malapp;uram – Chandrika Daily

മലപ്പുറം ജില്ലയിൽ കനത്ത മഴ തുടരുന്നു; പെരിന്തൽമണ്ണയിൽ മണ്ണിടിച്ചിൽ; സ്‌കൂട്ടറും ലോറിയും മണ്ണിനടിയിൽ

webdesk14 — Wed, 05 Jul 2023 17:28:52 +0000

പെരിന്തല്‍മണ്ണയില്‍ നിര്‍ത്തിയിട്ട വാഹനങ്ങള്‍ക്ക് മേലെ മണ്ണിടിഞ്ഞു വീണു. പെരിന്തല്‍മണ്ണയില്‍ പട്ടാമ്പി റോഡിലെ പഴയ കെട്ടിടത്തിന്റെ ഒരു ഭാഗം ഇടിഞ്ഞു വീഴുകയായിരുന്നു. ഒരു സ്‌കൂട്ടറും ലോറിയും മണ്ണിനടിയിലായി. ഈ സമയത്ത് സമീപത്ത് ആളുകള്‍ ഇല്ലാതിരുന്നത് വലിയ അപകടത്തില്‍ നിന്ന് രക്ഷയയായി.

മേലാറ്റൂരില്‍ മഴയില്‍ തെങ്ങ് കടപുഴകി വീണു വീടിനു നാശം. എടപ്പറ്റ ആലുംകുന്നിലെ മുട്ടു പാറ സലാമിന്റെ വീടിനു മുകളിലേക്കാണ് തെങ്ങ് കടപുഴകി വീണത്. ചുമര്‍ പൊട്ടി പൊളിഞ്ഞു. ജലസംഭരണിയും തകര്‍ന്നു.

പാണ്ടിക്കാട് കനത്ത മഴയില്‍ തെങ്ങ് കടപുഴകി വീണ് വീടിനു നാശം. പാണ്ടിക്കാട് മൊഴക്കല്ലിലെ കുന്നുമ്മല്‍ കുഞ്ഞി മുഹമ്മദിന്റെ വീട്ടിലേക്കാണ് തെങ്ങ് കടപുഴകി വീണത്. വീടിന്റെ മേല്‍ക്കൂരയുടെ ഒരുഭാഗം ഓട് തകര്‍ന്നു. പട്ടിക ഇരുമ്പു കമ്പിയായതിനാല്‍ പൊട്ടിവീഴാതെ നില്‍ക്കുകയായിരുന്നു.

ജില്ലയില്‍ ഇന്നും നാളെയും ഓറഞ്ച് അലര്‍ട്ട് പ്രഖ്യാപിച്ച സാഹചര്യത്തില്‍ ജില്ലാ കലക്ടര്‍ വി.ആര്‍ പ്രേംകുമാറിന്റെ നേതൃത്വത്തില്‍ ജില്ലാ ദുരന്ത നിവാരണ അതോറിറ്റി മുന്നൊരുക്കങ്ങള്‍ പൂര്‍ത്തിയാക്കി.

അലിഗഢ് മലപ്പുറം സെന്ററിന്റെ ശോച്യാവസ്ഥക്ക് പരിഹാരം കാണണമെന്ന് ആവശ്യപ്പെട്ട് സമദാനി

Test User — Tue, 20 Dec 2022 12:29:48 +0000

അലിഗഢ് മലപ്പുറം സെന്ററിന്റെ ശോച്യാവസ്ഥക്ക് പരിഹാരം കാണണമെന്നാവശ്യപ്പെട്ട് ഡോ. എം.പി സമദാനി. അടിസ്ഥാനപരമായ പ്രശ്‌നങ്ങള്‍ക്ക് പരിഹരം കാണണമെന്നാവശ്യപ്പെട്ട് ബഹു. കേന്ദ്ര വിദ്യാഭ്യാസ മന്ത്രി ശ്രീ ധര്‍മേന്ദ്ര പ്രധാനെ കണ്ട് നിവേദനം നല്‍കി. കേന്ദ്രസഹായം ലഭിക്കാത്തതുകൊണ്ട് യൂണിവേഴ്‌സിറ്റി സെന്ററിന് ഉണ്ടായിക്കൊണ്ടിരിക്കുന്ന പ്രയാസങ്ങള്‍ മന്ത്രിയുടെ ശ്രദ്ധയില്‍പ്പെടുത്തി.

നിലവിലെ ഡി.പി.ആര്‍ അനുസരിച്ച് സമ്പൂര്‍ണ്ണവും സ്വതന്ത്രവുമായ സര്‍വ്വകലാശാലയാക്കാന്‍ കേന്ദ്ര സര്‍ക്കാര്‍ പ്രത്യേക ധനസഹായം അനുവദിക്കുക, പുതിയ വിദ്യാഭ്യാസനയത്തിന്റെ (എന്‍.ഇ.പി 2020) ഭാഗമായി സാമൂഹികവും സാമ്പത്തികവുമായി പിന്നോക്കം നില്‍ക്കുന്ന പ്രദേശത്ത് സ്ഥിതിചെയ്യുന്ന സ്ഥാപനം എന്ന പരിഗണന നല്‍കുക, ഇതിനായി സെന്റര്‍ നിലകൊള്ളുന്ന പ്രദേശം സ്‌പെഷ്യല്‍ എഡ്യൂക്കേഷന്‍ സോണില്‍ ഉള്‍പെടുത്തുക, സെന്ററിന്റെ വികസനത്തില്‍ അഞ്ചുവര്‍ഷമായി തുടരുന്ന സ്തംഭനാവസ്ഥ ഇല്ലാതാക്കാന്‍ സര്‍ക്കാര്‍ ഇടപെടുക, നിലവിലുള്ള ഡി.പി.ആര്‍ പ്രകാരം കൂടുതല്‍ കോഴ്‌സുകള്‍ അനുവദിക്കാന്‍ സൗകര്യങ്ങളൊരുക്കുക എന്നീ ആവശ്യങ്ങളാണ് നിവേദനത്തില്‍ ഉന്നയിച്ചിട്ടുള്ളത്. നിവദേനം സമര്‍പ്പിച്ച ശേഷം മന്ത്രിയുമായി ചര്‍ച്ച നടത്തുകയും ചെയ്തു. നിവേദനം പരിഗണിക്കുമെന്ന് മന്ത്രി പറഞ്ഞെന്നും സമദാനി അറിയിച്ചു.

