കള്ളപ്പണ നിരോധന നിയമപ്രകാരമാണ് നടപടി. ബിനീഷിന്റെ ബിനാമികളുടെ സ്വത്തും കണ്ടുകെട്ടും. ഇതേക്കുറിച്ച് വിശദമായി പരിശോധിച്ചുവരികയാണ്. ആദ്യഘട്ട ഏറ്റെടുക്കലാണ് ഇപ്പോള്‍ ഇഡി നടത്തുന്നത്.

കേസുമായി ബന്ധപ്പെട്ട് നേരത്തെ മരുതംകുഴിയിലെ വീട്ടില്‍ എന്‍ഫോഴ്‌സ്‌മെന്റ് റെയ്ഡ് നടത്തിയിരുന്നു. ഇപ്പോള്‍ അവധിയില്‍ പോയ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ ഈ വീട്ടിലാണ് താമസിച്ചിരുന്നത്. പിന്നീട് പാര്‍ട്ടി അനുവദിച്ച ഫഌറ്റിലേക്ക് കോടിയേരി മാറുകയായിരുന്നു.

സ്വര്‍ണക്കടത്തുമായി ബന്ധപ്പെട്ട കേസില്‍ കഴിഞ്ഞ മാസമാണ് ബിനീഷിന്റെ ആസ്തിവകകളുടെ കൈമാറ്റം മരവിപ്പിച്ചുകൊണ്ട് കൊച്ചി ഇ.ഡി ഓഫീസ് സസ്ഥാന രജിസ്‌ട്രേഷന്‍ വകുപ്പിന് കത്ത് നല്‍കിയത്. സ്വാഭാവിക നടപടിക്രമം അനുസരിച്ച് അറസ്റ്റ് നടന്ന് 90 ദിവസത്തിനകം കണ്ടുകെട്ടല്‍ നടപടികള്‍ ഇ.ഡി പൂര്‍ത്തീകരിക്കും. ഇതിന്റെ ഭാഗമായാണ് കേസില്‍ ഉള്‍പ്പെട്ടവരുടെ ആസ്തിവകകള്‍ കണ്ടുകെട്ടാനുള്ള ഇഡിയുടെ തീരുമാനം.

അഞ്ചുകോടി രൂപ വേണമെന്ന യുവതിയുടെ ആവശ്യം വിനോദിനി അംഗീകരിച്ചില്ല. ഇപ്പോള്‍ പണം നല്‍കിയാല്‍ പിന്നേയും പണം ചോദിച്ചുകൊണ്ടേയിരിക്കില്ലേ എന്നാണ് ബിനോയ് പറഞ്ഞതെന്നും കെ പി ശ്രീജിത്ത് വെളിപ്പെടുത്തി. അച്ഛന്‍ ഇടപെടേണ്ട കാര്യമില്ലെന്നും കേസായാല്‍ ഒറ്റയ്ക്ക് നേരിടാന്‍ തയ്യാറാണ് എന്നും ബിനോയി പറഞ്ഞതായി കെ പി ശ്രീജിത്ത് പറയുന്നു. സ്ത്രീ സുരക്ഷാ വിഷയത്തില്‍ വാചാലരാകുന്ന സി.പി.എം നേതൃത്വത്തിന് യുവതി പരാതി നല്‍കിയിട്ടും ഇതുവരെ നടപടിയ്ക്ക് തയ്യാറാവാത്തത്് വലിയ പ്രതിരോധത്തിലാക്കിയിട്ടുണ്ട്.

