അഷ്‌റഫ് മുസ്‌ലിം ലീഗ് പ്രവര്‍ത്തകനും മൊയ്ദീന്‍ കുട്ടി സുന്നി പ്രവര്‍ത്തകനുമാണ്. പോപുലര്‍ ഫ്രണ്ടുമായി ബന്ധമില്ലാത്ത തങ്ങളുടെ സ്വത്തുക്കള്‍ ജപ്തി ചെയ്തതിനെതിരെ ഇരുവരും പരാതി നല്‍കിയിരുന്നു. ആഭ്യന്തര വകുപ്പ് നല്‍കിയ പട്ടികയില്‍ ഉള്‍പ്പെട്ടത് കൊണ്ടാണ് നടപടി എന്നാണ് പറഞ്ഞിരുന്നത്. പരാതിയെ തുടര്‍ന്ന് നടത്തിയ പുന പരിശോധനയില്‍ ആണ് ഇവര്‍ നിരപരാധികള്‍ ആണെന്ന് വ്യക്തമായത്.

ഇതേ തുടര്‍ന്ന് കളക്ടറുടെ നിര്‍ദേശപ്രകാരം തഹസില്‍ദാര്‍ ജപ്തി നടപടി റദ്ദാക്കി ഉത്തരവിറക്കി. ഇന്ന് വില്ലേജ് ഓഫീസര്‍മാര്‍ ഇരുവര്‍ക്കും ഉത്തരവ് കൈമാറും. മാറാക്കാര, പെരിന്തല്‍മണ്ണ എന്നിവിടങ്ങളിലും ഇത്തരത്തില്‍ നടന്ന ജപ്തി നടപടി ഒഴിവാക്കിയിട്ടുണ്ട്.

ലീഗ് നേതാക്കളുടെ സ്വത്ത് കണ്ടുകെട്ടിയ നടപടിക്കെതിരെ പി.കെ കുഞ്ഞാലിക്കുട്ടിയും പി.എം.എ സലാമും നേരത്തെ രംഗത്തു വന്നിരുന്നു. കട്ടവനെ കിട്ടിയില്ലെങ്കില്‍ കിട്ടിയവനെ കള്ളനാക്കുന്ന രീതിയാണ് പൊലീസ് സ്വീകരിക്കുന്നതെന്ന് കുഞ്ഞാലിക്കുട്ടില പറഞ്ഞു.

പോപുലര്‍ ഫ്രണ്ട് മിന്നല്‍ ഹര്‍ത്താല്‍ ജനാധിപത്യവിരുദ്ധവും നിയമവാഴ്ചയോടുള്ള വെല്ലുവിളിയാണെന്നതില്‍ ആര്‍ക്കും തര്‍ക്കമില്ല. എന്നാല്‍ അതിന്റെ പേരില്‍ ഏതൊരാളുടെ മേലിലും കുതിരകയറാമെന്ന പൊലീസ് നയം വെച്ചുപൊറിപ്പിക്കാനാവില്ല. നിയമം നടപ്പാക്കാന്‍ മാത്രമാണ് കോടതി പറഞ്ഞിട്ടുള്ളത്, അല്ലാതെ അധികാരം ഉപയോഗിച്ച് നിരപരാധികളുടെമേല്‍ അക്രമം കാണിക്കരുതെന്ന് കുഞ്ഞാലിക്കുട്ടി പറഞ്ഞു.