ലഹരിമരുന്ന് അടിവസ്ത്രത്തില്‍ ഒളിപ്പിച്ച് കൊണ്ടുവന്ന വിദേശിയെ രക്ഷിക്കാന്‍ തൊണ്ടിമുതലായ അടിവസ്ത്രം കൈക്കലാക്കി വെട്ടിച്ചുരുക്കി കൃത്രിമം കാട്ടിയെന്നാണ് ആന്റണി രാജുവിനെതിരായ കേസെന്ന് സതീശന്‍ വ്യക്തമാക്കി. അത്രയും ഗുരുതരമായ കേസിലെ പ്രതിയെ രണ്ടര വര്‍ഷത്തോളം മന്ത്രിയായി നിലനിര്‍ത്തിയതിലൂടെ സര്‍ക്കാര്‍ പ്രതികളെ സംരക്ഷിക്കുന്ന നിലപാടാണ് സ്വീകരിച്ചതെന്നും അദ്ദേഹം കുറ്റപ്പെടുത്തി.

പ്രതിയായ വിദേശിയെ വെറുതെ വിട്ട കേസില്‍ കോടതിക്ക് സംശയം തോന്നിയതിനെ തുടര്‍ന്നാണ് തെളിവ് നശിപ്പിച്ചതിന് പിന്നീട് കേസെടുത്തതെന്നും, പ്രതികളെ സംരക്ഷിക്കല്‍ എല്‍.ഡി.എഫും സി.പി.എമ്മും ഇപ്പോഴും തുടരുകയാണെന്നും സതീശന്‍ പറഞ്ഞു. ശബരിമല സ്വര്‍ണക്കൊള്ള കേസില്‍ ജയിലില്‍ കഴിയുന്ന പ്രതികളെയും സി.പി.എം സംരക്ഷിക്കുകയാണെന്നും, കൊള്ളക്കാര്‍ക്ക് കുടപിടിക്കുന്ന സര്‍ക്കാരാണിതെന്നതിന്റെ മറ്റൊരു തെളിവാണിതെന്നും അദ്ദേഹം കൂട്ടിച്ചേര്‍ത്തു.

നിയമസഭ തിരഞ്ഞെടുപ്പിന് മുന്നോടിയായി യു.ഡി.എഫിലെ ഘടകകക്ഷികളുമായി ഇതുവരെ ചര്‍ച്ച ആരംഭിച്ചിട്ടില്ലെന്നും, ഉഭയകക്ഷി ചര്‍ച്ചകള്‍ ഉടന്‍ തുടങ്ങുമെന്നും സതീശന്‍ പറഞ്ഞു. മാധ്യമങ്ങള്‍ കുത്തിത്തിരിപ്പ് സൃഷ്ടിക്കാന്‍ ശ്രമിക്കുന്നുവെന്നും, നിലവില്‍ കുത്തിത്തിരിപ്പിന് കൂടുതല്‍ സാധ്യത എല്‍.ഡി.എഫിലാണെന്നും അദ്ദേഹം ആരോപിച്ചു. ഒരു വശത്ത് ഐക്യത്തോടെ നില്‍ക്കുന്ന ടീം യു.ഡി.എഫും, മറുവശത്ത് ശിഥിലമായ എല്‍.ഡി.എഫുമാണുള്ളതെന്നും വിമര്‍ശിച്ചു.

തൊടുപുഴയിലെ ബാങ്കില്‍ ഒരു പാര്‍ട്ടി പ്രവര്‍ത്തകന്‍ മരിച്ചപ്പോള്‍ ഭാര്യയ്ക്ക് നല്‍കിയ ചെറിയ ജോലിയില്‍ നിന്ന്, യു.ഡി.എഫ് സ്ഥാനാര്‍ഥിക്ക് വേണ്ടി മകന്‍ പ്രവര്‍ത്തിച്ചതിന്റെ പേരില്‍ അവരെ പിരിച്ചുവിട്ടത് സി.പി.എമ്മിന്റെ അധപതനം വ്യക്തമാക്കുന്നതാണെന്നും, ആ കുടുംബത്തിന് എല്ലാ വിധ സഹായവും കോണ്‍ഗ്രസും യു.ഡി.എഫും നല്‍കുമെന്നും വി.ഡി. സതീശന്‍ അറിയിച്ചു.

