സാധാരണ ഗതിയില്‍ പോക്‌സോ കേസുകളില്‍ ജാമ്യം ലഭിക്കാന്‍ ചുരങ്ങിയത് 90 ദിവസമെങ്കിലുമെടുക്കും. അന്വേഷണം പൂര്‍ത്തീകരിക്കാന്‍ അത്ര സമയം എടുക്കുമെന്നുള്ളതാണ് വസ്തുത. എന്നാല്‍ പാര്‍ട്ടി നേതാവെന്ന നിലയില്‍ പൊലീസും നേതാക്കളും കൂടുതല്‍ ശുഷ്‌കാന്തിയും പരിഗണന നല്‍കി എന്നതാണ് ഈ കേസില്‍ സംഭവിച്ചത്. രണ്ടു കേസുകളുടെ അന്വേഷണം പൂര്‍ത്തിയാക്കി 20 ദിവസം കൊണ്ടു തന്നെ തെളിവുകള്‍ ശേഖരിച്ചു സാക്ഷി മൊഴികള്‍ രേഖപ്പെടുത്തി റിപ്പോര്‍ട്ട് നല്‍കി എന്ന അത്ഭുതമാണ് ഈ കേസില്‍ സംഭവിച്ചിട്ടുള്ളത്. ഇത്രയധികം ക്രൂരകൃത്യങ്ങള്‍ വിദ്യാര്‍ഥികളോട് ഒരധ്യാപകന്‍ ചെയ്തിട്ടും അതിനെ അനുകൂലിക്കുന്ന പാര്‍ട്ടി നേതാക്കളെ സ്‌കൂളിലെ പൂര്‍വ വിദ്യാര്‍ഥികള്‍ തന്നെ സോഷ്യല്‍ മീഡിയകളില്‍ പങ്കുവെച്ചിരുന്നു.

അധ്യാപകനെതിരെ ഗുരുതര ആരോപണങ്ങളുണ്ടായിട്ടും തുടക്കത്തില്‍ തന്നെ പൊലീസ് വേണ്ടത്ര ഗൗരവത്തിലെടുത്തിരുന്നില്ല. പൂര്‍വ വിദ്യാര്‍ഥികളടക്കം വാര്‍ത്ത മാധ്യമങ്ങള്‍ക്ക് മുമ്പിലെത്തിയതോടെയാണ് പൊലീസ് കേസെടുക്കാന്‍ പോലും തയാറായത്. ആദ്യഘട്ടത്തില്‍ 60 വിദ്യാര്‍ഥികളാണ് പരാതി നല്‍കിയിരുന്നത്. എന്നാല്‍ വെറും രണ്ടു കുട്ടികളുടെ കേസ് മാത്രമാണ് അന്ന് എടുത്തിരുന്നത്. തുടര്‍ന്ന് ഇയാളെ അറസ്റ്റ് ചെയ്യണമെന്നാവശ്യപ്പെട്ട യുവജന സംഘടനകളെടക്കം രംഗത്ത് വന്നതോടെയാണ് വയനാടിലെ അറസ്റ്റ് നാടകം അരങ്ങേറിയത്. കുടുതല്‍ വിദ്യാര്‍ഥികള്‍ പരാതി നല്‍കിയിട്ടും അത് മുഖവിലക്കെടുക്കാതെ വെറും രണ്ടു കേസിലായിരുന്നു പൊലീസ് കേസ്. 38 വര്‍ഷം മലപ്പുറം നഗരത്തിലെ സ്‌കൂളില്‍ അധ്യാപകനായിരുന്ന പ്രതിക്കെതിരെ കൂടുതല്‍ വിദ്യാര്‍ഥികള്‍ പരാതിയുമായി എത്തുമെന്ന് സൂചനയുണ്ട്.

