malapuram byelection – Chandrika Daily

മലപ്പുറം ഉപതെരഞ്ഞെടുപ്പ്: വോട്ടെണ്ണല്‍ തുടങ്ങി; ആദ്യ ഫലം എട്ടരയോടെ

chandrika — Mon, 17 Apr 2017 02:00:46 +0000

മലപ്പുറം: മലപ്പുറം ലോക്സഭാ ഉപതെരഞ്ഞെടുപ്പ് വോട്ടെണ്ണല്‍ ആരംഭിച്ചു. ആദ്യ ഫലം എട്ടരയോടെ അറിവാകും. 11 മണിയോടെ മലപ്പുറം ആര്‍ക്കൊപ്പമെന്നതു സംബന്ധിച്ച് വ്യക്തമായ ചിത്രം ലഭിക്കും. മലപ്പുറം ഗവണ്‍മെന്റ് കോളജിലാണ് വോട്ടെണ്ണല്‍. ഏഴു ഹാളുകളിലായി നിയമസഭാ മണ്ഡലം തിരിച്ചാണ് വോണ്ണെല്‍ നടത്തുക. മലപ്പുറം ഗവണ്‍മെന്റ് കോളജിലാണ് വോട്ടെണ്ണല്‍. ആദ്യം തപാല്‍ ബാലറ്റുകളാണ് എണ്ണുക. തുടര്‍ന്ന് മഞ്ചേരി, പെരിന്തല്‍മണ്ണ, മങ്കട, മലപ്പുറം, കൊണ്ടോട്ടി, വേങ്ങര, വള്ളിക്കുന്ന് നിയമസഭാ മണ്ഡലങ്ങളിലെ വോട്ടുകള്‍ പത്ത് വീതം ടേബിളുകളിലായി എണ്ണും. 71.33 ശതമാനം ആയിരുന്നു പോളിങ്. യുഡിഎഫിലെ ശ്രീ.പി.കെ കുഞ്ഞാലിക്കുട്ടിയും എല്‍ഡിഎഫിലെ ശ്രീ. എം.ബി ഫൈസലും എന്‍ഡിഎയിലെ ശ്രീ.എന്‍ ശ്രീപ്രകാശും തമ്മിലാണ് പ്രധാന മത്സരം. ആറു സ്വതന്ത്ര സ്ഥാനാര്‍ത്ഥികളും മത്സരരംഗത്തുണ്ട്. യുഡിഎഫിന്റെ സിറ്റിങ് സീറ്റായ മലപ്പുറത്ത് ഇ.അഹമ്മദ് അന്തരിച്ചതിനെത്തുടര്‍ന്നാണ് ഉപതെരഞ്ഞെടുപ്പ് വേണ്ടിവന്നത്. വലിയ ഭൂരിപക്ഷത്തില്‍ യുഡിഎഫ് വിജയിക്കുമെന്ന് മുസ്ലിംലീഗ് സംസ്ഥാന ജനറല്‍ സെക്രട്ടറി ശ്രീ. കെ.പി.എ മജീദ് മലപ്പുറത്ത് പറഞ്ഞു.

