പ്രോട്ടംസ്പീക്കറുടെ അധികാരം ഭരണകക്ഷിയെ സഹായിക്കാനും കൂറുമാറ്റ നിരോധന നിയമം മറികടക്കാനും സഹായിക്കുമെന്ന് സാരം. സുപ്രീം കോടതി വിധി അനുസരിച്ച് പ്രോട്ടംസ്പീക്കര്‍ക്ക് വിശ്വാസ വോട്ടെടുപ്പ് ശബ്ദ വോട്ടോടെ വേണോ, ബാലറ്റ് വഴി വേണോ എന്ന് തീരുമാനിക്കാം. പ്രോട്ടംസ്പീക്കര്‍ വിശ്വാസ വോട്ടെടുപ്പ് നടത്തുന്നത് ഭരണഘടനാപരമായി യാതൊരു അപാകതയുമില്ലെന്നാണ് ഭരണഘടന വിദഗ്ധനായ പി.ഡി.റ്റി ആചാരി പറയുന്നത്.

പക്ഷേ ഒരു സ്പീക്കറെ തെരഞ്ഞെടുക്കാന്‍ കഴിയാത്ത സാഹചര്യത്തില്‍ മാത്രമേ ഈ അധികാരങ്ങള്‍ വിനിയോഗിക്കാന്‍ കഴിയൂവെന്നും അദ്ദേഹം പറയുന്നു. പക്ഷേ കര്‍ണാടകയില്‍ യെദ്യൂരപ്പ സര്‍ക്കാര്‍ വിശ്വാസ വോട്ടെടുപ്പിനെ അഭിമുഖീകരിക്കുമ്പോള്‍ ചില പ്രതിപക്ഷ എം.എല്‍.എമാര്‍ വോട്ടെടുപ്പില്‍ നിന്നു വിട്ടു നില്‍ക്കുകയോ, കൂറുമാറുകയോ ചെയ്താല്‍ കൂറുമാറ്റ നിരോധന പരിധിയില്‍ നിന്നും ഇതിനെ ഒഴിവാക്കാന്‍ സ്പീക്കറുടേതായ വിവേചന അധികാരം ഉപയോഗപ്പെടുത്താന്‍ ബൊപ്പയ്യക്കാവും. നിലവില്‍ കര്‍ണാടക നിയമസഭയില്‍ 222 അംഗങ്ങളാണുള്ളത്. കോണ്‍ഗ്രസ്-ജെ.ഡി.എസ് സഖ്യത്തിന് 116 അംഗങ്ങളുടെ പിന്തുണയും ബി.ജെ.പിക്ക് 104 അംഗങ്ങളുടെ പിന്തുണയുമാണുള്ളത്.

വിശ്വാസ വോട്ടെടുപ്പെന്ന നിര്‍ണായക സംഭവം നിയന്ത്രിക്കാനാണ് മൂന്നു തവണ ബി.ജെ.പി എം.എല്‍.എയും മുന്‍ സ്പീക്കറുമായ വിരാജ്‌പേട്ടില്‍ നിന്നുള്ള കെ.ജി ബൊപ്പയ്യയെ കര്‍ണാടക ഗവര്‍ണര്‍ വാജുഭായ് വാല പ്രോട്ടം സ്പീക്കറായി നിയമിച്ചത്. പരമ്പരാഗത രീതി അനുസരിച്ച് സഭയിലെ ഏറ്റവും മുതിര്‍ന്ന അംഗമായ കോണ്‍ഗ്രസിലെ ആര്‍.വി ദേശ്പാണ്ഡെയെയാണ് നിയമിക്കേണ്ടത്.

എന്നാല്‍ എട്ടു തവണ എം. എല്‍.എയായ ദേശ്പാണ്ഡെയെ മറികടന്ന് മുന്‍ എ.ബി.വി.പി, ആര്‍.എസ്.എസ് അംഗമായിരുന്ന ബൊപ്പയ്യയെ നിയമിച്ചതിന് പിന്നില്‍ ബി. ജെ.പിക്ക് ചില കാരണങ്ങളുണ്ട്.

2008ല്‍ ഡെപ്യൂട്ടി സ്പീക്കറായിരുന്ന ബൊപ്പയ്യ ഒരു വര്‍ഷത്തിനു ശേഷം ജഗദീഷ് ഷെട്ടാര്‍ യെദ്യൂരപ്പക്കെതിരെ കലാപവുമായി എത്തിയ സമയത്ത് സ്പീക്കറാവുകയും ചെയ്തു.
2009-2013 കാലയളവില്‍ കര്‍ണാടക സ്പീക്കറായിരുന്നു ബെ ാപ്പയ്യ. മുഖ്യമന്ത്രി യെദ്യൂരപ്പയുടെ ഏറ്റവും വലിയ വിശ്വസ്തനായാണ് ഇയാള്‍ അറിയപ്പെടുന്നത്. 2010 ഒക്ടോബറില്‍ യെദ്യൂരപ്പ മുഖ്യമന്ത്രിയായിരിക്കെ റെഡ്ഢി സഹോദരന്‍മാരുടെ അനധികൃത ഖനനവുമായി ബന്ധപ്പെട്ട് യെദ്യൂരപ്പയുടെ നേതൃത്വത്തെ ചോദ്യം ചെയ്തു ബി. ജെ. പി എം. എ ല്‍. എമാരില്‍ ചിലര്‍ രംഗത്തു വന്നു.