കൊല്ലം : വൃദ്ധരും രോഗബാധിതരുമായ കുടുംബത്തിന് അകെയുള്ള വരുമാനം സര്‍ക്കാരിന്റെ ക്ഷേമ പെന്‍ഷന്‍ മാത്രം. വീട്ടില്‍ ടി.വിയോ, ഗ്യാസ് സിലിണ്ടറോ ഇല്ല. കാര്‍ഡില്‍ ഉള്‍പ്പെട്ട അംഗങ്ങളാകട്ടെ 70 വയസിന് മുകളില്‍ പ്രായമുള്ളവരും. എന്നാല്‍ അധികൃതരുടെ കണ്ടെത്തലില്‍ ഇവര്‍ക്ക് കിട്ടിയതാകട്ടെ ആനുകൂല്യങ്ങള്‍ക്ക് അര്‍ഹതയില്ലാത്ത വെള്ള റേഷന്‍ കാര്‍ഡ്. അതും മാസവരുമാനം 96295 രൂപയെന്ന ഞെട്ടിപ്പിക്കുന്ന കണ്ടെത്തലില്‍. പന്മന വടക്കുംതല മേക്ക് പുല്ലും പുറത്ത് കമലാക്ഷി (70) യ്ക്കാണ് ഇത് കാരണം ആറു മാസക്കാലമായി റേഷന്‍ സാധനങ്ങള്‍ കിട്ടാത്ത സ്ഥിതിയുള്ളത്. പരാതികള്‍ നല്‍കിയിട്ടും പരിഹാരമില്ലെന്ന് ഇവര്‍ പറയുന്നു. ഭര്‍ത്താവ് സദാശിവന്‍ (74) കമലാക്ഷിയുടെ സഹോദരന്‍ സദാനന്ദന്‍ (76) എന്നിവരാണ് കാര്‍ഡിലെ മറ്റംഗങ്ങള്‍. എ.ആര്‍.ഡി.50 ാം നമ്പര്‍ റേഷന്‍ കടയിലെ ഗുണഭോക്താക്കളായ ഇവര്‍ കാലങ്ങളായി ബി.പി.എല്‍ കാര്‍ഡിനര്‍ഹരായിരുന്നവരാണ്. മുന്‍ഗണനാ മാനദണ്ഡങ്ങള്‍ക്ക് പറയപ്പെടുന്ന നിര്‍ദ്ദേശങ്ങളില്‍ ഒന്ന് പോലും ഇല്ലാത്തവരായിട്ടും ഏറ്റവും ഉയര്‍ന്ന സാമ്പത്തിക വിഭാഗത്തിന്റെ പട്ടികയിലാണ് ഈ കുടുംബം. നേരത്തെ 275 രൂപ മാസ വരുമാനമുള്ള കുടുംബത്തിനാകട്ടെ പുതിയ കാര്‍ഡില്‍ ഒരു ലക്ഷത്തിനടുത്താണ് വരുമാനം രേഖപ്പെടുത്തിയിരിക്കുന്നത്. കമലാക്ഷിക്കും സദാനന്ദനും കിട്ടുന്ന വാര്‍ദ്ധക്യകാല പെന്‍ഷനും, സദാശിവന് കിട്ടുന്ന കര്‍ഷകത്തൊഴിലാളി പെന്‍ഷനും മാത്രമുള്ള കുടുംബത്തിന് 96295 രൂപ വരുമാനം എങ്ങനെ വന്നു എന്നതിന്റെ അങ്കലാപ്പിലാണ് നിര്‍ദ്ദന കുടംബം. പരാതിയുമായി ജില്ലാ കളക്ടറെയും താലൂക്ക് സപ്ലൈ ഉദ്യോഗസ്ഥരെയും സമീപിച്ചെങ്കിലും യാതൊരു പ്രയോജനവുമുണ്ടായിട്ടില്ലന്ന് വീട്ടുകാര്‍ പറയുന്നു. നാമമാത്ര വരുമാനമുള്ളവരാണന്ന് കണ്ടെത്തിയതിനെ തുടര്‍ന്ന് വില്ലേജ് അധികൃതര്‍ വരുമാന സര്‍ട്ടിഫിക്കറ്റ് നല്‍കിയെങ്കിലും സൗജന്യമായി കിട്ടേണ്ട ഭക്ഷ്യധാന്യങ്ങള്‍ വില നല്‍കി വാങ്ങേണ്ട ഗതികേടിലാണ് ഇവര്‍.