ചെറുവാഹനങ്ങളില്‍ ചരക്ക് എത്തിക്കുന്നതിന് ചെലവ് കൂടും. വാടക കൂടുന്നതാണ് പ്രശ്‌നം. ചെലവ് വര്‍ധിക്കുന്നതിന്റെ ഭാഗമായി വിപണിയില്‍ സാധനങ്ങള്‍ക്ക് വില കൂടിയിട്ടുണ്ട്. തക്കാളിക്ക് 24 രൂപയായിരുന്നത് 29 മുതല്‍ 30 രൂപ വരെയാണ് റീട്ടെയില്‍ മാര്‍ക്കറ്റ് വില. വലിയഉള്ളിക്ക് നേരത്തെ 20 രൂപയായിരുന്നത് ഇന്നലെ 25 രൂപയായി. കാബേജ്, വെണ്ട, വഴുതന എന്നിവക്കും അഞ്ചുമുതല്‍ 15 രൂപവരെ വില കൂടി. വലിയങ്ങാടിയില്‍ ലോറികളുടെ വരവ് ഗണ്യമായി കുറഞ്ഞു. നൂറിലധികം ലോറികള്‍ എത്തുന്ന വലിയങ്ങാടിയില്‍ ഇന്നലെ പതിനഞ്ച് ലോറികള്‍ മാത്രമാണ് എത്തിയത്. കോഴിക്കോട്ടേക്ക് പുറപ്പെട്ട പല ലോറികളും ഇതര സംസ്ഥാനകേന്ദ്രങ്ങളില്‍ തടഞ്ഞിട്ടിരിക്കുകയാണ്. ഇതുകാരണം വലിയങ്ങാടിയില്‍ വ്യാപാരമാന്ദ്യം അനുഭവപ്പെടുന്നു.

അരി, പരിപ്പ്, മുളക് എന്നിവക്ക് വില കൂടിയിട്ടില്ല. ഇവ ആവശ്യത്തിന് സ്റ്റോക്കുണ്ടെന്നാണ് വ്യാപാരികള്‍ പറയുന്നത്. അതേസമയം, സമരം നീണ്ടുപോയാല്‍ അരിക്കും പഞ്ചസാരക്കും മറ്റും ക്ഷാമം അനുഭവപ്പെടും. അരി വാഗണുകളില്‍ എത്തുന്നതിനാല്‍ സമരം കാര്യമായി ബാധിച്ചിട്ടില്ല. മൊത്തവിപണിയെ സമരം കാര്യമായി ബാധിക്കാന്‍ രണ്ടുദിവസം കൂടി കഴിയേണ്ടിവരുമെന്നാണ് വ്യാപാരികള്‍ പറയുന്നത്. എന്നാല്‍, ഉള്‍പ്രദേശങ്ങളില്‍ സാധനങ്ങള്‍ക്ക് ക്ഷാമം അനുഭവപ്പെട്ടു തുടങ്ങിയതായി സൂചനയുണ്ട്. കോഴിക്കോട്ടെ മൊത്തവിപണിയെ ആശ്രയിക്കുന്ന നാട്ടിന്‍പുറങ്ങളിലെ വ്യാപാരികള്‍ ഏതായാലും പ്രതിസന്ധി നേരിടുകയാണ്. പച്ചക്കറി ഇനങ്ങളും പലവ്യഞ്ജനങ്ങളും നാട്ടിലെത്തിക്കാന്‍ മാര്‍ഗമില്ലാത്തതാണ് വ്യാപാരികളെ വിഷമത്തിലാക്കുന്നത്. ഇതുകാരണം ഉപഭോക്താക്കളും വലയുകയാണ്.