എന്നാല്‍ വിവാദ നീക്കത്തിലൂടെ ബൊപ്പയ്യ വിമത സ്വരമുയര്‍ത്തി സര്‍ക്കാറിന് പിന്തുണ പിന്‍വലിച്ച 11 ബി.ജെ.പി എം. എല്‍.എമാരേയും അഞ്ച് സ്വതന്ത്ര എം. എല്‍.എമാരേയും അയോഗ്യരാക്കി. ബൊപ്പയ്യയുടെ നീക്കം പക്ഷപാതിത്തപരമാണെന്ന് കോടതി നീരീക്ഷിച്ചിരുന്നു. ഈ നീക്കം ബി.ജെ.പി സര്‍ക്കാറിനെ അവിശ്വാസം നേരിടാതെ രക്ഷപ്പെടാന്‍ അവസരമൊരുക്കുകയും ചെയ്തു.

വിശ്വാസ വോട്ട് സമയത്ത് ബൊപ്പയ്യ നടത്തിയ നീക്കത്തെ സുപ്രീം കോടതി നിശിതമായി വിമര്‍ശിച്ചിരുന്നു. ബൊപ്പയ്യയുടെ തീരുമാനം സുപ്രീം കോടതി റദ്ദാക്കുകയും ചെയ്തിരുന്നു. തങ്ങളുടെ ഇംഗിതത്തിന് അനുസരിച്ച് നില്‍ക്കാന്‍ ഏറ്റവും യോജിച്ച വ്യക്തി എന്ന നിലയിലാണ് ബൊപ്പയ്യയെ ബി.ജെ.പി പ്രോട്ടം സ്പീക്കറായി നിയമിച്ചതെന്ന കാര്യത്തില്‍ സംശയമില്ല.

കെ.ജി ബൊപ്പയ്യയുടെ ഈ ചരിത്രം കാണിച്ചാണ് കോണ്‍ഗ്രസ് ഇന്ന് സുപ്രീംകോടതിയില്‍ എത്തിയത്. കെ.ജി ബൊപ്പയ്യയുടെ ചരിത്രം മറ്റൊന്നാണെന്നും അദ്ദേഹത്തിന്റെ തീരുമാനം മുമ്പ് സുപ്രീംകോടതി റദ്ദാക്കേണ്ടി വന്നിട്ടുണ്ടെന്നും കോണ്‍ഗ്രസിനു വേണ്ടി കപില്‍ സിബല്‍ വാദിക്കുകയുമുണ്ടയി.

എന്നാല്‍ ബൊപ്പയ്യയുടെ നിയമനം പരിശോധിക്കണമെങ്കില്‍ നോട്ടീസ് നല്‍കേണ്ടി വരുമെന്നായി കോടതി. അങ്ങനെയെങ്കില്‍ വിശ്വാസ വോട്ടെടുപ്പ് നീട്ടേണ്ടി വരുമെന്ന് കോടതി മുന്നറിയിപ്പ് നല്‍കി. തുടര്‍ന്നാണ് ബൊപ്പയ്യ തന്നെ പ്രോടേം സ്പീക്കറായി തുടരേണ്ട സാഹചര്യമുണ്ടായത്.
അതേസമയം പ്രോടേം സ്പീക്കറായി കെ.ജി ബൊപ്പയ്യയെ തുടരാന്‍ സുപ്രീംകോടതി അനുവദിച്ചെങ്കിലും സഭാനടപടി തത്സമയം സംപ്രേക്ഷണം ചെയ്യാന്‍ കോടതി നിര്‍ദേശം നല്‍കിയിട്ടുണ്ട്്.
ജഡ്ജിമാരായ എസ്.എ ബോബ്ഡെ, എ.കെ സിക്രി, അശോക് ഭൂഷണ്‍ എന്നിവരടങ്ങിയ പ്രത്യേക ബഞ്ചാണ് ഇന്ന് ഹര്‍ജി പരിഗണിച്ചത്.

തെരഞ്ഞെടുക്കപ്പെട്ട എം.എല്‍.എമാരില്‍ ഏറ്റവും പ്രായം കൂടിയ ആളെ പ്രോടേം സ്പീക്കറായി നിയമിക്കണമെന്നാണ് ചട്ടം. ഇക്കാര്യം സുപ്രീംകോടതി എടുത്തുപറയുകയും ചെയ്തിരുന്നു. എന്നാല്‍ മുതിര്‍ന്ന കോണ്‍ഗ്രസ് അംഗം ആര്‍.വി ദേശ്പാണ്ഡെയെ മറികടന്നാണ് ബൊപ്പയ്യയെ നിയമിച്ചത്. ഇതിനെതിരെയാണ് കോണ്‍ഗ്രസ് സുപ്രീംകോടതിയെ സമീപിക്കുന്നത്. മാനദണ്ഡം പാലിക്കാതെയാണ് ബൊപ്പയ്യയുടെ നിയമനം നടന്നതെന്ന് കോണ്‍ഗ്രസ് നേതാക്കള്‍ ആരോപിച്ചു.
2009 മുതല്‍ 2013 വരെ സ്പീക്കറായിരുന്ന ബൊപ്പയ്യ 2008ലും പ്രോടേം സ്പീക്കറായിരുന്നു.

2011ല്‍ ബിജെപിയുടെ പിന്തുണ പിന്‍വലിച്ച 11 എംഎല്‍എമാരെ അയോഗ്യരാക്കിയിരുന്നു. വിശ്വാസ വോട്ടെടുപ്പിനിടെ നടത്തിയ ആ നടപടിയെ സുപ്രീംകോടതി വിമര്‍ശിച്ചിരുന്നു.