മലപ്പുറം ഇന്ന് വിധിയെഴുതും

chandrika — Tue, 11 Apr 2017 19:06:19 +0000

മലപ്പുറം: മലപ്പുറം ലോക്‌സഭാ മണ്ഡലത്തിലേക്കുള്ള ജനപ്രതിനിധിയെ തെരഞ്ഞെടുക്കുന്നതിന് 13.12 ലക്ഷം വോട്ടര്‍മാര്‍ ഇന്ന് വിധിയെഴുതും. 6,56,470 സ്ത്രീകളും 6,56,273 പുരുഷന്‍മാരുമടക്കം 13,12,693 വോട്ടര്‍മാരാണുള്ളത്. രാവിലെ ഏഴ് മുതല്‍ വൈകിട്ട് ആറ് വരെയാണ് വോട്ടെടുപ്പ്. വീറും വാശിയും ചോരാത്ത പ്രചാരണമാണ് ആഴ്ചകളായി മലപ്പുറത്തിന്റെ മുക്കിലും മൂലയിലും നടന്നത്. പ്രചാരണത്തിലെ യു.ഡി.എഫ് ആധിപത്യം ഐക്യജനാധിപത്യ മുന്നണിക്ക് വലിയ വിജയ പ്രതീക്ഷയാണ് പകരുന്നത്. പി.കെ കുഞ്ഞാലിക്കുട്ടി വന്‍ ഭൂരിക്ഷം നേടുമെന്നാണ് രാഷ്ട്രീയ കേരളത്തിന്റെ വിലയിരുത്തല്‍.
മൂന്ന് പാര്‍ട്ടി സ്ഥാനാര്‍ഥികളും ആറ് സ്വതന്ത്രരും ഉള്‍പ്പെടെ ഒമ്പത് പേരാണ് മത്സര രംഗത്തുള്ളത്. വോട്ടെടുപ്പിനായി 1175 പോളിങ് സ്റ്റേഷനുകള്‍ ക്രമീകരിച്ചിട്ടുണ്ട്. ഓരോ പോളിങ് സ്റ്റേഷനിലും ഒരു പ്രിസൈഡിങ് ഓഫീസറും മൂന്ന് പോളിങ് ഓഫീസര്‍മാരും ഡ്യൂട്ടിക്കുണ്ടാകും. 1200 ല്‍ കൂടുതല്‍ വോട്ടര്‍മാരുള്ള ബൂത്തുകളില്‍ അഞ്ച് പേര്‍ ചുമതലയിലുണ്ടാകും. ഇത് കൂടാതെ സ്‌പെഷല്‍ എക്‌സിക്യൂട്ടീവ് മജിസ്‌ട്രേറ്റിന്റെ പദവിയോടെ 111 സെക്ടര്‍ ഓഫീസര്‍മാര്‍ ബൂത്തുകളുടെ പ്രവര്‍ത്തനങ്ങള്‍ ഏകോപിപ്പിക്കും. വരണാധികാരി കൂടിയായ ജില്ലാ കലക്ടര്‍ അമിത് മീണയുടെ നേതൃത്വത്തില്‍ ഏഴ് ഉപവരണാധികാരികളുടെ മേല്‍നോട്ടത്തിലാണ് തെരഞ്ഞെടുപ്പ് പ്രവര്‍ത്തനങ്ങളുടെ ഏകോപനം.
ഇലക്‌ട്രോണിക് വോട്ടിങ് മെഷീന്‍ ഉപയോഗിച്ച് നടക്കുന്ന വോട്ടെടുപ്പിനായി 1175 വീതം കണ്‍ട്രോള്‍ യൂണിറ്റുകളും ബാലറ്റ് യൂണിറ്റുകളും സജ്ജീകരിച്ചിട്ടുണ്ട്. അവശ്യഘട്ടങ്ങളില്‍ ഉപയോഗിക്കുന്നതിന് 50 ശതമാനം റിസര്‍വ് മെഷീനുകളുമുണ്ട്. വോട്ടിങ് യന്ത്രങ്ങളുടെ തകരാറുകള്‍ പരിഹരിക്കുന്നതിന് തെരഞ്ഞെടുപ്പ് കമ്മീഷന്റെ 14 എഞ്ചിനീയര്‍മാരെ വിന്യസിച്ചിട്ടുണ്ട്.
വന്‍ സുരക്ഷാ സന്നാഹമാണ് തെരഞ്ഞെടുപ്പിനായി ഒരുക്കിയിട്ടുള്ളത്. ജില്ലാ പൊലീസ് മേധാവി ദേബേഷ് കുമാര്‍ ബെഹ്‌റയുടെ നേതൃത്വത്തില്‍ നാല് കമ്പനി കേന്ദ്ര സേന ഉള്‍പ്പെടെ 2300 ഓളം സുരക്ഷാ ഉദ്യോഗസ്ഥര്‍ രംഗത്തുണ്ട്. കേന്ദ്ര തെരഞ്ഞെടുപ്പ് കമ്മീഷന്റെ ഒരു പൊതു നിരീക്ഷകനും ഒരു ചെലവ് നിരീക്ഷകനും മണ്ഡലത്തിലെ തെരഞ്ഞെടുപ്പ് പ്രവര്‍ത്തനങ്ങള്‍ നിരീക്ഷിക്കുന്നതിനായി രംഗത്തുണ്ട്. നിരീക്ഷകരെ സഹായിക്കാന്‍ 49 സൂക്ഷ്മ നിരീക്ഷകരെയും നിയോഗിച്ചിട്ടുണ്ട്.

മലപ്പുറത്ത് ഭൂരിപക്ഷം കൂടും: കുഞ്ഞാലികുട്ടി

chandrika — Sun, 09 Apr 2017 13:26:22 +0000

വേങ്ങര: മലപ്പുറം ഉപതെരഞ്ഞെടുപ്പില്‍ യുഡിഎഫിന്റെ ഭൂരിപക്ഷം കൂടുമെന്ന് മുസ്‌ലിം ലീഗ് ദേശീയ ജനറല്‍ സെക്രട്ടറിയും സ്ഥാനാര്‍ഥിയുമായ പികെ കുഞ്ഞാലിക്കുട്ടി. തെരഞ്ഞെടുപ്പ് പ്രചാരണത്തിനിടയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം. ദേശീയ തലത്തിലുള്ള രാഷ്ട്രീയ വിലയിരുത്തലുകള്‍ ലോക്സഭാ തിരഞ്ഞെടുപ്പിനെ കൂടുതലായി സ്വാധിക്കും. അതോടൊപ്പം തന്നെ നിലവിലുള്ള സംസ്ഥാന സരക്കാരിന്റെ പ്രവര്‍ത്തനങ്ങളുടെ ജനങ്ങളുടെ വിലയിരുത്തലാവും വിധയെന്നും കുഞ്ഞാലികുട്ടി പറഞ്ഞു. ലോക്സഭാ തിരഞ്ഞെടുപ്പ് പഞ്ചായത്ത് തിരഞ്ഞെടുപ്പില്‍ നിന്നും നിയമസഭാ തിരഞ്ഞെടുപ്പില്‍ നിന്നും വ്യത്യസ്തമാണെന്നും അദ്ദേഹം അഭിപ്രായപ്പെട്ടു.

