സാങ്കേതികാര്‍ത്ഥത്തില്‍ നിയമ സഭക്കുള്ളില്‍ നടക്കുന്ന ചര്‍ച്ചകളെല്ലാം നിയമനിര്‍മാണവുമായി ബന്ധപ്പെട്ടതാണ്. ജന പ്രതിനിധി സഭ എന്ന നിലയില്‍ സംസ്ഥാനത്തിന്റെ പൊതുകാര്യങ്ങളും ഇവിടെ ചര്‍ച്ചാവിഷയമാകുന്നു. എന്നാല്‍ അടുത്തിടെ കാര്യങ്ങള്‍ ശരിയായ വിധത്തിലല്ല നടക്കുന്നതെന്ന് പറഞ്ഞാല്‍ കുറ്റപ്പെടുത്താനാകില്ല. കളിക്കളങ്ങളുടെ പ്രതീതി ജനിപ്പിക്കുന്ന വെല്ലുവിളികളും വീമ്പുപറച്ചിലും പോര്‍വിളികളുമൊക്കെയാണ് ഭരണകക്ഷി അംഗങ്ങളില്‍ നിന്നുണ്ടാകുന്നത്. ഭരണകക്ഷി അംഗങ്ങള്‍തന്നെ സഭ മുടക്കുന്ന കാഴ്ചയും ഇന്നലെ കാണാനായി. സ്പീക്കര്‍ എ.എന്‍ ഷംസീറിന് ഭരണകക്ഷി അംഗങ്ങളെ ശകാരിക്കേണ്ടിവന്നതിലേക്കുവരെ കാര്യങ്ങളെത്തി. ഇപ്പോഴത്തെ ഭരണകക്ഷി അംഗങ്ങള്‍ പ്രതിപക്ഷമായിരുന്നപ്പോള്‍ സഭ തന്നെ തല്ലിപ്പൊളിക്കുന്ന കാഴ്ചയായിരുന്നു കണ്ടിരുന്നത്. അതിനാല്‍ അവരില്‍നിന്ന് മാന്യത കൂടുതലൊന്നും പ്രതീക്ഷിക്കേണ്ടതുമില്ല.

ലൈഫ് മിഷന്‍ പദ്ധതിയില്‍ പ്രതിപക്ഷം കൊണ്ടുവന്ന അടിയന്തര പ്രമേയത്തില്‍ ചര്‍ച്ച നടക്കവേയാണ് മുഖ്യമന്ത്രിയുടെ നേതൃത്വത്തില്‍ സഭ തടസ്സപ്പെടുത്തുന്ന നടപടിയുണ്ടായത്. പ്രതിപക്ഷത്തിനായി അടിയന്തര പ്രമേയ നോട്ടീസ് നല്‍കിയ മാത്യു കുഴല്‍നാടനെ മുഖ്യമന്ത്രിയുടെ നേതൃത്വത്തില്‍ ആക്രമിക്കുന്നതാണ് സഭയില്‍ കണ്ടത്. അടിയന്തര പ്രമേയ നോട്ടീസില്‍ പതിവില്ലാത്ത തരത്തില്‍ മുഖ്യമന്ത്രി സഭയില്‍ എഴുന്നേറ്റ് മൂന്നുതവണയാണ് വെല്ലുവിളിച്ചത്. മുഖ്യമന്ത്രിയുടെ പാത പിന്തുടര്‍ന്ന് മറ്റു മന്ത്രിമാരും രംഗത്തെത്തി. ഇതേതുടര്‍ന്ന് രൂപപ്പെട്ട ബഹളത്തെതുടര്‍ന്ന് സഭ നിര്‍ത്തിവെക്കുകയായിരുന്നു.

