Mammooty – Chandrika Daily

മൂന്ന് പതിറ്റാണ്ടിന്റെ ഇടവേളയ്ക്ക് ശേഷം മമ്മൂട്ടിയും അടൂരും ഒന്നിക്കുന്നു

webdesk17 — Thu, 22 Jan 2026 15:12:30 +0000

31 വര്‍ഷങ്ങള്‍ക്ക് ശേഷം വീണ്ടും അടൂര്‍ ഗോപാലകൃഷ്ണനും മമ്മൂട്ടിയും ഒന്നിക്കുന്നു. മമ്മൂട്ടി കമ്പനി നിര്‍മ്മിക്കുന്ന എട്ടാമത്തെ ചിത്രത്തിലൂടെയാണ് ഇരുവരും ഒന്നിക്കുന്നത്. ഈ ചിത്രത്തിന്റെ പേര് നാളെ പുറത്തുവിടും. ‘മതിലുകള്‍’, ‘അനന്തരം’, ‘വിധേയന്‍’ തുടങ്ങിയ ചിത്രങ്ങളിലൂടെ ഇരുവരും ഒരുമിച്ചതിനു ശേഷം അടുത്ത അടൂര്‍-മ്മൂട്ടി ചിത്രത്തിനായുള്ള കാത്തിരിപ്പിലാണ് ആരാധകര്‍. ചിത്രത്തിന്റെ ചിത്രീകരണം എറണാകുളത്ത് ആരംഭിക്കുമെന്നാണ് സൂചനകള്‍.

തകഴി ശിവശങ്കരപ്പിള്ളയുടെ ‘രണ്ടിടങ്ങഴി’യെ ആസ്പദമാക്കിയാണ് സിനിമ എന്ന റിപ്പോര്‍ട്ടുകളും പുറത്തുവരുന്നുണ്ട്. ചിത്രത്തില്‍ മമ്മൂട്ടിക്കൊപ്പം അനു സിത്താരയുമുണ്ട്. ‘രണ്ടിടങ്ങഴി’, 1950കളിലെ കുട്ടനാട്ടിലെ കര്‍ഷകരുടെ ജീവിതം പറഞ്ഞ നോവലാണ്. ഈ നോവലിനെ ആസ്പദമാക്കി 1958ല്‍ നോവല്‍ ഇറങ്ങിയിരുന്നു. ‘രണ്ടിടങ്ങഴി’യാണ് സിനിമയാകുന്നതെങ്കില്‍ ഇത് നോവലിനെ പശ്ചാത്തലമാക്കിയുള്ള രണ്ടാമത്തെ സിനിമയാണ്.

1994ല്‍ ഇറങ്ങിയ ‘വിധേയന്’ ശേഷം 31 വര്‍ഷങ്ങള്‍ക്ക് ശേഷമാണ് ഈ കൂട്ടുക്കെട്ടില്‍ സിനിമ ഒരുക്കുന്നത്. വിധേയനിലെ ‘ഭാസ്‌കര പട്ടേലരി’ന് മമ്മൂട്ടിക്ക് ദേശീയ പുരസ്‌കാരം ലഭിച്ചിരുന്നു. ‘മതിലുകളിലെ’ അഭിനയത്തിനായിരുന്നു മമ്മൂട്ടിക്ക് ആദ്യ ദേശീയ അവാര്‍ഡും അടൂര്‍ ഗോപാലകൃഷ്ണന് മികച്ച സംവിധായകനുള്ള അവാര്‍ഡും ലഭിച്ചിരുന്നു.

2016 ല്‍ ഇറങ്ങിയ ‘പിന്നെയും’ ആണ് അടൂരിന്റെ സംവിധാനത്തില്‍ പുറത്തിറങ്ങിയ അവസാനത്തെ സിനിമ.

രാഷ്ട്രീയ നിലപാടുകള്‍ കൊണ്ടും മതസ്വത്വം കൊണ്ടും ഇത്രമേല്‍ അവഗണിക്കപ്പെട്ട മറ്റൊരു നടനും ഉണ്ടാവില്ല; ഗീവര്‍ഗീസ് മാര്‍ കൂറിലോസ്

webdesk18 — Tue, 18 Nov 2025 15:33:10 +0000

മമ്മൂട്ടിയുടെ അഭിനയത്തെ കുറിച്ചുള്ള കുറിപ്പുമായി യാക്കോബായ നിരണം ഭദ്രാസനാധിപന്‍ ഗീവര്‍ഗീസ് മാര്‍ കൂറിലോസ്. തന്റെ രാഷ്ട്രീയ നിലപാടുകള്‍ കൊണ്ടും മതസ്വത്വം കൊണ്ടും ഇത്രമേല്‍ അവഗണിക്കപ്പെട്ട മറ്റൊരു നടനും ഇന്ത്യന്‍ സിനിമയില്‍ ഉണ്ടാവില്ലെന്നും ഗീവര്‍ഗീസ് മാര്‍ കൂറിലോസ് പറഞ്ഞു. ഇന്ത്യന്‍ സിനിമയില്‍ മെത്തേഡ് ആക്റ്റിംഗിന്റെ അവസാന വാക്കാണ് മമ്മൂട്ടിയെന്നും ഇന്ത്യന്‍ സിനിമയുടെ ഡാനിയേല്‍ ഡേ ലൂയിസും റോബര്‍ട്ട് ഡി നീറോ ആണ് അദ്ദേഹമെന്നും അദ്ദേഹം കുറിച്ചു. മമ്മൂട്ടിയെ ഇളം തലമുറ പാഠപുസ്തകമാക്കണം എന്നും അദ്ദേഹം ഫേസ്ബുക്കില്‍ കുറിച്ചു.