ദേശീയ തലത്തില്‍ ബിജെപിയുടെ ജനവിരുദ്ധ നയങ്ങള്‍ക്കെതിരെയുള്ള വിധിയെഴുത്താണ് മലപ്പുറത്തുണ്ടാവുക. അത് യുഡിഎഫിനും ലീഗിനും അനുകൂലമായിരിക്കും.നിലവില്‍ സംസ്ഥാന സര്‍ക്കാരിന്റെ പ്രതിച്ഛായയെക്കുറിച്ച് പ്രത്യേകം പറയേണ്ട കാര്യമുണ്ടോ? എല്ലാം കൊണ്ടും കാര്യങ്ങള്‍ ഞങ്ങള്‍ക്ക് അനുകൂലമാണ് കുഞ്ഞാലികുട്ടി പറഞ്ഞു.

മലപ്പുറത്ത് ബീഫ് നിരോധനത്തെക്കുറിച്ച് മിണ്ടാന്‍ ബിജെപിക്ക് ധൈര്യമുണ്ടോ?: ശിവസേന

chandrika — Mon, 03 Apr 2017 08:00:40 +0000

ന്യൂഡല്‍ഹി: മലപ്പുറം ഉപതെരഞ്ഞെടുപ്പില്‍ വിജയിപ്പിച്ചാല്‍ മണ്ഡലത്തിലെങ്ങും നല്ല ബീഫ് നല്‍കുമെന്ന ബിജെപി സ്ഥാനാര്‍ത്ഥി എന്‍.ശ്രീപ്രകാശിന്റെ പ്രസ്താവനക്കെതിരെ ശിവസേന രംഗത്ത്. ബീഫ് നിരോധനത്തെക്കുറിച്ച് മലപ്പുറത്ത് മിണ്ടാന്‍ ബിജെപിക്ക് ധൈര്യമുണ്ടോയെന്ന് ശിവസേന ചോദിച്ചു. ശിവസേനയുടെ മുഖപത്രമായ സാമ്‌നയിലൂടെയാണ് ബിജെപിക്കെതിരെ ആഞ്ഞടിച്ചത്. മലപ്പുറത്ത് നടക്കാനിരിക്കുന്ന തെരഞ്ഞെടുപ്പിനു മുമ്പ് ബീഫ് നിരോധനത്തെക്കുറിച്ച് മിണ്ടാന്‍ പാര്‍ട്ടിക്ക് ചങ്കൂറ്റമുണ്ടോയെന്നാണ് ശിവസേനയുടെ ചോദ്യം. ബീഫ് വിഷയത്തില്‍ മോദിയുടെ ബിജെപിക്ക് ഇരട്ടത്താപ്പ് നയമാണുള്ളതെന്ന് ശിവസേന കുറ്റപ്പെടുത്തുന്നു. ഓരോ സംസ്ഥാനങ്ങളിലും രാഷ്ട്രീയ ലാഭത്തിനു വേണ്ടി വ്യത്യസ്ത നിലപാടുകളാണ് ബിജെപി സ്വീകരിക്കുന്നത്. ഇത് അംഗീകരിക്കാന്‍ സാധിക്കില്ലെന്നും സാമ്‌നയുടെ റിപ്പോര്‍ട്ടില്‍ പറയുന്നു.
മലപ്പുറത്ത് മീറ്റ് ദ പ്രസ് പരിപാടിക്കിടെയാണ് ശ്രീപ്രകാശ് ബീഫ് നിരോധനത്തില്‍ പാര്‍ട്ടിയുടെ ദേശീയ നിലപാടിന് വിരുദ്ധമായി പ്രതികരിച്ചത്. വിജയിച്ചാല്‍ ഗുണമേന്മയുള്ള ബീഫ് നല്‍കാമെന്നും ഉയര്‍ന്ന നിലവാരമുള്ള ബീഫ് കടകള്‍ ആരംഭിക്കാന്‍ മുന്‍കൈയെടുക്കാമെന്നുമായിരുന്നു ബിജെപി സ്ഥാനാര്‍ത്ഥിയുടെ വാഗ്ദാനം. ബീഫ് നിരോധനമുള്ള സംസ്ഥാനങ്ങളില്‍ പശുവിനെ കശാപ്പ് ചെയ്യുന്നതാണ് ഗുരുതരമായ കുറ്റമെന്നും പല സംസ്ഥാനങ്ങളിലും ചത്ത പശുക്കളുടെ മാംസം പോലും ഭക്ഷിക്കുന്നുണ്ടെന്നുമായിരുന്നു ശ്രീപ്രകാശ് പറഞ്ഞത്. ഗോവധത്തിനും ബീഫിനുമെതിരെ ദേശീയ തലത്തില്‍ ബിജെപി നിലപാട് കടുപ്പിക്കുന്നതിനിടെയാണ് ശ്രീപ്രകാശിന്റെ ബീഫ് വാഗ്ദാനം.

