keshav prasad maurya – Chandrika Daily

മുഹമ്മദലി ജിന്ന മഹാനായ വ്യക്തിയായിരുന്നു; ജിന്നയെ പുകഴ്ത്തി ബി.ജെ.പി മന്ത്രി

ചന്ദ്രിക വെബ് ഡെസ്‌ക്‌ — Wed, 02 May 2018 08:59:29 +0000

ലക്‌നൗ: മുഹമ്മദലി ജിന്ന മഹാനായ വ്യക്തിയായിരുന്നുവെന്ന് യു.പിയിലെ ബി.ജെ.പി മന്ത്രി സ്വാമി പ്രസാദ് മൗര്യ. പാക്കിസ്ഥാന്‍ രൂപീകരിക്കുന്നതിന് മുമ്പ് ജിന്ന ഇന്ത്യക്ക് നിരവധി സംഭാവനകള്‍ നല്‍കിയിട്ടുണ്ട്. രാജ്യത്തിന് വേണ്ടി പ്രവര്‍ത്തിച്ച മഹാന്‍മാരായ നേതാക്കള്‍ക്കെതിരെ വിരല്‍ ചൂണ്ടുന്നത് അപമാനകരമാണെന്നും മൗര്യ പറഞ്ഞു.

അലിഗഡ് മുസ്‌ലിം യൂണിവേഴ്‌സിറ്റിയില്‍ ജിന്നയുടെ ചിത്രം പ്രദര്‍ശിപ്പിച്ചതിനെ ബി.ജെ.പി എം.പി സതീഷ് ഗൗതം നേരത്തെ വിമര്‍ശിച്ചിരുന്നു. ജിന്നയുടെ ഫോട്ടോ സ്ഥാപിച്ചതിനെ കുറിച്ച് വിശദീകരണം ആവശ്യപ്പെട്ട് ഗൗതം സര്‍വകലാശാല വി.സി താരീഖ് മന്‍സൂറിന് കത്തയച്ചിരുന്നു. ജിന്നയുടെ ഫോട്ടോ സ്ഥാപിച്ചതിന് യാതൊരു ന്യായീകരണവുമില്ലെന്നായിരുന്നു സതീഷ് ഗൗതം പറഞ്ഞതിന്. ഇതിനെതിരെയാണ് സ്വാമി പ്രസാദ് മൗര്യ രംഗത്ത് വന്നിരിക്കുന്നത്.

ഏറ്റുമുട്ടല്‍ കൊലകള്‍ രാമരാജ്യം സൃഷ്ടിക്കാനെന്ന് യുപി ഉപമുഖ്യമന്ത്രി

chandrika — Mon, 05 Mar 2018 05:25:40 +0000

അലഹബാദ്: ഏറ്റുമുട്ടല്‍ കൊലപാതകങ്ങളെ ന്യായീകരിച്ച് യുപി ഉപമുഖ്യമന്ത്രി കേശവപ്രസാദ് മൗര്യ രംഗത്ത്. ഏറ്റുമുട്ടല്‍ കൊലപാതകങ്ങള്‍ രാമരാജ്യത്തിലേക്കുള്ള ചുവടുവെപ്പാണെന്ന് അദ്ദേഹം പറഞ്ഞു. ക്രിമിനലുകളെ കൊല്ലുന്നത് തങ്ങളുടെ ലക്ഷ്യമല്ല. എന്നാല്‍ അവര്‍ പോലീസിനെ സായുധമായി ആക്രമിക്കുമ്പോഴാണ് തിരിച്ച് വെടിവെക്കുന്നത്. സംസ്ഥാനത്ത് സമാധാനാന്തരീക്ഷം ഉണ്ടാക്കുന്നതിനാണ് ഇത്തരം നടപടികള്‍ സ്വീകരിക്കുന്നതെന്നും അദ്ദേഹം പറഞ്ഞു.

2017 മാര്‍ച്ചില്‍ ഉത്തര്‍പ്രദേശില്‍ ബിജെപി സര്‍ക്കാര്‍ അധികാരത്തില്‍ വന്നതിന് ശേഷം ഇതുവരെ 1240 ഏറ്റുമുട്ടലുകളാണ് ഉണ്ടായത്. ഇതില്‍ 40 പേര്‍ കൊല്ലപ്പെടുകയും 305 പേര്‍ക്ക് പരിക്കേല്‍ക്കുകയും ചെയ്തു.