ഫേസ്ബുക്ക് പോസ്റ്റിന്റെ പൂർണരൂപം:

നിങ്ങൾ ഇത് എന്ത് ഭാവിച്ചാ മമ്മൂക്ക?

കുറച്ചു ദിവസം മുൻപ് കുവൈറ്റിൽ നിന്നും നാട്ടിലേക്കുള്ള മടക്ക യാത്രയിലാണ് കുവൈറ്റ്‌ എയർവേസ് ഫ്ലൈറ്റിൽ “ഭ്രമയുഗം” മൂവി കണ്ടത്. അപ്പോൾ മനസ്സിൽ ചോദിച്ച ചോദ്യമാണ് മുകളിൽ കുറിച്ചത്

ഇന്ത്യൻ സിനിമയിൽ method acting ഇൽ മമ്മൂട്ടി അവസാന വാക്കാണ്. പരകായ പ്രവേശം അതിന്റെ ഔന്നത്യം പ്രാപിക്കുന്നു ഈ മഹാ നടനിൽ. ഒരു കഥാ പാത്രമായി മാറാൻ അദ്ദേഹം ചെയ്യുന്ന ഗൃഹപാഠം! ഇന്ത്യൻ സിനിമയുടെ Daniel Day- Lewis എന്നോ Robert de Niro എന്നോ വിളിക്കാവുന്ന ഉയരത്തിലാണ് അദ്ദേഹത്തിന്റെ പകർന്നാട്ടം. എബ്രഹാം ലിങ്കനെ അവതരിപ്പിച്ച Daniel Day-Lewis ഷൂട്ടിംഗ് തീരുന്നതു വരെയും ആ കഥാപത്രത്തിൽ നിന്നും പുറത്തു കടന്നിട്ടില്ല എന്ന് വായിച്ചിട്ടുണ്ട്. മമ്മൂട്ടി അംബേദ്കർ ചെയ്തപ്പോൾ നടത്തിയ ഗവേഷണം, ഇംഗ്ലീഷ് ഭാഷ accent പരിശീലനം എല്ലാം നടനം എത്ര ഗൗരവമായിട്ടാണ് എടുക്കുന്നത് എന്നതിന്റെ സൂചകങ്ങളാണ്. Taxi Driver ആയി അഭിനയിക്കാൻ ജീവിതത്തിൽ de Niro taxi driver ആയതു പോലെ!

ആകാര ഭംഗിയും ശബ്ദ സൗകുമാര്യവും അപാര ശബ്ദ വിന്യസവും (modulation ) ഇത്രമേൽ സാമാന്വയിച്ചിരിക്കുന്ന മറ്റൊരു നടനെ നമുക്ക് സങ്കൽപ്പിക്കാൻ കഴിയില്ല. ഭാഷയുടെ വൈവിധ്യങ്ങളും ഇത്രമേൽ വഴങ്ങുന്ന മറ്റൊരു നടനും ഇല്ല. സൂക്ഷ്മ അഭിനയം മമ്മൂട്ടിയിൽ പൂർണത കൈവരിക്കുന്നു. ശരീര ഭാഗങ്ങളുടെ ചലനങ്ങൾ ഇത്രയും ഭാവ ഗംഭീരമായി അവതരിപ്പിക്കാൻ മമ്മൂട്ടിക്കുള്ള കഴിവ് അപാരമാണ്. അമരത്തിലെയും ഉദ്യാനപാലകനിലെയും അദ്ദേഹത്തിന്റെ നടപ്പ്, ഭ്രമയുഗത്തിലെയും ഭൂതകണ്ണാടിയിലെയും നോട്ടം ഒക്കെ ഈ ഭാവഭിനയ പൂർണതയുടെ അടയാളങ്ങളാണ്. കണ്ണുകൾ കൊണ്ട് മാത്രം പേടിപ്പിക്കാനും കരയിപ്പിക്കാനും ചിരിപ്പിക്കാനും (കാഴ്ച്ച ) കഴിയുന്ന അപൂർവം നടന്മാരിൽ ഒരാൾ! ഒരു വടക്കൻ വീരഗാഥ, അമരം, വാത്സല്യം, കാഴ്ച, മൃഗയ, വിധേയൻ, ഭൂതകണ്ണാടി, മതിലുകൾ, പാലേരി മാണിക്യം, പൊന്തൻ മാട, പ്രാഞ്ചിയേട്ടൻ, അരയന്നങ്ങളുടെ വീട്, യാത്ര, ന്യൂ ഡൽഹി, നിറക്കൂട്ടു അങ്ങനെ എത്ര എത്ര ചിത്രങ്ങളിൽ കൂടി മമ്മൂട്ടി നമ്മെ വിസ്മയിപ്പിച്ചിട്ടുണ്ട്. ഇനിയും അഭിനയിക്കാനുള്ള അടങ്ങാത്ത ആർത്തി അദ്ദേഹത്തെ അദ്ദേഹത്തിന്റെ തന്നെ ഭാഷയിൽ “ഇനിയും മൂർച്ച കൂട്ടാൻ പാകത്തിൽ തേച്ചു മിനുക്കാൻ ” കഴിവുള്ള സംവിധായകരുടെ കൈകളിൽ എത്തിക്കട്ടെ

ഒരു പക്ഷെ തന്റെ രാഷ്റ്റ്രീയ നിലപാടുകൾ കൊണ്ടും മത സ്വത്വം കൊണ്ടും ഇത്രമേൽ അവഗണിക്കപ്പെട്ട മറ്റൊരു നടനും ഇന്ത്യൻ സിനിമയിൽ ഉണ്ടാവില്ല. പേരന്പ്, നന്പകൽ നേരത്തു, കാതൽ. .,അങ്ങനെ പോകുന്നു ഈ മാറ്റിനിർത്തലിന്റെ രാഷ്ട്രീയ ഉദാഹരനങ്ങൾ. ..