തിരുവനന്തപുരം: സാമ്പത്തിക തട്ടിപ്പുകേസില്‍ യാത്രാവിലക്ക് നീക്കണമെന്നാവശ്യപ്പെട്ട് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന്‍ ബിനോയി കോടിയേരി ദുബായ് മേല്‍ കോടതിയില്‍ അപ്പീല്‍ നല്‍കി.
ദുബായ് അടിയന്തിര കോടതി ഏര്‍പെടുത്തിയ രാജ്യം വിട്ടുപോകരുതെന്ന വിലക്ക് നീക്കണമെന്നാവശ്യപ്പെട്ടാണ് ബിനോയി ദുബായ് ഫസ്റ്റ് ഇന്‍സ്റ്റന്‍സ് കോടതിയില്‍ അപ്പീല്‍ നല്‍കിയത്. കേസിലെ വസ്തുതകള്‍ പരിശോധിച്ച ശേഷം യാത്രാവിലക്ക് നീക്കാന്‍ കഴിയുമോ എന്ന് കോടതി തീരുമാനിക്കും. യാത്രാ വിലക്ക് ഒഴിവാക്കാനാവാതെ വന്നാല്‍ ബിനോയ് സിവില്‍ കോടതി വിധിയുടെ നടപടികള്‍ നേരിടേണ്ടിവരും. അതേസമയം നിയമനടപടികള്‍ ശക്തമാക്കാനുള്ള നീക്കത്തിലാണ് ജാസ് കമ്പനി ഉടമ ഹസന്‍ ഇസ്മായില്‍ അബ്ദുള്ള അല്‍ മര്‍സൂഖി. പത്ത് ലക്ഷം ദിര്‍ഹം നല്‍കുകയോ സമാനമായ തുകയുടെ ബാങ്ക് ഗ്യാരന്റി സമര്‍പിക്കുകയോ ചെയ്യാതെ ബിനോയിയെ വിട്ടയക്കരുതെന്നാണ് മര്‍സൂഖിയുടെ വാദം. വസ്തുതകളുടെയും മറ്റു രേഖകളുടെയും അടിസ്ഥാനത്തില്‍ ഇത്തരം കേസുകള്‍ ഒരു വര്‍ഷം വരെ നീണ്ടു നില്‍ക്കാന്‍ സാധ്യതയുണ്ടെന്ന്് നിയമ വിദഗ്ധര്‍ പറയുന്നു. എന്നാല്‍ മറ്റൊരാളുടെ പാസ്‌പോര്‍ട്ട് സമര്‍പ്പിച്ച് വിലക്കു മാറ്റിയെടുക്കാനുള്ള ശ്രമവും ബിനോയുടെ അഭിഭാഷകന്‍ നടത്തുന്നുണ്ട്.
ഇതിനിടെ കോടിയേരി ബാലകൃഷ്ണന് കൂടുതല്‍ തലവേദന സൃഷ്ടിച്ച് ഇളയ മകന്‍ ബിനീഷ് കോടിയേരിയുടെ കേസുകളെ സംബന്ധിച്ച വിവരങ്ങളും പുറത്തുവന്നു. ബിനീഷ് കോടിയേരി പിടികിട്ടാപ്പുള്ളിയാണെന്ന വിവരം ദുബായ് പൊലീസിനെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്തു. ബിനീഷ് യു.എ.ഇയില്‍ എത്തിയാലുടന്‍ അറസ്റ്റിലാകും. വായ്പ തിരിച്ചടക്കാത്ത കേസിലാണ് ബിനീഷിനെ പിടികിട്ടാപ്പുള്ളിയായി പ്രഖ്യാപിച്ചിരിക്കുന്നത്.
സഊദി കേന്ദ്രമായി പ്രവര്‍ത്തിക്കുന്ന സാംബാ ഫിനാന്‍സിയേഴ്‌സിന്റെ ദുബായ് ശാഖയില്‍ നിന്ന് എടുത്ത ലോണ്‍ തിരിച്ചടക്കാത്ത കേസില്‍ ദുബായ് കോടതി ബിനീഷിനെ രണ്ട് മാസം തടവിന് ശിക്ഷിച്ചിരുന്നു.
പൊലീസില്‍ നിന്നു ദുബായ് പ്രോസിക്യൂഷനിലേക്കും പിന്നീട് കേസ് കോടതിയിലുമെത്തുകയായിരുന്നു. പണം തിരിച്ചു പിടിക്കാന്‍ ബാങ്ക് റിക്കവറി ഏജന്‍സിയെ നിയോഗിച്ചെങ്കിലും ഫലമുണ്ടായില്ല. പ്രതി കേരളത്തിലെ ഉന്നതനായ രാഷ്ര്ട്രീയ നേതാവിന്റെ മകനെന്നാണ് ബാങ്കിനു ലഭിച്ച റിപ്പോര്‍ട്ട്. ദുബായ് പൊലീസ് ബിനീഷിനെ പിടികിട്ടാപുള്ളിയായി രേഖപ്പെടുത്തിയിരിക്കുന്നതിനാല്‍ രാജ്യത്ത് പ്രവേശിച്ച ഉടന്‍ അറസ്റ്റിലാകും.

തിരുവനന്തപുരം: നിയമസഭയില്‍ കോടിയേരിയുടെ മകനെ പരോക്ഷമായി വിമര്‍ശിച്ച് ഇ.പി ജയരാജന്‍. ഇ.പി.ജയരാജന്റെ മകന്റെ പേരില്‍ വിദേശത്ത് കേസുണ്ടെന്ന് അനില്‍ അക്കര ഉന്നയിച്ച ആരോപണത്തോട് പ്രതികരിക്കുമ്പോഴാണ് ജയരാജന്റെ ഒളിയമ്പ്. ആരില്‍ നിന്നും വായ്പ വാങ്ങുന്ന ആളല്ല തന്റെ മകനെന്നും മറ്റൊരാള്‍ ഉണ്ടാക്കിയ കടം സ്വന്തം പോക്കറ്റില്‍ നിന്ന് തീര്‍ത്ത ആളാണെന്നും ജയരാജന്‍ പറഞ്ഞു. വസ്തുതകള്‍ മനസ്സിലാക്കാതെ പ്രതിപക്ഷം സംസാരിക്കരുത്. തന്റെ മകനെന്ന് പറഞ്ഞ് പ്രതിപക്ഷം പറഞ്ഞത് മറ്റാരുടെയോ പേരാണ്. ഡീസല്‍ വിതരണ കമ്പനിയുടെ ഡിസ്ട്രിബ്യൂട്ടറാണ് തന്റെ മകന്‍. അറ്റ്‌ലസ് രാമചന്ദ്രന്റെ മകളുടെ ഭര്‍ത്താവിനെ സഹായിക്കാന്‍ അദ്ദേഹത്തിന്റെ കൂട്ടുകാരന്‍ കൂടിയായ തന്റെ മകന്‍ ഒരു ചെക്ക് നല്‍കിയിരുന്നു. മകന്‍ നല്‍കിയ ചെക്ക് കൂട്ടുകാരന്‍ മാറി പണമാക്കി. പകരം അതേ തുകക്ക് അറ്റലസ് രാമചന്ദ്രന്റെ മകളുടെ പേരിലുള്ള ചെക്ക് നല്‍കി. ഇത് ബാങ്കില്‍ മാറാന്‍ നല്‍കിയെങ്കിലും അക്കൗണ്ടില്‍ പണമില്ലാത്തതിനാല്‍ ചെക്ക് മടങ്ങി. ഇതിന്റ നഷ്ടപരിഹാരം മകന്‍ കൊടുത്തുതീര്‍ത്തെന്നും പ്രതിപക്ഷം രാഷ്ട്രീയ വിരോധത്തിന്റെ അടിസ്ഥാനത്തില്‍ വ്യക്തിഹത്യ നടത്തുകയാണെന്നും ജയരാജന്‍ പറഞ്ഞു.

