Malasia – Chandrika Daily

ഇന്റര്‍നെറ്റ് കഫെയിലെ കമ്പ്യൂട്ടറില്‍ കണ്ട അജ്ഞാത ഫയല്‍ ജീവനക്കാരന്‍ ഡിലീറ്റ് ചെയ്തു; പിന്നീട് സംഭവിച്ചത് ഒരു ജീവിതം മാറിമറിഞ്ഞ കഥ

ചന്ദ്രിക വെബ് ഡെസ്‌ക്‌ — Mon, 05 Nov 2018 11:08:20 +0000

മലേഷ്യ: പന്ത്രണ്ടുകാരന്‍ നിര്‍മിച്ച കമ്പ്യൂട്ടര്‍ ഗെയിം അറിയാതെ ഡിലീറ്റ് ആയിപ്പോയാല്‍ എന്ത് സംഭവിക്കും? ഉത്തരം പലതാവാം..എന്നാല്‍ ഒരു രാജ്യം മുഴുവന്‍ ഒപ്പം നിന്ന കഥയാണ് മലേഷ്യയിലെ മുഹമ്മദ് താലിഫ് എന്ന വിദ്യാര്‍ഥിക്ക് പറയാനുള്ളത്. വലിയൊരു സ്വപ്നം പൊലിഞ്ഞതില്‍ സങ്കടമൊക്കെയുണ്ടായെങ്കിലും അത് മുഹമ്മദ് താലിഫ് എന്ന പന്ത്രണ്ടുകാരനെ പ്രസിദ്ധനാക്കിയിരിക്കുകയാണ്.സ്വന്തമായി കമ്പ്യൂട്ടറോ ഇന്റര്‍നെറ്റോ ഒന്നും ഇല്ലാത്തതിനാല്‍ സമീപത്തെ ഇന്റര്‍നെറ്റ് കഫേയിലായിരുന്നു മുഹമ്മദിന്റെ ഗെയിം നിര്‍മാണം.

എന്നാല്‍ കഫേയില്‍ പതിവില്ലാത്ത ഒരു ഫയല്‍ കണ്ട ജീവനക്കാരന്‍ അത് വൈറസാണെന്നു കരുതി ഉടനെ ഡിലീറ്റ് ചെയ്തു. എന്നാല്‍ സംഭവം 12 കാരന്റെ ജീവിതം മാറ്റിമറിച്ചു. രാജ്യം മുഴുവന്‍ ആ പന്ത്രണ്ടുകാരന്റെ കൂടെനിന്നു. രാജ്യത്തെ കായിക യുവജനക്ഷേമ വകുപ്പ് മന്ത്രി സയ്യിദ് സാദിഖ് നേരിട്ട് മുഹമ്മദിനെ കാണാനെത്തി.

പന്ത്രണ്ടുകാരനൊപ്പം നില്‍ക്കുന്ന ചിത്രവും അദ്ദേഹം പങ്കുവെച്ചു. ഇത് പോലെ കഠിനാധ്വാനം ചെയ്യുന്ന ഭാവി തലമുറയെയാണ് ആവശ്യമെന്നാണ് മന്ത്രി ചിത്രത്തിനൊപ്പം ട്വിറ്ററില്‍ കുറിച്ചത്. മലേഷ്യയിലെ ഏറ്റവും പ്രായം കുറഞ്ഞ ഗെയിം ഡെവലപ്പര്‍ക്കൊപ്പമാണ് നില്‍ക്കുന്നതെന്നും അദ്ദേഹം എഴുതി.

എന്തായാലും ഡിലീറ്റ് ആയ ഗെയിം ഫയല്‍ കഫേ അധികൃതര്‍ തന്നെ മുഹമ്മദിന് വീണ്ടെടുത്ത് കൊടുത്തു. സോംബി ഷൂട്ടര്‍ എന്ന ഗെയിമാണ് മുഹമ്മജ് നിര്‍മിച്ചത്.