എഴുപതുകളിലും പുതു തലമുറയെ വെല്ലുവിളിച്ചു കൊണ്ട് നാട്യകലയിൽ പുതിയ ഉയരങ്ങൾ കീഴടക്കുന്ന മമ്മൂട്ടിയെ ഇളം തലമുറ പാഠപുസ്തകമാക്കണം.

അത് കൊണ്ട് മമ്മൂട്ടിയും മോഹൻലാലും മാറി നിൽക്കുകയല്ല വേണ്ടത്, മറിച്ചു വരും തലമുറ അവരോട് ഏറ്റുമുട്ടി വിജയിക്കട്ടെ

നമ്മുടെ എല്ലാം പ്രാർത്ഥന സഫലമായി മമ്മൂട്ടി രോഗത്തെ തോൽപിച്ചു വീണ്ടും തിരിച്ചു വന്നിരിക്കുന്നു. ..നാട്യ കലയിൽ സപര്യ തുടരാൻ. ..തുടർന്നും മമ്മൂട്ടി നമ്മെ വിസ്മയിപ്പിക്കട്ടെ

ഒരു ആഗ്രഹം കൂടി പങ്കു വയ്ക്കുന്നു :

കേരള സമൂഹത്തെ മാറ്റി മറിച്ച മഹാത്മാ അയ്യങ്കാളി എന്ന ചരിത്ര പുരുഷനെ മമ്മൂട്ടി അഭ്രപാളികളിൽ അവതരിപ്പിച്ചു കാണണം എന്ന ആഗ്രഹം

ഒരു Mammoottyfan

ദാരിദ്ര്യം ഇനിയും നമ്മുടെ മുന്നിലുണ്ട്; വിശക്കുന്ന വയറിന് മുന്നില്‍ ഒരു വികസനത്തിനും വിലയില്ല; മമ്മൂട്ടി

webdesk18 — Sat, 01 Nov 2025 14:57:47 +0000

കേരളത്തില്‍ അതിദാരിദ്ര്യം മാത്രമേ മാറിയിട്ടുള്ളൂവെന്നും ദാരിദ്ര്യം ഇനിയും നമ്മുടെ മുന്നിലുണ്ടെന്നും നേട്ടങ്ങളെല്ലാം നേടിയത് സാമൂഹ്യബോധത്തിന്റെയും ജനാധിപത്യത്തിന്റെയും അടിസ്ഥാനത്തിലാണെന്ന് മമ്മൂട്ടി. കേരളം തന്നേക്കാള്‍ ചെറുപ്പമാണെന്നും തോളോട് തോള്‍ ചേര്‍ന്ന് ദാരിദ്ര്യത്തെ നേരിടാമെന്നും വിശക്കുന്ന വയറിന് മുന്നില്‍ ഒരു വികസനത്തിനും വിലയില്ലെന്നും മമ്മൂട്ടി പറഞ്ഞു.

‘കേരളം തന്നേക്കാള്‍ ചെറുപ്പമാണ്. കേരളത്തിന്റെ പല സൂചികകളും ലോകത്തെ അമ്പരപ്പിച്ചിട്ടുണ്ട്. വികസനം എന്ന് പറയുമ്പോള്‍ ആരുടെ വികസനമാണ്. വികസിക്കേണ്ടത് സാമൂഹ്യജീവിതമാണ്. രാജപാതകളും വലിയ കെട്ടിടങ്ങളും നിര്‍മിക്കുന്നതുകൊണ്ട് വികസനം സാധ്യമാകുന്നില്ല. വികസനം പൂര്‍ണതോതില്‍ എത്തണമെങ്കില്‍ ദാരിദ്ര്യത്തെ പരിപൂര്‍ണമായും തുടച്ചുമാറ്റണം. അത്തരത്തിലുള്ള സ്ഥലങ്ങളില്‍ എന്റെ അറിവില്‍ അപൂര്‍വമായിട്ടേയുള്ളൂ.. ഏത് കണ്ണഞ്ചിപ്പിക്കുന്ന വികസനമാണെങ്കിലും വിശക്കുന്ന വയറിന് മുന്നില്‍ ഒരു വികസനത്തിനും വിലയില്ല. എല്ലാവര്‍ക്കും കേരളപ്പിറവി ദിനാശംസകളും ഇന്ന് ജനിച്ചവര്‍ക്ക് ജന്മദിനാശംസകളും’ മമ്മൂട്ടി പറഞ്ഞു. എട്ട് മാസങ്ങള്‍ക്ക് ശേഷമാണ് മമ്മൂട്ടി പൊതുപരിപാടിയില്‍ പങ്കെടുത്തത്.