തിരുവനന്തപുരം: മകനെതിരായ ആരോപണങ്ങള്‍ക്ക് പ്രതിരോധം തീര്‍ക്കാന്‍ ശ്രമിച്ച് പരാജയപ്പെട്ട സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ കൂടുതല്‍ കുരുക്കിലേക്ക്. ദുബായില്‍ ബിനോയ് കോടിയേരിക്കെതിരെ കേസില്ലെന്നും യാത്ര ചെയ്യാന്‍ വിലക്കില്ലെന്നും ആവര്‍ത്തിച്ചു പറഞ്ഞ കോടിയേരി ബാലകൃഷ്ണന് ബിനോയിയുടെ ഇന്ത്യയിലേക്ക് മടക്കം മുടങ്ങിയത് വന്‍ തിരിച്ചടിയായി. വാര്‍ത്താസമ്മേളനം നടത്താനും കേരളത്തിലെത്തി മുഖ്യമന്ത്രിയെ നേരില്‍കാണാനും ശ്രമം നടത്തിയ ജാസ് കമ്പനി ഉടമ ഇസ്മായില്‍ അബ്ദുല്ല അല്‍ മര്‍സൂഖിയെ കോടിയേരി ബാലകൃഷ്ണന്‍ പരിഹസിച്ചിരുന്നു. അറബി ഇവിടെ വന്നു ബുദ്ധിമുട്ടേണ്ടെന്നും മകന്‍ ദുബായില്‍ത്തന്നെ ഉണ്ടെന്നുമാണ് കോടിയേരി കഴിഞ്ഞ ദിവസം പറഞ്ഞത്. ഇതിനു പിന്നാലെയാണ് യാത്രാവിലക്കുണ്ടായത്.
സി.പി.എമ്മിന്റെ കേന്ദ്രനേതൃത്വം ഇക്കാര്യത്തില്‍ കര്‍ക്കശ നിലപാട് സ്വീകരിക്കുകയും ജനറല്‍ സെക്രട്ടറി സീതാറാം യെച്ചൂരിയും മുതിര്‍ന്ന പി.ബി അംഗം എസ്. രാമചന്ദ്രന്‍ പിള്ളയും വിവാദത്തില്‍ പാര്‍ട്ടിക്ക് ഇടപെടാനാവില്ലെന്ന് വ്യക്തമാക്കുകയും ചെയ്തിരുന്നു. ഈസാഹചര്യത്തില്‍ കേസ് ഒതുക്കിത്തീര്‍ക്കാന്‍ കോടിയേരിക്ക് ഏറെ ബുദ്ധിമുട്ടേണ്ടിവരും.
അതേസമയം ബിനോയ് കോടിയേരിക്ക് മുന്നിലുള്ളത് രണ്ട് മാര്‍ഗങ്ങള്‍ മാത്രമാണ്. ജാസ് ടൂറിസം കമ്പനി ആവശ്യപ്പെടുന്നത് പ്രകാരം 10 ലക്ഷം ദര്‍ഹം കമ്പനി ഉടമ ഇസ്മായില്‍ അബ്ദുല്ല അല്‍ മര്‍സൂഖിക്ക് നല്‍കി യാത്രാ വിലക്ക് നീക്കുക, അല്ലാത്തപക്ഷം സമാനമായ തുകയ്ക്കുള്ള ബാങ്ക് ഗ്യാരണ്ടി നല്‍കുക എന്നിവയാണിത്. ഇതില്‍ ഏതെങ്കിലുമൊരു വഴി തെരഞ്ഞെടുക്കാനായില്ലെങ്കില്‍ ദുബായില്‍ ബിനോയിക്ക് നിയമനടപടി നേരിടേണ്ടിവരും.
ഇന്ത്യയിലേക്ക് മടങ്ങാനാകാത്ത സാഹചര്യത്തില്‍ ബിനോയി അപ്പീല്‍ നല്‍കാനുള്ള നടപടികള്‍ ആരംഭിച്ചിട്ടുണ്ട്. അപ്പീല്‍ സ്വീകരിച്ചാല്‍ യാത്രാവിലക്കുമായി ബന്ധപ്പെട്ട് എന്താണ് ഭാവി നടപടിയെന്ന് കോടതി തീരുമാനിക്കും. ദുബായില്‍ നിന്ന് ഇന്ത്യയിലേക്കോ മറ്റേതെങ്കിലും രാജ്യത്തേക്കോ പോകുന്നതിനാണ് തടസം.

സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന്‍ ബിനോയ് കോടിയേരി 13 കോടി രൂപയുടെ സാമ്പത്തിക തട്ടിപ്പ് നടത്തിയതായി പരാതി. ദുബായില്‍ വിനോദ സഞ്ചാര മേഖലയില്‍ പ്രവര്‍ത്തിക്കുന്ന ജാസ് ടൂറിസം എല്‍.എല്‍.സി എന്ന കമ്പനിയാണ് കോടിയേരിയുടെ മകനെതിരെ പരാതിയുമായി രംഗത്തെത്തിയത്. നിയമ നടപടിക്ക് മുന്നോടിയായി പാര്‍ട്ടി തലത്തില്‍ പ്രശ്‌നം പരിഹരിക്കാന്‍ കമ്പനി ശ്രമം തുടങ്ങി. ഇതിന്റെ ഭാഗമായി സി.പി.എം പോളിറ്റ് ബ്യൂറോക്ക് കമ്പനി ഉടമ ഹസന്‍ ഇസ്മഈല്‍ അബ്ദുല്ല അല്‍ മര്‍സൂഖി പരാതി നല്‍കി. ഇദ്ദേഹം പ്രമുഖ സി.പി.എം നേതാക്കളെ നേരില്‍ക്കണ്ട് സാമ്പത്തിക തട്ടിപ്പിനെ കുറിച്ച് വിശദീകരിച്ചതായും സൂചനയുണ്ട്. അതേസമയം ബിനോയ് കോടിയേരി ആരോപണം നിഷേധിച്ചു.
കമ്പനിയുടെ പേരില്‍ ബാങ്ക്‌വായ്പ എടുത്ത ശേഷം തിരിച്ചടക്കാതെ മുങ്ങിയെന്നാണ് ബിനോയിക്കെതിരായ പരാതി. ഒരു ഔഡി കാര്‍ വാങ്ങുന്നതിന് 3,13,200 ദിര്‍ഹവും ഇന്ത്യ, യു.എ.ഇ, സഊദി അറേബ്യ, നേപ്പാള്‍ എന്നിവിടങ്ങളിലെ ബിസിനസ് ആവശ്യങ്ങള്‍ക്ക് 45 ലക്ഷം ദിര്‍ഹവും കമ്പനിയുടെ അക്കൗണ്ടില്‍ നിന്ന് വാങ്ങിയ ശേഷം ബിനോയ് മുങ്ങിയെന്ന് കമ്പനി പറയുന്നു. 2016 ജൂണ്‍ ഒന്നിന് മുന്‍പ് പണം തിരിച്ചുനല്‍കുമെന്ന് ഉറപ്പു നല്‍കിയിരുന്നു. എന്നാല്‍ കാര്‍ വായ്പയുടെ തിരിച്ചടവ് ഇടക്കുവെച്ച് മുടങ്ങി. അടക്കാന്‍ ബാക്കിയുണ്ടായിരുന്ന 2,09,704 ദിര്‍ഹവും ബാങ്ക് പലിശയും കോടതിച്ചെലവും ചേര്‍ത്താണ് 13 കോടി രൂപ നല്‍കണമെന്ന് കമ്പനി ആവശ്യപ്പെട്ടിരിക്കുന്നത്.
ദുബായില്‍ നിന്ന് രക്ഷപ്പെട്ട ബിനോയിയെ അറസ്റ്റ് ചെയ്യാന്‍ ഇന്റര്‍പോളിന്റെ സഹായം തേടാന്‍ കമ്പനി നീക്കം ആരംഭിച്ചു. അതേസമയം പോളിറ്റ്ബ്യൂറോക്ക് ഇത്തരമൊരു പരാതി ലഭിച്ചിട്ടില്ലെന്നും വിശദാംശങ്ങള്‍ പാര്‍ട്ടിയുമായി ആലോചിച്ച ശേഷം പ്രതികരിക്കാമെന്നും സി.പി.എം ജനറല്‍ സെക്രട്ടറി സീതാറാം യെച്ചൂരി പറഞ്ഞു.
എന്നാല്‍ തങ്ങള്‍ നല്‍കിയതിന് പുറമേ ബിനോയി കോടിയേരിക്കെതിരെ അഞ്ചു ക്രിമിനല്‍ കേസുകള്‍ കൂടി ദുബായില്‍ ഉണ്ടെന്നും സദുദ്ദേശ്യത്തോടെയല്ല അദ്ദേഹം പണം വാങ്ങിയതെന്ന് ഇതില്‍ നിന്നു വ്യക്തമാണെന്നും കമ്പനി ആരോപിക്കുന്നു. ബിനോയ് ഒരു വര്‍ഷത്തിലേറെയായി ദുബായില്‍ നിന്ന് വിട്ടുനില്‍ക്കുകയാണെന്നും അവര്‍ പരാതിയില്‍ പറയുന്നു. കമ്പനിയുടമകള്‍ സി.പി.എം നേതൃത്വത്തെ പ്രശ്‌നത്തില്‍ ഇടപെടുത്താന്‍ ശ്രമിക്കുന്നുണ്ട്. ഒന്നുകില്‍ ബിനോയ് കോടതിയില്‍ ഹാജരാകണം. അല്ലാത്തപക്ഷം പണം തിരികെ നല്‍കണം. ഇതില്‍ ഏതെങ്കിലുമൊന്ന് ഉടനെ ഉണ്ടായില്ലെങ്കില്‍ ഇന്റര്‍പോള്‍ നോട്ടിസിനുള്ള നടപടികളുമായി മുന്നോട്ടുപോകുമെന്നും കമ്പനി വൃത്തങ്ങള്‍ വ്യക്തമാക്കി. ഇതു പാര്‍ട്ടിയെ ബോധ്യപ്പെടുത്താനാണ് ശ്രമം.
തിരിച്ചടവ് ഇനത്തില്‍ ബിനോയ് കഴിഞ്ഞ മേയ് 16ന് നല്‍കിയ രണ്ടു കമ്പനി ചെക്കുകളും ഒരു വ്യക്തിഗത ചെക്കും മടങ്ങി. ദുബായ് കമ്പനിയുടെ അക്കൗണ്ടില്‍ നിന്ന് പണം ലഭ്യമാക്കാന്‍ ഇടനില നിന്ന മലയാളിയായ സുഹൃത്തും അദ്ദേഹത്തിന്റെ പിതാവും കോടിയേരിയെ കണ്ട് മകന്‍ നടത്തിയ ഇടപാടുകളുടെ കാര്യം ചര്‍ച്ച ചെയ്‌തെന്നും പ്രശ്‌നം ഉടന്‍ രമ്യമായി പരിഹരിക്കുമെന്ന് കോടിയേരി ഉറപ്പുനല്‍കിയതായും പറയപ്പെടുന്നു. എന്നാല്‍ ഇക്കാര്യത്തില്‍ നടപടികളുണ്ടാകാത്തതിനാലാണ് കമ്പനി ഉടമ സി.പി.എം നേതൃത്വത്തെ സമീപിച്ചത്. പ്രശ്‌നം പരിഹരിച്ചില്ലെങ്കില്‍ ഇന്റര്‍പോളിനെ സമീപിക്കാനാണ് തീരുമാനം.
സി.പി.എം ചവറ എം.എല്‍. എ വിജയന്‍പിള്ളയുടെ മകന്‍ ശ്രീജിത്തിനെതിരെയും പരാതിയില്‍ പരാമര്‍ശമുണ്ട്. എന്നാല്‍ മകന്റെ ഇടപാടുകളെ കുറിച്ച് തനിക്ക് അറിയില്ലെന്നായിരുന്നു വിജയന്‍പിള്ളയുടെ പ്രതികരണം.