‘മുഖ്യമന്ത്രിയുടെ ഇടതും വലതും നിന്നവരാണ് കേസിലെ പ്രതികളെന്നും ഇതിന്റെ നാള്‍വഴികള്‍ ഇഴകീറി പരിശോധിച്ചാല്‍ ബന്ധം വ്യക്തമാകും. ശിവശങ്കറിന് സ്വപ്‌ന സുരേഷ് അയച്ച വാട്‌സ് ആപ് ചാറ്റ് പുറത്തുവന്നിട്ടുണ്ടെന്നും, യു.എ.ഇ കോണ്‍സുലേറ്റിന് റെഡ് ക്രസന്റുമായി കരാറില്‍ ഏര്‍പ്പെടാന്‍ മുഖ്യമന്ത്രിയുടെ അനുമതി വാങ്ങിത്തരണമെന്നാണ് ചാറ്റില്‍ പറയുന്നത്. പദ്ധതിക്കായി മുഖ്യമന്ത്രിയുടെ അഡീഷണല്‍ പ്രൈവറ്റ് സെക്രട്ടറി സി.എം രവീന്ദ്രനെ വിളിക്കാനാണ് ശിവശങ്കര്‍ സ്വപ്‌നയോട് പറയുന്നത്. തെറ്റാണെങ്കില്‍ നിഷേധിക്കാനുള്ള തന്റേടം മുഖ്യമന്ത്രി കാണിക്കണം.

2019 ജൂലൈയിലെ ഇ.ഡി റിമാന്‍ഡ് റിപ്പോര്‍ട്ടില്‍ കോണ്‍സുലേറ്റ് ജനറലും ശിവശങ്കറും സ്വപ്‌നയും മുഖ്യമന്ത്രിയുമായി ക്ലിഫ്ഹൗസില്‍ ചര്‍ച്ച നടത്തിയെന്ന് പറയുന്നുണ്ട്’ ഇക്കാര്യം മാത്യു കുഴല്‍നാടന്‍ വ്യക്തമാക്കിയതാണ് മുഖ്യമന്ത്രിയെ പ്രകോപിതനാക്കിയത്. പ്രതിപക്ഷ സമരങ്ങളെ അടിച്ചമര്‍ത്തുന്ന സര്‍ക്കാര്‍ നടപടി ചോദ്യംചെയ്ത പ്രതിപക്ഷ നേതാവിനെതിരെ മുഖ്യമന്ത്രി തിരിഞ്ഞത് തൊട്ട് മുമ്പത്തെ ദിവസമാണ്. യുവജന സംഘടനാ നേതാക്കള്‍ക്കെതിരെ കേസെടുക്കുകയും കരുതല്‍ തടങ്കലിലാക്കുകയും ചെയ്തത് ചോദ്യംചെയ്ത് അനുമതി തേടിയ അടിയന്തര പ്രമേയ നോട്ടീസിന് മറുപടി പറയവേയായിരുന്നു മുഖ്യമന്ത്രിയുടെ വീമ്പുപറച്ചില്‍. പഴയ വിജയനാണെങ്കില്‍ താന്‍ അപ്പോഴേ മറുപടി പറഞ്ഞിട്ടുണ്ടാകുമെന്നായിരുന്നു മുഖ്യമന്ത്രിയുടെ അഹങ്കാരത്തോടെയുള്ള വെല്ലുവിളി.

അന്വേഷണ ഏജന്‍സികള്‍ക്കുമുന്നില്‍ എന്തെല്ലാമോ ഒളിപ്പിക്കാനുണ്ടെന്നാണ് മുഖ്യമന്ത്രിയുടെ ഈ വെപ്രാളം കണ്ടാല്‍ തോന്നുക. നേരായ വഴിയിലാണെങ്കില്‍ അന്വേഷണത്തെ ഭയക്കേണ്ട യാതൊരാവശ്യവുമില്ല. മുഖ്യമന്ത്രി ഇങ്ങനെ വികാരം കൊള്ളേണ്ടതുമില്ല. ലൈഫ് മിഷന്‍ അഴിമതിയില്‍ സര്‍ക്കാര്‍ ഓഫീസുകള്‍ക്കോ അതുമായി ബന്ധപ്പെട്ടവര്‍ക്കോ പങ്കില്ലെന്നും കാരറുകാര്‍ക്ക് മാത്രമാണ് പങ്കെന്നുമായിരുന്നു സര്‍ക്കാര്‍ ആവര്‍ത്തിച്ചിരുന്നത്. എന്നാല്‍ സര്‍ക്കാര്‍ ഏജന്‍സി തന്നെ പ്രിന്‍സിപ്പല്‍ സെക്രട്ടറിയായിരുന്ന ശിവശങ്കറിനെ പ്രതി ചേര്‍ത്തതോടെ ഈ വാദത്തിന്റെ മുനയൊടിയുകയായിരുന്നു. മുഖ്യമന്ത്രിയുടെ അഡീഷണല്‍ പ്രൈവറ്റ് സെക്രട്ടറി സി.എം രവീന്ദ്രനെ ചോദ്യം ചെയ്യാന്‍ വിളിപ്പിച്ചതോടെ സര്‍ക്കാര്‍ പരുങ്ങലിലായി. എന്നാല്‍ ഇ.ഡിക്ക് കടന്നുവരാന്‍ കഴിയാത്ത സ്ഥലമായ നിയമസഭാമന്ദിരത്തില്‍ രവീന്ദ്രന് സുരക്ഷിത താവളമൊരുക്കുകയാണ് സര്‍ക്കാര്‍ ചെയ്തത്.