‘ശ്രുതിയുടെ വേദന ചിന്തിക്കാവുന്നതിനുമപ്പുറം’; ജെൻസന്റെ വിയോഗദുഃഖത്തിൽ മമ്മൂട്ടി

webdesk14 — Thu, 12 Sep 2024 07:22:15 +0000

ഓർക്കാപ്പുറത്ത് ഉറ്റവരെ നഷ്‌ടമായ ശ്രുതിയെ വിട്ട് പ്രതിശ്രുത വരൻ ജെൻസണും വിടവാങ്ങിയ വാർത്തയിലെ വിറങ്ങലിപ്പ് ഇനിയും മാറിയിട്ടില്ല മലയാളിക്ക്. മുണ്ടക്കൈ ഉരുൾപൊട്ടൽ ദുരന്തത്തിൽ അച്ഛനെയും അമ്മയെയും സഹോദരിയെയും മറ്റു കുടുംബാംഗങ്ങളെയും കവർന്നപ്പോഴും, താലി ചാർത്താനായി കൈപിടിച്ച ജെൻസൺ ശ്രുതിക്ക് താങ്ങും തണലുമായി കൂടെയുണ്ടായിരുന്നു. വിധിവൈപരീത്യമെന്നു പറയട്ടെ, കഴിഞ്ഞ ദിവസം കൽപ്പറ്റയിൽ വച്ചുണ്ടായ വാഹനാപകടത്തിൽ ജെൻസണും ശ്രുതിയെ വിട്ടകന്നു.

ഇരുവർക്കും പരിക്കേറ്റു എങ്കിലും, തലയ്‌ക്കേറ്റ ആഴത്തിലെ ക്ഷതമായിരുന്നു ജെൻസന്റെ മരണകാരണം. ബുധനാഴ്ച രാത്രിയോട് കൂടി ജെൻസൺ മരണത്തിനു കീഴടങ്ങി. ജെൻസനെ അവസാനമായി കാണാൻ, ശ്രുതി ആശുപത്രിയിൽ വന്നിരുന്നു. സംസ്കാര ചടങ്ങുകൾ ഇന്ന് വൈകുന്നേരം നടക്കും.

ജെൻസന്റെ വിയോഗത്തിൽ നടൻ മമ്മൂട്ടി ദുഃഖം രേഖപ്പെടുത്തുന്നു. ‘ജെൻസന്റെ വിയോഗം വലിയ ദുഃഖം ഉണ്ടാക്കുന്നു.. ശ്രുതിയുടെ വേദന…ചിന്തിക്കാവുന്നതിനും അപ്പുറമാണ്….സഹനത്തിന് അപാരമായൊരു ശക്തി ലഭിക്കട്ടെ ശ്രുതിക്കും ജെൻസന്റെ പ്രിയപ്പെട്ടവർക്കും’ എന്ന് അദ്ദേഹം ഫേസ്ബുക്കിൽ കുറിച്ചു.

സിനിമയിൽ മാത്രമല്ല ജീവിതത്തിലും മെഗാസ്റ്റാർ ;ജൂഡ് ആന്റണി വിഷയത്തില്‍ ഖേദം പ്രകടിപ്പിച്ച്‌ മമ്മൂട്ടി

Test User — Wed, 14 Dec 2022 13:09:13 +0000

‘2018’ എന്ന സിനിമയുടെ ട്രെയിലര്‍ ലോഞ്ചിനോട് അനുബന്ധിച്ചു നടന്ന ചടങ്ങില്‍ സംവിധായകന്‍ ജൂഡ് ആന്റണിയെ പരിഹസിച്ചതിന് ഖേദം പ്രകടിപ്പിച്ച്‌ മമ്മൂട്ടി.ചടങ്ങില്‍ തമാശയായിട്ട് മമ്മൂട്ടി പറഞ്ഞകാര്യം സോഷ്യല്‍ മീഡിയയില്‍ ബോഡി ഷെയിമിംഗ് എന്ന് തരത്തില്‍ പ്രചരിക്കുകയായിരുന്നു. മമ്മൂട്ടിയെ പിന്തുണച്ച്‌ ജൂഡ് ആന്റണി രംഗത്ത് വരികയും ചെയ‌്തു.

എന്നാല്‍ ആവേശത്തില്‍ ഉപയോഗിച്ച വാക്കുകള്‍ ചിലരെ അലോസരപ്പെടുത്തിയതില്‍ തനിക്കുള്ള ഖേദം പ്രകടിപ്പിക്കുന്നതോടൊപ്പം ഇങ്ങനെയുള്ള പ്രയോഗങ്ങള്‍ ആവര്‍ത്തിക്കാതിരിക്കുവാന്‍ മേലില്‍ ശ്രദ്ധിക്കുമെന്ന് ഉറപ്പു തരുന്നുവെന്നും മമ്മൂട്ടി ഫേസ്ബുക്കില്‍ കുറിച്ചു.

