KERALA BUDGET 2017 – Chandrika Daily

ബജറ്റ് അവതരണം തുടങ്ങി

chandrika — Fri, 02 Feb 2018 04:13:58 +0000

പിണറായി സര്‍ക്കാറിന്റെ മൂന്നാംം ബജറ്റ് അവതരണം തുടങ്ങി. തീരദേശത്തിനായി 2000 കോടിയുടെ പ്രത്യേക പാക്കേജ് പ്രഖ്യാപിച്ചിട്ടുണ്ട്. എന്നാല്‍ കടുത്ത സാമ്പത്തിക പ്രതിസന്ധിയാണ് കേരളം നേരിടുന്നതെന്നും വരവിനേക്കാള്‍ കൂടിയ ചെലവാണ് കേരളത്തിന്റെ വെല്ലുവിളിയെന്നും തോമസ് ഐസക് പറഞ്ഞു.

ധനമന്ത്രി രാജിവെക്കണമെന്നും പുതിയ ബജറ്റ് അവതരിപ്പിക്കണമെന്നും: ചെന്നിത്തല

chandrika — Fri, 03 Mar 2017 12:59:02 +0000

തിരുവനന്തപുരം: സംസ്ഥാന ബജറ്റ് ചോര്‍ന്നതിലൂടെ ധനമന്ത്രി തോമസ് ഐസക്കിന് ഗുരുതര വീഴ്ചയാണ് സംഭവിച്ചതെന്ന് പ്രതിപക്ഷ നേതാവ് രമേശ് ചെന്നിത്തല. ബജറ്റ് ചോര്‍ന്ന സാഹചര്യത്തില്‍ അദ്ദേഹം രാജിവെക്കണമെന്നും പുതിയ ധനമന്ത്രി പുതിയ ബജറ്റ് അവതരിപ്പിക്കണമെന്നും ചെന്നിത്തല ആവശ്യപ്പെട്ടു. വിഷയത്തില്‍ ഗവര്‍ണര്‍ ജസ്റ്റിസ് പി. സദാശിവത്തെ സന്ദര്‍ശിച്ചു മാധ്യമങ്ങളോട് സംസാരിക്കുകയായിരുന്നു അദ്ദേഹം.

ബജറ്റിന്റെ ഹൈലൈറ്റ് മാത്രമാണ് പുറത്തായതെന്നാണ് ധനമന്ത്രി പറഞ്ഞത്. എന്നാല്‍, ഹൈലൈറ്റ് പുറത്തായതോടെ ബജറ്റിന്റെ പവിത്രത തന്നെയാണ് നഷ്ടപ്പെട്ടതെന്നും ഇപ്പോള്‍ ഒരുപിടി പേപ്പറുകള്‍ മാത്രമായി ബജറ്റ് മാറിയെന്നും അദ്ദേഹം കുറ്റപ്പെടുത്തി.

സംസ്ഥാന ബജറ്റ് ഒറ്റനോട്ടത്തില്‍

chandrika — Fri, 03 Mar 2017 12:04:22 +0000

തിരുവനന്തപുരം: ധനമന്ത്രി തോമസ് ഐസക് നിയമസഭയില്‍ അവതരിപ്പിച്ച ബജറ്റ് ഒറ്റനോട്ടത്തില്‍.