മലപ്പുറം ഡി.പി.ഒ റോഡില്‍ രോഹിണിയില്‍ കിഴക്കെവെള്ളാട്ട് ശശികുമാര്‍ (56)നാണ് ജഡ്ജി കെ.ജെ ആര്‍ബി ഉപാധികളോടെ ജാമ്യം അനുവദിച്ചത്. 50000 രൂപയുടെ രണ്ടാള്‍ ജാമ്യം, എല്ലാ ശനി, തിങ്കള്‍ ദിവസങ്ങളിലും രാവിലെ 9 നും 11 നും ഇടയില്‍ അന്വേഷണ ഉദ്യോഗസ്ഥനു മുന്നില്‍ ഹാജരാകണം. ഇരകളെ സ്വാധീനിക്കാനോ ഭീഷണിപ്പെടുത്താനോ പാടില്ല, സമാനമായ കേസുകളില്‍ ഉള്‍പ്പെടരുത്, അന്വേഷണവുമായി സഹകരിക്കണം എന്നീ ഉപാധികളിലാണ് ജാമ്യം. അഞ്ചു ദിവസത്തിനുള്ളില്‍ പാസ്‌പോര്‍ട്ട് കോടതിയില്‍ സറണ്ടര്‍ ചെയ്യണമെന്ന് ഉപാധി വെച്ചെങ്കിലും പ്രതിക്ക് പാസ്‌പോര്‍ട്ട് ഇല്ലെന്ന് പ്രതിയുെട അഭിഭാഷകന്‍ കോടതിയെ അറിയിച്ചു.

രണ്ടു പോക്‌സോ കേസുകളിലാണ് പ്രതിക്ക് ഇപ്പോള്‍ കോടതി ജാമ്യം നല്‍കിയത്. 2012 ജൂണ്‍ മുതല്‍ 2013 മാര്‍ച്ച് വരെയുള്ള കാലയളവില്‍ ഏഴാം ക്ലാസ് വിദ്യാര്‍ഥിനിയെ പലതവണ ക്ലാസ് മുറിയില്‍ വെച്ച് ലൈംഗികാതിക്രമത്തിന് വിധേയയാക്കിയെന്നതാണ് ഒരു കേസ്. ഈ കേസില്‍ 2022 മെയ് 13ന് പൊലീസ് അറസ്റ്റ് ചെയ്ത പ്രതി മഞ്ചേരി സബ് ജയിലില്‍ കഴിഞ്ഞു വരികയായിരുന്നു. 2013 ജൂണ്‍ മുതല്‍ 2014 മാര്‍ച്ച് 31 വരെ അഞ്ചാം ക്ലാസ് വിദ്യാര്‍ഥിനിയെ പീഡിപ്പിച്ചുവെന്നതാണ് രണ്ടാമത്തെ കേസ്. ഈ കേസില്‍ മെയ് 24ന് പ്രതിയെ ജയിലില്‍ വെച്ച് പൊലീസ് ഫോര്‍മല്‍ അറസ്റ്റ് ചെയ്യുകയായിരുന്നു.

38 വര്‍ഷം അധ്യാപകനായിരുന്ന പ്രതിക്കെതിരെ കൂടുതല്‍ വിദ്യാര്‍ഥികള്‍ പരാതിയുമായി എത്തുമെന്ന് സൂചനയുണ്ട്. പ്രതിക്കെതിരെ കൂടുതല്‍ കേസുകളുണ്ടെന്നും ജാമ്യം അനുവദിക്കരുതെന്നും പ്രാസിക്യൂഷന്‍ കേടതിയില്‍ വാദിച്ചിരുന്നു. എന്നാല്‍ രണ്ടു കേസുകളിലും അന്വേഷണം പൂര്‍ത്തിയായതായും, തെളിവുകള്‍ ശേഖരിച്ചതായും, സാക്ഷിമൊഴികള്‍ രേഖപ്പെടുത്തിയതായും വിലയിരുത്തിയാണ് കോടതി ജാമ്യം അനുവദിച്ചത്. അതേ സമയം പ്രതിക്ക് വേഗത്തില്‍ ജാമ്യം ലഭിക്കുവാന്‍ പൊലീസ് വഴിവിട്ടു സൗകര്യം ചെയ്തു കൊടുത്തുവെന്ന ആരോപണം ഉയരുന്നുണ്ട്. സമാന കേസില്‍ ഉള്‍പ്പെടരുതെന്ന ജാമ്യ വ്യവസ്ഥ നിലവിലുള്ളതിനാല്‍ പ്രതിക്ക് അതൊരു കുരുക്കാവും. കൂടുതല്‍ പരാതികള്‍ വരാനിരിക്കെയാണ് ജാമ്യം ലഭിച്ചത്. നാല് കേസുകള്‍ കൂടി പൊലീസ് എടത്തിട്ടുണ്ട്.