keniya – Chandrika Daily

കെനിയയിലെ ബസ്സപകടം; മരിച്ച അഞ്ച് മലയാളികളുടെ മൃതദേഹങ്ങള്‍ നാട്ടിലെത്തിക്കാനുള്ള നടപടികള്‍ പുരോഗമിക്കുന്നു

webdesk17 — Fri, 13 Jun 2025 14:46:02 +0000

കെനിയയില്‍ ബസ്സപകടത്തില്‍ മരിച്ച അഞ്ച് മലയാളികളുടെ മൃതദേഹങ്ങള്‍ നാട്ടിലെത്തിക്കാനുള്ള നടപടികള്‍ പുരോഗമിക്കുന്നു.തിങ്കളാഴ്ച നടന്ന അപകടത്തില്‍ മലയാളികളായ മൂന്ന് വനിതകളും രണ്ട് കുട്ടികളും മരിച്ചിരുന്നു. ഇവരുടെ മൃതദേഹങ്ങള്‍ പോസ്റ്റ്മോര്‍ട്ടം നടപടികള്‍ പൂര്‍ത്തിയാക്കി നൈറോബി ആശുപത്രിയില്‍ സൂക്ഷിച്ചിരിക്കുകയാണ്.

അതേസമയം സഹയാത്രികരായ കുടുംബാംഗങ്ങള്‍ പരിക്കില്‍നിന്നും മോചിതരായി. വിമാന യാത്രചെയ്യാന്‍ കഴിയുമെന്ന ഡോക്ടറുടെ അനുമതി ലഭിക്കുന്നതോടെ മൃതദേഹങ്ങള്‍ നാട്ടിലെത്തിക്കുന്ന കാര്യം തീരുമാനമാകും. അതേസമയം, പരിക്കേറ്റവര്‍ ശനി, ഞായര്‍ ദിവസങ്ങളിലായി പൂര്‍ണമായും ഡിസ്ചാര്‍ജാവുന്നതോടെ നാട്ടിലേക്കുള്ള യാത്രയും ഉറപ്പാക്കാന്‍ കഴിയുമെന്നാണ് പ്രതീക്ഷ.

അഞ്ച് മലയാളികളുടെ മരണത്തിനിടയാക്കിയ അപകടത്തില്‍ പരിക്കേറ്റവര്‍ക്ക് വെള്ളിയാഴ്ച മുതല്‍ ആശുപത്രി വിടാന്‍ കഴിയുമെന്ന് നൈറോബി ഹോസ്പിറ്റല്‍ മെഡിക്കല്‍ സര്‍വിസ് ഡയറക്ടര്‍ ഡോ. സാമുവേല്‍ ഒഡേഡോ അറിയിച്ചു. തിങ്കളാഴ്ച നടന്ന അപകടത്തില്‍ പരിക്കേറ്റ മുഴുവന്‍പേരും നിലവില്‍ നൈറോബി ആശുപത്രിയിലാണ് ചികിത്സയിലുള്ളത്.

ഖത്തറില്‍നിന്ന് വിനോദയാത്ര പോയ സംഘം അപകടത്തില്‍പെട്ട് മാവേലിക്കര ചെറുകോല്‍ സ്വദേശിനി ഗീത ഷോജി ഐസക് (58), പാലക്കാട് മണ്ണൂര്‍ സ്വദേശിനി റിയ ആന്‍ (41), മകള്‍ ടൈറ (8), മൂവാറ്റുപുഴ സ്വദേശിനി ജസ്ന കുറ്റിക്കാട്ടുചാലിയില്‍ (30), ഏക മകള്‍ റൂഹി മെഹ്റിന്‍ (ഒന്നര വയസ്സ്) എന്നിവരാണ് മരിച്ചത്. കേരളം, തമിഴ്നാട്, ഗോവ, കര്‍ണാടക സ്വദേശികളായ ഒമ്പത് കുടുംബങ്ങള്‍ ഉള്‍പ്പെടെ 28 പേരാണ് ഖത്തറില്‍ നിന്ന് കെനിയയിലെത്തിയത്.

കെനിയയില്‍ വാഹനാപകടം; അഞ്ച് വിനോദസഞ്ചാരികള്‍ മരിച്ചു

webdesk17 — Tue, 10 Jun 2025 11:07:09 +0000

നൈറോബി: കെനിയയില്‍ വാഹനാപകടത്തില്‍ അഞ്ച് വിനോദസഞ്ചാരികള്‍ മരിച്ചു. 27 പേര്‍ക്ക് പരിക്കേറ്റിട്ടുണ്ട്. ഇന്നലെ കെനിയയിലെ നാകുരു ഹൈവേയില്‍ വെച്ചായിരുന്നു അപകടം സംഭവിച്ചത്. അപകടത്തില്‍പെട്ട ബസ്സില്‍ 28 ഇന്ത്യന്‍ വിനോദ സഞ്ചാരികളും മൂന്ന് ടൂര്‍ ഗൈഡുകളും ഡ്രൈവറും ഉള്‍പ്പെടെ 32 പേരായിരുന്നു ഉണ്ടായിരുന്നത്.

