law academy – Chandrika Daily

ലക്ഷ്മി നായര്‍ക്കെതിരായ പരാതി പിന്‍വലിച്ചു; യൂണിറ്റ് സെക്രട്ടറിയെ എ.ഐ.എസ്.എഫ് പുറത്താക്കി

chandrika — Sun, 28 May 2017 08:41:43 +0000

തിരുവനന്തപുരം: ലോ അകാദമി എഐഎസ്എഫ് യൂണിറ്റ് സെക്രട്ടറി വി.ജെ വിവേകിനെ സംഘടനയില്‍ നിന്ന് പുറത്താക്കി. ലോ അകാദമി മുന്‍ പ്രിന്‍സിപ്പല്‍ ലക്ഷ്മി നായര്‍ ജാതിപ്പേര് വിളിച്ച് അധ്‌ക്ഷേപിച്ചെന്ന പരാതി സംഘടനയോട് ആലോചിക്കാതെ പിന്‍വലിക്കുകയും പാര്‍ട്ടിക്ക് അപമാനമുണ്ടാക്കുന്ന തരത്തില്‍ പ്രസ്താവന നടത്തിയതിനുമാണ് നടപടി.

കേസ് പിന്‍വലിക്കുന്നതായി സിപിഎം സംസ്ഥാന സെക്രട്ടറി കാനം രാജേന്ദ്രനെ അറിയിച്ചിരുന്നതായി വിവേക് പറഞ്ഞിരുന്നു. പിന്നീട് ഇത് തിരുത്തിയ വിവേക് തനിക്ക് തെറ്റു പറ്റിയതാണെന്നും സംഘടനയുമായി ബന്ധപ്പെട്ട എല്ലാ സ്ഥാനങ്ങളില്‍ നിന്നും രാജി വെക്കുന്നതായും വ്യക്തമാക്കിയിരുന്നു.

എന്നാല്‍ പാര്‍ട്ടിയെ അപകീര്‍ത്തിപ്പെടുത്തിയെന്നു കാണിച്ച് 24 മണിക്കൂറിനുള്ളില്‍ വിശദീകരണം നല്‍കാന്‍ സിപിഐ നേതൃത്വം നിര്‍ദേശിച്ചിരുന്നു. വിശദീകരണം നല്‍കിയില്ലെങ്കിലോ തൃപ്തികരമല്ലെങ്കിലോ നടപടിയെടുക്കാനായിരുന്നു തീരുമാനം. വിശദീകരണം തൃപ്തികരമല്ലെന്ന് കാട്ടിയാണ് പുറത്താക്കല്‍ നടപടി.

ലോ അക്കാദമിയുടെ പ്രവേശന കവാടം റവന്യൂ വകുപ്പ് പൊളിച്ചുനീക്കി

chandrika — Sun, 12 Feb 2017 07:38:50 +0000

തിരുവനന്തപുരം: തിരുവനന്തപുരത്തെ ലോ അക്കാദമിയുടെ പ്രധാന കവാടത്തിന്റെ തൂണുകള്‍ റവന്യൂ വകുപ്പ് അധികൃതര്‍ പൊളിച്ചു നീക്കി. സര്‍ക്കാറിന്റെ പുറമ്പോക്ക് ഭൂമിയിലാണ് അക്കാദമിയുടെ പ്രധാന കവാടമെന്ന കണ്ടെത്തലിനെ തുടര്‍ന്നാണ് നടപടി. റവന്യൂ പ്രിന്‍സിപ്പല്‍ സെക്രട്ടറി പി.എച്ച് കുര്യന്റെ റിപ്പോര്‍ട്ടിന്റെ അടിസ്ഥാനത്തില്‍ അക്കാദമിക്ക് നോട്ടീസ് നല്‍കിയിരുന്നെങ്കിലും ഗെയിറ്റും ബോര്‍ഡും മാത്രമാണ് മാനേജ്‌മെന്റ് പൊളിച്ചു നീക്കിയത്. തുടര്‍ന്നാണ് റവന്യൂ വിഭാഗം നേരിട്ടെത്തി കവാടം പൂര്‍ണമായും പൊളിച്ചു നീക്കിയത്. ഇതിന്റെ തുക മാനേജ്‌മെന്റില്‍ നിന്ന് ഈടാക്കുമെന്നാണ് സൂചന.