തിരുവനന്തപുരം

സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന്‍ ബിനോയ് കോടിയേരിയുടെ സാമ്പത്തിക തട്ടിപ്പ് പുറത്തുവന്നതോടെ സി.പി.എം നേതൃത്വം വെട്ടിലായി. ജില്ലാസമ്മേളനങ്ങള്‍ പൂര്‍ത്തിയാക്കി സംസ്ഥാന സമ്മേളനത്തിലേക്ക് കടക്കാനൊരുങ്ങുന്നതിനിടെയാണ് സി.പി.എം കേന്ദ്രങ്ങളെ ഞെട്ടിച്ചുകൊണ്ട് വന്‍ സാമ്പത്തിക ഇടപാടിനെ കുറിച്ചുള്ള വിവരങ്ങള്‍ പുറത്തുവന്നത്. പതിമൂന്ന് കോടിയുടെ വന്‍ സാമ്പത്തിക തട്ടിപ്പ് ആരോപിച്ചാണ് ബിനോയ് കോടിയേരിക്കെതിരെ ദുബായ് കമ്പനി സി.പി.എം നേതൃത്വത്തിന് പരാതി നല്‍കിയത്.
സംഭവത്തെ കുറിച്ച് ആദ്യഘട്ടത്തില്‍ പ്രതികരിക്കാന്‍ തയാറാകാതിരുന്ന കോടിയേരി മകനെതിരെ കേസില്ലെന്നും മകന്‍ തന്നെ പ്രതികരിക്കുമെന്നും അറിയിച്ച് തടിയൂരി. പാര്‍ട്ടിയിലെ മറ്റ് നേതാക്കളാകട്ടെ കൃത്യമായ മറുപടി പറയാനാവാതെ കുഴയുന്ന സ്ഥിതിയിലുമാണ്. ആരോപണം കോടിയേരിക്ക് എതിരെയല്ല, മകനെതിരെയാണെന്നും അതുകൊണ്ടുതന്നെ സി.പി.എം നേതൃത്വം ഇത് ചര്‍ച്ച ചെയ്യേണ്ടതില്ലെന്നുമാണ് ഒരു വിഭാഗം നേതാക്കളുടെ വിശദീകരണം. എന്നാല്‍ സംഭവം ദുബായ് കമ്പനി ഉടമ നേരത്തെ തന്നെ കോടിയേരിയെ അറിയിച്ചിരുന്നെന്നും സംഭവം ഒത്തുതീര്‍ക്കാന്‍ കോടിയേരി ശ്രമിച്ചിരുന്നതായും പുറത്തുവന്ന വാര്‍ത്ത അതീവഗൗരവമുള്ളതാണ്. സാധാരണഗതിയില്‍ സംസ്ഥാന സെക്രട്ടറിക്കെതിരെ ഇത്തരമൊരു ആരോപണമുയര്‍ന്നാല്‍ പാര്‍ട്ടിതലത്തിലെ അന്വേഷണമെങ്കിലും പ്രഖ്യാപിക്കേണ്ടതാണ്. എന്നാല്‍ വിഷയം ലഘൂകരിക്കാനാണ് പിണറായി വിജയന്‍ അടക്കമുള്ള നേതാക്കള്‍ ശ്രമിക്കുന്നത്.
അതേസമയം കോടിയേരിക്കു നേരെ ഉയര്‍ന്ന ആരോപണം ഗൗരവമായി കാണണമെന്ന അഭിപ്രായം ഒരു വിഭാഗം നേതാക്കള്‍ക്കുണ്ട്. എന്നാല്‍ സര്‍ക്കാരിനെ പ്രതിക്കൂട്ടിലാക്കാന്‍ പ്രതിപക്ഷം ഇത് ആയുധമാക്കുമെന്നതിനാല്‍ നേതാക്കള്‍ കരുതലോടെയാണ് നീങ്ങുന്നത്. നിയമസഭാ സമ്മേളനം നടക്കുന്ന സമയമായതിനാല്‍ പതിവിലും വീര്യത്തോടെ വിവാദം പുകയും. നേരത്തെ ബന്ധു നിയമന വിവാദത്തില്‍ ഇ.