പതിറ്റാണ്ടുകളായുള്ള കാത്തിരിപ്പിന് വിരാമമായി കോട്ടപ്പടി ഗ്രൗണ്ട് തുറന്ന് കൊടുത്തു

ചന്ദ്രിക വെബ് ഡെസ്‌ക്‌ — Wed, 10 Feb 2021 10:44:23 +0000

മലപ്പുറം: നഗരത്തിൻ്റെ ചരിത്രത്തിൻ്റെ ഭാഗമായ കോട്ടപ്പടി മൈതാനം പൊതു ജനങ്ങൾക്ക് തുറന്ന് കൊടുക്കണമെന്ന വർഷങ്ങളായുള്ള മുറവിളിക്ക് പരിഹാരമായി.
സ്റ്റേഡിയം തുറന്ന് നൽകണമെന്നാവശ്യപ്പെട്ട് മുനിസിപ്പൽ ചെയർമാൻ മുജീബ്കാടേരിയുടെ നേതൃത്വത്തിൽ കൗൺസിൽ പ്രതിനിധി സംഘം ബി.ശ്രീകുമാറുമായി കഴിഞ്ഞ മാസം നടത്തിയ ചർച്ചയെ തുടർന്നാണ് ഗ്രൗണ്ട് തുറന്ന് നൽകാൻ തീരുമാനമായത്.

https://www.chandrikadaily.com/wp-content/uploads/2021/02/video.mp4

നിശ്ചിത സമയം ഗ്രൗണ്ട് തുറക്കാനും, ഫുട്ബാൾ അക്കാദമി ആരംഭിക്കാനും തീരുമാനമായിരുന്നു. ഗ്രൗണ്ട് തുറന്ന് നൽകുന്നതിൻ്റെ ഭാഗമായി നഗരസഭ കൗൺസിൽ ടീമും, ജില്ലാ സ്പോർട്സ് കൗൺസിൽ ടീമും തമ്മിലുള്ള പ്രദർശന മൽസരവുമുണ്ടായിരിന്നു. ജില്ലാ സ്പോർട്സ് കൗൺസിൽ പ്രസിഡൻ്റ് എ.ശ്രീകുമാറിൻ്റെ അധ്യക്ഷതയിൽ ചേർന്ന ചടങ്ങ് ജില്ലാ കലക്ടർ കെ.ഗോപാലകൃഷ്ണൻ ഉൽഘാടനം ചെയ്തു.

നഗരസഭ ചെയർമാൻ മുജീബ്കാടേരി മുഖ്യാതിഥിയായിരുന്നു. സ്റ്റാൻ്റിംങ് കമ്മറ്റി ചെയർമാന്മാരായ പി.കെ.സക്കീർ ഹുസൈൻ, പി.കെ.അബ്ദുൽ ഹക്കീം, സിദ്ധീഖ് നൂറേങ്ങൽ, പ്രതി പക്ഷ നേതാവ് ഒ.സഹദേവൻ, സ്പോർട്സ് കൗൺസിൽ ഭാരവാഹികളായ വി.പി.അനിൽ ,സി.സുരേഷ് മാസ്റ്റർ പ്രസംഗിച്ചു.പ്രദർശന മൽസരത്തിൽ എതിരില്ലാത്ത ഒരു ഗോളിന് സ്പോർട്സ് കൗൺസിൽ ടീം വിജയിച്ചു.

വീണ്ടും ജീവനെടുത്ത് കോവിഡ്; മലപ്പുറത്ത് ഒരു മരണംകൂടി

web desk 1 — Thu, 20 Aug 2020 06:42:46 +0000

മലപ്പുറം: ജില്ലയില്‍ ഒരു കോവിഡ് മരണം കൂടി. മഞ്ചേരി കരുവമ്പ്രം സ്വദേശിയായ കുഞ്ഞിമൊയ്തീന്‍ (65) ആണ് ബുധനാഴ്ച രാത്രി മഞ്ചേരി മെഡിക്കല്‍ കോളേജില്‍ മരിച്ചത്. ഹൃദയ സംബന്ധമായ അസുഖത്തിന് ഓഗസറ്റ് 10 നാണ് ഇയാളെ ആശുപത്രിയില്‍ പ്രവേശിപ്പിച്ചത്. അന്ന് തന്നെ നടത്തിയ പരിശോധനയില്‍ കോവിഡ് സ്ഥിരീകരിച്ചിരുന്നു.