കെവിന്റെ ഭാര്യ നീനുവിന്റെ പഠന ചെലവ് ഏറ്റെടുക്കാനും മന്ത്രിസഭാ യോഗം തീരുമാനിച്ചു. അതേസമയം, കെവിന്റെ മരണകാരണത്തില്‍ അന്തിമ തീരുമാനത്തിലെത്താതെ മെഡിക്കല്‍ ബോര്‍ഡ് യോഗം പിരിഞ്ഞു. പോസ്റ്റ്‌മോര്‍ട്ടം റിപ്പോര്‍ട്ടിന്റെ അടിസ്ഥാനത്തില്‍ കഴിഞ്ഞ ദിവസം തിരുവനന്തപുരത്ത് ചേര്‍ന്ന ആരോഗ്യ വകുപ്പ് മെഡിക്കല്‍ ബോര്‍ഡ് യോഗമാണ് കെവിന്റെ മരണത്തില്‍ അന്തിമ തീരുമാനമുണ്ടാകാതെ പിരിഞ്ഞത്. മെഡിക്കല്‍ വിദ്യാഭ്യാസ വകുപ്പിലെയും ആരോഗ്യ വകുപ്പിലെയും ഉന്നത പൊലീസ് സര്‍ജന്മാരുടെ സംഘം പോസ്റ്റ്‌മോര്‍ട്ടം റിപ്പോര്‍ട്ട് വിശകലനം ചെയ്‌തെങ്കിലും മരണകാരണം സംബന്ധിച്ച അന്തിമ തീരുമാനത്തിലെത്താന്‍ കഴിഞ്ഞിട്ടില്ല.

കഴിഞ്ഞ ദിവസം തിരുവനന്തപുരത്ത് ചേര്‍ന്ന മെഡിക്കല്‍ ബോര്‍ഡ് പോസ്റ്റുമോര്‍ട്ടം റിപ്പോര്‍ട്ട് വിശദമായി പരിശോധിച്ചു. ഇതില്‍ നിന്നുമാണ് കെവിന്റേത് മുങ്ങിമരണം തന്നെയാണെന്ന പ്രാഥമിക നിഗമനത്തിലേക്ക് എത്തിയത്. ഈ റിപ്പോര്‍ട്ട് ഐ.ജിക്ക് കൈമാറുകയും ചെയ്തു. എന്നാല്‍ കെവിന്‍ രക്ഷപെടുന്നതിനിടെ പുഴയില്‍ വീണതാണോ അതോ അബോധാവസ്ഥയിലായ കെവിനെ പ്രതികള്‍ പുഴയില്‍ കൊണ്ടുവന്നിട്ടതാണോ എന്ന കാര്യത്തില്‍ മെഡിക്കല്‍ ബോര്‍ഡിന് ഒരു നിഗമനത്തിലേക്ക് എത്താന്‍ സാധിച്ചിട്ടില്ല. ഈ സാഹചര്യത്തില്‍ സംഭവം നടന്ന തെന്മലയിലെ സ്ഥലങ്ങള്‍ നേരിട്ട് സന്ദര്‍ശിച്ച് പരിശോധന നടത്താനും മെഡിക്കല്‍ ബോര്‍ഡ് തീരുമാനിച്ചിട്ടുണ്ട്.

പിതാവ് ജയിലില്‍ ആയതിനാല്‍ നീനുവിനെ ഏതെങ്കിലും സംരക്ഷണ കേന്ദ്രത്തിലാക്കണമെന്നാണ് വാദം. നീനുവിന്റെ രക്ഷിതാവ് നിയമപരമായി ചാക്കോ ആണെന്ന് അഭിഭാഷകന്‍ കോടതിയില്‍ പറഞ്ഞു. കെവിന്റെ വീട്ടിലാണ് നിലവില്‍ നീനു താമസിക്കുന്നത്. നീനുവിന് ചികില്‍ത്സ ആവശ്യമുണ്ടെങ്കില്‍ ഉറപ്പാക്കണമെന്നും അഭിഭാഷകന്‍ ആവശ്യപ്പെട്ടു.

ചാക്കോയുടെ പരാതി ഫയലില്‍ സ്വീകരിച്ച കോടതി, വാദം കേള്‍ക്കാനായി മാറ്റിവച്ചു. കെവിന്‍ വധക്കേസില്‍ പ്രതികളായ ചാക്കോയെയും സാനുവിനെയും ഏറ്റുമാനൂര്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി എട്ടു വരെ പൊലീസ് കസ്റ്റഡിയില്‍ വിട്ടു. നീനുവിനെ വിട്ടുകിട്ടണമെന്ന് പിതാവ് ചാക്കോക്കു വേണ്ടി അഭിഭാഷകന്‍ കോടതിയില്‍ പരാതി നല്‍കി.

മൃതദേഹത്തില്‍ പരിക്കേറ്റതിന്റെ നിരവധി പാടുകളുണ്ട്. എന്നാല്‍ ഈ പരിക്ക് മരണകാരണമായിട്ടില്ലെന്നാണ് പ്രാഥമിക നിഗമനം. മര്‍ദിച്ച് വെള്ളത്തിലിട്ടതോ അക്രമിസംഘം ഓടിച്ചപ്പോള്‍ വീണതോ ആകാമെന്നാണ് കരുതുന്നതെന്ന് റിപ്പോര്‍ട്ടില്‍ പറയുന്നു.

ആന്തരിക അവയവങ്ങളുടെ പരിശോധനക്കു ശേഷം അന്തിമ റിപ്പോര്‍ട്ട് സമര്‍പ്പിക്കും.
അതിനിടെ, കേസിലെ പ്രതികള്‍ മുന്‍കൂര്‍ ജാമ്യത്തിനായി ഹൈക്കോടതിയെ സമീപിച്ചു. നീനുവിന്റെ പിതാവ് ഷാനു ചാക്കോ ഉള്‍പ്പെടെയുള്ളവരാണ് കോടതിയെ സമീപിച്ചത്.