വിവിധ മേഖകളിലെ ബജറ്റ് വിഹിതം

• പശ്ചാത്തല വികസത്തിന് 25000 കോടി രൂപ
• 182 റോഡുകള്‍ക്ക് 5628 കോടി രൂപ
• മേല്‍പ്പാലങ്ങള്‍, ആര്‍ഒബികള്‍, 69 പാലങ്ങള്‍ എന്നിവക്ക് 2557 കോടി രൂപ
• തീരദേശ ഹൈവേക്ക് 6500 കോടി രൂപ, 3500 കോടി രൂപയുടെ മലയോര ഹൈവേ
നിര്‍മാണാനുമതി
• 1696 കോടി രൂപയുടെ കുടിവെള്ള പദ്ധതികള്‍
• പൊതു വിദ്യാലയങ്ങളുടെ പശ്ചാത്തല സൗകര്യ വികസനത്തിനും നിലവാര വര്‍ധനക്കും 1000 കോടിയുടെ പദ്ധതികള്‍.
• ഹയര്‍ സെക്കന്റി സ്‌കൂളുകളില്‍ 2500 തസ്തികകള്‍
• പൊതുജനാരോഗ്യ സംവിധാനത്തിന് 2500 കോടി രൂപ
• സൗജന്യവും സാര്‍വത്രികവുമായ ആരോഗ്യരക്ഷ ലക്ഷ്യം
• ആശുപത്രികളുടെ നിലവാര വര്‍ധനക്ക് 8000 പുതിയ തസ്തികകള്‍
• ഹരിത കേരളത്തിനും പൊതുവിദ്യാഭ്യാസത്തിനും ആരോഗ്യരക്ഷക്കും നിശ്ചിത ലക്ഷ്യങ്ങള്‍
• വയലേലകളില്‍ 10 ശതമാനം വര്‍ധന
• പൊതുവിദ്യാലയങ്ങളില്‍ പത്തു ശതമാനം കുട്ടികളുടെ വര്‍ധന
• സാമൂഹിക സുരക്ഷാ പെന്‍ഷനുകള്‍ 1100 രൂപയാക്കി
• പ്രവാസികള്‍ക്ക് 2000 രൂപയുടെ ക്ഷേമ പെന്‍ഷന്‍.
• പ്രവാസികളുടെ ഡേറ്റാബാങ്ക്
• സ്ത്രീകള്‍ക്കായി പ്രത്യേക വകുപ്പ് അടുത്തവര്‍ഷം; ജെന്റര്‍ ബജറ്റ് പുനസ്ഥാപിച്ചു
• കെഎസ്ആര്‍ടിസിക്ക് 3000 കോടിയുടെ പുനരുദ്ധാരണ പാക്കേജ്
• ഭിന്നശേഷിക്കാര്‍ക്ക് പ്രത്യേക പരിഗണന; എന്‍ഡോസള്‍ഫാന്‍ ഇരകള്‍ക്ക് 10 കോടി
• കയര്‍ കോര്‍പ്പറേഷന് 48 കോടി
• കൈത്തറി മേഖലക്ക് 72 കോടി
• റബര്‍ വിലസ്ഥിരതാ ഫണ്ടിന് 500 കോടി
• പത്രപ്രവര്‍ത്തക പെന്‍ഷന്‍ 2000 രൂപയും അല്ലാത്തവര്‍ക്ക് ആയിരം രൂപയുമാക്കി

ധനസൂചകങ്ങള്‍

• ആകെ വരുമാനം – 119124 കോടി രൂപ
• ആകെ ചെലവ് – 119601 കോടി രൂപ
• റവന്യൂ വരുമാനം – 93584 കോടി രൂപ
• റവന്യൂ ചെലവ് – 109627 കോടി രൂപ
• റവന്യൂ കമ്മി – 16043 കോടി രൂപ (2.14 %)
• മൂലധന ചെലവ് – 9057 കോടി രൂപ
• ധനകമ്മി – 25756 കോടി രൂപ (3.44%)
• പ്രൈമറി ഡെഫിസിറ്റ് – 1.62 %
• ശമ്പള ചെലവ് – 31909 കോടി രൂപ
• പെന്‍ഷന്‍ ചെലവ് – 18174 കോടി രൂപ
• പലിശ – 13631 കോടി രൂപ
• ശമ്പളം, പെന്‍ഷന്‍ പലിശ – ആകെ വരുമാനത്തിന്റെ 68.08 %

ബജറ്റ് ചോര്‍ന്നതിങ്ങനെ; ഐസകിനെതിരെ സി.പി.എമ്മില്‍ മുറുമുറുപ്പ്; സ്റ്റാഫിനെതിരെ നടപടിയുണ്ടാകും

chandrika — Fri, 03 Mar 2017 09:07:31 +0000

തിരുവനന്തപുരം: ബജറ്റ് അവതരണത്തിന് മുമ്പ് ബജറ്റ് ചോര്‍ന്ന സംഭവത്തില്‍ ധനമന്ത്രിക്ക് ജാഗ്രതക്കുറവുണ്ടായെന്ന് സി.പി.എം. സംഭവം അന്വേഷിക്കുമെന്ന് മന്ത്രി ഏ.കെ ബാലന്‍ അറിയിച്ചു. ഐസക്കിന്റെ സ്റ്റാഫിനെതിരെ നടപടിയുണ്ടാകാനും സാധ്യതയുണ്ട്.