“പ്രിയരെ കഴിഞ്ഞ ദിവസം ‘2018’ എന്ന സിനിമയുടെ ട്രൈലർ ലോഞ്ചിനോട് അനുബന്ധിച്ചു നടന്ന ചടങ്ങിൽ സംവിധായകൻ ‘ജൂഡ് ആന്റണി’യെ പ്രകീർത്തിക്കുന്ന ആവേശത്തിൽ ഉപയോഗിച്ച വാക്കുകൾ ചിലരെ അലോസരപ്പെടുത്തിയതിൽ എനിക്കുള്ള ഖേദം
പ്രകടിപ്പിക്കുന്നതോടൊപ്പം ഇങ്ങനെയുള്ള പ്രയോഗങ്ങൾ ആവർത്തിക്കാതിരിക്കുവാൻ മേലിൽ ശ്രദ്ധിക്കുമെന്ന് ഉറപ്പു തരുന്നു. ഓർമ്മിപ്പിച്ച എല്ലാവർക്കും നന്ദി.”

കേരളത്തില്‍ 2018ലുണ്ടായ മഹാപ്രളയത്തെ പശ്ചാത്തലമാക്കിയാണ് ചിത്രം ഒരുങ്ങുന്നത്. ടൊവിനോ തോമസ്, കുഞ്ചാക്കോ ബോബന്‍, ആസിഫ് അലി, വിനീത് ശ്രീനിവാസന്‍, അപര്‍ണ ബാലമുരളി, കലൈയരസന്‍, നരേന്‍, ലാല്‍, ഇന്ദ്രന്‍സ്, അജു വര്‍ഗീസ്, തന്‍വി റാം, ശിവദ തുടങ്ങി വന്‍ താരനിരയാണ് ചിത്രത്തിലുള്ളത്.

കോവിഡ് കാലത്ത് പുത്തന്‍ പരസ്യ രീതിയുമായി മമ്മൂട്ടി; ഇത്തവണ കാനോണ്‍ മിറര്‍ലെസ് ക്യാമറ

chandrika — Thu, 10 Sep 2020 14:50:09 +0000

കോവിഡ് കാലത്ത് പുത്തന്‍ പരസ്യ രീതിയുമായി മെഗാ സ്റ്റാര്‍ മമ്മൂട്ടി. തന്റെ സോഷ്യല്‍ മീഡിയാ പ്ലാറ്റ്‌ഫോമിലൂടെ പ്രിയങ്കരമായ പുത്തന്‍ ഗാഡ്ജറ്റുകള്‍ പരിചയപ്പെടുത്തിയാണ് താരം രംഗത്തെത്ത്. കാനോന്റെ പുത്തന്‍ മിറര്‍ലെസ് ക്യാമറ കാനോണ്‍ ഇഒഎസ് ആര്‍ ഫൈവ് പരിചയപ്പെടുത്തിയാണ് ഇത്തവണ മമ്മൂട്ടി രംഗത്തെത്തിയത്.

കുറേ കാലമായി ആഗ്രഹിച്ചിരുന്ന ഒരു ക്യാമറ എന്റെ കയ്യില്‍ കിട്ടി. കാനോണ്‍ ഇഒഎസ് ആര്‍ ഫൈവ്, അദ്ദേഹത്തിന്റെ ഔദ്യോഗിക ഫെയ്‌സ്ബുക്ക് പേജില്‍ പുറത്തുവിച്ച ക്യമറാ ‘അണ്‍ബോക്‌സിങ്’ വീഡിയോയില്‍ മമ്മൂട്ടി പറഞ്ഞു. ഗാഡ്ജറ്റ് പ്രേമിയായ അറിയപ്പെടുന്ന മലയാളത്തിന്റെ സൂപ്പര്‍ താരം കോവിഡ് കാലത്ത് ഇത് രണ്ടാം തവണയാണ് സമൂഹമാധ്യമങ്ങളിലൂടെ ഇത്തരത്തില്‍ പുതിയത് ആരാധകരോട് പങ്കുവക്കുന്നത്.

https://www.facebook.com/257135417773/videos/322296009003457/

നേരത്തെ ഇന്‍സ്റ്റാഗ്രാമില്‍ മമ്മൂട്ടി പങ്കുവെച്ച സാംസങിന്റെ എസ്20 അള്‍ട്രാ ഫോണ്‍ ചിത്രം വൈറലായിരുന്നു. പ്രായത്തെ തോല്‍പ്പിക്കും വിധമുള്ള ഫിറ്റ്നസിലും കിടിലന്‍ ലുക്കിലും പ്രേക്ഷകരുടെ മുന്നില്‍ പ്രത്യക്ഷപെട്ട ചിത്രത്തിലാണ് താരം സ്മാാര്‍ട്ഫോണ്‍ കൂടി പരിചയപ്പെടുത്തിയത്. മമ്മൂക്കയെ പോലെ തന്നെ ചിത്രം കാണുന്നവരുടെ ശ്രദ്ധ ആ ഫോണിലും പതിഞ്ഞിരുന്നു. മമ്മൂട്ടി ഉപയോഗിക്കുന്ന ഫോണ്‍ എതാണെന്നറിയാന്‍ ആരാധകര്‍ ആകാംക്ഷയിലുമായിരുന്നു.