പി.ജയരാജനെതിരെ നടപടി എടുത്ത പാര്‍ട്ടി ഇക്കാര്യത്തില്‍ എന്ത് നിലപാട് സ്വീകരിക്കുമെന്നതും ശ്രദ്ധേയമാണ്. ജയരാജന്‍ നേരിട്ട് അഴിമതി നടത്തുകയോ സാമ്പത്തിക ഇടപാടുകളില്‍ പെടുകയോ ചെയ്തിട്ടില്ല. ബന്ധുവിനെ ഉന്നത പദവിയില്‍ നിയമിച്ചു എന്നതായിരുന്നു അദ്ദേഹത്തിനെതിരായ കുറ്റം. സി.പി.എം സംസ്ഥാന സെക്രട്ടറിയേറ്റ് യോഗം ചേര്‍ന്ന് ജയരാജന്റെ പ്രവര്‍ത്തി പാര്‍ട്ടിയുടെ ധാര്‍മികതക്ക് ചേരുന്നതല്ലെന്ന് വിലയിരുത്തിയാണ് അദ്ദേഹത്തെ മന്ത്രിസ്ഥാനത്തുനിന്ന് പുറത്താക്കിയത്. നിലവില്‍ കോടിയേരിക്കെതിരെ ‘ധാര്‍മികത’ ഉന്നയിക്കാന്‍ വകുപ്പുണ്ടെന്നാണ് പാര്‍ട്ടിയിലെ ഒരു വിഭാഗം പറയുന്നത്.
ബിനോയ് കോടിയേരിയെ അറസ്റ്റുചെയ്യാന്‍ ഇന്റര്‍പോളിന്റെ സഹായം തേടുമെന്നും കേസിന്റെ നടപടികള്‍ക്കായി ഭാരത സര്‍ക്കാരിനെ സമീപിക്കുമെന്നും ദുബായ് കമ്പനി വ്യക്തമാക്കിയിട്ടുണ്ട്. ഇന്റര്‍പോള്‍ നോട്ടീസ് പുറപ്പെടുവിച്ചാല്‍ അതേത്തുടര്‍ന്നുണ്ടാകുന്ന പ്രശ്‌നങ്ങള്‍ സി.പി.എമ്മിനെ കൂടുതല്‍ ആശങ്കയിലാക്കും.
കൊല്‍ക്കത്തയില്‍ നടന്ന സി.പി.എം കേന്ദ്രക്കമ്മിറ്റിയില്‍ കോണ്‍ഗ്രസ് ബന്ധം സംബന്ധിച്ച് യെച്ചൂരി കൊണ്ടുവന്ന സമീപന രേഖയെ വോട്ടിനിട്ട് തോല്‍പിച്ചതുമായി ബന്ധപ്പെട്ട വിവാദം സി.പി.എമ്മിനുള്ളിലും മറ്റ് ഇടതുപാര്‍ട്ടികളിലും വലിയ തോതിലുള്ള ചര്‍ച്ചകള്‍ക്ക് വഴിതുറന്നിരിക്കുന്നതിനിടെയാണ് പുതിയ വിവാദം ഉണ്ടായത്. ഹൈദരാബാദ് പാര്‍ട്ടി കോണ്‍ഗ്രസില്‍ സമീപനരേഖ സംബന്ധിച്ച് ചൂടേറിയ വാഗ്വാദങ്ങള്‍ നടക്കും. ഇതിനിടയില്‍ പ്രകാശ് കാരാട്ട് പക്ഷത്തെ ശക്തനായ നേതാവ് കൂടിയായ കോടിയേരിയെ പ്രതികൂട്ടില്‍ നിര്‍ത്താന്‍ യെച്ചൂരിയും ബംഗാള്‍ ഘടകവും ബിനോയിയുടെ തട്ടിപ്പ് എടുത്തുയര്‍ത്താനും ഇടയുണ്ട്.

