അശോകന്‍ ചെരുവില്‍ എഴുതുന്നു-

സാഹിത്യ അക്കാദമി മെമ്പര്‍ സ്ഥാനവും സര്‍ക്കാര്‍ വക പുരസ്‌കാരങ്ങളും രാജിവെക്കുന്നതും തിരിച്ചു കൊടുക്കുന്നതും എഴുത്തു/ കലാപ്രവര്‍ത്തകര്‍ക്ക് ഭരണകൂടത്തോട് വിയോജിക്കാനും പ്രതിഷേധിക്കാനുമുള്ള നല്ല മാര്‍ഗ്ഗങ്ങളാണ്. ടഗോറിന്റെ കാലം മുതന്‍ അത്തരം പ്രതിഷേധങ്ങള്‍ നമുക്ക് പരിചയമുള്ളതാണല്ലോ. ഒരു നിലക്കു പറഞ്ഞാല്‍ ഇത്തരം സ്ഥാനമാനങ്ങള്‍ കൈവശമുള്ളതുകൊണ്ടുള്ള പ്രധാന ഗുണം വേണ്ടിവന്നാല്‍ അത് രാജിവെച്ച് പ്രതിഷേധിക്കാം എന്നതാണ്.

എന്നാല്‍ പ്രിയപ്പെട്ട കവി എസ്.ജോസഫിന്റെ കേരള സാഹിത്യ അക്കാദമിയില്‍ നിന്നുള്ള രാജിയുടെ കാരണം അങ്ങേയറ്റം പരിഹാസ്യമായിപ്പോയി. അതില്‍ ഒരു രാഷ്ട്രീയവുമില്ല; സാമൂഹ്യ വിഷയവുമില്ല എന്നതാണ് പ്രശ്‌നം. കേരള ലിറ്ററേച്ചര്‍ ഫെസ്റ്റിവലില്‍ പ്രഭാഷകനായി ക്ഷണിക്കാത്തതു കൊണ്ട് അദ്ദേഹം അക്കാദമിയില്‍ നിന്ന് രാജിവെച്ചിരിക്കുന്നു. ഡി.സി ബുക്‌സിന്റെ നേതൃത്തത്തില്‍ നടക്കുന്ന കെ.എല്‍.എഫും സാഹിത്യ അക്കാദമിയും തമ്മില്‍ ഏതു വകയിലാണ് ബന്ധപ്പെടുന്നത് എന്ന് അറിഞ്ഞു കൂടാ. സര്‍ക്കാരിന്റെ സാമ്പത്തിക സഹായം കെ.എല്‍.എഫിനുണ്ട് എന്നാണ് വാദം. തങ്ങള്‍ ധനസഹായം നല്‍കുന്ന സാംസ്‌കാരിക പരിപാടികള്‍ക്ക് ആരെ വിളിക്കണം/ വിളിക്കണ്ട എന്നു സര്‍ക്കാര്‍ നിര്‍ദ്ദേശിക്കുന്നത് മര്യാദയാവില്ല.

കവികള്‍ ഇത്രക്കും വിവേകശൂന്യരായി സ്വയം പ്രഖ്യാപിക്കരുതെന്നാണ് ഒരു കാവ്യാസ്വാദകന്‍ എന്ന നിലയില്‍ പറയാനുള്ളത്.

അതേസമയം കവി ആസാദ് ജോസഫിന് അനുകൂലമായി രംഗത്തുവന്നു.

അദ്ദേഹം എഴുതിയത് ഇങ്ങനെ

കവി എസ് ജോസഫ് സാഹിത്യ അക്കാദമി അംഗത്വം രാജിവെച്ചതായി കണ്ടു. അര്‍ഹതയുള്ള ഇടത്ത് അവഗണിക്കപ്പെട്ടു എന്നതു മതിയായ കാരണമാണ്. ഒരു പരിപാടിയില്‍ ക്ഷണിക്കപ്പെട്ടില്ല എന്നത് അത്ര പ്രധാന വിഷയമല്ല. എന്നാല്‍ പ്രമുഖ കവിയും സാഹിത്യ അക്കാദമി പ്രസിഡണ്ടുമായ സച്ചിദാനന്ദന്‍ ഡയറക്ടറായി വര്‍ഷംതോറും നടത്തുന്ന സാഹിത്യ ആഘോഷത്തില്‍ തുടര്‍ച്ചയായി മാറ്റി നിര്‍ത്തപ്പെടുന്നു അഥവാ ബോധപൂര്‍വ്വം അവഗണിക്കപ്പെടുന്നു എന്ന തോന്നലാണ് ജോസഫിന്. അത് അദ്ദേഹത്തിന്റെ ഫെയ്‌സ് ബുക് പോസ്റ്റില്‍ എഴുതിയിട്ടുണ്ട്.