കാണാതായ മലേഷ്യന്‍ വിമാനത്തിന്റെ ദിശ മനപ്പൂര്‍വം തെറ്റിച്ചതെന്ന്

chandrika — Mon, 30 Jul 2018 17:09:31 +0000

ക്വാലാലംപൂര്‍: 2014 മാര്‍ച്ച് എട്ടിന് ക്വാലാലംപൂരില്‍നിന്ന് ബീജിങിലേക്കുള്ള യാത്രമധ്യേ കാണാതായ മലേഷ്യന്‍ വിമാനത്തിന്റെ ദിശ മനപ്പൂര്‍വം തെറ്റിച്ചതാണെന്ന് അന്വേഷണ റിപ്പോര്‍ട്ട്. 239 യാത്രക്കാരുമായി വിമാനം എങ്ങോട്ടാണ് അപ്രത്യക്ഷമായതെന്നോ ആരാണ് ദിശ തെറ്റിച്ചതെന്നോ റിപ്പോര്‍ട്ടില്‍ പറയുന്നില്ല.
വ്യോമയാന ചരിത്രത്തിലെ ഏറ്റവും വലിയ ദുരൂഹതയായി അവശേഷിക്കുന്ന വിമാനത്തിന്റെ അവശിഷ്ടങ്ങള്‍ കണ്ടെത്താന്‍ സാധിക്കാത്തതിനാല്‍ അന്വേഷണം അപൂര്‍ണമാണെന്നും എംഎച്ച്370 ഇന്‍വെസ്റ്റിഗേഷന്‍ സംഘത്തിന്റെ മേധാവി കോക് സൂ ചോന്‍ പറഞ്ഞു. നിശ്ചിത റൂട്ടില്‍നിന്ന് വിമാനം ദിശ മാറി സഞ്ചരിക്കാന്‍ കാരണം എന്താണെന്ന് വ്യക്തമല്ല. റെഡാറിനെ വെട്ടിച്ചായിരുന്നോ വിമാനത്തിന്റെ തുടര്‍ന്നുള്ള സഞ്ചാരമെന്ന ചോദ്യവും ഉത്തരമില്ലാതെ തുടരുകയാണ്. പൈലറ്റുമാര്‍ ഉള്‍പ്പെടെ വിമാന ജീവനക്കാരുടെ പെരുമാറ്റത്തില്‍ അസ്വാഭാവികത കാണാനും സാധിച്ചിട്ടില്ല. വിമാനം ഇന്ത്യന്‍ മഹാസമുദ്രത്തില്‍ വീണിട്ടുണ്ടാകുമെന്ന് തന്നെയാണ് അന്വേഷണ സംഘത്തിന്റെ ഉറച്ച വിശ്വാസം. പക്ഷെ, ദിശ തിരിച്ചുവിടുന്നതിന് മുമ്പ് വിമാനത്തിന്റെ ട്രാന്‍സ്‌പോണ്ടര്‍ ആരോ മനപൂര്‍വം ഓഫ് ചെയ്തിരിക്കാം. മൂന്നാമതൊരാളുടെ ഇടപെടലും അന്വേഷണ സംഘം തള്ളിക്കളയുന്നില്ല. ദുരന്തത്തിലേക്കുള്ള യാത്രക്കൊടുവില്‍ വിമാനം മിനുട്ടില്‍ 25,000 അടി വേഗത്തില്‍ കടലില്‍ പതിച്ചിരിക്കാമെന്ന് ഓസ്‌ട്രേലിയന്‍ ട്രാന്‍സ്‌പോര്‍ട്ട് സേഫ്റ്റി ബ്യൂറോ നേരത്തെ അഭിപ്രായപ്പെട്ടിരുന്നു. പൈലറ്റുമാര് മനപ്പൂര്‍വം എന്തെങ്കിലും ചെയ്തതായി അന്വേഷണ സംഘം കരുതുന്നില്ല. തകര്‍ന്നു വീഴുന്നതിന് തൊട്ട് മുമ്പ് നടത്തിയ യാത്രയുടെ സാറ്റ്‌ലൈറ്റ് ഡാറ്റ സംഘത്തിന് ലഭിച്ചിട്ടുണ്ട്. ക്വാലാലംപൂരില്‍നിന്ന് ബീജിങ്ങിലേക്കുള്ള യാത്രയില്‍ നടപടി ക്രമങ്ങളെല്ലാം കൃത്യമായി പാലിച്ചിരുന്നു.