2020 മാര്‍ച്ചില്‍ പുറത്തിറക്കിയ സാംസങിന്റെ എസ്20 പരമ്പരയിലെ ഏറ്റവും വലുതും ഉയര്‍ന്ന സൗകര്യങ്ങളുള്ള വിലകൂടിയതുമായ ഫോണ്‍ ആണ് മമ്മൂട്ടിയുടെ കയ്യിലുണ്ടായിരുന്നത്. 6.9 ഇഞ്ച് ഡൈനാമിക് അമോലെഡ് 2എക്സ് കപ്പാസിറ്റീവ് ടച്ച് സ്‌ക്രീന്‍ ഉള്ള സാംസങ് എസ് 20 അള്‍ട്ര ഫോണിന് 97,999 രൂപയിലാണ് ആമസോണില്‍ വില തുടങ്ങുന്നത്. ഇതിന്റെ കൂടിയ വില 175900 രൂപയാണ്. സ്റ്റോറേജിന്റേയും റാമിന്റേയും അടിസ്ഥാനത്തില്‍ 128ജിബി-12ജിബി റാം, 256 ജിബി -12 ജിബി റാം, 512ജിബി-16ജിബി റാം എന്നിങ്ങനെ മൂന്ന് പതിപ്പുകളാണ് എസ്20 അള്‍ട്രയ്ക്ക്.

അതേസമയം, ഇന്ന് പുറത്തുവിട്ട ക്യാമറ, കാനോന്റെ ഏറ്റവും പുതിയ മിറര്‍ലെസ് ക്യാമറയാണ്. ഒന്നര ലക്ഷത്തിന് മുകളിലാണ് ക്യാമറയുടെ വില. ക്യാമറ എത്തിയെന്നും ഇനി ഇതിലായിരിക്കും ഫോട്ടോസ് എടുക്കുകയെന്നുമാണ് പങ്കുവച്ച വിഡിയോയില്‍ മമ്മൂട്ടി പറയുന്നത്. എന്റെ പുതിയ ഗാഡ്ജറ്റ്‌സ് എന്ന ടൈറ്റിലില്‍ പുറത്തുവന്ന മമ്മൂട്ടിയുടെ ‘അണ്‍ബോക്‌സിങ്’ ഏതായാലും ആരാധകര്‍ ഏറ്റെടുത്തുകഴിഞ്ഞു. ലോക്ഡൗണിന് ഇടയില്‍ മമ്മൂട്ടി വീട്ടിലിരുന്ന് പകര്‍ത്തിയ ചിത്രങ്ങള്‍ സമൂഹമാധ്യമങ്ങളില്‍ വൈറലായിരുന്നു.

മമ്മൂട്ടിയെ കാണാന്‍ പാതിരാത്രിയിലും ആരാധകര്‍; ഇച്ചാക്കക്ക് പെരുന്നാള്‍ മുത്തവുമായി ലാല്‍; 66ലും 69ലും 99ലും ഇങ്ങിനെതന്നെയാവുമെന്ന് സലീം കുമാര്‍

chandrika — Mon, 07 Sep 2020 06:41:15 +0000

69ാം ജന്മദിനത്തില്‍ മെഗാസ്റ്റാര്‍ മമ്മൂട്ടിക്ക് പിറന്നാള്‍ ആശംസകളുമായി താരലോകം. ഫിറ്റ്‌നസ് കൊണ്ട് എന്നും അത്ഭുതപ്പടുത്തുന്ന മലയാളത്തിന്റെ മാത്രം അഹങ്കാരത്തിന് പ്രായത്തിന്റെ പാടുകള്‍ മനസ്സിലും ശരീരത്തിലും വീഴ്ത്താതെയാണ് പുതിയ പിറന്നാളും എത്തിയിരിക്കുന്നത്. എല്ലാ വര്‍ഷവും കൂടുന്ന അക്കങ്ങളെ പോലും അമ്പരിപ്പിക്കുന്ന മമ്മൂട്ടിക്ക് പ്രായമാണോ ഗ്ലാമറാണോ കൂടുന്നതെന്ന സംശയമാണ് ഓരോ പിറന്നാളിലും ആരാധകര്‍ ചോദിക്കുന്നത്. കുടുംബനാഥനായും ചേട്ടനായും പൊലീസുകാരനായും ജേര്‍ണലിസ്റ്റായും രാഷ്ട്രീയക്കാരനായും അധ്യാപകനായും സാഹിത്യകാരനായും അടിയാനായും ഭൂതമായും ചരിത്രപുരുഷനായും വെള്ളിത്തിരയില്‍ മിന്നിയ മമ്മൂട്ടിയെന്ന മമ്മൂക്കയ്ക്ക് ഇന്ന് പിറന്നാളാശംസകള്‍ നല്‍കുന്ന തിരക്കിലാണ് ആരാധകര്‍ക്കപ്പുറം സെലിബ്രറ്റികളും.

https://www.facebook.com/437760549610219/videos/330513558391376

ലോക്ക്ഡൗണിനിടെ പ്രായത്തെ തോല്‍ക്കുന്ന ചിത്രങ്ങളുമായി എത്തിയ മെഗാ സ്റ്റാര്‍ മമ്മൂട്ടിയുടെ പിറന്നാള്‍ തലേന്ന് തന്നെ താര രാജാവിന് പിറന്നാള്‍ ആശംസകളുമായി ഫാന്‍സുകാരുടെ സിഡിപി(കോമണ്‍ ഡിസ്പ്ല പിക്ചര്‍) സോഷ്യല്‍ മീഡിയയില്‍ ട്രെന്റായിരുന്നു. ഇന്നലെ പാതിരാത്രി പിറന്നാള്‍ ആശംസകളുമായി ആരാധകര്‍ മമ്മൂട്ടിയുടെ വീടിനു മുന്നില്‍ എത്തിയ വീഡിയോയും വൈറലായി.
എല്ലാ സെപ്റ്റംബര്‍ ആറിനും മമ്മൂട്ടിയുടെ പിറന്നാള്‍ തലേന്ന്, താരം വീട്ടിലുണ്ടെങ്കില്‍ പിറന്നാള്‍ ആശംസിക്കാന്‍ അര്‍ധരാത്രി വീടിനു വെളിയില്‍ തടിച്ചുകൂടുന്ന ഒരു ആള്‍ക്കൂട്ടം പതിവാണ്. പ്രിയപ്പെട്ട മമ്മൂക്കയ്ക്ക് ആശംസകള്‍ അര്‍പ്പിക്കാന്‍ വീടിനു മുന്നില്‍ കോവിഡ് കാലത്തും എത്തിയ ആരാധകര്‍ക്ക് നേരെ കൈവീശി നന്ദി പറയുന്ന മമ്മൂട്ടിയുടെ വീഡിയോ പുറത്തുവന്നിട്ടുണ്ട്.