രവീന്ദ്രനെ ചോദ്യംചെയ്താല്‍ കുരുക്കുമുറുകുന്നതു തനിക്കാണെന്ന് ഉത്തമബോധ്യമുള്ളതിനാലാണ് മുഖ്യമന്ത്രിയുടെ വെപ്രാളമത്രയും. മുഖ്യമന്ത്രിയുടെ അഡീഷണല്‍ പ്രൈവറ്റ് സെക്രട്ടറിയെ കേന്ദ്ര ഏജന്‍സി ചോദ്യം ചെയ്യലിന് വിളിപ്പിച്ചത് അസാധാരണമായ സംഭവമാണ്. ലൈഫ് മിഷന്റെ ചെയര്‍മാന്‍ മുഖ്യമന്ത്രിയാണ്. അദ്ദേഹത്തിന്റെ പ്രതിപുരുഷന്മാരായി വന്ന പ്രിന്‍സിപ്പല്‍ സെക്രട്ടറിയും അഡീഷണല്‍ പ്രൈവറ്റ് സെക്രട്ടറിയും അഴിമതിയുടെ സംശയനിഴലിലാണ്. ഇക്കാര്യം നിയമസഭയില്‍ ചര്‍ച്ച ചെയ്യാനാണ് പ്രതിപക്ഷം ശ്രമിച്ചത്. പക്ഷേ അത് തടസപ്പെടുത്താനുള്ള ശ്രമമാണ് മുഖ്യമന്ത്രിയടക്കം ഭരണകക്ഷി കാട്ടിക്കൂട്ടിയത്. പ്രതിപക്ഷത്തിന് പറയാനുള്ളത് കേള്‍ക്കാനും സഹിഷ്ണുത കാണിക്കാനും ഭരണകക്ഷിക്കാര്‍ തയാറാവണം. വമ്പത്തരങ്ങള്‍ പറഞ്ഞും ഭീഷണിപ്പെടുത്തിയും എപ്പോഴും ഒളിച്ചോടാന്‍ കഴിയുമെന്ന് കരുതേണ്ട.

ഏപ്രിൽ അവസാനത്തോടെ സംസ്ഥാനത്ത് തെരഞ്ഞെടുത്ത് പ്രഖ്യാപനം വരുന്നതിനാൽ രാഹുലിന്റെ സന്ദർശനം സംസ്ഥാനത്ത് യു.ഡി.എഫ് കേന്ദ്രങ്ങളിൽ വലിയ ആവേശമുണ്ടാക്കും. രാഹുലിന്റെ സന്ദർശനത്തിന് മുന്നോടിയായി വയനാട് ജില്ലാ യു ഡി എഫ് കമ്മിറ്റി ഇന്നലെ കൽപ്പറ്റ ലീഗ് ഹൗസിൽ യോഗം ചേർന്ന്, നിയമസഭാ തിരഞ്ഞെടുപ്പിനുള്ള തയ്യാറെടുപ്പ് പരിപാടികൾ ആവിഷ്‌ക്കരിച്ചു. തെരഞ്ഞെടുപ്പിന് മുന്നോടിയായി ജനുവരി 21ന് മൂന്ന് നിയോജകമണ്ഡലങ്ങളിലും കൺവെൻഷനുകൾ നടക്കും. ഡൽഹിയിൽ നടക്കുന്ന കർഷകസമരത്തിന് ഐക്യദാർഢ്യം പ്രഖ്യാപിച്ചുകൊണ്ട് കൽപ്പറ്റ, മാനന്തവാടി, സുൽത്താൻബത്തേരി എന്നിവിടങ്ങളിൽ നിയോജകമണ്ഡലതലത്തിൽ ധർണ സംഘടിപ്പിക്കും.