മലപ്പുറം ഉപതെരഞ്ഞെടുപ്പ്: ബിജെപി-സിപിഎം സ്ഥാനാര്‍ത്ഥികളുടെ പത്രിക അപൂര്‍ണം

chandrika — Mon, 03 Apr 2017 06:12:59 +0000

മലപ്പുറം: മലപ്പുറം ഉപതെരഞ്ഞെടുപ്പില്‍ ബിജെപിയുടെയും സിപിഎമ്മിന്റെയും സ്ഥാനാര്‍ത്ഥികള്‍ സമര്‍പ്പിച്ച നാമനിര്‍ദേശ പത്രിക അപൂര്‍ണമാണെന്ന് കണ്ടെത്തല്‍. ബിജെപി സ്ഥാനാര്‍ത്ഥി എന്‍.ശ്രീപ്രകാശിന്റെയും സിപിഎം സ്ഥാനാര്‍ത്ഥി അഡ്വ.എം.ബി ഫൈസലിന്റെയും പത്രികകളില്‍ വിദ്യാഭ്യാസ യോഗ്യതയുടെ കോളത്തില്‍ ക്രമ നമ്പര്‍ അപൂര്‍ണമായാണ് നല്‍കിയിരിക്കുന്നത്. നേരത്തെ യുഡിഎഫ് സ്ഥാനാര്‍ത്ഥി പി.കെ കുഞ്ഞാലിക്കുട്ടിയുടെ പത്രിക അപൂര്‍ണമാണെന്ന് ആരോപിച്ച് ബിജെപി സ്ഥാനാര്‍ത്ഥി ശ്രീപ്രകാശ് പരാതി നല്‍കിയിരുന്നെങ്കിലും തെരഞ്ഞെടുപ്പ് കമ്മീഷന്‍ അത് തള്ളിയിരുന്നു. അതേസമയം ബിജെപിസിപിഎം സ്ഥാനാര്‍ത്ഥികളുടെ പത്രികകള്‍ അപൂര്‍ണമാണെന്ന് ചൂണ്ടിക്കാട്ടി മുസ്‌ലിം ലീഗ് നേതാവ് പി.കെ കുഞ്ഞാലിക്കുട്ടി തെരഞ്ഞെടുപ്പ് കമ്മീഷന് പരാതി നല്‍കുമെന്നാണ് വിവരം.

യുഡിഎഫ് സ്ഥാനാര്‍ത്ഥി പി.കെ കുഞ്ഞാലിക്കുട്ടിയുടെ പത്രിക തള്ളുമെന്ന തരത്തില്‍ ഇടതരും ബിജെപിയും ഒരുപോലെ പ്രചരണം നടത്തിയിരുന്നു. പ്രചരണ പ്രവര്‍ത്തനങ്ങളില്‍പോലും ഈ വിഷയം ഉന്നയിച്ച സിപിഎം ബിജെപി സ്ഥാനാര്‍ത്ഥികള്‍ ഇപ്പോള്‍ വെട്ടിലായിരിക്കുകയാണ്. കുഞ്ഞാലിക്കുട്ടിയുടെ പത്രികയില്‍ പിശകുണ്ടെന്ന തരത്തില്‍ പ്രചരണം നടത്തുന്ന ബിജെപി സ്ഥാനാര്‍ത്ഥിയുടെ സത്യവാങ്മൂലത്തില്‍ ഇതേ കോളം ഒഴിച്ചിട്ടുണ്ട്. ബി.ജെ.പി സ്ഥാനാര്‍ത്ഥി ശ്രീപ്രകാശിന്റെ
സ്വത്ത് വിവരങ്ങള്‍ സംബന്ധിച്ച അഫിഡവിറ്റില്‍ ഭാര്യയുടെ പേരിലുള്ള 9.25 സെന്റ് സ്ഥലം ഡവലപ് ചെയ്തിട്ടുണ്ടോ, ഉണ്ടെങ്കില്‍ എത്ര നിക്ഷേപം എന്ന കോളത്തിന് ഉത്തരം നല്‍കാതെ വിട്ടിരിക്കുകയാണ്. ആരോപണം ഉന്നയിച്ച ബി.ജെ.പി സ്ഥാനാര്‍ത്ഥി അതേ കോളം തന്നെയാണ് പൂരിപ്പിക്കാതെ വിട്ടിരിക്കുന്നത്.

