ലോക ഫുട്‌ബോളര്‍ പട്ടം അഞ്ചാംവട്ടം സ്വന്തമാക്കിയ പോര്‍ച്ചുഗീസ് താരം ക്രിസ്റ്റിയാനോ റെണാള്‍ഡോ ഏഴു കളികളില്‍ നിന്നായി ഒരു ഗോള്‍ മാത്രമാണ് റയല്‍ മാഡ്രിഡിനായി നേടിയത്. കഴിഞ്ഞ ദിവസം ലണ്ടനില്‍ മാധ്യമ പ്രവര്‍ത്തകന്‍ ഗോള്‍ ക്ഷാമത്തെ കുറിച്ചു ചോദിച്ചപ്പോള്‍ ഷുഭിതനായ റൊണാള്‍ഡോ എന്റെ മികവിനെ പറ്റിയും കണക്കുകളെപ്പറ്റിയും നിങ്ങളോട് പറയാന്‍ ഞാനില്ല. നിങ്ങള്‍ക്ക് ഗൂഗിളില്‍ തിരഞ്ഞാല്‍ എല്ലാം മനസ്സിലാകും എന്നാണ് പറഞ്ഞത്. കഴിഞ്ഞവാരം ലാസ്പല്‍മാസിനെതിരെ ലീഗില്‍ റയല്‍ ജയിച്ചപ്പോള്‍ ഗോള്‍ നേടാനാവത്തതില്‍ നിരാശപൂണ്ട റൊണാള്‍ഡോ ആഘോഷ പരിപാടിയില്‍ പങ്കെടുത്തിരുന്നില്ല.

2015-16 സീസണില്‍ മെസ്സിയേയും റൊണാള്‍ഡോയേയും പിന്നിലാക്കി ഗോള്‍ഡന്‍ ബൂട്ട് സ്വന്തം മാക്കിയ ബാര്‍സിലോണയുടെ ഉറുഗ്വെയ്ന്‍ താരം ലൂയിസ് സുവാരസാണ് ഗോള്‍ ക്ഷാമം നേരിടുന്ന മറ്റൊരു പ്രമുഖന്‍. സെവിയ്യക്കെതിരായ മത്സരത്തോടെ ലീഗില്‍ സുവാരസ് ഗോള്‍ നേടാത്ത അഞ്ചു മത്സരങ്ങള്‍ പൂര്‍ത്തിയായി. ലീഗില്‍ ഇതുവരെ മൂന്നു ഗോളാണ് സുവാരസിന്റെ സമ്പാദ്യം. 2015-16 സീസണില്‍ നാല്‍പ്പതും, 2016-17 സീസണില്‍ ഇരുപത്തിയെമ്പത് ഗോളുമായി തിളങ്ങിയ താരമാണ് സുവരാസ്.

അത്‌ലറ്റികോയുടെ ഗോള്‍ മെഷീനും കഴിഞ്ഞ സീസണില്‍ ബാലന്‍ ഡി ഓര്‍ പുരസ്‌കാരത്തില്‍ മൂന്നാമനുമായ ഫ്രഞ്ച് താരം ആന്റണിയോ ഗ്രീസ്മാനും നടപ്പു സീസണില്‍ ഗോളിനായി ഗ്രൗണ്ടില്‍ നെട്ടോട്ടം ഓടുകയാണ്. ഒമ്പതികളിയില്‍ നിന്നായി വെറും രണ്ടു ഗോളാണ് ഗ്രീസ്മാന്‍ നേടിയത്. ഫോം നഷ്ടമായ ഗ്രീസ്മാനെ കഴിഞ്ഞ കളിയില്‍ പരിശീലകന്‍ സിമോണി സബ്‌സ്റ്റിറ്റിയൂട്ട്‌
ചെയതിരുന്നു. കഴിഞ്ഞ രണ്ടു സീസണുകളിലായി നാല്‍പ്പതിലധികം ലീഗ് ഗോളുകള്‍ ഗ്രീസ് നേടിയിട്ടുണ്ട്. വരും മത്സരങ്ങളില്‍ കൂടുതല്‍ ഗോളുമായി ത്രീമൂര്‍ത്തികള്‍ തിരിച്ചെത്തുമെന്ന പ്രതീക്ഷയിലാണ് ആരാധകര്‍.

പ്രമുഖര്‍ ഗോളിനായി വിഷമിക്കുമ്പോള്‍ ബാര്‍സിലോണയുടെ അര്‍ജന്റീനന്‍ താരം 12 ഗോളുമായി തേരോട്ടം തുടരുകയാണ്. വലന്‍സിയുടെ ഇറ്റലി താരം സിമോണി സാസയാണ് (ഒമ്പത് ഗോള്‍) സ്വര്‍ണ ബൂട്ടിനായുള്ള പോരാട്ടത്തില്‍ രണ്ടാമത്.

2004-ല്‍ എസ്പാനോളിനെതിരെ 82-ാം മിനുട്ടില്‍ പകരക്കാരനായി ഇറങ്ങിയായിരുന്നു ബാര്‍സലോണയില്‍ മെസ്സിയുടെ അരങ്ങേറ്റം. പതിമൂന്ന് വര്‍ഷമായി ബാര്‍സയില്‍ തുടരുന്ന മെസ്സി 599 മത്സരങ്ങളില്‍ നിന്നായി 523 ഗോളുകള്‍ ക്ലബിനായി നേടിയിട്ടുണ്ട്. ബാര്‍സക്കൊപ്പം 30 കിരീട നേട്ടങ്ങളില്‍ പങ്കാളിയായ മെസ്സി അഞ്ചു തവണ ലോക ഫുട്‌ബോളര്‍ പട്ടത്തിന് അര്‍ഹനായിട്ടുണ്ട്.
നടപ്പു സീസണില്‍ ലാലീഗയില്‍ ഗോള്‍വേട്ട തുടരുന്ന മെസ്സി പത്തു കളികളില്‍ നിന്നായി 12 തവണ ബാര്‍സക്കായി വലകുലുക്കി. തന്റെ അറുന്നൂറാം മത്സരത്തിലും ഗോള്‍വേട്ട തുടരുമെന്ന പ്രതീക്ഷയിലാണ് മെസ്സി ആരാധകര്‍. കഴിഞ്ഞ വര്‍ഷം ലാലീഗ കിരീടം ബന്ധവൈരികളായ റയല്‍ മാഡ്രിഡിന് അടിയറുവെച്ച ബാര്‍സ, പരിശീലകന്‍ എര്‍ണസ്റ്റോ വാല്‍വെര്‍ടെ നേതൃത്വത്തില്‍ തിരിച്ചു പിടിക്കാനുള്ള ശ്രമത്തിലാണ് മെസ്സിയും സംഘവും. പത്തു മത്സരങ്ങള്‍ പൂര്‍ത്തിയാക്കിയ ലീഗില്‍ ഒന്‍പതു ജയവും ഒരു സമനിലയുമായി 28 പോയിന്റോടെ നിലവില്‍ ഒന്നാമതാണ് ബാര്‍സ . മൂന്നാമതുള്ള റയലുമായി എട്ടു പോയിന്റിന്റെ വ്യക്തമായ ലീഡാണ്ടാണുള്ളത്.