ബൂത്തുതല യു ഡി എഫ് കൺവെൻഷനുകൾ ജനുവരി 31നുള്ളിൽ പൂർത്തിയാക്കും. യു ഡി എഫ് അധികാരത്തിൽ വന്നാൽ ഗവ. മെഡിക്കൽ കോളേജ് മടക്കിമലയിൽ തന്നെ സ്ഥാപിക്കും, വയനാട് റെയിൽപാത, വന്യമൃഗശല്യം, ചുരംബദൽപാത, രാത്രിയാത്രാ നിരോധനം എന്നിങ്ങനെ അടിയന്തര പ്രാധാന്യമുള്ള വയനാടിന്റെ വിഷയങ്ങളിൽ മുന്തിയ പരിഗണന നൽകുവാനും യോഗത്തിൽ തീരുമാനിച്ചു.

ക്ഷേമപദ്ധതികളില്‍ ഊന്നിയുള്ള ബജറ്റില്‍ പുതിയ നികുതികള്‍ ഉണ്ടാകാനിടയില്ല. സാമ്പത്തിക പ്രതിസന്ധിയില്‍ നില്‍ക്കുന്ന സര്‍ക്കാരിന്റെ വാഗ്ദാനങ്ങള്‍ ജനങ്ങളെ കബളിപ്പിക്കാന്‍ വേണ്ടിമാത്രമാണെന്ന് പ്രതിപക്ഷം ഉന്നയിക്കുന്നു. അഞ്ച് വര്‍ഷം മുന്‍പ് ഒന്നരലക്ഷം കോടി രൂപ പൊതു കടമുണ്ടായിരുന്നത് ഇന്ന് മൂന്ന് ലക്ഷം കോടിയായി.

ക്ഷേമപെന്‍ഷന്‍, കാര്‍ഷിക വിളകളുടെ താങ്ങുവില, റബര്‍ സബ്‌സിഡി, ചെറുകിട തൊഴില്‍ പ്രോത്സാഹനം എന്നിവയും ബജറ്റില്‍ സ്ഥാനം പിടിച്ചേക്കും. അതേസമയം, മുന്‍ ബജറ്റുകളില്‍ നടത്തിയ പ്രഖ്യാപനങ്ങള്‍ പലതും നടപ്പിലാക്കാനാകാത്തത് സര്‍ക്കാരിന് തിരിച്ചടിയാണ്. അഞ്ച് വര്‍ഷമായി യുവാക്കള്‍ക്ക് തൊഴിലവസരം നല്‍കുന്ന പദ്ധതികളൊന്നുമുണ്ടായിട്ടില്ലെന്നതും പ്രതിപക്ഷം ഉന്നയിക്കുന്നു

പ്രതിപക്ഷ നേതാവിനും കക്ഷി നേതാക്കള്‍ക്കും മാത്രമാണ് സംസാരിക്കാന്‍ അവസരമുണ്ടാവുക.

കോവിഡ് നിരീക്ഷണത്തിലായതിനാല്‍ പ്രതിപക്ഷ നേതാവ് സഭയിലെത്തില്ല.

തിരുവനന്തപുരം: സ്വര്‍ണ്ണക്കടത്തിനും ലൈഫ് മിഷനിലെ കമ്മിഷന്‍ ആരോപണത്തിനുമൊപ്പം അദാനിയുടെ പേരില്‍ തിരുവനന്തപുരം വിമാനത്താവളത്തിലേക്ക് പറന്നെത്തിയ പുതിയ വിവാദവും നാളെ ചേരുന്ന കൊവിഡ് കാല നിയമസഭാസമ്മേളനത്തെ ഇളക്കിമറിക്കും.