മുസ്ലിംലീഗ് മതേതര മൂല്യങ്ങള്‍ സൂക്ഷിക്കുന്ന പാര്‍ട്ടി: കെ.എം മാണി

chandrika — Sun, 26 Mar 2017 18:42:55 +0000

മലപ്പുറം: മുസ്്‌ലിംലീഗിന്റെ മതേതരത്വ നിലപാടിനുള്ള അംഗീകാരമാണ് തങ്ങളുടെ പിന്തുണയെന്ന് കേരള കോണ്‍ഗ്രസ് എം ചെയര്‍മാന്‍ കെ.എം മാണി. മലപ്പുറം നഗരസഭാ ടൗണ്‍ഹാളിലെ തിങ്ങിനിറഞ്ഞ സദസ്സിനെ സാക്ഷിയാക്കിയാണ് മാണി പി.കെ കുഞ്ഞാലിക്കുട്ടിക്കുള്ള പിന്തുണ ആവര്‍ത്തിച്ചത്. ഉപതെരഞ്ഞെടുപ്പില്‍ മുസ്്‌ലിംലീഗ് സ്ഥാനാര്‍ഥിയുടെ വിജയത്തിനായി കേരളകോണ്‍ഗ്രസ് എം ജില്ലാ കമ്മിറ്റി സംഘടിപ്പിച്ച കണ്‍വന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം.
എല്ലാ പ്രശ്‌നങ്ങളെയും മതേതരത്വ വീക്ഷണത്തോടെയാണ് എന്നും മുസ്്‌ലിംലീഗ് സമീപിച്ചിട്ടുള്ളത്. കേരള കോണ്‍ഗ്രസും മുസ്്‌ലിംലീഗുമായുള്ള ബന്ധത്തിന് അരനൂറ്റാണ്ടിന്റെ ആഴമുണ്ട്. വേറിട്ടൊരു രാഷ്ട്രീയമാണ് മുസ്്‌ലിംലീഗ് എന്നും കാഴ്ചവെച്ചിട്ടുള്ളത്. കേരളത്തിന്റെ വികസനത്തിന് മുസ്്‌ലിംലീഗിന്റെ സംഭാവന വളരെ വലുതാണ്. അന്താരാഷ്ട്ര തലത്തില്‍ ഇന്ത്യയുടെ മുഖമായിരുന്നു ഇ. അഹമ്മദ്. വിദേശരാഷ്ട്രങ്ങളുമായി അടുത്ത ബന്ധം സ്ഥാപിക്കുകയും രാജ്യനന്മക്കായി അതു ഉപയോഗപ്പെടുത്തുന്നതില്‍ അദ്ദേഹം വിജയിക്കുകയും ചെയ്തിട്ടുണ്ട്. അദ്ദേഹത്തിന്റെ പിന്‍ഗാമിയായി ഏറ്റവും അനുയോജ്യനായ നേതാവാണ് പി.കെ കുഞ്ഞാലിക്കുട്ടി. കേരളത്തിന്റെ വ്യവസായിക കുതിപ്പിന് അടിത്തറ പാകിയവരാണ് രണ്ട് നേതക്കളും. ഇതിന് പിന്തുണയായി അവര്‍ക്കൊപ്പം നില്‍ക്കാന്‍ കഴിഞ്ഞതില്‍ ചാരിതാര്‍ത്യമുണ്ടെന്നും കെ.എം മാണി കൂട്ടിച്ചേര്‍ത്തു.
എത്ര രൂക്ഷമായ പ്രശ്‌നത്തിനും സമവായം കണ്ടെത്താന്‍ പി.കെ കുഞ്ഞാലിക്കുട്ടിക്കുള്ള കഴിവ് അപാരമാണ്. കേരള രാഷ്ട്രീയത്തിന് തണുപ്പും തണലുമേകുന്ന ആല്‍വൃക്ഷമാണ് പി കെ കുഞ്ഞാലിക്കുട്ടി. മതേതരത്വത്തിന്റെയും ജനാധിപത്യത്തിന്റെയും ശാക്തീകരണത്തിന് മുന്നില്‍ നില്‍ക്കുന്ന മുസ്്‌ലിംലീഗും പി.കെ കുഞ്ഞാലിക്കുട്ടിയും തെരഞ്ഞെടുപ്പിനെ നേരിടുമ്പോള്‍ പിന്തുണ നല്‍കാന്‍ കേരള കോണ്‍ഗ്രസിന് മറ്റൊന്നും ആലോചിക്കാനില്ലെന്നും കെ.എം മാണി പറഞ്ഞു. പി.എം ജോണി അധ്യക്ഷത വഹിച്ചു. പി.ജെ ജോസഫ് മുഖ്യപ്രഭാഷണം നടത്തി.
എല്ലാ മേഖലയിലും പരാജപ്പെട്ട സര്‍ക്കാറാണ് കേരളം ഭരിക്കുന്നത്. ഇതിനെതിരെയുള്ള ജനവികാരം മലപ്പുറം ഉപതെരഞ്ഞെടുപ്പില്‍ പ്രതിഫലിക്കും. കുഞ്ഞാലിക്കുട്ടി വമ്പിച്ച ഭൂരിപക്ഷത്തില്‍ വിജയിക്കുമെന്നും അദ്ദേഹം പറഞ്ഞു. ജോസ് കെ മാണി എം.പി, ജോയ് എബ്രഹാം എം.പി, എം.എല്‍.എമാരായ മോന്‍സ് ജോസഫ്, റോഷി അഗസ്റ്റിന്‍, പി. ഉബൈദുല്ല, ടി.എ അഹമ്മദ് കബീര്‍, മുന്‍ എം.എല്‍.എ തോമസ് ഉണ്ണിയാടന്‍, ജോസഫ് എം പുതുശ്ശേരി, പി.ടി ജോസഫ്, ചാണ്ടി മാസ്റ്റര്‍, കെ.ജെ ദേവസ്യ, ജോബി മാസ്റ്റര്‍, അഡ്വ. ജോസ് ജോസഫ്, സജി മഞ്ഞക്കടമ്പന്‍, മുഹമ്മദ് ഇഖ്ബാല്‍, കെ.പി.എ നസീര്‍, പി.വി ജോണി, കെ.എം ഇഗ്ന്യേഷ്യസ്, മേഴ്‌സി ജെയിംസ്്, ആന്‍സി ജോയി പ്രസംഗിച്ചു.