രാവിലെ ഒന്‍പതുമണിയോടുകൂടി അവതരണം തുടങ്ങിയ ബജറ്റ് ഏകദേശം രണ്ടരമണിക്കൂറിന് ശേഷമാണ് ചോര്‍ന്നുവെന്ന് അറിയുന്നത്. പ്രതിപക്ഷ നേതാവ് രമേഷ് ചെന്നിത്തലയാണ് ബജറ്റിന്റെ പ്രിന്റൗട്ടുമായി രംഗത്തെത്തിയത്. അതോടെ ബജറ്റവതരണം തടസ്സപ്പെട്ടു. എന്താണ് സംഭവിച്ചതെന്ന് അന്വേഷിക്കാമെന്ന് സ്പീക്കര്‍ പറഞ്ഞു. സംഭവം ഗൗരവകരമാണെന്ന് ഐസക്കും പ്രതികരിച്ചു. തുടര്‍ന്ന് സംഭവത്തില്‍ പ്രതിഷേധിച്ച് പ്രതിപക്ഷം ഇറങ്ങിപ്പോവുകയും മീഡിയാ റൂമില്‍ സമാന്തര ബജറ്റ് ചെന്നിത്തല അവതരിപ്പിക്കുകയും ചെയ്തു. പിന്നീട് അവസാനഭാഗങ്ങള്‍ അവതരിപ്പിക്കാതെ ഐസക് ബജറ്റ് പൂര്‍ത്തീകരിക്കുകയായിരുന്നു. ശേഷം വിളിച്ചു ചേര്‍ത്ത വാര്‍ത്താസമ്മേളനത്തിലാണ് എന്താണ് സംഭവിച്ചതെന്ന് മന്ത്രി വ്യക്തമാക്കിയത്.

ബജറ്റ് അവതരണത്തിന് മുമ്പ് തന്റെ ഓഫീസില്‍നിന്ന് ചില ഭാഗങ്ങള്‍ മാധ്യമ പ്രവര്‍ത്തകര്‍ക്ക് നല്‍കിയിരുന്നുവെന്ന് മന്ത്രി വ്യക്തമാക്കി. മാധ്യമങ്ങള്‍ക്ക് തയ്യാറാക്കാനുള്ള ഹൈലൈറ്റ് നേരത്തെ ഒരുക്കാനായിരുന്നു ധനമന്ത്രിയുടെ ഓഫീസില്‍നിന്ന് ഇത്തരത്തിലൊരു നീക്കം നടത്തിയത്. എന്നാല്‍ നികുതി നിര്‍ദേശമടക്കമുള്ള ഈ ഭാഗങ്ങള്‍ പിന്നീട് സഭയില്‍ എത്തുകയായിരുന്നു. ഇങ്ങനെ പുറത്തുവന്ന ഭാഗങ്ങളാണ് ലോഡ് ചെയ്ത് പ്രതിപക്ഷ എം.എല്‍.എമാര്‍ക്ക് എത്തിച്ചുകൊടുത്തത്. ഇതിന് പിന്നില്‍ ചില മാധ്യമങ്ങളാണെന്നാണ് സൂചന. ബജറ്റ് അവതരണത്തിനിടെ ചോര്‍ന്ന ബജറ്റ് വായിച്ച് പ്രതിപക്ഷം രംഗത്തെത്തിയതോടെ എന്താണ് സംഭവിച്ചതെന്നറിയാതെ ഭരണപക്ഷം കുഴയുകയായിരുന്നു.

