kerala film awards-2017 – Chandrika Daily

ഇന്ദ്രന്‍സ് പിന്തള്ളിയത് ഫഹദിനെയും സുരാജിനെയും; പാര്‍വതി വിനീതാ കോശിയെ

chandrika — Thu, 08 Mar 2018 18:50:23 +0000

തിരുവനന്തപുരം: മികച്ച നടനുള്ള പോരാട്ടത്തില്‍ ഇന്ദ്രന്‍സ് പിന്നിലാക്കിയത് ഫഹദ് ഫാസിലിനെയും സുരാജ് വെഞ്ചാറമൂടിനെയും. അവസാന റൗണ്ടുവരെയും ഇരുവരും ഇന്ദ്രന്‍സിനൊപ്പമുണ്ടായിരുന്നു. തൊണ്ടിമുതലും ദൃക്‌സാക്ഷിയിലേയും അഭിനയ മികവാണ് ഫഹദിനെ അവസാന റൗണ്ടിലേക്ക് എത്തിച്ചത്. തൊണ്ടിമുതലും ദൃക്‌സാക്ഷിക്കുമൊപ്പം ‘സവാരിയിലെ’ അഭിനയ മികവുമാണ് സുരാജിനെ അവസാന റൗണ്ടിലെത്തിച്ചത്. എന്നാല്‍ പുതുമുഖങ്ങള്‍ക്ക് പുരസ്‌കാരം നല്‍കണമെന്ന ജൂറിയുടെ പൊതുവായ സമീപനം ഇന്ദ്രന്‍സിനെ തുണക്കുകയായിരുന്നു.
പുതുമുഖങ്ങള്‍ക്ക് പുരസ്‌കാരം നല്‍കണമെന്ന ജൂറിയുടെ നിലപാട് മികച്ച നടിയുടെ കാര്യത്തില്‍ പക്ഷേ നടപ്പായില്ല. വിനീതാ കോശിയില്‍ നിന്ന് ശക്തമായ വെല്ലുവിളി പാര്‍വതിക്ക് നേരിടേണ്ടിവന്നു. ഭര്‍ത്യപീഡനത്തിനിരയാകുന്ന ഒരു ഉള്‍നാടന്‍ പെണ്‍കുട്ടിയുടെ ചെറുത്തുനില്‍പ്പിന്റേയും അതിജീവനത്തിന്റെയും ഭാവതീവ്രമായ ആവിഷ്‌കാരം കാഴ്ചവെച്ച വിനീതക്ക് ഒടുവില്‍ പ്രത്യേക ജൂറി അവാര്‍ഡ് നല്‍കുകയായിരുന്നു. മഞ്ജു വാര്യര്‍, നിമിഷ സജയന്‍ എന്നിവരെ മറികടന്നാണ് വിനീതയും പാര്‍വതിയും അവസാന റൗണ്ടിലേത്തിയത്.
ആറ് കുട്ടികളുടെ ചിത്രങ്ങള്‍ ഉള്‍പ്പെടെ 110 സിനിമകളാണ് ജൂറിയുടെ മുന്നിലെത്തിയത്. 110 സിനിമകളും ആദ്യ ഘട്ടത്തില്‍ ജൂറി അംഗങ്ങള്‍ രണ്ടു ഗ്രൂപ്പായി തിരിഞ്ഞു കണ്ടു. ഇതില്‍ മികച്ച 23 സിനിമകള്‍ എല്ലാവരും ചേര്‍ന്നു വീണ്ടും കണ്ടു. ജൂറിയുടെ മുന്നിലെത്തിയവയില്‍ 58 ചിത്രങ്ങള്‍ പുതുമുഖ സംവിധായകരുടേതായിരുന്നു. ഒരു ചിത്രം മാത്രമാണ് സ്ത്രീ സംവിധായികയുടേത്. 110 ചിത്രങ്ങളുണ്ടായിട്ടും പൊതുവായുള്ള സിനിമകളുടെ നിലവാരം ശുഭോദര്‍ക്കമായിരുന്നില്ലെന്നാണ് ജൂറി വിലയിരുത്തല്‍. ചിത്രങ്ങളില്‍ ഏറിയ പങ്കും സിനിമ എന്ന മാധ്യമത്തെ ഗൗരവമായി കണക്കാക്കാതെ സൃഷ്ടിക്കപ്പെട്ടവയായിരുന്നുവെന്ന് ജൂറി ചെയര്‍മാന്‍ ടി.വി ചന്ദ്രന്‍ പറഞ്ഞു.