സൂക്ഷ്മ പരിശോധന പൂര്‍ത്തിയായി; കുഞ്ഞാലിക്കുട്ടിയുടെ പത്രിക വരണാധികാരി സ്വീകരിച്ചു

chandrika — Fri, 24 Mar 2017 10:52:15 +0000

മലപ്പുറം: മലപ്പുറം ലോക്സഭ ഉപതെരഞ്ഞെടുപ്പില്‍ നാമനിര്‍ദ്ദേശ പത്രികകളുടെ സൂക്ഷ്മ പരിശോധന പൂര്‍ത്തിയായി. ഏഴ് പേരുടെ നാമനിര്‍ദ്ദേശ പത്രികകള്‍ സൂക്ഷ്മപരിശോധനയില്‍ തള്ളി. മൊത്തം 16 സ്ഥാനാര്‍ത്ഥികളാണ് പത്രിക നല്‍കിയത്. പത്രിക സമര്‍പ്പണത്തിന്റെ അവസാന ദിവസമായ ഇന്നലെ ഒന്‍പത് പേര്‍ പത്രിക നല്‍കിയിരുന്നു.

യു.ഡി.എഫ്. സ്ഥാനാര്‍ത്ഥി ശ്രീ പി.കെ. കുഞ്ഞാലിക്കുട്ടി, എല്‍.ഡി.എഫിലെ ശ്രീ എം.ബി. ഫൈസല്‍, എന്‍.ഡി.എ. സ്ഥാനാര്‍ത്ഥി ശ്രീ എന്‍ ശ്രീപ്രകാശ് എന്നിവര്‍ നേരത്തെ നാമനിര്‍ദേശ പത്രിക സമര്‍പ്പിച്ചിരുന്നു.

ഇന്ന് രാവിലെ 11 മണിയോടെ ആരംഭിച്ച സൂക്ഷ്മപരിശോധന വരണാധികാരി കൂടിയായ കലക്ടര്‍ അമിത് മീണയുടെ ചേംബറില്‍ വെച്ചാണ് നടന്നത്. യു.ഡി.എഫ് സ്ഥാനാര്‍ത്ഥി പി.കെ കുഞ്ഞാലിക്കുട്ടി, എല്‍.ഡി.എഫ് സ്ഥാനാര്‍ത്ഥി എം.ബി ഫൈസല്‍ എന്നിവര്‍ സൂക്ഷ്മ പരിശോധനയ്ക്ക് എത്തിയിരുന്നു.

അതേസമയം, കുഞ്ഞാലിക്കുട്ടിയുടെ നാമനിര്‍ദേശ പത്രികക്കെതിരെ ഉയര്‍ന്ന ആരോപണം വരണാധികാരി അംഗീകരിച്ചില്ല. പത്രകയിലെ ഒരു കോളം പൂരിപ്പിക്കാത്തതിനെതിരെ കഴിഞ്ഞ ദിവസം എതിര്‍സത്യവാങ്മൂലം സമര്‍പ്പിച്ചിരുന്നു. കുഞ്ഞാലിക്കുട്ടിയുടെ നാമനിര്‍ദേശപത്രിക തള്ളണമെന്നായിരുന്നു ആവശ്യം.
എന്നാല്‍ ഇത് തള്ളി കലക്ടര്‍ അമിത് മീണ കുഞ്ഞാലിക്കുട്ടിയുടെ പത്രിക സ്വീകരിക്കുകയായിരുന്നു. ഒരു കോളം പൂരിപ്പിക്കാതെ ഒഴിച്ചിട്ടതു പത്രിക തള്ളാന്‍ മതിയായ കാരണമല്ലെന്ന് കലക്ടര്‍ അറിയിച്ചു.