വിനോദ സഞ്ചാരികള്‍ മസായി മാരാ നാഷണല്‍ പാര്‍ക്കിയില്‍ നിന്ന് ന്യാഹുരൂരുവിലേക്കും അവിടെ നിന്ന് നാകുരുവിലേക്കുമുള്ള യാത്രയിലായിരുന്നു. മോശം കാലാവസ്ഥയും വാഹനത്തിന്റെ ബ്രേക്ക് തകരാറിലുമായിരുന്നു എന്നാണ് അറിയാന്‍ കഴിഞ്ഞത്. ഇതാണ് അപകടകാരണമെന്നാണ് പ്രാഥമിക നിഗമനം. അഞ്ച് പേര്‍ സംഭവസ്ഥലത്തുവെച്ചു തന്നെ മരിച്ചിരുന്നു എന്ന് ന്യാന്‍ഡരുവ സെന്‍ട്രല്‍ പോലീസ് ഉദോഗസ്ഥ സ്റ്റെല്ല കീറോണാ പറഞ്ഞു. പരിക്കേറ്റവരെ അടുത്തുള്ള ആശുപത്രിയില്‍ പ്രവേശിപ്പിച്ചിരിക്കുകയാണെന്നും ഉദോഗസ്ഥ അറിയിച്ചു. സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്.

തലച്ചോറില്‍ രക്തം കട്ടപിടിച്ചയാള്‍ക്ക് പകരം തലവേദനയുമായി എത്തിയ ആളെ ശസ്ത്രക്രിയക്കു വിധേയമാക്കി; നാല് ഡോക്ടര്‍മാരെ സസ്‌പെന്റ് ചെയ്തു

chandrika — Fri, 02 Mar 2018 15:04:15 +0000

നെയ്‌റോബി: പല്ലിന് ക്ലിപ്പിടാന്‍ എത്തിയ ആളുടെ പല്ല് പറിക്കല്‍ പോലുള്ള അമളികള്‍ പറ്റാറുണ്ടെങ്കിലും ആളുമാറി ശസ്ത്രക്രിയക്കു വിധേയനാക്കുക എന്നത് കേട്ടു കേള്‍വിയില്ലാത്തതാണ്. പക്ഷേ കെനിയയുടെ തലസ്ഥാനമായ നെയ്‌റോബിയില്‍ ഇത്തരമൊരു സംഭവമാണ് കഴിഞ്ഞ ദിവസം നടന്നത്.

തലച്ചോറില്‍ രക്തം കട്ടപിടിച്ചതിനെ തുടര്‍ന്ന് ശസ്ത്രക്രിയക്കായി ആസ്പത്രിയില്‍ പ്രവേശിപ്പിച്ച രോഗിക്കു പകരം കെനിയാത്ത നാഷണല്‍ ഹോസ്പിറ്റലിലെ ഡോക്ടര്‍മാര്‍ ശസ്ത്രക്രിയക്കു വിധേയനാക്കിയത് തലവേദനയും നെറ്റിയില്‍ നീര്‍ക്കെട്ടുമായി എത്തിയ ആളെയാണ്. ശസ്ത്രക്രിയയുടെ ഘട്ടം വരെ ഡോക്ടര്‍മാര്‍ക്ക് തങ്ങള്‍ക്കു പറ്റിയ പിശക് മനസിലായില്ല. രോഗിയുടെ തലയോട്ടി കീറി തലച്ചോര്‍ പരിശോധിച്ച ഡോക്ടര്‍മാര്‍ക്ക് രക്തം കട്ടപിടിച്ചത് കാണാന്‍ കഴിയാതെയായതോടെയാണ് ആളു മാറിയതായി മനസിലായത്. സംഭവം വിവാദമായതോടെ നാലു ഡോക്ടര്‍മാരെ ആസ്പത്രി സസ്‌പെന്റ് ചെയ്തിട്ടുണ്ട്.

അബദ്ധത്തില്‍ ശസ്ത്രക്രിയക്കു വിധേയനാകേണ്ടി വന്നയാള്‍ സുഖം പ്രാപിച്ചു വരുന്നതായി ആസ്പത്രി സി.ഇ.ഒ ലിലി കോറോസ് പറഞ്ഞു. സമൂഹ മാധ്യമങ്ങളിലടക്കം ആസ്പത്രിക്കെതിരെ വന്‍ പ്രതിഷേധമാണ് ഉയരുന്നത്. നേരത്തെ ഗര്‍ഭിണികള്‍ ലൈംഗിക പീഡനത്തിന് വിധേയമായതായി ആരോപണം ഉയര്‍ന്നതിനെ തുടര്‍ന്ന് ആറാഴ്ച മുമ്പ് ഇതേ ആസ്പത്രിക്കെതിരെ അന്വേഷണത്തിന് ആരോഗ്യ മന്ത്രാലയം ഉത്തരവിട്ടിരുന്നു.

