ബുധനാഴ്ച കോഴിക്കോട് മെഡിക്കല്‍ കോളജ് ആശുപത്രി മാതൃശിശുസംരക്ഷണ കേന്ദ്രത്തിലും ഡെപ്യൂട്ടി കമീഷണര്‍ കെ.ഇ. ബൈജുവിന്റെ നേതൃത്വത്തില്‍ അന്വേഷണസംഘം മൊഴിയെടുക്കാനെത്തി. സി.സി.ടി.വി ദൃശ്യങ്ങളുടെ സൂക്ഷ്മ പരിശോധനയും നടന്നു. മരിച്ച വിശ്വനാഥനെ ആള്‍ക്കൂട്ടം ചോദ്യം ചെയ്യുന്നതിന്റെ ദൃശ്യങ്ങള്‍ ലഭിച്ചിട്ടുണ്ടെങ്കിലും ആളുകളെ തിരിച്ചറിയാന്‍ പൊലീസിന് സാധിച്ചിട്ടില്ല. ശനിയാഴ്ചയാണ് ആദിവാസി യുവാവ് കല്‍പറ്റ സ്വദേശി വിശ്വനാഥന്‍ മെഡി. കോളജ് മാതൃശിശുസംരക്ഷണകേന്ദ്രത്തിന് സമീപം ആളൊഴിഞ്ഞ പറമ്ബിലെ മരത്തില്‍ തൂങ്ങിമരിച്ചത്. മോഷണ ആരോപണവുമായി ബന്ധപ്പെട്ട മാനസികപീഡനമാണ് ആത്മഹത്യക്ക് കാരണമായതെന്നാണ് നിഗമനം.