https://twitter.com/Mohanlal/status/1302815370533842946

ഇതിനിടെ മമ്മൂട്ടിക്ക് പെരുന്നാള്‍ മുത്തവുമായി മോഹന്‍ലാലും എത്തി. പിറന്നാള്‍ ദിനത്തില്‍ എന്റെ ഇച്ചാക്കയ്ക്ക് ആശംസകള്‍ നേരുകയാണ് മോഹന്‍ലാല്‍ ട്വിറ്ററില്‍ കുറിച്ചു. മലയാളത്തിന്റെ അഭിമാനമായ സുവര്‍ണ താരങ്ങളാണ് മമ്മൂട്ടിയും മോഹന്‍ലാലും. പ്രേം നസീര്‍ യുഗത്തിലെ താരങ്ങളില്‍ നിന്നും ബാറ്റണ്‍ ഏറ്റെടുത്ത് മലയാളസിനിമയെ നാലു പതിറ്റാണ്ടിലേറെയായി മുന്നോട്ട് നയിക്കുന്ന ഈ താരങ്ങള്‍ സിനിമയ്ക്ക് അപ്പുറവും ദൃഢമായൊരു സൗഹൃദം കാത്തുസൂക്ഷിക്കുന്നുണ്ട്. ലാലിന്റെ പിറന്നാളിന് മമ്മൂട്ടിയും ലാലുമായുള്ള സൗഹൃദത്തെ കുറിച്ച് വാചാനായിരുന്നു.

https://www.facebook.com/SalimKumarOfficialPage/posts/2920658821372371

മമ്മൂക്കയ്ക്ക വേറിട്ട ആശംസയുമായി നടന്‍ സലിം കുമാര്‍ എത്തിയത്. തന്റെ സിനിമാ ഡയലോഗുകള്‍ പോലെ തന്നെയാണ് സലിം കുമാറിന്റെ ആശംസയും. ‘ 66 ഇത് ഇങ്ങിനെയായിരുന്നപ്പോഴും ഇങ്ങേര് ഇങ്ങിനെ തന്നെയായിരുന്നു. ഇപ്പോള്‍ ’69’ ഇത് ഇങ്ങിനെയായപ്പോളും ഇങ്ങേര് ഇങ്ങിനെ തന്നെയാണ്.ഇനി ഇത് ’96’ ഇങ്ങിനെയും ’99’ഇങ്ങിനെയുമൊക്കെയാവും അപ്പോളും ഇങ്ങേര് ഇങ്ങിനെ തന്നെയായിരിക്കും, അത് ഇങ്ങേരും അങ്ങേരും തമ്മിലുള്ള ഒരു ഇത് ആണ്,’ സലിം കുമാര്‍ കുറിച്ചു. മമ്മൂക്കയ്ക്ക് പിറന്നാള്‍ ആശംസകള്‍ നേര്‍ന്നുകൊണ്ടുള്ള സലിം കുമാറിന്റെ രസകരമായ പോസ്റ്റും ആരാധകര്‍ ഏറ്റെടുത്തു കഴിഞ്ഞു.

https://www.instagram.com/p/CE0gfK2pqCM/?utm_source=ig_embed

‘ജന്മദിനാശംസകള്‍ ഇക്കാ. സൗന്ദര്യത്തിന്റെയും കലയോടുള്ള അവസാനിക്കാത്ത പാഷനും നിറഞ്ഞ നിരവധി വര്‍ഷങ്ങള്‍ ഇനിയുമുണ്ടാവട്ടെ,’ പ്രിയപ്പെട്ട ഇക്കയ്ക്ക് സുരേഷ് ഗോപിയുടെ ആശംസ.

ആശംസകളുമായി ചലച്ചിത്ര-സാമൂഹ്യ – സാംസ്‌ക്കാരിക മേഖലകളിലെ പ്രമുഖരാണ് രംഗത്തെത്തിയത്. ഏകദേശം 125ലധികം സെലിബ്രിറ്റീസിന്റെ രണ്ടര മണിക്കൂറോളം ദൈര്‍ഖ്യം ഉള്ള ജന്മദിനാശംസകളുടെ വീഡിയോ ആണ് മമ്മൂട്ടി ടൈംസ് പുറത്തിറക്കിയിരിക്കുന്നത്. പിറന്നാള്‍ ദിനത്തില്‍ മലയാളത്തിന്റെ മഹാനടന് ആശംസകള്‍ നേരാനായി നൂറിലേറെ വരുന്ന ചലച്ചിത്ര-സാംസ്‌കാരിക- രാഷ്ട്രീയ രംഗങ്ങളിലെ പ്രമുഖ വ്യക്തിത്വങ്ങളാണ് ഈ വീഡിയോയില്‍ അണിനിരക്കുകയാണ്. :സിനിമ സ്വപ്നം കാണാന്‍ പ്രചോദനമായ മഹാനടന് ഒരു സ്‌നേഹസമ്മാന’മായാണ് മമ്മൂട്ടി ടൈംസ് ഈ വീഡിയോ പുറത്തിറക്കിയിരുന്നത്. ഫാസില്‍, പ്രിയദര്‍ശന്‍, എസ് എന്‍ സ്വാമി, ശരത് കുമാര്‍, ശോഭന, മംമ്ത, മല്ലിക സുകുമാരന്‍, ഉമ്മന്‍ ചാണ്ടി എന്നിവരെല്ലാം വീഡിയോയില്‍ ആശംസകളുമായി എത്തിയിട്ടുണ്ട്.