സംസ്ഥാന ബജറ്റ് ചോര്‍ന്നു; പ്രതിഷേധിച്ച് പ്രതിപക്ഷത്തിന്റെ ബദല്‍ ബജറ്റ്; ഗൗരവകരമെന്ന് ഐസക്

chandrika — Fri, 03 Mar 2017 06:05:32 +0000

തിരുവനന്തപുരം: സംസ്ഥാന സര്‍ക്കാരിന്റെ ബജറ്റ്- 2017 ചോര്‍ന്നെന്ന് പ്രതിപക്ഷത്തിന്റെ പരാതി. ബജറ്റ് സാമൂഹ്യമാധ്യമങ്ങളിലൂടെ പ്രചരിച്ചുവെന്ന് പ്രതിപക്ഷനേതാവ് രമേഷ് ചെന്നിത്തല ആരോപിച്ചു. ബജറ്റിന്റെ വിശദാംശങ്ങള്‍ അടങ്ങുന്ന പേപ്പറുകളുമായാണ് ചെന്നിത്തല നിയമസഭയില്‍ കാര്യങ്ങള്‍ വിശദീകരിച്ചത്. തന്റെ ഓഫീസില്‍ നിന്നാണ് ബജറ്റിന്റെ വിശദാംശങ്ങള്‍ അടങ്ങുന്ന പേപ്പറുകള്‍ ലഭിച്ചതെന്നും ചെന്നിത്തല കൂട്ടിച്ചേര്‍ത്തു.

ബജറ്റ് അവതരണത്തിനിടെയാണ് പി.സി വിഷ്ണുനാഥും ഹൈബി ഈഡന്‍ എംഎല്‍എയും അടക്കമുളളവര്‍ ബഹളവുമായി എഴുന്നേറ്റത്. പിന്നീട് കാര്യങ്ങള്‍ വിശദീകരിച്ച് ചെന്നിത്തല രംഗത്തെത്തി. സോഷ്യല്‍മീഡിയയിലും ദൃശ്യമാധ്യമങ്ങളിലും ബജറ്റിന്റെ വിശദാംശങ്ങള്‍ അവതരണത്തിന് മുമ്പുതന്നെ പ്രചരിച്ചുവെന്ന് ചെന്നിത്തല പറഞ്ഞു. ധനമന്ത്രിയുടെ ഓഫീസില്‍ നിന്നാണ് ബജറ്റ് ചോര്‍ന്നതെന്നും ചെന്നിത്തല കൂട്ടിച്ചേര്‍ത്തു. സംഭവത്തില്‍ പ്രതിഷേധിച്ച് പ്രതിപക്ഷം ഇറങ്ങിപ്പോയി. അതുമൂലം ബജറ്റവതരണം സ്തംഭിപ്പിക്കപ്പെട്ടു. ആവശ്യമായ പരിശോധന നടത്തുമെന്ന് സ്പീക്കര്‍ ശ്രീരാമകൃഷ്ണന്‍ അറിയിച്ചു. സംഭവം ഗൗരവകരമാണെന്നും പരിശോധിക്കാമെന്നും ധനമന്ത്രി പറഞ്ഞു.

മാന്‍ഹോള്‍ ശുചീകരണത്തിന് 10കോടി; ഇന്റര്‍നെറ്റ് സേവനം പൗരാവകാശമാക്കുമെന്നും ഐസക്

chandrika — Fri, 03 Mar 2017 05:12:17 +0000

ഇന്റര്‍നെറ്റ് സേവനം പൗരാവകാശമാക്കും, 20ലക്ഷം ദരിദ്ര കുടുംബങ്ങള്‍ക്ക് സൗജന്യ ഇന്റര്‍നെറ്റ് കണക്ഷന്‍ നല്‍കുമെന്നും ധനമന്ത്രി ഐസക് ബജറ്റില്‍.