യുപി മന്ത്രിസഭയില്‍ പൊട്ടിത്തെറി; മൗര്യയെ ഒതുക്കി ആഭ്യന്തരം മുഖ്യമന്ത്രിക്ക്, മന്ത്രിമാരുടെ വകുപ്പുകള്‍ ഇങ്ങനെ…

chandrika — Thu, 23 Mar 2017 06:27:30 +0000

ലക്‌നോ: അധികാരമേറ്റ് ദിവസങ്ങള്‍ പിന്നിടും മുമ്പേ ഉത്തര്‍പ്രദേശ് മന്ത്രിസഭയില്‍ പൊട്ടിത്തെറി. ഉപമുഖ്യമന്ത്രി കേശവ് പ്രസാദ് മൗര്യയെ ഒതുക്കി ആഭ്യന്തരം സ്വന്തമാക്കിയതോടെ മുഖ്യമന്ത്രി യോഗി ആദിത്യനാഥിനെതിരെ സംസ്ഥാനത്ത് ജനവികാരം ഉണര്‍ന്നിട്ടുണ്ട്. മന്ത്രിമാരുടെ വകുപ്പുകള്‍ പ്രഖ്യാപിച്ചപ്പോള്‍ രണ്ട് ഉപമുഖ്യമന്ത്രിമാര്‍ക്കും ആവശ്യപ്പെട്ട വകുപ്പുകള്‍ നല്‍കാന്‍ യോഗി സര്‍ക്കാര്‍ തയാറായില്ല. ആഭ്യന്തരത്തിനു പുറമെ ധനവകുപ്പും മുഖ്യമന്ത്രി തന്നെയാണ് കൈകാര്യം ചെയ്യുന്നത്. ബിജെപിയുടെ സംസ്ഥാന അധ്യക്ഷനായ കേശവ് പ്രസാദ് മൗര്യയെ ആദ്യം മുഖ്യമന്ത്രി സ്ഥാനത്തേക്ക് പരിഗണിച്ചിരുന്നെങ്കിലും പിന്നീട് തഴഞ്ഞപ്പോള്‍ ആഭ്യന്തര വകുപ്പ് വേണമെന്ന ആവശ്യം അദ്ദേഹം ഉന്നയിച്ചിരുന്നു. എന്നാല്‍ താരതമ്യേന പ്രധാന്യം കുറഞ്ഞ വകുപ്പാണ് ഉപമുഖ്യമന്ത്രിമാരായ മൗര്യക്കും ദിനേശ് ശര്‍മക്കും നല്‍കിയത്. മൗര്യക്ക് പൊതുമരാമത്ത് വകുപ്പാണ് ലഭിച്ചതെങ്കില്‍ ശര്‍മ്മക്ക് വിദ്യാഭ്യാസ വകുപ്പാണ് നല്‍കിയത്. അതേസമയം കോണ്‍ഗ്രസ് വിട്ട് ബിജെപിയിലെത്തിയ റീത്ത ബഹുഗുണക്ക് ടൂറിസം വകുപ്പും വനിതാശിശു സംരക്ഷണ വകുപ്പുകളും നല്‍കിയത് മൗര്യയുടെയും ശര്‍മ്മയുടെയും അനുയായികളെ ചൊടിപ്പിച്ചിട്ടുണ്ട്. അനുനയമെന്ന രീതിയിലാണ് ഇരുവര്‍ക്കും ഉപമുഖ്യമന്ത്രിപദം നല്‍കിയതെങ്കിലും വകുപ്പു വിഭജനത്തിലെ പാളിച്ച ബിജെപി നേതൃനിരയില്‍ ഭിന്നത രൂക്ഷമാക്കിയിട്ടുണ്ട്. യു.പിയില്‍ അധികാരത്തിലെത്തിയതിനു ശേഷം വകുപ്പ് വിഭജനം പാര്‍ട്ടിക്ക് വലിയ പ്രതിസന്ധിയാണ് നല്‍കിയത്. ഇതുസംബന്ധിച്ച് തീരുമാനമെടുക്കാന്‍ പ്രധാനമന്ത്രി നരേന്ദ്രമോദിയുമായും പാര്‍ട്ടി ദേശീയ അധ്യക്ഷന്‍ അമിത് ഷായുമായും മുഖ്യമന്ത്രി യോഗി ആദിത്യനാഥ് കഴിഞ്ഞ ദിവസം ചര്‍ച്ച ചെയ്തിരുന്നു.

മറ്റ് പ്രമുഖ മന്ത്രിമാരുടെ വകുപ്പുകള്‍:

സുരേഷ് ഖന്ന – പാര്‍ലമെന്ററികാര്യം
സതീഷ് മഹാന – വ്യവസായം
സ്വാമി പ്രസാദ് മൗര്യ – തൊഴില്‍, കോ-ഓപ്പറേറ്റീവ്
ശ്രീകാന്ത് ശര്‍മ്മ – ഊര്‍ജം
സിദ്ധാര്‍ത്ഥ്‌നാഥ് സിങ് – ആരോഗ്യം
സൂര്യപ്രതാപ് ശാഹി – കൃഷി
മുഹ്‌സിന്‍ റാസ – ന്യൂനപക്ഷം
ചേതന്‍ ചൗഹാന്‍ – യുവജനക്ഷേമം, സ്‌പോര്‍ട്‌സ്, വാണിജ്യ വിദ്യാഭ്യാസം,
വൈദഗ്ധ്യ വികസനം
സ്വാതി സിങ് – എന്‍ആര്‍ഐ, കുടുംബക്ഷേമം
ജയ് പ്രകാശ് സിങ് – എക്‌സൈസ്
ശ്രീകാന്ത് ശാമ – ഊര്‍ജ്ജം