പി.കെ കുഞ്ഞാലിക്കുട്ടിയുടെ അപരനായി കെ.പി കുഞ്ഞാലിക്കുട്ടിയും എം.ബി ഫൈസലിന്റെ അപരനായി മുഹമ്മദ് ഫൈസലും മത്സര രംഗത്തുണ്ട്.

കുഞ്ഞാലിക്കുട്ടിക്ക് വേണ്ടി നാലു സെറ്റും എം.ബി ഫൈസലിനു വേണ്ടി രണ്ടും ശ്രീപ്രകാശിന് മൂന്നും സെറ്റ് പത്രികകളാണ് സമര്‍പ്പിച്ചത്. കുഞ്ഞാലിക്കുട്ടിക്ക് ഡമ്മി സ്ഥാനാര്‍ത്ഥിയായി എം.ഉമ്മറാണ് പത്രിക സമര്‍പ്പിച്ചത്. എന്നാല്‍ ഐടി നജീബാണ് ഫൈസലിന്റെ ഡമ്മി.
കഴിഞ്ഞ തവണ മത്സരിച്ച എസ്.ഡി.പി.ഐ, വെല്‍ഫെയര്‍ പാര്‍ട്ടികള്‍ക്ക് ഇത്തവണ മലപ്പുറത്ത് സ്ഥാനാര്‍ത്ഥികളില്ല. തിങ്കളാഴ്ചവരെ പത്രിക പിന്‍വലിക്കാം.

മലപ്പുറം ഉപതെരഞ്ഞെടുപ്പ്: സൂക്ഷ്മ പരിശോധന ഇന്ന്; പത്രിക നല്‍കിയത് 16 പേര്‍

chandrika — Fri, 24 Mar 2017 04:33:10 +0000

മലപ്പുറം: മലപ്പുറം ലോക്‌സഭ ഉപതെരഞ്ഞെടുപ്പില്‍ നാമനിര്‍ദ്ദേശ പത്രികകളുടെ സൂക്ഷ്മ പരിശോധന ഇന്ന് രാവിലെ നടക്കും.
പത്രിക സമര്‍പ്പണത്തിന്റെ അവസാന ദിവസമായ ഇന്നലെ ഒന്‍പത് പേര്‍ പത്രിക നല്‍കി. മൊത്തം 16 സ്ഥാനാര്‍ത്ഥികളാണ് പത്രിക നല്‍കിയത്. യു.ഡി.എഫ്. സ്ഥാനാര്‍ത്ഥി ശ്രീ പി.കെ. കുഞ്ഞാലിക്കുട്ടി, എല്‍.ഡി.എഫിലെ ശ്രീ എം.ബി. ഫൈസല്‍, എന്‍.ഡി.എ. സ്ഥാനാര്‍ത്ഥി ശ്രീ എന്‍ ശ്രീപ്രകാശ് എന്നിവര്‍ നേരത്തെ നാമനിര്‍ദേശ പത്രിക സമര്‍പ്പിച്ചിരുന്നു. കുഞ്ഞാലിക്കുട്ടിക്ക് വേണ്ടി നാലു സെറ്റും എം.ബി ഫൈസലിനു വേണ്ടി രണ്ടും ശ്രീപ്രകാശിന് മൂന്നും സെറ്റ് പത്രികകളാണ് സമര്‍പ്പിച്ചത്. കുഞ്ഞാലിക്കുട്ടിക്ക് ഡമ്മി സ്ഥാനാര്‍ത്ഥിയായി എം.ഉമ്മറാണ് പത്രിക സമര്‍പ്പിച്ചത്. എന്നാല്‍ ഐടി നജീബാണ് ഫൈസലിന്റെ ഡമ്മി.
കഴിഞ്ഞ തവണ മത്സരിച്ച എസ്.ഡി.പി.ഐ, വെല്‍ഫെയര്‍ പാര്‍ട്ടികള്‍ക്ക് ഇത്തവണ മലപ്പുറത്ത് സ്ഥാനാര്‍ത്ഥികളില്ല. തിങ്കളാഴ്ചവരെ പത്രിക പിന്‍വലിക്കാം.