കാര്യം നിസ്സാരമാണെന്ന് എപ്പോഴെങ്കിലും ക്ഷണിക്കപ്പെട്ട ആര്‍ക്കും തോന്നാം. അക്കാദമി പ്രസിഡണ്ട് ഡയറക്ടറായി നടക്കുന്ന പരിപാടിയാണ്. സര്‍ക്കാര്‍ – സ്വകാര്യ (ജജജ) കൂട്ടു സംരംഭമാണ്. സ്‌പോണ്‍സര്‍മാരുണ്ട്. വാടക പവലിയനുകളുണ്ട്. നൂറുകണക്കിന് ക്ഷണിതാക്കളും ആയിരക്കണക്കിന് പൊതുജനങ്ങളും പങ്കെടുക്കുന്ന പരിപാടിയാണ്. കേരളത്തിലെ പൊതുബോധം നിര്‍ണയിക്കേണ്ട ചര്‍ച്ചകളാണ്. സംസ്ഥാന കേന്ദ്ര ഭരണകൂടങ്ങളെ വിമര്‍ശിക്കുന്ന ചര്‍ച്ചകളല്ല, അവയുടെ താല്‍പ്പര്യങ്ങളുടെ ബോധാധീശത്വം ഉറപ്പിക്കുന്ന സെഷനുകളാണ് വിഭാവനം ചെയ്യപ്പെട്ടത്. അതില്‍ എതിരഭിപ്രായം ധീരമായി പറഞ്ഞവര്‍ തീരെ ഇല്ല എന്നല്ല വിവക്ഷ. പൊതുവേ ഒരു ഹെഗിമണി ഉറപ്പിച്ചു നില നിര്‍ത്തലാണ് ദൗത്യം. അതിനാല്‍ സര്‍ക്കാറുകള്‍ കോടികള്‍ ചെലവഴിച്ചുകാണും.

ഇങ്ങനെയൊരു വലിയ സര്‍ക്കാര്‍ പദ്ധതിയില്‍നിന്ന് കെ റെയില്‍പോലുള്ള പീപീപീ പദ്ധതികളെ പരസ്യമായി പിന്തുണച്ച ഒരെഴുത്തുകാരന്‍ മാറ്റി നിര്‍ത്തപ്പെടുന്നത് എന്തുകൊണ്ടാവും? സാഹിത്യ അക്കാദമി പ്രസിഡണ്ടും വൈസ് പ്രസിഡണ്ടും മുന്‍ പ്രസിഡണ്ടും മറ്റ് അംഗങ്ങളുമെല്ലാം പല സെഷനുകളില്‍ നിറഞ്ഞു നില്‍ക്കുന്നു. അക്കാദമിയിലെ ഒരംഗത്തോട് എന്തിനാണ് വിവേചനം? സംവരണ സീറ്റില്‍ മത്സരിക്കുന്ന ഒരെഴുത്തുകാരനായി തന്നെ കാണേണ്ടതില്ല എന്ന് ജോസഫ് വ്യക്തമായി എഴുതിക്കണ്ടു. അതു വിവേചനത്തെക്കുറിച്ചുള്ള ഗുരുതരമായ ആക്ഷേപവും പരാതിയുമാണ്. കെ എല്‍ എഫ് എന്നതിലെ കെ എന്തു കെയാണ് അഥവാ ഏതുതരം കെ ആണ് എന്ന ചോദ്യമാണത്.