വോട്ടെടുപ്പില്‍ അട്ടിമറി ഉണ്ടായിട്ടില്ലെന്ന് കെനിയന്‍ തെരഞ്ഞെടുപ്പ് കമ്മീഷന്‍

chandrika — Thu, 10 Aug 2017 16:37:43 +0000

നെയ്‌റോബി: കെനിയന്‍ പ്രസിഡന്റ് തെരഞ്ഞെടുപ്പ് ഫലം അട്ടിമറിക്കാന്‍ കമ്പ്യൂട്ടര്‍ ശൃംഖലകള്‍ ഹാക്ക് ചെയ്യപ്പെട്ടുവെന്ന പ്രതിപക്ഷ ആരോപണം തെരഞ്ഞെടുപ്പ് കമ്മീഷന്‍ തള്ളി. കമ്മീഷന്റെ ഐടി സിസ്റ്റില്‍ ഒരുഘട്ടത്തില്‍ പോലും പ്രശ്‌നങ്ങളുണ്ടായിട്ടില്ലെന്ന് മുഖ്യ തെരഞ്ഞെടുപ്പ് ഉദ്യോഗസ്ഥന്‍ എസ്‌റ ചിലോബ പറഞ്ഞു. പ്രസിഡന്റ് ഉഹ്‌റു കെനിയാത്തക്ക് ശക്തമായ മേല്‍ക്കൈ ലഭിച്ച തെരഞ്ഞെടുപ്പ് ഫലം അംഗീകരിക്കില്ലെന്ന് പ്രതിപക്ഷ സ്ഥാനാര്‍ത്ഥി റൈല ഒഡിംഗ പ്രഖ്യാപിച്ചിട്ടുണ്ട്. എന്നാല്‍ കുറ്റമറ്റ രീതിയില്‍ വോട്ടെടുപ്പ് നടത്താന്‍ സാധിച്ചതായി കമ്മീഷന്‍ അവകാശപ്പെട്ടു.
കമ്മീഷന്‍ അകത്തും പുറത്തുമുള്ള ഐടി ശൃംഖലകളില്‍ ഒരുതരത്തിലുള്ള ഇടപെടലും ഉണ്ടായിട്ടില്ലെന്ന് ചിലോബ വ്യക്തമാക്കി. തെരഞ്ഞെടുപ്പില്‍ ക്രമക്കേടു നടന്നുവെന്ന് ആരോപിച്ച് പ്രതിപക്ഷം നടത്തിയ പ്രതിഷേധങ്ങള്‍ അക്രമാസക്തമായി. സുരക്ഷാ ഉദ്യോഗസ്ഥരുമായുള്ള ഏറ്റുമുട്ടലില്‍ നിരവധി പേര്‍ക്ക് പരിക്കുണ്ട്. തലസ്ഥാനമായ നെയ്‌റോബിയില്‍ രണ്ടുപേര്‍ പൊലീസിന്റെ വെടിയേറ്റ് മരിച്ചുവെന്ന വാര്‍ത്ത ഭരണകൂടം നിഷേധിച്ചു.
10 വര്‍ഷം മുമ്പ് നടന്ന പ്രസിഡന്റ് തെരഞ്ഞെടുപ്പിനെ തുടര്‍ന്നുണ്ടായ അക്രമങ്ങളില്‍ 1100ലേറെ പേര്‍ കൊല്ലപ്പെടുകയും ആറു ലക്ഷത്തോളം പേര്‍ കുടിയിറക്കപ്പെടുകയും ചെയ്ത ഓര്‍മകള്‍ ഇപ്പോഴും കെനിയന്‍ ജനതയെ വേട്ടയാടുന്നുണ്ട്. ഇത്തവണയും രക്തചൊരിച്ചില്‍ ആവര്‍ത്തിക്കുമോ എന്നാണ് ജനങ്ങളുടെ പേടി. കെനിയാത്തയെക്കാള്‍ ഏറെ മുന്നിലാണ് താന്നെന്ന് പാര്‍ട്ടിയുടെ വിലയിരുത്തലെന്ന് ഒഡിംഗ ട്വിറ്ററിലൂടെ അവകാശപ്പെട്ടു. ബലപ്രയോഗത്തിനു മുതിരാതെ ആത്മസംയമനം പാലിക്കാന്‍ ആഫ്രിക്കന്‍ യൂണിയനും യൂറോപ്യന്‍ യൂണിയനും കെനിയയിലെ രാഷ്ട്രീയ പാര്‍ട്ടികളോട് അഭ്യര്‍ത്ഥിച്ചു.