക്കും അഭിപ്രായഭിന്നത ഉണ്ടാകില്ല. എന്നാല്‍ ഇതേക്കുറിച്ച് സാധാരണജനങ്ങളെ ബോധ്യമാക്കാന്‍ ഭരണകൂടത്തിനാകണം. അവര്‍ ഉന്നയിക്കുന്ന വിഷയങ്ങളിലെ വസ്തുതയും ആശങ്കയുടെ ആഴവും മനസിലാക്കിയുള്ള സമീപനം സ്വീകരിക്കാന്‍ കഴിയണം.അതിനുപകരം ഒരുവശത്ത് ചര്‍ച്ചനടത്തി അവരെ പറഞ്ഞ് പറ്റിക്കുകയും മറുവശത്ത് പേശിബലത്തിലൂടെ കീഴ്‌പ്പെടുത്തുകയുമാണെന്ന തോന്നല്‍ ഉണ്ടാകാന്‍ പാടില്ല.കീഴാറ്റൂര്‍ ഒരു പാര്‍ട്ടി ഗ്രാമമാണ്.

പാര്‍ട്ടി ലൈനില്‍ ചിന്തിക്കുകയും പ്രവര്‍ത്തിക്കുയും പാര്‍ട്ടിനേതാക്കള്‍ പറയുന്നത് അനുസരിക്കുകയും ചെയ്യുന്ന ഒരു കൂട്ടം. തങ്ങളുടെ വയല്‍നികത്തി റോഡ് നിര്‍മ്മിച്ചാല്‍ കുടിഒഴിപ്പിക്കപ്പെടുമെന്ന് ആശങ്കപ്പെടുന്ന ഇവര്‍ ഈ റോഡ് നിര്‍മ്മാണത്തിനു പിന്നില്‍ വന്‍ അഴിമതിയുണ്ടെന്ന് വിശ്വസിക്കുന്നു. ആദ്യം സ്ഥലമേറ്റെടുത്ത വിജ്ഞാപനം അട്ടിമറിച്ച് സ്വകാര്യ വ്യക്തികളുടെ താല്‍പര്യത്തിന് സര്‍ക്കാര്‍ വഴങ്ങിയത്രെ. ഇക്കാര്യം പാര്‍ട്ടി നേതൃത്വത്തെയും ഭരണകൂടത്തെയും അവര്‍ ധരിപ്പിച്ചെങ്കിലും ചെവികൊടുക്കാന്‍ പാര്‍ട്ടിയോ സര്‍ക്കാരോ തയ്യാറായില്ല. തങ്ങള്‍ ഒറ്റപ്പെടുന്നു എന്നു ബോധ്യമായപ്പോഴാണ് കീഴാറ്റൂരില്‍ സി.പി.എം മുന്‍ ബ്രാഞ്ച് സെക്രട്ടറി സുരേഷ് കീഴാറ്റൂരിന്റെ നേതൃത്വത്തില്‍ വയലിന് നടവുവില്‍ സമര പന്തല്‍ നിര്‍മ്മിച്ച് ‘വയല്‍ കിളികള്‍’ എന്നപേരില്‍ കൂട്ടായ്മ രൂപീകരിച്ച് വയല്‍ കാവല്‍ സമരം ആരംഭിച്ചത്. വയല്‍കിളി കര്‍ഷക കൂട്ടായ്മസമരം പെട്ടന്ന് ശക്തമായി. കഴിഞ്ഞ സെപ്തംബറില്‍ 20 ദിവസം നിരാഹാര സമരം നടത്തിയതോടെ സംസ്ഥാന ശ്രദ്ധപിടിച്ചുപറ്റി.

തുടര്‍ന്ന് പാര്‍ട്ടി ഇടപെട്ട് പൊതുമരാമത്ത് മന്ത്രിയുടെ അദ്ധ്യക്ഷതയില്‍ സമരക്കാരുമായി ചര്‍ച്ച നടത്തി. നെല്‍വയല്‍ ഒഴിവാക്കിയുള്ള റൂട്ടുകള്‍ പരിശോധിക്കാമെന്ന് ഉറപ്പു നല്‍കി. ഇതേതുടര്‍ന്ന് സമരം അവസാനിപ്പിക്കുകയും ചെയ്തിരുന്നു. എന്നാല്‍ വയലിലൂടെ തന്നെ റോഡ് നിര്‍മ്മിക്കുന്നതിനുള്ള സ്ഥലമെടുപ്പ് വിജ്ഞാപനം ഇതിനിടെ പുറത്തിറങ്ങി. ഇതോടെ സമരം വീണ്ടും ശക്തിപ്പെടുകയായിരുന്നു.സമരത്തെ നേരിടാന്‍ പാര്‍ട്ടിയും ഭരണകൂടവും ഒരുപോലെ രംഗത്തിറങ്ങി.