സമരം ഒത്തുതീര്‍പ്പാക്കാന്‍ കേന്ദ്ര ഗതാഗതവകുപ്പ് ഇടപെടണമെന്ന് മലബാര്‍ ചേംബര്‍ ഓഫ് കോമേഴ്‌സ് പ്രസിഡണ്ട് പി.വി നിധീഷ് ആവശ്യപ്പെട്ടു. ലോറി സമരം റേഷന്‍ വിതരണത്തെയും പ്രതികൂലമായി ബാധിച്ചതായി വ്യാപാരികള്‍ പറഞ്ഞു. എഫ്.സി.ഐ ഗോഡൗണില്‍ നിന്ന് മൊത്തവിതരണ കേന്ദ്രത്തിലേക്കുള്ള ചരക്ക്‌നീക്കം നിലച്ചു. മൊത്തവിതരണകേന്ദ്രങ്ങളില്‍ നിന്ന് റേഷന്‍കടകളിലേക്ക് കൊണ്ടുപോകാനും ലോറി കിട്ടാത്ത അവസ്ഥയാണ്. ജൂലൈ മാസം വിതരണത്തിനുള്ള അരിയും ഗോതമ്പും മറ്റും ഇതിനകം എത്തിച്ച കടകളില്‍ വലിയ പ്രതിസന്ധിയില്ല. എന്നാല്‍ അരി വേണ്ടത്ര എത്താത്ത കടക്കാര്‍ക്ക് സമരം തീരുന്നതുവരെ കാത്തിരിക്കേണ്ടിവരും. കഴിഞ്ഞ രണ്ടുദിവസമായി ജില്ലയിലെ റേഷന്‍കടകളിലൊന്നും സാധനങ്ങള്‍ എത്തിയിട്ടില്ല. കയറ്റിറക്ക് തൊഴിലാളികള്‍ വെറുതെവന്നു മടങ്ങുകയാണ്. വലിയങ്ങാടിയിലെ കയറ്റിറക്ക് തൊഴിലാളികളും പണിയില്ലാതെ വിഷമിക്കുകയാണ്.

കോഴിക്കോട് വലിയങ്ങാടിയില്‍ ഇന്നലെ ഏതാനും ലോറികള്‍ ചരക്കുമായി എത്തി. അരിയും പഞ്ചസാരയും പരിപ്പ് ഉള്‍പ്പെടെയുള്ള ധാന്യങ്ങളും മൈദ, ഗോതമ്പ് എന്നിവയുമാണ് എത്തിയത്. കോഴിക്കോട് മാത്രം ദിനംപ്രതി അഞ്ഞൂറ് ലോറികള്‍ എത്തുന്നുണ്ട്. സമരം തുടര്‍ന്നാല്‍ നിത്യോപയോഗസാധനങ്ങള്‍ക്ക് ദൗര്‍ലഭ്യം നേരിടുമെന്നാണ് സൂചന. കോഴിക്കോട് നിന്ന് കൊപ്ര, തേങ്ങ, റബ്ബര്‍ എന്നിവ കയറ്റിപ്പോകുന്നത് നിലച്ചു.

അനിയന്ത്രിത ഡീസല്‍ വിലവര്‍ധന പിന്‍വലിക്കുക, അശാസ്ത്രീയ ടോള്‍ ഉപേക്ഷിക്കുക, തേഡ് പാര്‍ട്ടി ഇന്‍ഷൂറന്‍സ് പ്രീമിയം വര്‍ധന ഉപേക്ഷിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് സമരം. ഓള്‍ ഇന്ത്യാ മോട്ടോര്‍ ട്രാന്‍സ്‌പോര്‍ട്ട് കോണ്‍ഗ്രസ് ആണ് അഖിലേന്ത്യാ വ്യാപകമായി സമരത്തിന് ആഹ്വാനം ചെയ്തത്. കേരളത്തില്‍ സമരം പൂര്‍ണമാണെന്ന് ലോറി ഓണേഴ്‌സ് ആന്റ് വെല്‍ഫെയര്‍ ഫെഡറേഷന്‍ പ്രസിഡണ്ട് കെ.കെ ഹംസ പറഞ്ഞു.