ജോസഫ് രാജി പിന്‍വലിക്കുമോ എന്ന് അറിയില്ല. ക്ഷമിക്കണം, അങ്ങനെ എഴുതുന്നത് അദ്ദേഹത്തിന്റെ നിശ്ചയത്തെ കുറച്ചു കാണലാണെന്ന് കരുതരുത്. ഇന്നത്തെ കാലത്ത് പലവിധ മെയ് വഴക്കളില്ലാതെ ഒരു സാധാരണ മനുഷ്യനും അംഗീകാരത്തോടെ ജീവിക്കാനാവില്ലെന്ന് വന്നിട്ടുണ്ട്. ജോസഫിന്റെ രാജി അംഗീകൃത സാംസ്‌കാരിക നേതാക്കള്‍ക്കിടയിലെ വൈരുദ്ധ്യങ്ങള്‍ പൊട്ടിത്തെറിച്ചു പോവുന്ന ചില സന്ദര്‍ഭങ്ങള്‍ തുറന്നു കാണിക്കുന്നു. കേരളത്തിലെ പലവിധ അതിജീവന സമരങ്ങള്‍ നാം കാണുകയില്ലെങ്കിലും കാര്‍ണിവലുകളിലെ പങ്കാളിത്തം ഉറപ്പാക്കാനും അവിടത്തെ ആഘോഷങ്ങളുടെ ഭാഗമാകാനും വല്ലാത്ത ഒരു വെമ്പലാണ്. ആ വെമ്പലാണ് കേരളത്തിലെ അധീശ വര്‍ഗ പൊതുബോധം.

സമരങ്ങളിലും അതിന്റെ സാഹിത്യ ആഖ്യാനങ്ങളിലും നമുക്ക് ഒരുപോലെ പങ്കാളിത്തം ഉണ്ടാവേണ്ടതുണ്ട്. അതാണ് നവോത്ഥാന പാരമ്പര്യം. അതില്‍ വന്ന ഛേദമാണ് ജോസഫിനെപ്പോലെ ഒരെഴുത്തുകാരന്‍ മാറ്റി നിര്‍ത്തപ്പെടാനോ അങ്ങനെയൊരു തോന്നല്‍ ഉയര്‍ന്നുവരാനോ കാരണമായിട്ടുണ്ടാവുക. പീപീപി സാംസ്‌കാരിക പദ്ധതികള്‍ ജനകീയ സാംസ്‌കാരിക പദ്ധതികളായി തെറ്റിദ്ധരിച്ചുകൂടാ. അവിടെ ജനങ്ങളെ കണ്ടേക്കും. അന്തരീക്ഷവും ആത്മാവും നവലിബറല്‍ മുതലാളിത്ത ആശ്രിതത്വമാണ്.

വിഷയത്തില്‍ മുന്‍ പി.ആര്‍.ഡി ഡെപ്യൂട്ടി ഡയറക്ടര്‍ ഖാദര്‍ പാലാഴി എഴുതിയത് ഇങ്ങനെ

കെ.എല്‍ എഫ് നടന്നപ്പോഴൊക്കെ അതിലെ സാഹിത്യേതര താല്‍പര്യങ്ങളെക്കുറിച്ച് പോസ്റ്റിയിരുന്നെങ്കിലും ഇത്തവണ ഉമ്പാച്ചിപരമായ കാരണങ്ങളാല്‍ അതിന് മുതിരുന്നില്ല. മാത്രമല്ല മുന്‍ കെ.എല്‍.എഫുകളില്‍ ചൂണ്ടിക്കാട്ടിയ ഇഷ്യൂകളേക്കാള്‍ ഏറെയധികമൊന്നും ആരും പറഞ്ഞിട്ടുമില്ല.

എന്നാല്‍ മുമ്പ് സര്‍ക്കാര്‍ മുന്‍കയ്യില്‍ നടന്ന ഒരു സാഹിത്യോത്സവ ശ്രമം ഓര്‍മിക്കുന്നത് ഉചിതമാവുമെന്ന് കരുതുന്നു. എഴുത്തുകാരനായ കെ.വി മോഹന്‍കുമാര്‍ കോഴിക്കോട് കലക്ടറായിരുന്ന കാലം. ജയ്പൂര്‍ ലിറ്റ്‌ഫെസ്റ്റ് മാതൃകയില്‍ കോഴിക്കോട്ടൊരു സാഹിത്യമേള നടത്തണമെന്ന ഐഡിയ അദ്ദേഹം മുന്നോട്ട് വെച്ചു. പ്രാഥമിക ചര്‍ച്ചകളില്‍ ഏവരുമതിനെ സ്വാഗതം ചെയ്തു. പിന്നെ അഞ്ച് മണി കഴിഞ്ഞാല്‍ കലക്ടറുടെ ചേംബറില്‍ കോഴിക്കോടന്‍ സാഹിത്യകാരന്‍മാരുടെ യോഗത്തോട് യോഗമായിരുന്നു പല ദിവസങ്ങളിലും. ചര്‍ച്ചകള്‍, ഉപചര്‍ച്ചകള്‍, കമ്മിറ്റികള്‍, സബ് കമ്മിറ്റികള്‍. ജില്ലാ ഇന്‍ഫര്‍മേഷന്‍ ഓഫീസര്‍ എന്ന നിലയില്‍ ഈ വിനീതനല്ലാത്തവന്‍ കമ്മിറ്റിയുടെ സെക്രട്ടറിയായിരുന്നു. ഇന്ത്യയില്‍ നിന്ന് മാത്രമല്ല വിദേശത്ത് നിന്നും എഴുത്തുകാരെ കൊണ്ടുവരണമെന്നായിരുന്നു സാറിന്റെ താല്‍പര്യം.

