പ്ലേ സ്‌റ്റോറില്‍ കണ്ടതിനാല്‍ സുരക്ഷിതമാണെന്ന് കരുതിയാണ് എം.ബി.എ ബിരുദധാരിയും സ്വകാര്യ കമ്പനിയിലെ മാനേജറുമായ യുവാവ് 2500 രൂപ വായ്പ എടുത്തത്. 90 ദിവസം കൊണ്ട് തിരിച്ചടക്കണമെന്നാണ് പരസ്യത്തില്‍ കണ്ടത്. അഞ്ചാമത്തെ ദിവസം മുതല്‍ തിരിച്ചടവിനായി വിളി തുടങ്ങി. ഇതുവരെ നൂറിരട്ടി രൂപ തിരിച്ചടക്കേണ്ടി വന്നു. ലോണ്‍ അടക്കാന്‍ പണമില്ലാത്ത സാഹചര്യം വരുമ്പോള്‍ പുതിയ ലിങ്കില്‍ നിന്ന് പണമെടുക്കാനായി നിര്‍ദേശം വന്നു.

ഭീഷണി ഭയന്ന് ആറ് ആപ്പുകളില്‍ നിന്ന് പണമെടുത്ത് കടം വീട്ടികൊണ്ടിരിക്കുകയാണ് ഈ യുവാവ്. ആദ്യ ലോണ്‍ എടുത്തതോടെ ഫോണിന്റെ മുഴുവന്‍ നിയന്ത്രണവും തട്ടിപ്പുകാരുടെ കൈയിലായി. ഫോണിലുളള നമ്പറുകളിലേക്ക് നിരന്തരം അപകീര്‍ത്തി സന്ദേശങ്ങളും മോര്‍ഫ് ചെയ്ത ചിത്രങ്ങളും അയക്കാന്‍ തുടങ്ങി. ജോലിക്ക് പോകാന്‍ പോലുമാകാതെ ദിവസങ്ങളായി ഉറക്കം പോലും നഷ്ടപ്പെട്ട അവസ്ഥയിലാണ് ഈ യുവാവ്.