ഭൂമികയ്യേറ്റം: ലോ അക്കാദമിയുടെ പ്രധാന കവാടം പൊളിച്ചുനീക്കി

chandrika — Sat, 11 Feb 2017 07:22:36 +0000

തിരുവനന്തപുരം: ഭൂമികയ്യേറ്റവുമായി ബന്ധപ്പെട്ട് തിരുവനന്തപുരം ലോ അക്കാദമിയുടെ പ്രധാന കവാടം പൊളിച്ചുനീക്കി. ജല അതോറിറ്റിയുടെ ഭൂമിയിലും സര്‍ക്കാര്‍ പുറമ്പോക്കിലുമായി അക്കാദമി നിര്‍മിച്ച പ്രധാന കവാടവും മതിലും 24 മണിക്കൂറിനുള്ളില്‍ പൊളിച്ചുമാറ്റാന്‍ റവന്യൂ വകുപ്പു കോളജ് മാനേജ്‌മെന്റിന് നോട്ടീസ് നല്‍കിയിരുന്നു. റവന്യൂ ഉദ്യോഗസ്ഥരുടെ നേതൃത്വത്തില്‍ മാനേജ്‌മെന്റു തന്നെയാണ് കവാടം പൊളിച്ചു നീക്കിയത്. ലോ അക്കാദമി ഭൂമിയിലെ ഹോട്ടലിലും ബാങ്കിലും തുടര്‍ നടപടി സ്വീകരിക്കുമെന്നാണ് വിവരം.

ലോ അക്കാദമി സമരം ഒത്തുതീര്‍പ്പായി; പുതിയ പ്രിന്‍സിപ്പലിനെ നിയമിക്കും

chandrika — Wed, 08 Feb 2017 08:07:41 +0000

തിരുവനന്തപുരം: ലോ അക്കാദമി സമരം ഒത്തുതീര്‍പ്പായി. വിദ്യാഭ്യാസമന്ത്രിയുടെ അധ്യക്ഷതയില്‍ മാനേജ്‌മെന്റും വിദ്യാര്‍ത്ഥി സംഘടനകളും നടത്തിയ ചര്‍ച്ചയിലാണ് സമരം ഒത്തുതീര്‍പ്പിലെത്തിയത്.
യൂണിവേഴ്‌സിറ്റി അനുശാസിക്കുന്ന നിയമങ്ങളും ചട്ടങ്ങളുമനുസരിച്ച് പുതിയ പ്രിന്‍സിപ്പലിനെ നിയമിക്കുമെന്ന ഉറപ്പിനെത്തുടര്‍ന്നാണ് സമരം അവസാനിപ്പിക്കാന്‍ ധാരണയാത്. കാലാവധിയില്ലാതെയായിരിക്കും പുതിയ പ്രിന്‍സിപ്പലിനെ നിയമിക്കുക. പ്രിന്‍സിപ്പലിന് മാറ്റുകയോ ചട്ടം ലംഘിക്കുകയോ ചെയ്യുന്നപക്ഷം സര്‍ക്കാര്‍ ഇടപെടുമെന്ന് വിദ്യാഭ്യാസമന്ത്രി വിദ്യാര്‍ത്ഥികള്‍ക്ക് ഉറപ്പു നല്‍കി.

ലോ അക്കാദമി പ്രിന്‍സിപ്പല്‍ തസ്തികയിലേക്ക് പത്രപരസ്യം: കുതന്ത്രമെന്ന് കെ.മുരളീധരന്‍

chandrika — Wed, 08 Feb 2017 05:51:34 +0000

തിരുവനന്തപുരം: പ്രിന്‍സിപ്പല്‍ തസ്തികയിലേക്ക് ആളെ ആവശ്യമുണ്ടെന്നറിയിച്ച് ലോ അക്കാദമി നല്‍കിയ പത്രപരസ്യം മാനേജ്‌മെന്റിന്റെ കുതന്ത്രമാണെന്ന് കോണ്‍ഗ്രസ് നേതാവ് കെ.മുരളീധരന്‍. വ്യക്തമായ വിവരങ്ങള്‍ നല്‍കാതെയാണ് പരസ്യം നല്‍കിയിരിക്കുന്നത്. ജനങ്ങളെ കബളിപ്പിക്കുന്ന തരത്തിലാണ് പരസ്യമുള്ളത്. എത്ര കാലത്തേക്കാണ് നിയമനമെന്നോ മറ്റു വിവരങ്ങളോ പരസ്യത്തിലില്ല. പ്രിന്‍സിപ്പലിനെ മാറ്റുന്നതാണ് പ്രധാന കാര്യം. ഭൂമി ഏറ്റെടുക്കലിനേക്കാണ് ലക്ഷ്മി നായരുടെ രാജിയാണ് വിദ്യാര്‍ത്ഥികള്‍ ആവശ്യപ്പെടുന്നതെന്നും അദ്ദേഹം പറഞ്ഞു. ഇന്നു നടക്കുന്ന മന്ത്രിസഭായോഗത്തില്‍ ഒരു തീരുമാനവുമുണ്ടാവാനിടയില്ലെന്നും മുരളീധരന്‍ പറഞ്ഞു. ഇന്നു പുറത്തിറങ്ങിയ പത്രങ്ങളിലാണ് പുതിയ പ്രിന്‍സിപ്പലിനെ തേടി ലോ അക്കാദമി മാനേജ്‌മെന്റ് പരസ്യം നല്‍കിയിരുന്നത്. എന്നാല്‍ ഇതില്‍ പ്രിന്‍സിപ്പലിന്റെ കാലാവധിയെക്കുറിച്ചോ സ്ഥിനിയമനമാണോ എന്നതു സംബന്ധിച്ചും പരസ്യത്തില്‍ വ്യക്തമായിരുന്നില്ല.