അങ്ങനെയിരിക്കെ ഒരു അപരാഹ്നത്തില്‍ തലസ്ഥാനത്ത് നിന്ന് ഒരുത്തരവിറങ്ങുന്നു. കെ.വി മോഹന്‍ കുമാറിന് സ്ഥലം മാറ്റവും വകുപ്പ് മാറ്റവും . സാഹിത്യപ്രേമികളില്‍ നിരാശയുടെ സുനാമി ആഞ്ഞടിച്ചു. കലക്ടര്‍ ആശ്വാസവചനങ്ങള്‍ ഉരുവിട്ടു. അടുത്ത കലക്ടര്‍ ചാര്‍ജെടുത്ത ശേഷം നമുക്ക് പ്രൊസീഡ് ചെയ്യാം. ഞാനെന്നും കൂടെയുണ്ടാവും എന്നൊക്കെ.

പൊതുവെ ഒരു കലക്ടര്‍ തുടങ്ങിയ പ്രത്യേക പ്രൊജക്റ്റുകള്‍ പിറകെ വരുന്നവര്‍ മൈന്റ് ചെയ്യില്ല. പുതിയ കലക്ടര്‍ പക്ഷേ അങ്ങിനെയായിരുന്നില്ല എന്നല്ല പറയുന്നത് . അവര്‍ പറഞ്ഞു. ‘ എനിക്കീ സാഹിത്യവും കലയുമൊന്നും തലയില്‍ കയറില്ല. ഇവിടെ പിടിപ്പത് പണിയുണ്ട്. നിങ്ങളൊക്കെ എന്താച്ചാ ചെയ്യ് ‘

പിന്നെപ്പിന്നെ നായകനില്ലാത്ത ആ സ്വപ്നാടനം മറ്റെവിടെയോ തുടങ്ങിയ സാഹിത്യോത്സവത്തിലൂടെ സഫലമായിരിക്കണം.
അത് തന്നെയാണോ സര്‍ക്കാര്‍ സംവിധാനങ്ങളുടെ സമ്പൂര്‍ണ സഹായത്തോടെ കോഴിക്കോട്ടെത്തിയതും ഡി.സി ലിറ്റററി ഫെസ്റ്റ് എന്ന് പേരിടേണ്ടിയിരുന്നതുമായ കെ.എല്‍.എഫ് എന്നും അറിയില്ല. കാരണം അന്നദ്ദേഹം ഇപ്പറഞ്ഞ പ്രസാധകരുമായും എഴുത്തുകാരുമായൊക്കെ ബന്ധപ്പെട്ടിരുന്നു.

കെ.വി മോഹന്‍കുമാറിന്റെ സാര്‍ത്ഥകമാകാത്ത ഈ സ്വപ്നം പക്ഷേ ഇന്ന് പലര്‍ക്കുമറിയില്ല. എന്നാല്‍ കോഴിക്കോടിന് എന്നും ഓര്‍മിക്കാനുള്ള സാംസ്‌കാരികക്കാഴ്ചകള്‍ സമ്മാനിച്ചാണ് അദ്ദേഹം നഗരം വിട്ടത്. കോഴിക്കോട് ബീച്ചിലേയും മാനാഞ്ചിറയിലേയും കരിങ്കല്‍ ശില്‍പങ്ങളാണത്.