കോടിയേരി എത്ര പച്ചക്കൊടി കാണിച്ചാലും കെ.എം മാണി എല്‍.ഡി.എഫിലുണ്ടാകില്ലെന്ന് ശശിധരന്‍ പറഞ്ഞു. സി.പി.ഐ കോട്ടയം മണ്ഡലം സമ്മേളനത്തിന്റെ ഉദ്ഘാടനപരിപാടിയില്‍ പ്രസംഗിക്കുകയായിരുന്നു ശശിധരന്‍. മാണിക്കെതിരെ സമരം ചെയ്തവര്‍ ഇപ്പോള്‍ മാണിയെ മഹത്വവല്‍കരിക്കുകയാണെന്നും നിയമസഭയിലെ എം.എല്‍.എമാര്‍ എല്ലാവരും ഇവിടെ ഇല്ലേ എന്നും നോട്ടെണ്ണുന്ന മെഷീന്‍ ഇപ്പോള്‍ എവിടെപ്പോയെന്നും ശശിധരന്‍ സിപിഎമ്മിനെ പരിഹസിച്ചു.

സി.പി.എം കമ്യൂണിസ്റ്റ് പാര്‍ട്ടിയല്ലാതായി മാറിക്കൊണ്ടിരിക്കുകയാണെന്നും സി.പി.എമ്മില്‍നിന്ന് ആളുകള്‍ കൂട്ടത്തോടെ പുറത്തുപോകുന്ന കാഴ്ചയാണ് ഇപ്പോള്‍ കാണുന്നതെന്നും സി.കെ ശശിധരന്‍ തുറന്നടിച്ചു.

മൂന്നാറിലെ ഭൂമി വിഷയത്തില്‍ മന്ത്രി എംഎം മണിക്കെതിരേയും ശശിധരന്‍ വിമര്‍ശനമുന്നയിച്ചു. മൂന്നാറിലെ ഭൂമാഫിയയെ സഹായിക്കുന്ന നിലപാടാണ് മന്ത്രി എം.എം മണിയെപോലുള്ളവര്‍ സ്വീകരിക്കുന്നതെ്ന്നും ശശിധരന്‍ പറഞ്ഞു.

മൂന്നാറിലെ ഭൂമി കൈകാര്യം ചെയ്യുന്നത് എംഎം മണിയാണ്. ഉദ്യോഗസ്ഥരെ മണി ഇടയ്ക്കിടെ വിമര്‍ശിക്കുന്നത് വിദ്യാഭ്യാസമില്ലാത്തതുകൊണ്ടാണ്. പള്ളിക്കൂടത്തില്‍ പോകാത്തവരാണ് ഉദ്യോഗസ്ഥരെ വിമര്‍ശിക്കുന്നത്. പാവങ്ങള്‍ക്ക് ഭൂമിനല്‍കുക എന്ന സര്‍ക്കാര്‍ നിലപാടിന് തടസ്സംനില്‍ക്കുന്നത് ഭൂമാഫിയയെ സംരക്ഷിക്കുന്ന ഇത്തരക്കാരാണെന്നും അദ്ദേഹം ആരോപിച്ചു.

ബി.ജെ.പിയെ ചെറുക്കാന്‍ ദേശീയതലത്തില്‍ കോണ്‍ഗ്രസുമായി രാഷ്ട്രീയ കൂട്ടുകെട്ട് ഉണ്ടാക്കുക എന്ന ആശയത്തെ സി.പി.എം അംഗീകരിക്കുന്നില്ലെന്ന് കോടിയേരി ഫേസ്ബുക്ക് പോസ്റ്റില്‍ പറഞ്ഞു. കഴിഞ്ഞ ദിവസം ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തിലാണ് കോണ്‍ഗ്രസിനോട് അയിത്തമില്ലെന്ന് കാനം വ്യക്തമാക്കിയത്. മാത്രമല്ല, വലിയ പാര്‍ട്ടിയെന്ന് അഹങ്കരിക്കുന്ന സി.പി.എം പതിനൊന്ന് വര്‍ഷം അധികാരമില്ലാതെ വെയിലത്തുനിന്നവരാണെന്നും അദ്ദേഹം പരിഹസിച്ചിരുന്നു. ഇതിനാണ് കോടിയേരി പരോക്ഷമായി മറുപടി നല്‍കിയിരിക്കുന്നത്.

