പൊതുജനമധ്യത്തില്‍ തന്നെ അപമാനിച്ചെന്ന് നോട്ടീസില്‍ മോഹന്‍ലാല്‍ പറയുന്നു. അതേസമയം, സംഭവത്തില്‍ പ്രതികരണവുമായി ശോഭനാജോര്‍ജ്ജ് രംഗത്തെത്തി. വക്കീല്‍ നോട്ടീസിനെ നിയമപരമായി നേരിടാനാണ് ആലോചിക്കുന്നതെന്ന് ശോഭന ജോര്‍ജ്ജ് പറഞ്ഞു. സ്വകാര്യ സ്ഥാപനത്തിന്റെ ഉല്‍പ്പന്നത്തിന് ഖാദിയുമായി ബന്ധമില്ലെന്നും ചര്‍ക്കയില്‍ നൂല്‍നൂല്‍ക്കുന്നതായി മോഹന്‍ലാല്‍ അഭിനയിക്കുന്നത് ഖാദിബോര്‍ഡിന് നഷ്ടവും സ്വകാര്യ സ്ഥാപനത്തിന് ലാഭവും ഉണ്ടാക്കുമെന്നും വിലയിരുത്തിയാണ് പരസ്യം പിന്‍വലിക്കണമെന്നാവശ്യപ്പെട്ട് മുമ്പ് നോട്ടീസ് അയച്ചത്. ശേഷം സ്വകാര്യ സ്ഥാപനം പരസ്യം പിന്‍വലിച്ചിരുന്നു.

ഇതിനു മാസങ്ങള്‍ക്കു ശേഷമാണ് മോഹന്‍ലാലിന്റെ വക്കീല്‍ നോട്ടീസ് ഖാദി ബോര്‍ഡിനു ലഭിക്കുന്നത്. നോട്ടീസ് തനിക്ക് കിട്ടുന്നതിനോ അതിനോട് പ്രതികരിക്കുന്നതിനോ മുമ്പാണ് ശോഭനാജോര്‍ജ്ജ് ഈ വിഷയം പൊതുജനവേദിയില്‍ ഉന്നയിച്ചത്. തന്നെ അനാവശ്യമായി കടന്നാക്രമിച്ച് പ്രശസ്തി നേടാനാണ് ശോഭന ഇതിലൂടെ ശ്രമിച്ചതെന്ന് വക്കീല്‍ നോട്ടീസില്‍ മോഹന്‍ലാല്‍ പറയുന്നു.

ഖാദി തുണിത്തരങ്ങള്‍ മാത്രമാണ് ചര്‍ക്ക ഉപയോഗിച്ച് നിര്‍മ്മിക്കുന്നത്. ഖാദിയുമായോ ചര്‍ക്കയുമായോ യാതൊരു ബന്ധവുമില്ലാത്ത അത്തരത്തിലുള്ള പരസ്യത്തില്‍ മോഹന്‍ലാല്‍ അഭിനയിച്ചത് ആളുകളില്‍ തെറ്റിദ്ധാരണ സൃഷ്ടിക്കുമെന്നും ചര്‍ക്ക ദേശീയതയുടെ അടയാളം കൂടിയാണെന്നും അവര്‍ പറഞ്ഞു.

പരസ്യത്തിൽനിന്നു മോഹന്‍ലാല്‍ പിന്മാറിയില്ലെങ്കിൽ കടുത്ത നടപടി നേരിടേണ്ടിവരുമെന്നും ശോഭന പറഞ്ഞു.
ഖാദിയെന്ന പേരില്‍ വ്യാജതുണിത്തരങ്ങള്‍ വിപണിയില്‍ സജീവമാവുന്ന സാഹചര്യത്തില്‍ ഇത്തരം പരസ്യങ്ങളെ വിലക്കണമെന്നും ശോഭന ജോര്‍ജ് ആവശ്യപ്പെട്ടു.