എങ്കിലും വേണം കോഴിക്കോട്ടൊരു സര്‍ക്കാര്‍ സ്‌പോണ്‍സേഡ് ജനകീയ ലിറ്റ് ഫെസ്റ്റ് . തിരുവനന്തപുരത്തെ IFFK പോലെ കോഴിക്കോട്ടൊരു ഇന്റര്‍നാഷണല്‍ ലിറ്റററി ഫെസ്റ്റിവല്‍ ഓഫ് കേരള എന്ന ILFK.

15 വരെ കോഴിക്കോട് ബീച്ചില്‍ ആറ് വേദികളിലായാണ് ഫെസ്റ്റ് നടക്കുക. 12 രാജ്യങ്ങളില്‍ നിന്നായി അഞ്ഞൂറോളം പ്രഭാഷകര്‍ പങ്കെടുക്കും. ശാസ്ത്രവും സാങ്കേതികവിദ്യയും, കല, സിനിമ രാഷ്ട്രീയം, സംഗീതം, പരിസ്ഥിതി, സാഹിത്യം, സംരംഭകം, ആരോഗ്യം, കല വ്യവസ്ഥ സംസ്‌കാരം എന്നീ വിഷയങ്ങളെ അധികരിച്ചുള്ള ചര്‍ച്ചകള്‍ നടക്കും. മേളയില്‍ മൂന്നു ലക്ഷത്തിലധികം ആളുകള്‍ പങ്കാളികളാവും. തുര്‍ക്കി സ്‌പെയിന്‍, യുഎസ്, ബ്രിട്ടന്‍, ഇസ്രായേല്‍, മിഡില്‍ ഈസ്റ്റ്, ഫാര്‍ ഈസ്റ്റ് തുടങ്ങി വിവിധ രാജ്യങ്ങളില്‍ നിന്നുള്ള ക്ഷണിതാക്കള്‍ എത്തും. കലാകാരന്മാര്‍, അഭിനേതാക്കള്‍, സെലിബ്രിറ്റികള്‍, എഴുത്തുകാര്‍, ചിന്തകര്‍, ചര്‍ച്ചക്കെത്തും.

മന്ത്രിമാരായ സജി ചെറിയാന്‍, മുഹമ്മദ് റിയാസ്, കെ.എന്‍.ബാലഗോപാല്‍, വി.എന്‍.വാസവന്‍, അഹമ്മദ് ദേവര്‍കോവില്‍, പോപ്പ് ഗായിക ഉഷ ഉതുപ്പ്, ഗീതാഞ്ജലി, കെ.ആര്‍.മീര, ആഭാ യോനത്ത്, സുധാമൂര്‍ത്തി എന്നിവര്‍ പങ്കെടുക്കും. 12 മുതല്‍ 15 വരെ കോഴിക്കോട് ബീച്ചില്‍ ആറ് വേദികളിലായാണ് മേള നടക്കുന്നത്. നൊബേല്‍ സമ്മാന ജേതാക്കള്‍, ബുക്കര്‍ പുരസ്കാര ജേതാക്കളായ എഴുത്തുകാര്‍, സാഹിത്യ പ്രതിഭകള്‍, നയതന്ത്രജ്ഞര്‍, സിനിമാ-നാടക പ്രതിഭകള്‍, അവതാരകര്‍, കലാകാരന്‍മാര്‍, മുതിര്‍ന്ന രാഷ്ട്രീയ നേതാക്കള്‍, ചരിത്രകാരന്‍മാര്‍, മാധ്യമപ്രവര്‍ത്തകര്‍ തുടങ്ങി നിരവധി പ്രമുഖര്‍ കേരള ലിറ്ററേച്ചര്‍ ഫെസ്റ്റില്‍ പങ്കെടുക്കും. 12 രാജ്യങ്ങളില്‍ നിന്നായി 500 ഓളം പ്രഭാഷകരും പരിപാടിയുടെ ഭാഗമാകും.

ശാസ്ത്രസാങ്കേതികവിദ്യ, കല, സിനിമ, രാഷ്ട്രീയം, സംഗീതം, പരിസ്ഥിതി, സാഹിത്യം, സംരംഭകത്വം, ആരോഗ്യം, കലാസംവിധാനം, സംസ്കാരം തുടങ്ങിയ വിഷയങ്ങള്‍ പരുപാടിയില്‍ ചര്‍ച്ചയാവും. മൂന്നു ലക്ഷത്തിലധികം ആളുകള്‍ ഫെസ്റ്റിന്‍്റെ ഭാഗമാവും. തുര്‍ക്കി സ്പെയിന്‍, യുഎസ്, ബ്രിട്ടന്‍, ഇസ്രായേല്‍, മിഡില്‍ ഈസ്റ്റ്, ഫാര്‍ ഈസ്റ്റ് തുടങ്ങി ലോകത്തിന്‍്റെ വിവിധ ഭാഗങ്ങളില്‍ നിന്നുള്ള ക്ഷണിതാക്കളെക്കൊണ്ട് ധന്യമായിരിക്കും മേള.