ആളില്ല; യുപി ഭരിക്കാന്‍ കരുത്തനെ തേടി ബിജെപി

chandrika — Sun, 12 Mar 2017 06:15:10 +0000

ലക്‌നോ: ജാതി ഉയര്‍ത്തികാട്ടി ഉത്തര്‍പ്രദേശില്‍ അധികാരം സ്വന്തമാക്കിയ ബിജെപി ഭരണ സാരഥ്യം വഹിക്കാന്‍ കരുത്തനായ നേതാവിനെ തേടുന്നു. അധികാരത്തിലെത്തിയെങ്കിലും ഇനിയുള്ള അഞ്ചു വര്‍ഷം യുപിയെ ആരു നയിക്കുമെന്നതു സംബന്ധിച്ച ആശങ്കയിലാണ് ബിജെപി. 2019ല്‍ ലോക്‌സഭാ തെരഞ്ഞെടുപ്പ് വരാനിരിക്കെ യുപിയിലെ മുഖ്യമന്ത്രി സ്ഥാനം പാര്‍ട്ടിക്ക് നിര്‍ണായകമാണ്. ലോക്‌സഭാ തെരഞ്ഞെടുപ്പിന്റെ ഭാവി നിശ്ചയിക്കുന്നതില്‍ നിര്‍ണായക പങ്ക് വഹിക്കുന്നവരാണ് യു.പിയിലെ ജനത. ജനങ്ങളെ കയ്യിലെടുക്കാന്‍ കഴിയുന്ന നേതാവിനെ യുപിയുടെ ഭരണചക്രം ഏല്‍പിക്കാനാണ് പ്രധാനമന്ത്രി നരേന്ദ്രമോദി ഉള്‍പ്പെടെ ബിജെപി നേതൃത്വത്തിന്റെ നീക്കം. ഇതിനായി ജനപിന്തുണ ആര്‍ജ്ജിച്ചതും പാര്‍ട്ടിയോട് വിധേയത്വമുള്ളതുമായ വ്യക്തിയെ തെരഞ്ഞെടുക്കാനുള്ള ഒരുക്കത്തിലാണ് പാര്‍ട്ടി.

ബിജെപി സംസ്ഥാന അധ്യക്ഷന്‍ കേശവപ്രസാദ് മൗര്യ, ദേശീയ ഉപാധ്യക്ഷന്‍ ദിനേശ് ശര്‍മ്മ, കേന്ദ്രമന്ത്രി മനോജ് സിന്‍ഹ എന്നിവരുടെ പേരുകളാണ് ഉയര്‍ന്നു കേള്‍ക്കുന്നത്. എന്നാല്‍ മോദിയുടെയും പാര്‍ട്ടി ദേശീയ അധ്യക്ഷന്‍ അമിത്ഷായുടേതുമായിരിക്കും ഇതുസംബന്ധിച്ച അന്തിമ തീരുമാനം.

കേശവപ്രസാദ് മൗര്യ

ദിനേശ് ശര്‍മ്മ

മനോജ് സിന്‍ഹ

പിന്നോക്ക യാദവ വിഭാഗങ്ങള്‍ ഏറെയുള്ള യുപിയില്‍ പിന്നോക്കക്കാരനെ ഭരണം ഏല്‍പിക്കാന്‍ തീരുമാനമായാല്‍ കേശവപ്രസാദ് മൗര്യക്കായിരിക്കും നറുക്ക് വീഴുക. ലോക്‌സഭാ തെരഞ്ഞെടുപ്പില്‍ പിന്നോക്ക വിഭാഗക്കാരെ ഇതിലൂടെ ഒന്നാകെ പാര്‍ട്ടിക്കൊപ്പം നിര്‍ത്താമെന്ന കണക്കുകൂട്ടലിലാണ് ബിജെപി. എന്നാല്‍ മുന്നോക്ക വിഭാഗക്കാരെയാണ് പരിഗണിക്കുന്നതെങ്കില്‍ ദിനേശ് ശര്‍മ്മക്കും ജനസമ്മതനെയാണ് തെരഞ്ഞെടുക്കുന്നതെങ്കില്‍ മനോജ് സിന്‍ഹക്കുമായിരിക്കും സാധ്യത.

കേന്ദ്ര ആഭ്യന്തരമന്ത്രി രാജ്‌നാഥ് സിങിന്റെ പേരും മുഖ്യമന്ത്രി സ്ഥാനത്തേക്ക് ഉയരുന്നുണ്ടെങ്കിലും കരുത്തനായ മന്ത്രിയുടെ അസാന്നിധ്യം മോദി മന്ത്രിസഭക്ക് മങ്ങലേല്‍പ്പിച്ചേക്കുമെന്നാണ് രാഷ്ട്രീയ നിരീക്ഷരുടെ വിലയിരുത്തല്‍. അതിനാല്‍ അപകടഘട്ടത്തില്‍ മാത്രമേ ഇത്തരമൊരു നീക്കത്തിലേക്ക് പാര്‍ട്ടി നീങ്ങുകയുള്ളൂ.