മികച്ച ചിത്രം മാന്‍ഹോള്‍; മികച്ച നടന്‍ വിനായകന്‍, നടി രജീഷ വിജയന്‍

chandrika — Tue, 07 Mar 2017 12:00:00 +0000

തിരുവനന്തപുരം: സംസ്ഥാന സര്‍ക്കാറിന്റെ ചലച്ചിത്ര അവാര്‍ഡുകള്‍ പ്രഖ്യാപിച്ചു. മാന്‍ഹോള്‍ സിനിമ സംവിധാനം ചെയ്ത വിധു വിന്‍സന്റ് മികച്ച സംവിധായകയായും കമ്മട്ടിപ്പാടത്തിന്റെ അഭിനയത്തിന് വിനായകന്‍ മികച്ച നടനായും തെരഞ്ഞെടുത്തു. അനുരാഗ കരിക്കിന്‍ വെള്ളം എന്ന ചിത്രത്തിലെ അഭിനയത്തിന് രജീഷ വിജയന്‍ മികച്ച നടിക്കുള്ള അവാര്‍ഡ് നേടി.

മന്ത്രി എ.കെ.ബാലനാണ് പുരസ്‌കാരങ്ങള്‍ പ്രഖ്യാപിച്ചത്. മികച്ച ചിത്രമായി മാന്‍ഹോളും രണ്ടാമത്തെ കഥാചിത്രമായി ഒറ്റയാള്‍ പാതയും തിരഞ്ഞെടുക്കപ്പെട്ടു.
കോടികള്‍ ലാഭം നേടിയ പുലിമുരുകന്‍ ഉള്‍പ്പടെ 68 സിനിമകളാണ് പുരസ്‌കാരത്തിന് എത്തിയത്. ഇതില്‍ നല്ലൊരു പങ്കും മതിയായ നിലവാരം പുലര്‍ത്തിയില്ലെന്നാണ് ജൂറി വിലയിരുത്തല്‍. പ്രശസ്ത ഒഡീഷ സംവിധായകനും ക്യാമറാമാനുമായ എ.കെ.ബിര്‍ അധ്യക്ഷനായ പത്തംഗ ജൂറിയാണ് അവാര്‍ഡ് നിര്‍ണയം നടത്തിയത്.

മികച്ച നടന്‍: വിനായകന്‍ (കമ്മട്ടിപ്പാടം)

മികച്ച നടി: രജീഷ വിജയന്‍ (അനുരാഗ കരിക്കിന്‍ വെള്ളം)

മികച്ച സംവിധായകന്‍: വിധുവിന്‍സെന്റ് (മാന്‍ഹോള്‍)

മികച്ച സിനിമ: മാന്‍ഹോള്‍

ജനപ്രിയ ചിത്രം: മഹേഷിന്റെ പ്രതികാരം

മികച്ച സ്വഭാവ നടന്‍: മണികണ്ഠന്‍ (കമ്മട്ടിപ്പാടം)

മികച്ച സ്വഭാവ നടി: വി.കെ.കാഞ്ചന (ഓലപ്പീലി)

തിരക്കഥാകൃത്ത്: ശ്യാം പുഷ്‌കരന്‍ (മഹേഷിന്റെ പ്രതികാരം)