വിമാനത്താവളം അദാനിക്ക് കൈമാറാനുള്ള തീരുമാനത്തിനെതിരെ സര്‍വ്വകക്ഷിയോഗം വിളിച്ച് പ്രതിഷേധം അറിയിച്ച സര്‍ക്കാര്‍ ഇതിന്റെ ടെന്‍ഡറിന് നിയമോപദേശം തേടിയത് അദാനിയുടെ പുത്രഭാര്യ പങ്കാളിയായ സ്ഥാപനത്തില്‍ നിന്നാണെന്ന പുതിയ വെളിപ്പെടുത്തലാണ് ആന്റി ക്ലൈമാക്‌സ്. കോണ്‍ഗ്രസ് ഇത് ആയുധമാക്കിക്കഴിഞ്ഞു.

സര്‍ക്കാരിനെതിരായ അവിശ്വാസപ്രമേയ ചര്‍ച്ച തന്നെയാണ് സമ്മേളനത്തിലെ ശ്രദ്ധാകേന്ദ്രം. തിരഞ്ഞെടുപ്പ് വര്‍ഷമായതിനാല്‍ ആവനാഴിയിലെ എല്ലാ അസ്ത്രങ്ങളുമെടുത്ത് പ്രതിപക്ഷം സര്‍ക്കാരിനെ ആക്രമിക്കും. ഇതിനെ പ്രതിരോധിക്കാന്‍ ഭരണപക്ഷത്തിന്റെ മറുമരുന്ന് എന്ത് എന്നാണ് ഏവരും ഉറ്റുനോക്കുന്നത്. ഇന്നലെ മുഖ്യമന്ത്രി വിളിച്ചുചേര്‍ത്ത മന്ത്രിമാരുടെ മൂന്ന് മണിക്കൂര്‍ നീണ്ട അവലോകനയോഗം സഭയില്‍ സ്വീകരിക്കേണ്ട തന്ത്രങ്ങള്‍ ചര്‍ച്ച ചെയ്തിട്ടുണ്ട്. പ്രതിപക്ഷത്തിന്റെ ഏത് ആരോപണത്തെയും രേഖകളുടെ പിന്‍ബലത്തില്‍ നേരിടാനാണ് നീക്കം.

തിരുവനന്തപുരം വിമാനത്താവളം കൈമാറ്റത്തിനെതിരെ സഭ പ്രമേയം പാസാക്കാനിരിക്കെയാണ് വിവാദം വഴിതിരിഞ്ഞത്. പുതിയ ആക്ഷേപങ്ങള്‍ക്ക് സര്‍ക്കാര്‍ നല്‍കുന്ന വിശദീകരണത്തെ ആശ്രയിച്ചിരിക്കും ഭാവി. കേന്ദ്രതീരുമാനത്തെ അനുകൂലിച്ചതിന് കോണ്‍ഗ്രസ് എം.പി ശശി തരൂരിനെ ആക്രമിക്കുന്ന ഭരണപക്ഷത്ത് ആശയക്കുഴപ്പം സൃഷ്ടിക്കുന്നതാണ് പുതിയ ‘അദാനിവിവാദം’.

രാവിലെ 9ന് ആരംഭിക്കുന്ന സഭയില്‍ ധനകാര്യബില്‍ പാസാക്കലാണ് മുഖ്യ അജന്‍ഡയെങ്കിലും രാഷ്ട്രീയ സംഭവങ്ങള്‍ അതെല്ലാം മാറ്റി മറിച്ചിരിക്കുന്നു. കൊവിഡിനെ പ്രതിരോധിച്ച് അംഗങ്ങളെ സംരക്ഷിക്കാന്‍ സര്‍വ്വസജ്ജമാണ് നിയമസഭാസെക്രട്ടേറിയറ്റ്. കൊവിഡിനെയും വെല്ലുന്ന രാഷ്ട്രീയവിവാദങ്ങള്‍ പക്ഷേ സഭയില്‍ സൃഷ്ടിക്കാന്‍ പോകുന്ന കോളിളക്കങ്ങള്‍ പ്രവചനാതീതമാണ്.