മലയാള പുസ്തകങ്ങളുടെ ഇംഗ്ലീഷ് വിവര്‍ത്തനം ഇന്ത്യയിലുള്ള വായനക്കാര്‍ക്ക് മാത്രമെ വായിച്ചാസ്വദിക്കാന്‍ കഴിയൂ എന്നൊരു പരിമിതി പറഞ്ഞു കേള്‍ക്കുന്നുണ്ട്. ഇതും പരിഹരിക്കേണ്ട പ്രശ്‌നമാണ്. മലയാളത്തിലെ കൃതികളുടെ വിവര്‍ത്തനം കിട്ടുന്നില്ല എന്ന പരാതി പുറത്ത് ഉയരുന്നുണ്ട്. ഇത് ശ്രദ്ധിക്കേണ്ട കാര്യമാണ്.
മലയാളകൃതികള്‍ പുറംരാജ്യങ്ങളില്‍ എത്താത്തതുപോലെ ഇന്ത്യയിലെ മറ്റു ഭാഷകളിലും വേണ്ടപോലെ എത്തുന്നില്ലെന്ന് സേതു പറഞ്ഞു.

ഒരു കാലത്ത് ഇന്ത്യന്‍ ഭാഷകളിലെ കൃതികളുമായി നമുക്ക് സമ്പന്നമായ കൊടുക്കല്‍ വാങ്ങലുകള്‍ ഉണ്ടായിരുന്നു. യശ്പാല്‍, മുല്‍ക്ക് രാജ് ആനന്ദ്,ആശപൂര്‍ണാദേവി, ബിമല്‍മിത്ര തുടങ്ങിയവരുടെ കൃതികള്‍ മലയാളരചനകളെ പോലെ നാം വായിക്കുകയുണ്ടായി. എന്നാല്‍ ഇപ്പോള്‍ അത്തരത്തില്‍ കൊടുക്കല്‍ വാങ്ങല്‍ നടക്കുന്നുണ്ടോ എന്ന കാര്യം സംശയമാണ്. സേതു പറഞ്ഞു. പാണ്ഡവപുരം ഹിന്ദിയിലേക്ക് തര്‍ജ്ജമ ചെയ്തപ്പോള്‍ ജാരന്‍ എന്ന വാക്ക് പ്രശ്‌നമായി. ജാര്‍ എന്നാണ് വിവര്‍ത്തകനായ യു.കെ.എസ് ചൗഹാന്‍ മൊഴിമാറ്റിയത്. ഒരു വാക്കിന്റെ പ്രശ്‌നം ചിലപ്പോള്‍ നോവലിനെ തകര്‍ക്കും-സേതു പറഞ്ഞു.

പുസ്തകത്തിന്റെ പ്രമോഷനുവേണ്ടി എന്തെങ്കിലും ചെയ്യുന്നത് മഹാ അപരാധവും അധമവുമായി കാണുന്ന പ്രവണത മലയാളത്തില്‍ മാത്രമാണെന്ന് ബെന്യാമിന്‍ പറഞ്ഞു. പുസ്തകത്തിന്റെ കവര്‍ നേരത്തെ പ്രസിദ്ധീകരിച്ചതിന്റെ പേരില്‍പോലും പഴി കേള്‍ക്കേണ്ടിവരുന്ന എഴുത്തുകാര്‍ മലയാളത്തില്‍ മാത്രമേ ഉണ്ടാവുകയുള്ളു. ഇത് പുസ്തകത്തിന്റെ പ്രചാരണത്തിനും വില്‍പനക്കും തടസ്സമായി മാറുന്നുണ്ട്്്. വിവര്‍ത്തനത്തിന്റെ ഇതാണ് സംഭവിക്കുന്നത്. വിപണി ആവശ്യപ്പെടുന്ന പിന്തുണ പുസ്തകത്തിന് നല്‍കേണ്ടത് അനിവാര്യമാണ്. അതൊരു മോശം പ്രവൃത്തിയായി കാണേണ്ടതില്ല. ബെന്യാമിന്‍ പറഞ്ഞു. വിവര്‍ത്തകനെ അഥവാ വിവര്‍ത്തകയെ രണ്ടാംനിരക്കാരായി കാണുന്ന പ്രവണതയാണ് ഇവിടെയുള്ളതെന്ന് സുഭാഷ് ചന്ദ്രന്റെ മനുഷ്യന് ഒരു ആമുഖം എന്ന നോവല്‍ ഇംഗ്ലീഷിലേക്ക് തര്‍ജ്ജ ചെയ്ത ഇ.വി ഫാത്തിമ പറഞ്ഞു. സുഭാഷ് ചന്ദ്രന്‍, റൂബിന്‍ ഡിക്രൂസ് എന്നിവരും പ്രസംഗിച്ചു.