മറ്റു പ്രഖ്യാപനങ്ങള്‍

മലയോര ഹൈവേക്കായി ഒന്‍പതു ജില്ലകളില്‍ നിര്‍മ്മാണപപ്രവര്‍ത്തനങ്ങള്‍ തുടങ്ങും
മാന്‍ഹോള്‍ ശുചീകരണത്തിന് 10കോടി
തീരദേശ പുനരധിവാസ പദ്ധതിക്ക് 150കോടി രൂപ അനുവദിച്ചു
മെഡിക്കല്‍ കോളേജുകളില്‍ ഡോക്ടര്‍മാരേയും ജീവനക്കാരേയും നിയമിക്കും
കേരള സഹകരണബാങ്ക് രൂപീകരിക്കും
20കോടി രൂപ ബീഡി തൊഴിലാളി ക്ഷേമത്തിനായി ചെലവഴിക്കും
കൈത്തറി രംഗതത്ത് അസംസ്‌കൃത ഉല്‍പ്പന്നങ്ങള്‍ വാങ്ങാനായി 11കോടി രൂപ
സ്‌കൂള്‍ യൂണിഫോമുകളില്‍ കൈത്തറി വ്യാപിപ്പിക്കാന്‍ നടപടി സ്വീകരിക്കും
റബ്‌കോ പുനരുദ്ധരിക്കുന്നതിന് നടപടി സ്വീകരിക്കും
ഉള്‍നാടന്‍ മത്സ്യമോഖലക്ക് 49കോടി രൂപ
മത്സ്യബന്ധന ഉപകരണങ്ങള്‍ക്ക് ഇന്‍ഷുറന്‍സ് ഉറപ്പാക്കും
പ്രാഥമിക ആരോഗ്യകേന്ദ്രങ്ങളില്‍ 5257പുതിയ തസ്തികകള്‍
കുളങ്ങള്‍, നീര്‍ച്ചാലുകള്‍ വൃത്തിയാക്കി ഉപയോഗപ്രദമാക്കും
സര്‍ക്കാര്‍ ആസ്പത്രികള്‍ക്ക് 2000കോടി, 170ആസ്പത്രികളെ കുടുംബാരോഗ്യ കേന്ദ്രങ്ങളാക്കും
ശുചിത്വമിഷന് 127കോടി
കൃഷിയിലും അനുബന്ധ മേഖലകളിലും വളര്‍ച്ച 2.95ശതമാനം താഴ്ന്നു
നെല്ലു സംരക്ഷണത്തിന് 700കോടി
റേഷന്‍ വ്യാപാരികളുടെ കമ്മീഷനും ഹാന്‍ഡിംഗ് ചാര്‍ജ്ജും വര്‍ദ്ധിപ്പിക്കും, ഇതിനായി 100കോടി
പിന്നോക്ക വിഭാഗക്കാര്‍ക്ക് 2600കോടി

തുടക്കം എം.ടിയെ ഉദ്ധരിച്ച്; സംസ്ഥാന ബജറ്റ് -2017 അവതരിപ്പിക്കുന്നു

chandrika — Fri, 03 Mar 2017 04:32:31 +0000

തിരുവനന്തപുരം: സംസ്ഥാന സര്‍ക്കാരിന്റെ ബജറ്റ്-2017 നിയമസഭയില്‍ ധനമന്ത്രി തോമസ് ഐസക് അവതരിപ്പിക്കുന്നു. നോട്ട് നിരോധനവുമായി ബന്ധപ്പെട്ട് എം.ടി വാസുദേവന്‍ നായര്‍ ഉന്നയിച്ച വിമര്‍ശനങ്ങള്‍ ചൂണ്ടിക്കാണിച്ചായിരുന്നു ബജറ്റിന് തുടക്കമിട്ടത്. നോട്ട് നിരോധന കാലത്തെ ബജറ്റ് അവതരണം വെല്ലുവിളിയാണ്. അഞ്ചുമാസം പിന്നിട്ടിട്ടും നോട്ട് നിരോധനത്തിന്റെ ദുരിതങ്ങള്‍ തീര്‍ന്നിട്ടില്ലെന്നും മന്ത്രി പറഞ്ഞു. ബാങ്കുകളില്‍ പണമുണ്ട്. എന്നാല്‍ വായ്പ്പയെടുക്കാന്‍ ആളില്ല. നോട്ടുനിരോധനം നികുതി വരുമാനത്തെ ബാധിക്കും. കേന്ദ്രബജറ്റ് നിരാശാജനകമാണെന്നും മന്ത്രി കൂട്ടിച്ചേര്‍ത്തു.