നവാഗത സംവിധായകന്‍: ഷാനവാസ് വാവക്കുട്ടി (കിസ്മത്ത്)

മികച്ച കുട്ടികളുടെ ചിത്രം: കോലുമിട്ടായി

പിന്നണി ഗായകന്‍: സൂരജ് സന്തോഷ് (ഗപ്പി)

പിന്നണി ഗായിക: ചിത്ര (കാംബോജി)

ഗാനരചന :ഒഎന്‍വി കുറുപ്പ് (കാംബോജി)

മികച്ച മേക്കപ്പ് മാന്‍: എന്‍.ജി.റോഷന്‍

കഥാകൃത്ത്: സലിം കുമാര്‍ (കറുത്ത ജൂതന്‍)

ബാലതാരം (ആണ്‍): ചേതന്‍ ജയലാല്‍ (ഗപ്പി)

മികച്ച സിനിമാ ഗ്രന്ഥം: സിനിമ മുതല്‍ സിനിമ വരെ

മികച്ച സിനിമാ ലേഖനം: വെളുത്ത തിരശീലയിലെ കറുത്ത ഉടലുകള്‍

മികച്ച നടന്‍ വിനായകനോ?; സംസ്ഥാന ചലച്ചിത്ര പുരസ്‌ക്കാര പ്രഖ്യാപനം വൈകുന്നേരം നടക്കും

chandrika — Tue, 07 Mar 2017 07:12:55 +0000

തിരുവനന്തപുരം: സംസ്ഥാന ചലച്ചിത്ര പുരസ്‌ക്കാര പ്രഖ്യാപനം ഇന്ന് വൈകുന്നേരം നടക്കും.
മികച്ച ചിത്രത്തിനായി കടുത്ത മത്സരം നടക്കുമ്പോള്‍ അവസാന റൗണ്ടില്‍ മഹേഷിന്റെ പ്രതികാരം, കാട് പൂക്കുന്നനേരം, മാന്‍ഹോള്‍, പിന്നെയും, അയാള്‍ ശശി,ഗപ്പി, കിസ്മത്ത്, കമ്മട്ടിപ്പാടം,കറുത്ത ജൂതന്‍ എന്നീ ചിത്രങ്ങളാണുള്ളത്. മികച്ച നടനായി വിനായകന്‍ എത്തുന്നതിനാണ് സാധ്യത. വിനായകനെ കൂടാതെ ദിലീപും മോഹന്‍ലാലും, ഫഹദ് ഫാസിലും, ശ്രീനിവാസനും അവസാന റൗണ്ടിലുണ്ട്. മികച്ച നടിക്കുള്ള പുരസ്‌ക്കാരത്തിന് കാവ്യ മാധവനും റിമ കല്ലിങ്കലും സുരഭിയും മത്സരിക്കുന്നു. മികച്ച സംവിധായികയായി വിധുവിന്‍സെന്റിനെ (മാന്‍ഹോള്‍)തിരഞ്ഞെടുക്കുമെന്നാണ് സൂചന. സംവിധായകരായ പ്രിയനന്ദനന്‍, സുന്ദര്‍ദാസ്, സുദേവന്‍, തിരക്കഥാകൃത്ത് പി.എഫ് മാത്യൂസ്, നടി ശാന്തികൃഷ്ണ, ഗായകന്‍ വി.ടി മുരളി, സൗണ്ട് ഡിസൈനര്‍ അരുണ്‍ നമ്പ്യാര്‍, നിരൂപക ഡോ മീന.ടി.പിള്ള, ചലച്ചിത്ര അക്കാദമി സെക്രട്ടറി മഹഷ് പഞ്ചു എന്നിവരാണ് ജൂറി അംഗങ്ങള്‍. ഇന്ന് വൈകുന്നേരം അഞ്ചിന് മന്ത്രി ഏ.കെ ബാലനാണ് പുരസ്‌കാര പ്രഖ്യാപനം നടത്തുക.