മലപ്പുറം ഉപതെരഞ്ഞെടുപ്പ്: എം.ബി ഫൈസല്‍ എല്‍ഡിഎഫ് സ്ഥാനാര്‍ത്ഥി

chandrika — Sat, 18 Mar 2017 09:32:35 +0000

മലപ്പുറം ലോകസഭാ മണ്ഡലത്തില്‍ എല്‍.ഡി.എഫ് സ്ഥാനാര്‍ത്ഥിയായി എം.ബി ഫൈസല്‍ മത്സരിക്കും. ടി.കെ. ഹംസ യെപിന്തള്ളിയാണ് എല്‍ഡിഎഫ് മുന്നണി യോഗത്തില്‍ ഫൈസലിനെ തിരഞ്ഞെടുത്തത്. യു.ഡി.എഫ് സ്ഥാനാര്‍ത്ഥിയായി പി.കെ കുഞ്ഞാലിക്കുട്ടിയെ നേരത്തേ പ്രഖ്യാപിച്ചിരുന്നു. മലപ്പുറം ഉപതിരഞ്ഞെടുപ്പ് സംസ്ഥാന ഭരണത്തിന്റെ വിലയിരുത്തലായിരിക്കുമെന്ന് കോടിയേരി ബാലക്ണന്‍ തിരവനന്തപുരത്ത് പറഞ്ഞു. ഇതോടെ തിറഞ്ഞെടുപ്പ് ചിത്രം തെളിഞ്ഞിരിക്കുകയാണ്. പരിചയസമ്പത്തില്ലാത്ത സ്ഥാനാര്‍ത്ഥിയെ നിര്‍ത്തിയതോടെ യു.ഡി.എഫ് പാളയത്തില്‍ ആത്മവിശ്വാസം കൂടിയിരിക്കുക.യാണ്.

മലപ്പുറം ഉപതെരഞ്ഞെടുപ്പ്: എല്‍എഡിഎഫ് സ്ഥാനാര്‍ത്ഥി പ്രഖ്യാപനം ഇന്ന്

chandrika — Sat, 18 Mar 2017 05:26:44 +0000

മലപ്പുറം: മലപ്പുറം ലോക്‌സഭാ ഉപതെരഞ്ഞെടുപ്പില്‍ എല്‍ഡിഎഫ് സ്ഥാനാര്‍ത്ഥിയെ ഇന്നു പ്രഖ്യാപിക്കും. മലപ്പുറത്ത് ചേരുന്ന ജില്ലാ കമ്മിറ്റി യോഗത്തിനു ശേഷം കോടിയേരി ബാലകൃഷ്ണന്‍ സ്ഥാനാര്‍ത്ഥിയെ ഔദ്യോഗികമായി പ്രഖ്യാപിക്കും. സ്ഥാനാര്‍ത്ഥിയെ നിര്‍ണയിക്കുന്നതിനായി ഇന്നലെ എകെജി സെന്ററില്‍ സിപിഎം സംസ്ഥാന സെക്രട്ടറിയേറ്റ് യോഗം ചേര്‍ന്നിരുന്നു. മുന്‍ എംപി ടി.കെ ഹംസ, കര്‍ഷക സംഘം ജില്ലാ ക്മ്മിറ്റി അംഗം അഡ്വ.ടി.കെ അഷ്‌റഫലി, അഡ്വ. മുഹമ്മദ് റിയാസ്, എം.ബി ഫൈസല്‍ എന്നിവരുടെ പേരുകളാണ് ഉയര്‍ന്നു കേള്‍ക്കുന്നത്. മുസ്ലിംലീഗ് സ്ഥാനാര്‍ത്ഥിയായി പി.കെ കുഞ്ഞാലിക്കുട്ടിയെ പ്രഖ്യാപിച്ച സാഹചര്യത്തില്‍ കരുത്തനും ജനസമ്മതനുമായ ഒരാളെ തീരുമാനിക്കണമെന്നാണ് പാര്‍ട്ടി തീരുമാനം എന്നാല്‍ ഇതു സംബന്ധിച്ച് സിപിഎമ്മിനക്കത്ത് ആശയക്കുഴപ്പം രൂക്ഷമായതായാണ് വിവരം. ജനസമ്മതരെല്ലാം പരാജയഭീതിയില്‍ സ്ഥാനാര്‍ത്ഥിയാകാനില്ലെന്ന് അറിയിച്ചതാണ് പാര്‍ട്ടിയെ ആശയക്കുഴപ്പത്തിലാക്കുന്നത്. ഇടതു സര്‍ക്കാര്‍ അധികാരത്തില്‍ വന്നതിനു ശേഷം നടക്കുന്ന ആദ്യ ലോക്‌സഭാ ഉപതെരഞ്ഞെടുപ്പായതിനാല്‍ ഫലം സര്‍ക്കാറിന് നിര്‍ണായകമാണ്.
എന്‍ഡിഎ സ്ഥാനാര്‍ത്ഥിയായി ബിജെപി മലപ്പുറം ജില്ലാ വൈസ്പ്രസിഡന്റ് എന്‍.ശ്രീപ്രകാശ് മത്സരിക്കും. കഴിഞ്ഞ ലോക്‌സഭാ തെരഞ്ഞെടുപ്പിലും ശ്രീപ്രകാശ് തന്നെയായിരുന്നു എന്‍ഡിഎ സ്ഥാനാര്‍ത്ഥി. മഞ്ചേരി ബാറിലെ അഭിഭാഷകനാണ്.