മലേഷ്യ തിരച്ചില്‍ അവസാനിപ്പിച്ചുഎംഎച്ച്370 ദുരൂഹമായി തുടരും

chandrika — Tue, 29 May 2018 15:23:58 +0000

ക്വാലാലംപൂര്‍: 2014 മാര്‍ച്ചില്‍ ക്വാലാലംപൂരില്‍നിന്ന് ബീജിങ്ങിലേക്കുള്ള യാത്രാമധ്യേ ദുരൂഹതയിലേക്ക് മറഞ്ഞ എംഎച്ച്370 വിമാനത്തിനുവേണ്ടിയുള്ള തെരച്ചില്‍ മലേഷ്യ അവസാനിപ്പിച്ചു. തെരച്ചില്‍ അവസാനിപ്പിച്ച വിവരം മലേഷ്യന്‍ ഭരണകൂടമാണ് അറിയിച്ചത്. മലേഷ്യന്‍ എയര്‍ലൈന്‍സിന്റെ വിമാനത്തിനും അതിലുണ്ടായിരുന്ന 239 യാത്രക്കാര്‍ക്കും എന്തു സംഭവിച്ചെന്ന ചോദ്യം ഉത്തരം കിട്ടാതെ ഇപ്പോഴും അവശേഷിക്കുകയാണ്.
വ്യോമയാന ചരിത്രത്തിലെ ഏറ്റവും രഹസ്യമായി വിമാനം തുടരും. ഏപ്രിലില്‍ തന്നെ തെരച്ചില്‍ ഔദ്യോഗികമായി അവസാനിപ്പിച്ചിരുന്നെങ്കിലും ചില സാങ്കേതിക കാരണങ്ങളാല്‍ മെയ് 29 വരെ നീട്ടുകയായിരുന്നു. ഇന്ത്യന്‍ മഹാസമുദ്രത്തില്‍ 120,000 ചതുരശ്ര കിലോമീറ്റര്‍ വിസ്തൃതിയില്‍ കടലില്‍ അരിച്ചുപെറുക്കിയിട്ടും വിമാനത്തെക്കുറിച്ച് തുമ്പൊന്നും കിട്ടിയിട്ടില്ല. ഓസ്‌ട്രേലിയയുടെ നേതൃത്വത്തിലുള്ള അന്താരാഷ്ട്ര തെരച്ചില്‍ കഴിഞ്ഞ വര്‍ഷം ജനുവരിയില്‍ തന്നെ നിര്‍ത്തിവെച്ചിരുന്നു. വിമാന യാത്രക്കാരുടെ ബന്ധുക്കളുടെ സമ്മര്‍ദ്ദത്തിനു വഴങ്ങി ഓഷ്യന്‍ ഇന്‍ഫിനിറ്റിയെന്ന അമേരിക്കന്‍ കമ്പനിയെ ഉപയോഗിച്ച് മലേഷ്യ നടത്തിയ തെരച്ചിലാണ് ഇപ്പോള്‍ അവസാനിപ്പിച്ചിരിക്കുന്നത്. വിമാനത്തിന്റെ അവശിഷ്ടങ്ങളോ ബ്ലാക്ക് ബോക്‌സുകളോ കണ്ടെത്തുകയാണെങ്കില്‍ പണം തന്നാല്‍ മതിയെന്ന വ്യവസ്ഥയിലായിരുന്നു കമ്പനി തെരച്ചില്‍ ആരംഭിച്ചത്. മലേഷ്യയുമായുണ്ടാക്കിയ കരാറിന്റെ അടിസ്ഥാനത്തില്‍ കമ്പനി ജനുവരിയില്‍ തെരച്ചില്‍ ആംരംഭിക്കുകയായിരുന്നു. അത്യാധുനിക ഉപകരണങ്ങള്‍ ഉപയോഗിച്ച് കടലിന്റെ അടിത്തട്ടില്‍ തെരച്ചില്‍ തുടര്‍ന്നെങ്കിലും വിമാനത്തിന്റെ സൂചനയൊന്നും ലഭിച്ചില്ല. ഇന്ത്യന്‍ മഹാസമുദ്രത്തില്‍ അന്താരാഷ്ട്ര സംഘം തെരച്ചില്‍ നടത്തിയ ഭാഗത്തിന്റെ വടക്ക് ഭാഗത്ത് 25,000 ചതുരശ്ര കിലോമീറ്റര്‍ വിസ്തൃതിയിലായിരുന്നു അമേരിക്കന്‍ കമ്പനി അന്വേഷണത്തിനിറങ്ങിയത്. ദൗത്യം പരാജയപ്പെട്ട സാഹചര്യത്തില്‍ ദു:ഖഭാരത്തോടെ പിന്മാറുകയാണെന്ന് ഓഷ്യന്‍ ഇന്‍ഫിനിറ്റി ചീഫ് എക്‌സിക്യൂട്ടീവ് ഒളിവര്‍ പ്ലങ്കറ്റ് അറിയിച്ചു. വിമാനം കണ്ടെത്താന്‍ മലേഷ്യ കാണിച്ച താല്‍പര്യവും ശ്രമങ്ങളും ഏറെ വിലപ്പെട്ടതാണെന്ന് അദ്ദേഹം പറഞ്ഞു. സോണാറുകളും ക്യാമറകളും ഘടിപ്പിച്ച എട്ട് ഡ്രോണുകള്‍ ഉപയോഗിച്ചാണ് കമ്പനി തെരച്ചില്‍ നടത്തിയത്. 6000 മീറ്റര്‍ താഴെ വരെ കമ്പനിയുടെ ഡ്രോണുകള്‍ വിമാനത്തിന്റെ അവശിഷ്ടവും തേടി അലഞ്ഞു. പക്ഷെ, അന്വേഷണം വിഫലമാവുകയായിരുന്നു. മലേഷ്യന്‍ വിമാനത്തിന്റേതെന്ന് സ്ഥിരീകരിച്ച മൂന്ന് ഭാഗങ്ങള്‍ ഇന്ത്യന്‍ മഹാസമുദ്രത്തിന്റെ പടിഞ്ഞാറന്‍ തീരത്തുനിന്ന് ലഭിച്ചിട്ടുണ്ട്. വിമാനത്തിന്റെ ചിറകിന്റെ ഭാഗവും ഇതില്‍ പെടും. വിമാനം കടലില്‍ തകര്‍ന്നു വീഴുമ്പോള്‍ നിയന്ത്രണം നഷ്ടപ്പെട്ടിരുന്നതായി ഓസ്‌ട്രേലിയന്‍ അന്വേഷണ ഉദ്യോഗസ്ഥര്‍ കണ്ടെത്തിയിട്ടുണ്ട്.