ലോ അക്കാദമി സമരം 29-ാം ദിവസത്തിലേക്ക്; മുഖ്യമന്ത്രിക്ക് പ്രതിപക്ഷത്തിന്റെ നിവേദനം

chandrika — Wed, 08 Feb 2017 04:40:33 +0000

തിരുവനന്തപുരം: തിരുവനന്തപുരം ലോ അക്കാദമിയിലെ വിദ്യാര്‍ത്ഥി സമരം ഇന്ന് 29-ാം ദിവസത്തേക്ക് കടന്നു. സമരം പരിഹരിക്കുന്നതിന് അടിയന്തരമായി ഇടപെടണമെന്നാവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല നല്‍കിയ നിവേദനം ഗവര്‍ണര്‍ പി.സദാശിവം മുഖ്യമന്ത്രി പിണറായി വിജയന് കൈമാറി. ഇന്നു ചേരുന്ന മന്ത്രിസഭായോഗത്തില്‍ വിഷയം ചര്‍ച്ച ചെയ്‌തേക്കുമെന്നാണ് വിവരം. ഇന്നത്തെ യോഗത്തില്‍ തീരുമാനമായില്ലെങ്കില്‍ സമരം കൂടുതല്‍ ശക്തമാക്കുമെന്ന് സംയുക്ത വിദ്യാര്‍ത്ഥി യൂണിയന്‍ മുന്നറിയിപ്പു നല്‍കി.

അതേസമയം ലോ അക്കാദമിയുടെ കൈവശമിരിക്കുന്ന ഭൂമിയെക്കുറിച്ച് അന്വേഷിച്ച റവന്യു സെക്രട്ടറി ഇന്ന് റവന്യൂ മന്ത്രിക്ക് റിപ്പോര്‍ട്ട് നല്‍കിയേക്കും. ഇന്നലെ ചില വിദ്യാര്‍ത്ഥികള്‍ ലോ അക്കാദമിക്കു മുന്നില്‍ ആത്മഹ്യാഭീഷണി മുഴക്കിയതിനെത്തുടര്‍ന്ന് സമരം സംഘര്‍ഷത്തിലേക്ക് നീങ്ങി. ആത്മഹത്യ ചെയ്യുമെന്നറിയിച്ച് മരത്തില്‍ കയറിയ വിദ്യാര്‍ത്ഥിയെ പൊലീസും അഗ്നിശമനസേനയും ചേര്‍ന്നാണ് താഴെയിറക്കിയത്.

ലോ അക്കാദമിക്ക് അഫിലിയേഷന്‍ ഇല്ലെന്ന് വെളിപ്പെടുത്തല്‍

chandrika — Sun, 29 Jan 2017 09:55:35 +0000

തിരുവനന്തപുരം: ലക്ഷ്മി നായര്‍ പ്രിന്‍സിപ്പലായ ലോ അക്കാദമിക്ക് അഫിലിയേഷന്‍ ഇല്ലെന്ന് വെളിപ്പെടുത്തല്‍. അഫിലിയേഷന്‍ പ്രശ്‌നത്തില്‍ അക്കാദമിക്കെതിരെ കേസ് 35 വര്‍ഷം മുമ്പ് സുപ്രീംകോടതിയെ സമീപിച്ച അഭിഭാഷകന്‍ ഡോ.വിന്‍സന്റ് പാനിക്കുളങ്ങരയാണ് ഇതുസംബന്ധിച്ച വെളിപ്പെടുത്തലുമായി രംഗത്തുവന്നത്. ലോ അക്കാദമി ഇതുവരെ അഫിലിയേഷനു വേണ്ടി അപേക്ഷിച്ചിട്ടില്ലെന്നു അദ്ദേഹം സ്വകാര്യ ചാനലിനോട് പറഞ്ഞു.
കേസിനു ശേഷവും അഫിലിയേഷനുവേണ്ടി അപേക്ഷിക്കാന്‍ അക്കാദമി തയാറായില്ല എന്നാണ് വിന്‍സന്റ് ആരോപിക്കുന്നത്.

ലക്ഷ്മി നായരുടെ പിതാവ് നാരായണന്‍ നായരുടെ സര്‍വകലാശാല സിന്‍ഡിക്കേറ്റിലെ അംഗത്വം സംബന്ധിച്ച് വിവാദമായിരുന്നു. അഫിലിയേഷന്‍ ഇല്ലാത്ത ലോ അക്കാദമിയിലെ പ്രിന്‍സിപ്പലിന് സിന്‍ഡിക്കേറ്റില്‍ ഇരിക്കാന്‍ അര്‍ഹത ഇല്ലെന്ന വാദം ഹൈക്കോടതി തള്ളിയിരുന്നു. എന്നാല്‍ സുപ്രീംകോടതിയില്‍ സമര്‍പ്പിച്ച അപ്പീല്‍ ഹര്‍ജിയില്‍ നാരായണന്‍നായര്‍ക്കെതിരെയായിരുന്നു വിധി.