കേരളത്തിലേക്ക് വരുമ്പോള്‍ ഒരു കൂട്ടം ഫാസിസ്റ്റ് ശക്തികള്‍ തന്നെ നോക്കി പരിഹസിച്ചിരുന്നു. നിങ്ങളെന്തിനാണ് കേരളത്തിലേക്ക് പോകുന്നതെന്നായിരുന്നു അവരുടെ ചോദ്യം. എന്നാല്‍ ഞാന്‍ അവരോട് നന്ദി പറയുകയാണ്. അവരുടെ പ്രതികരണമാണ് എന്നെ കൂടെക്കൂടെ കേരളത്തിലെത്തിക്കുന്നത് -പ്രകാശ് രാജ് പറഞ്ഞു. ഫാസിസ്റ്റ് മനോഭാവമുള്ള ഭരണകൂടത്തേയും സംഘ്പരിവാര്‍ ശക്തികളേയും തീപ്പൊരി പ്രസംഗത്തിലൂടെയാണ് അദ്ദേഹം നേരിട്ടത്. ‘അഴിമതിയെക്കുറിച്ച് ചോദിക്കുമ്പോള്‍ നിങ്ങള്‍ കോണ്‍ഗ്രസ്സാണോ എന്നും പിഞ്ചുകുഞ്ഞുങ്ങള്‍ക്കു നേരെയുള്ള ആക്രമണങ്ങളെ എതിര്‍ക്കുമ്പോള്‍ നിങ്ങള്‍ ഹൈന്ദവ വിരുദ്ധരാണോ എന്നും, മനുഷ്യാവകാശങ്ങളെക്കുറിച്ച് ചോദിക്കുമ്പോള്‍ നിങ്ങള്‍ കമ്മ്യൂണിസ്റ്റുകളാണോ എന്നും അവര്‍ ചോദിക്കുന്നു. നമ്മള്‍ ഇനി സംസാരിക്കേണ്ടത് സൂര്യോദയത്തെയും സൂര്യാസ്തമയത്തെയും കുറിച്ചല്ല. ചോദ്യങ്ങള്‍ ചോദിക്കേണ്ട സമയമാണിത്. ഓരോരുത്തരും എഴുന്നേറ്റു നില്‍ക്കേണ്ട സമയമാണിത്. അവര്‍ നമ്മുടെ വയലില്‍ തീയിട്ട് ശ്രദ്ധ തെറ്റിച്ച് ഇപ്പുറത്ത് വന്ന് വീടിന് തീ വെക്കുന്ന തരം വിദ്യകളിലൂടെയാണ് കടന്നാക്രമിക്കുന്നത്. പ്രകാശ് രാജ് കൂട്ടിച്ചേര്‍ത്തു.

കേരളത്തിലെത്തിയതില്‍ താന്‍ സന്തോഷവാനാണ്. രാജ്യത്തെ നിലവിലെ സാഹചര്യങ്ങളെ മാറ്റിമറിക്കാന്‍ യുവജനങ്ങള്‍ക്ക് കഴിയുമെന്നതില്‍ എനിക്ക് വിശ്വാസമുണ്ട്. നമുക്ക് ആവശ്യപ്പെടാം, നമുക്ക് ചോദിക്കാം, നമുക്ക് പേടികൂടാതെ മൗലികാവകാശങ്ങള്‍ ആഘോഷിക്കാം എന്ന് പറഞ്ഞാണ് പ്രകാശ് രാജ് പ്രസംഗം അവസാനിപ്പിച്ചത്.