അറബിക്കടലിനും ബംഗാള്‍ ഉള്‍ക്കടലിനും മുകളിലായി അതിതീവ്ര ന്യൂനമര്‍ദ്ദം രൂപപ്പെടാന്‍ സാധ്യതയുള്ളതിനാല്‍ അടുത്ത ദിവസങ്ങളിലും മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.

ഇടിമിന്നലോടു കൂടിയ മഴയ്ക്കൊപ്പം മണിക്കൂറില്‍ 40 കിലോമീറ്റര്‍ വേഗതയില്‍ കാറ്റ് വീശാനാണ് സാധ്യത. ഇതനുസരിച്ച് കേരള തീരത്ത് മത്സ്യബന്ധന വിലക്ക് തുടരുമെന്നും അധികൃതര്‍ അറിയിച്ചു.

മഴ കനക്കുന്നതിനാല്‍ മലയോര പ്രദേശങ്ങളിലുള്ളവര്‍ മണ്ണിടിച്ചില്‍ സാധ്യതകള്‍ക്കും, തീരദേശവാസികള്‍ കടല്‍ക്ഷോഭങ്ങള്‍ക്കും നേരെ ജാഗ്രത പാലിക്കണമെന്ന് മുന്നറിയിപ്പുണ്ട്.

കോട്ടയം, ഇടുക്കി ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, തൃശൂര്‍, മലപ്പുറം ജില്ലകളില്‍ യെല്ലോ മുന്നറിയിപ്പും നിലനില്‍ക്കുന്നു. ഉച്ചയ്ക്ക് ശേഷമുള്ള ഇടിമിന്നലോടുകൂടിയ മഴ തന്നെയാണ് തുലാവര്‍ഷത്തിന്റെ പ്രധാന സവിശേഷത.

കടല്‍ പ്രക്ഷുബ്ധമാകാനുള്ള സാധ്യത നിലനില്‍ക്കുന്നതിനാല്‍ കേരള-ലക്ഷദ്വീപ് തീരങ്ങളില്‍ മത്സ്യബന്ധനത്തിന് വിലക്കേര്‍പ്പെടുത്തി. കോഴിക്കോട് കടപ്പുറത്ത് കഴിഞ്ഞ ദിവസങ്ങളില്‍ ഉണ്ടായിരുന്ന ഉള്‍വലിഞ്ഞ കടല്‍ ഇപ്പോള്‍ പൂര്‍വ്വസ്ഥിതിയിലായിട്ടുണ്ടെന്നും അധികൃതര്‍ അറിയിച്ചു.

കള്ളക്കടല്‍ പ്രതിഭാസം തുടരുന്നതിനാല്‍ തിരുവനന്തപുരം, കൊല്ലം, കന്യാകുമാരി തീരങ്ങളില്‍ ഉയര്‍ന്ന തിരമാലകളും കടലാക്രമണത്തിനും സാധ്യതയുണ്ട്, എന്ന് ദേശീയ സമുദ്രസ്ഥിതി പഠന ഗവേഷണ കേന്ദ്രം മുന്നറിയിപ്പ് നല്‍കി.

അറബിക്കടലില്‍ ലക്ഷദ്വീപ് സമീപം നിലനില്‍ക്കുന്ന ചക്രവാതചുഴി, ഞായറാഴ്ചയോടെ കേരള-കര്‍ണാടക തീരത്തോട് ചേര്‍ന്ന് ന്യുനമര്‍ദ്ദമായി ശക്തിപ്രാപിക്കാനുള്ള സാധ്യതയുമുണ്ട്. മത്സ്യത്തൊഴിലാളികളും തീരദേശവാസികളും പരമാവധി ജാഗ്രത പാലിക്കണം