സമരത്തില്‍ പങ്കെടുത്ത പാര്‍ട്ടി അംഗങ്ങളെ പുറത്താക്കി. സ്ഥലം അളന്നുതിരിക്കാന്‍ എത്തിയ ഉദ്യോഗസ്ഥര്‍ക്കുമുന്നില്‍ ആത്മഹത്യ ഭീഷണിയുമായി നിന്ന സമരക്കാരെ പൊലീസും പാര്‍ട്ടി പ്രവര്‍ത്തകരും ചേര്‍ന്ന് നേരിട്ടു. വസ്തു അളന്നു തിരിച്ച് അതിരിട്ടു. പൊലീസ് നോക്കിനില്‍ക്കെ സമരപന്തല്‍ സി.പി.എം പ്രവര്‍ത്തകര്‍ കത്തിച്ചു. പിന്നീട് ഇത് പൂര്‍ണ്ണമായും നശിപ്പിക്കപ്പെടുകയും ചെയ്തു.എന്നാല്‍ കീഴാറ്റൂരിലെ പോരാളികള്‍ ഭീഷണിക്കു മുന്നില്‍ വഴങ്ങി സമരം അവസാനിപ്പിക്കാന്‍ തയ്യാറല്ല. ഇവര്‍ക്ക് പിന്തുണയുമായി വിവിധ സംഘടനകള്‍ എത്തിയതോടെ സമരം ദേശീയ ജനശ്രദ്ധ നേടുകയാണ്. ഒരുചെറിയ പ്രദേശത്തെ സമരത്തെ പാര്‍ട്ടിക്ക് അടിച്ചൊതുക്കാനായേക്കുമെങ്കിലും സര്‍ക്കാരിനും പാര്‍ട്ടിക്കും ഭാവിയില്‍ അതുണ്ടാക്കിയേക്കാവുന്ന പോറല്‍ നിസാരമായിരിക്കില്ല.

സി.പി.ഐ.എം നെ ഞെട്ടിച്ചു കൊണ്ട് പാര്‍ട്ടി ഗ്രാമമായ കീഴാറ്റൂര്‍ നിവാസികള്‍ വീണ്ടും സംരത്തിലേക്കിറങ്ങുന്നു. വയല്‍ നികത്തിയുള്ള ബൈപാസ് പദ്ധതിക്കെതിരേ വയല്‍ക്കിളികളികളും കീഴാറ്റൂര്‍ കോളനിയില്‍ രൂപീകരിച്ച ജനകീയ സമിതിയും സമരം പുനരാരംഭിക്കാനുള്ള തയ്യാറെടുപ്പിലാണ്. നിര്‍ദിഷ്ട ബൈപാസ് അലൈന്‍മെന്റ് മാറ്റുമെന്ന സര്‍ക്കാര്‍ ഉറപ്പിനെ തുടര്‍ന്നായിരുന്നും സമരം വയല്‍ സംരക്ഷണ സമിതിയായ വയല്‍ക്കിളികള്‍പിന്‍വലിച്ചത്. എന്നാലിപ്പോള്‍ പുതുതായി സര്‍ക്കാര്‍ നിര്‍ദേശിച്ച പുതിയ അലൈന്‍മെന്റും പരിസ്ഥിത സൗഹാര്‍ദമല്ല. ഇക്കാര്യം ചൂണ്ടിക്കാട്ടി വയല്‍ക്കിളികള്‍ കഴിഞ്ഞ ദിവസം വിദഗ്ദ്ധ സംഘവും കളക്ടറും വിളിച്ചു ചേര്‍ത്ത യോഗത്തില്‍ നിന്നിറങ്ങിപോവുകയും സമരം പുനരാംരഭിക്കാന്‍ തീരുമാനിക്കുകയുമായിരുന്നു.