ബജറ്റിലെ പ്രഖ്യാപനങ്ങള്‍

എല്ലാ സാമൂഹ്യ പെന്‍ഷനുകളും 1100രൂപയാക്കി
60വയസ് കഴിഞ്ഞ പെന്‍ഷനില്ലാത്ത 2 ഏക്കറില്‍ കൂടുതല്‍ ഭൂമിയില്ലാത്ത എല്ലാവര്‍ക്കും പെന്‍ഷന്‍
അമൃത് പദ്ധതിക്ക് 150കോടി
ജനകീയാസൂത്രണം രണ്ടാം പതിപ്പ് തയ്യാറാക്കും
അഞ്ച് വര്‍ഷത്തിനുള്ളില്‍ 16000 കോടിയുടെ പദ്ധതി
ആധുനിക അറവുശാലകള്‍ക്ക് 100 കോടി രൂപ.
മണ്ണ് ജലസംരക്ഷണത്തിന് 150കോടി രൂപ. ചെറുകിട ജലസേചനത്തിന് 250കോടി രൂപ
6മാസം കൊണ്ട് കിഫ്ബി അഭിമാനകരമായ നേട്ടം കൈവരിച്ചു
ജീവിതശൈലി രോഗങ്ങള്‍ക്ക് സൗജന്യ ചികിത്സ
കാരണ്യപദ്ധതിക്ക് 350കോടി, മറ്റു പദ്ധതികള്‍ ചേര്‍ത്ത് 1000കോടി
ഓട്ടിസം ബാധിച്ച കുട്ടികള്‍ക്കായി ഓരോ ജില്ലകളിലും ഓട്ടിസം പാര്‍ക്ക്. ഇതിനായി ഏഴുകോടി രൂപ വകയിരുത്തി.
സ്മാര്‍ട്ട് സിറ്റികള്‍ക്ക് 100കോടി
സ്‌കൂള്‍ നവീകരണത്തിന് മാസ്റ്റര്‍ പ്ലാന്‍, കിഫ്ബിയില്‍ നിന്ന് 500കോടി
ബൃഹത് ആരോഗ്യ പരിപാലന പദ്ധതി വൈകും
സര്‍ക്കസ് കലാകാരന്‍മാരുടെ പുനരധിവാസത്തിന് 1കോടി രൂപ
ചെറുകിട ജലസേചന പദ്ധതികള്‍ക്ക് 208കോടി രൂപ

വിലക്കയറ്റത്തില്‍ നിന്ന് ആശ്വാസമാകുന്ന നടപടികളുണ്ടാകുമെന്ന് ധനമന്ത്രി; തോമസ് ഐസക്

chandrika — Fri, 03 Mar 2017 03:21:14 +0000

തിരുവനന്തപുരം: സാധാരണക്കാര്‍ക്ക് ഗുണകരമായിരിക്കുന്ന ബജറ്റായിരിക്കും ഇത്തവണ അവതരിപ്പിക്കുന്നതെന്ന് ധനമന്ത്രി തോമസ് ഐസക് പറഞ്ഞു. വരള്‍ച്ചയെ നേരിടാനുള്ള പദ്ധതികളും വിലക്കയറ്റത്തില്‍ നിന്ന് ആശ്വാസം നല്‍കുന്ന നടപടികളും ഉണ്ടാകുമെന്നും മന്ത്രി പറഞ്ഞു. ബജറ്റ് അവതരണത്തിനുമുമ്പ് മാധ്യമങ്ങളോട് സംസാരിക്കുകയായിരുന്നു അദ്ദേഹം. രാവിലെ ഒമ്പതു മണിക്കാണ് ബജറ്റ് അവതരണം തുടങ്ങുന്നത്. പിണറായി സര്‍ക്കാരിന്റെ ആദ്യത്തെ സമ്പൂര്‍ണ്ണ ബജറ്റാണിത്. ഇത് എട്ടാം തവണയാണ് ജോമസ് ഐസക് ബജറ്റ് അവതരിപ്പിക്കുന്നത്. വികസനത്തിന് ഊന്നല്‍ നല്‍കും, പദ്ധതികളില്‍ കിഫ്ബിക്ക് ഉള്ള മേല്‍ക്കൈ നിലനിര്‍ത്തും, പെന്‍ഷന്‍, ആരോഗ്യം, വിദ്യാഭ്യാസം എന്നിവക്ക് ഊന്നല്‍, സ്ത്രീകള്‍ക്ക് എതിരായ അതിക്രമങ്ങള്‍ തടയുന്നതിനുള്ള പദ്ധതികള്‍ക്ക് പണത്തിന്റെ പിന്തുണ കൂടി നല്‍കുമെന്നും മന്ത്രി പറഞ്ഞു.