കോടതി ഉത്തരവുണ്ടായിട്ടും മൃതദേഹം ദഹിപ്പിച്ചതില്‍ സംശയമുണ്ട്. സംസ്‌കാര ചടങ്ങുകള്‍ സംസ്ഥാന സര്‍ക്കാര്‍ ഹൈജാക്ക് ചെയ്യുകയായിരുന്നു. ഡി.വൈ.എസ്.പിയും ഐ.ജിയും മൃതദേഹം സംസ്‌കരിക്കുന്ന സ്ഥലത്ത് എത്തിയതിലും സംശയമുണ്ട്. മൃതദേഹം എങ്ങനെയാണ് ദഹിപ്പിക്കുന്നത് എന്നറിയാന്‍ അവര്‍ക്ക് ആകാംക്ഷയുണ്ടെന്ന് തോന്നിയതായും ആന്‍ഡ്രൂ ആരോപിച്ചു.

രാജ്യം വിടാന്‍ തനിക്ക് മേല്‍ സമ്മര്‍ദ്ദമുണ്ടായെന്നും കൊലപാതകം നടന്നതിന് ശേഷം നടന്നതെല്ലാം ടൂറിസം വകുപ്പ് ആസൂത്രണം ചെയ്തതാണെന്നും ആന്‍ഡ്രൂ ആരോപിച്ചു. പൊലീസ് കണ്ടെത്തിയ മൃതദേഹത്തിന് 20,25 ദിവസത്തെ പഴക്കമുണ്ടെന്നാണ് പോസ്റ്റ്‌മോര്‍ട്ടം റിപ്പോര്‍ട്ടില്‍ പറയുന്നത്. അങ്ങനെയാണെങ്കില്‍ അവളെ ആരെങ്കിലും രണ്ടാഴ്ചയില്‍ കൂടുതല്‍ തടവില്‍ പാര്‍പ്പിച്ചിരിക്കണം. പ്രതികളുടെ മൊഴി ഇതില്‍ നിന്നും വിരുദ്ധമാണെന്നും ആഡ്രൂ പറഞ്ഞു.

വിദേശ വനിതയെ അവസാനമായി കണ്ടിടത്ത് നിന്നും മൂന്ന് കിലോമീറ്റര്‍ അകലെ നിന്നാണ് അവരുടെ മൃതദേഹം കണ്ടെത്തിയത്. എന്നിട്ടും പൊലീസിന് അവളെ കണ്ടെത്താന്‍ ഇത്രയും സമയം വേണ്ടിവന്നു. പൊലീസും നാട്ടുകാരും ടൂറിസം വകുപ്പും എല്ലാം ചേര്‍ന്ന് ഒത്തുകളിക്കുകയാണ്. ഇതിനെ കുറിച്ച് സമഗ്ര അന്വേഷണം വേണമെന്നും ആന്‍ഡ്രൂ ആവശ്യപ്പെട്ടു.

ലിഗക്കു നല്‍കിയതു പോലെ മയക്കുമരുന്ന് കലര്‍ന്ന സിഗരറ്റും മറ്റു ചില തെളിവുകളും കസ്റ്റഡിയിലായവരില്‍ നിന്ന് പൊലീസ് കണ്ടെടുത്തു. കൊലപാതകവുമായി ബന്ധപ്പെട്ട് അടുത്ത ദിവസങ്ങളില്‍ അറസ്റ്റ് ഉണ്ടായേക്കുമെന്നാണ് സൂചന.

കണ്ടല്‍ക്കാട്ടിലേക്ക് കൊണ്ടുവന്ന ബോട്ടിലും ലിഗയുടെ മൃതദേഹം കണ്ടെത്തിയ സ്ഥലത്തും ഫോറന്‍സിക് വിഭാഗം പരിശോധന നടത്തി. മണിക്കൂറുകള്‍ നീണ്ട പരിശോധനക്കൊടുവില്‍ മരത്തില്‍ നിന്നും വള്ളിയില്‍ നിന്നും തലമുടി, ത്വക്കിന്റെ ഭാഗങ്ങള്‍ എന്നിവ കണ്ടെത്തി. ഇവ ശാസ്ത്രീയ പരിശോധനക്കായി ഫോറന്‍സീക് ലാബിലേക്ക് കൊണ്ടുപോയി.

കണ്ടല്‍ക്കാട്ടിലേക്ക് ലിഗയെ എത്തിച്ചത് വാഴമുട്ടത്തിനു സമീപത്തെ കടവില്‍ നിന്നുള്ള ബോട്ടിലാണ്. എന്നാല്‍ കോവളം സ്വദേശിയുടെ നാലു സുഹൃത്തുക്കള്‍ പനത്തുറ ക്ഷേത്രത്തിനു സമീപത്തെ കല്യാണ മണ്ഡപത്തിനു സമീപത്തു കൂടിയാണെന്നും പൊലീസിന് തെളിവ് ലഭിച്ചിട്ടുണ്ട്. നിലവില്‍ പത്തു പേരാണ് പൊലീസ് കസ്റ്റഡിയിലുള്ളത്.