വര്‍ഗീയതക്കെതിരെ വിശാലമായ വേദിയാവാമെന്നും എന്നാല്‍ നയപരമായി യോജിച്ച് മാത്രമേ രാഷ്ട്രീയ സഖ്യം പാടുള്ളുവെന്നുമാണ് കോടിയേരിയുടെ നിലപാട്. നയപരമായ യോജിപ്പ് ഇല്ലെങ്കില്‍ വിപരീത ഫലമുണ്ടാവും. 2004ല്‍ ഇടതുപക്ഷത്തിന്റെ പിന്തുണയോടെ അധികാരത്തിലെത്തിയ യു.പി.എ സര്‍ക്കാരിന് നേതൃത്വം നല്‍കിയ കോണ്‍ഗ്രസ് ഉദാരവല്‍ക്കരണ, സ്വകാര്യവല്‍ക്കരണ നയങ്ങള്‍ക്കും വര്‍ഗീയതക്കുമെതിരായ സഖ്യം വളര്‍ത്താന്‍ തയ്യാറായില്ല. സംഘപരിവാര്‍ ശക്തികളെ ഒറ്റപ്പെടുത്താനും കോണ്‍ഗ്രസ് ഒന്നും ചെയ്തില്ല. അമേരിക്കന്‍ സാമ്രാജ്യത്വവുമായി തന്ത്രപരമായ സഖ്യമുണ്ടാക്കിയപ്പോഴാണ് ഇടതുപക്ഷം അവര്‍ക്കുള്ള പിന്തുണ പിന്‍വലിച്ചത്.

കോണ്‍ഗ്രസുമായി സഖ്യത്തില്‍ ഏര്‍പെട്ട സി.പി.ഐ ഭതീന്ദ കോണ്‍ഗ്രസില്‍ വെച്ച് സഖ്യം തെറ്റെന്ന് വിലയിരുത്തി, ഇടതുമുന്നണിയുടെ രൂപീകരണത്തില്‍ പങ്കാളിയായതാണ്. വര്‍ഗീയതക്കും കോര്‍പറേറ്റ് വല്‍കരണത്തിനുമെതിരായ ശക്തമായ ജനകീയ പോരാട്ടം നടത്തിയാണ് രാഷ്ട്രീയ ബദല്‍ യാഥാര്‍ത്ഥ്യമാക്കേണ്ടതെന്നും കോടിയേരി പറഞ്ഞു.
കഴിഞ്ഞ ദിവസം കാനം പറഞ്ഞിനെ ഖണ്ഡിക്കാനാണ് തന്റെ ഫേസ്ബുക്ക് പോസ്റ്റിലൂടെ കോടിയേരി ശ്രമിച്ചത്. ബി.ജെ.പിയുമായും ആര്‍.എസ്.എസുമായും ഒരിക്കലും കൂട്ടുകെട്ട് ഉണ്ടാക്കില്ലെന്നും എന്നാല്‍ കോണ്‍ഗ്രസുമായി സഹകരിക്കേണ്ട സാഹചര്യമുണ്ടായാല്‍ അതിന് തയാറാകുമെന്നും സി.പി.ഐ ദേശീയതലത്തില്‍ തന്നെ തീരുമാനമെടുത്തിട്ടുണ്ട്. കേരളത്തിലും സി.പി.ഐക്ക് കോണ്‍ഗ്രസിനോടും യു.ഡി.എഫിനും വലിയ അകല്‍ച്ചയില്ല. എന്നാല്‍ രാജ്യം കടുത്ത പ്രതിസന്ധിയിലേക്ക് നീങ്ങുന്ന ഘട്ടത്തില്‍ കോണ്‍ഗ്രസുമായി സഹകരിക്കില്ലെന്ന് കോടിയേരി ആവര്‍ത്തിക്കുന്നത് ഇടതുപാര്‍ട്ടികള്‍ക്കിടയില്‍ തന്നെ ആശയക്കുഴപ്പമുണ്ടാക്കുന്നതാണ്. കോണ്‍ഗ്രസുമായി സഹകരിക്കാതെ എങ്ങനെ ബി.ജെ.പിയെയും സംഘപരിവാര്‍ രാഷ്ട്രീയത്തെയും പരാജയപ്പെടുത്തും എന്ന ചോദ്യം സി.പി.എം പോളിറ്റ്ബ്യൂറോയില്‍ പോലും ചര്‍ച്ച ചെയ്തിരുന്നു. ഇതിനിടെയാണ് കാനത്തിന് മറുപടിയുമായി കോടിയേരി എത്തിയത്.