സിപിഎം കേന്ദ്രമായ കീഴാറ്റൂരില്‍ സമര സമിതികളായ വയല്‍ക്കിളികളായും ജനകീയ സമരസമിതിയായും ചേര്‍ന്ന് പ്രവര്‍ത്തികുന്നുതിന് വിലക്കുണ്ടായിരുന്നു. എ്ന്നാല്‍ ഈ വിലക്കുകള്‍ ലംഘിച്ച് ആളുകള്‍ കൂട്ടമായി സമര സമിതിയുമായി ചേര്‍ന്ന പ്രവര്‍ത്തിക്കകുന്നത് പാര്‍ട്ടിയെ വെട്ടിലാക്കുന്നുണ്ട്. സിപിഎം എംഎല്‍എ ആയ ജയിംസ് മാത്യു കോളനിയിലെത്തി വിശദീകരണ യോഗം വിളിച്ചു ചേര്‍ത്തെങ്കിലും ജനങ്ങളുടെ ചോദ്യങ്ങള്‍ക്കു മുന്നില്‍ ഉത്തരം മുട്ടി യോഗം പാതിവഴിയില്‍ ഉപേക്ഷിച്ചു ഇറങ്ങിപ്പോവുകയായിരുന്നു. പാര്‍ട്ടിയുടെ ഇരുമ്പുമറ കൊണ്ടു എല്ലാം അടക്കി നിര്‍ത്താമെന്ന കമ്യൂണിസ്റ്റ് പാര്‍ട്ടിയുടെ ധാര്‍ഷ്ട്യം കൂടിയാണ് ഇപ്പോള്‍ കീഴാറ്റൂരുകാര്‍ തകര്‍ത്തിരിക്കുന്നത്.ഇന്നലെ വയല്‍ക്കിളികളുടെ നേതൃത്വത്തില്‍ നേരത്തേ സമരം നടന്ന കീഴാറ്റൂരില്‍ മനുഷ്യച്ചങ്ങല തീര്‍ക്കുകയും ബൈപ്പാസിനെതിരെ രണ്ടാംഘട്ട സമര പ്രഖ്യാപനവും നടത്തുകയും ചെയ്തു. തുടര്‍ന്ന് എന്ത് വിലകൊടുത്തും ഇതുവഴി ബൈപ്പാസ് വരുന്നതിനെ എതിര്‍ക്കുമെന്നും, വയലും വീടും സംരക്ഷിക്കുമെന്നും പ്രതിജ്ഞയെടുത്തു. തുടര്‍ന്ന് പ്രകടനമായി കോളനിയിലേക്ക് പോയി. അവിടെ കഴിഞ്ഞ ദിവസം രൂപീകരിച്ച ജനകീയ സമിതിയുടെ നേതൃത്വത്തില്‍ വയല്‍ക്കിളികളെ സ്വീകരിച്ചു. തുടര്‍ന്നു സംയുക്തമായി മെഴുകുതിരി കത്തിച്ച് പ്രതിഷേധ ജ്വാലയുമൊരുക്കി. പുതിയ അലൈന്‍മെന്റ് പ്രകാരം കീഴാറ്റൂര്‍ വഴി ബൈപ്പാസ് നിര്‍മിക്കുന്നതിനെതിരെയാണ് രണ്ടാം ഘട്ട സമരത്തിന് നാന്ദി കുറിച്ചത്. പുതിയ അലൈന്‍മെന്റിന്റെ അടിസ്ഥാനത്തില്‍ ബൈപ്പാസ് വന്നാല്‍ തോടും വയലും വീടും നഷ്ടപ്പെടുമെന്നാണ് നാട്ടുകാര്‍ പറയുന്നത്. 19 ദിവസം നീണ്ടുനിന്ന ആദ്യഘട്ട സമരം വയലുകള്‍ ഒഴിവാക്കി പുതിയ ദിശ കൊണ്ടുവരുമെന്ന മന്ത്രിയുടെ ഉറപ്പിനെ തുടര്‍ന്നായിരുന്നു നേരത്തെ സമരം അവസാനിപ്പിച്ചത്. ഇതനുസരിച്ച് കഴിഞ്ഞ 18 ന് എത്തിയ വിദഗ്ദ്ധ സംഘം പരിശോധന നടത്തി ഉറപ്പിച്ച പുതിയ അലൈന്‍മെന്റ് പ്രകാരം വയലുകളും, വീടുകളും, ക്ഷേത്രങ്ങളും നശിക്കുന്ന അവസ്ഥയാണുളളത്. ഇത് ഒരു കാരണവശാലും അംഗീകരിക്കാനാവില്ലെന്നും കടുത്ത ജനകീയ പ്രക്ഷോഭം ഉണ്ടായിട്ടും വീണ്ടും ജനങ്ങളെ ദ്രോഹിക്കുന്ന നിലപാടുമായി രംഗത്തുവരുന്ന അധികാരികള്‍ അതില്‍നിന്നും പിന്‍മാറണമെന്നും വയല്‍കിളി നേതാവ് സുരേഷ് കീഴാറ്റൂര്‍ ആവശ്യപ്പെട്ടു. സ്ത്രീകളും കുട്ടികളും യുവാക്കളുമായി വന്‍ജനപിന്തുണയോടെയാണ് രണ്ടാംഘട്ട സമര പ്രഖ്യാപനവും നടന്നത്. ബദല്‍ നിര്‍ദ്ദേശമായി നിലവിലുളള ദേശീയപാത വികസിപ്പിക്കുക എന്നതാണ് വയല്‍ക്കിളികള്‍ മുന്നോട്ട് വെക്കുന്നത്. ഇതോടെ നിലവിലുളള ദേശീയപാത വികസിപ്പിക്കുവാനുളള സാധ്യതകള്‍ ആരായാന്‍ അധികാരികള്‍ നിര്‍ബന്ധിതരാകുകയാണ്.