നടി പാര്‍വ്വതിക്ക് വീണ്ടും മമ്മൂട്ടി ആരാധകരുടെ പൊങ്കാല

chandrika — Sat, 10 Mar 2018 16:15:06 +0000

കൊച്ചി: പാര്‍വ്വതിയെ പൊങ്കാലയിട്ട് വീണ്ടും മമ്മൂട്ടി ആരാധകര്‍. പൃഥ്വിരാജ്-പാര്‍വതി ജോടികളുടെ പുതിയ ചിത്രമായ മൈ സ്റ്റോറിയുടെ ട്രെയിലര്‍ മമ്മൂട്ടി തന്റെ ഫെയ്‌സ്ബുക്ക് പേജില്‍ ഷെയര്‍ ചെയ്തിരുന്നു. ഇതിനു നന്ദി പറഞ്ഞു നടി പാര്‍വ്വതി പോസ്റ്റാണ് ആരാധകരെ ചൊടിപ്പിച്ചത്.

‘ഞങ്ങളുടെ ചിത്രം മൈ സ്‌റ്റോറിയുടെ ട്രെയിലര്‍ ഷെയര്‍ ചെയ്ത മമ്മൂട്ടിക്ക് നന്ദി’ എന്നാണ് പാര്‍വ്വതി പേജില്‍ കുറിച്ചത്. പൃഥ്വിരാജ് ഉള്‍പ്പെടെയുള്ള സീനിയര്‍ താരങ്ങള്‍ മമ്മൂക്ക എന്ന് വിളിക്കുമ്പോള്‍ പൃഥ്വിയേക്കാള്‍ 6 വയസ് കുറവുള്ള പാര്‍വ്വതി പേര് വിളിച്ചതാണ് ആരാധകരെ ഇത്തവണ പ്രകോപിതരാക്കിയത്. തുടര്‍ന്ന് നടിയുടെ പേജില്‍ പൊങ്കാലയിടുകയായിരുന്നു ആരാധകര്‍

നേരത്തെ കസബ വിഷയത്തില്‍ മമ്മൂട്ടിയെ വിമര്‍ശിച്ചതിനെ തുടര്‍ന്ന് നടി പാര്‍വ്വതി സൈബര്‍ ആക്രമണത്തിന് ഇരയായിരുന്നു. ഇതിനു പിന്നാലെ മൈ സ്റ്റോറി സിനിമയിലെ ഗാനം പുറത്തിറക്കിയപ്പോള്‍ ഡിസ്‌ലൈക്ക് ക്യാമ്പയിനും ആരാധകര്‍ നടത്തിയിരുന്നു. ഈ സാഹചര്യത്തിലാണ് മമ്മൂട്ടി തന്റെ ഒഫീഷ്യല്‍ പേജിലൂടെ ചിത്രത്തിന്റെ ട്രെയിലര്‍ പുറത്തിറക്കിയത്.

എന്ന് നിന്റെ മൊയ്തീന്’ ശേഷം പൃഥ്വിരാജും പാര്‍വ്വതിയും ഒന്നിക്കുന്ന ചിത്രമാണ് ‘മൈ സ്‌റ്റോറി’. നവാഗതയായ റോഷ്ണി ദിനകറാണ് ചിത്രം സംവിധാനം ചെയ്യുന്നത്. ആക്ഷന്‍ പ്രണയ ചിത്രത്തിന്റെ പ്രതീതി തരുന്ന ട്രെയിലറാണ് പുറത്ത് വന്നത്. മാഡ്രിഡ് നഗരത്തിന്റെ മനോഹര ദൃശ്യങ്ങളോടൊപ്പം പൃഥ്വിരാജിന്റെ സ്‌റ്റൈലിഷ് ലുക്കും ട്രെയിലറിനെ ആകര്‍ഷകമാക്കുന്നു.ശങ്കര്‍ രാമകൃഷ്ണന്‍ തിരക്കഥ ഒരുക്കുന്ന ചിത്രം നിര്‍മ്മിക്കുന്നത് റോഷ്ണി ദിനകര്‍ തന്നെയാണ്.

ഈ പ്രിയപ്പെട്ടവന്റെ വിയോഗം എന്നെ തളര്‍ത്തുന്നു: മമ്മൂട്ടി

chandrika — Tue, 24 Oct 2017 08:49:27 +0000

സംവിധായകന്‍ ഐ.വി ശശിയുടെ വിയോഗത്തില്‍ ദുഃഖം രേഖപ്പെടുത്തി മലയാളത്തിന്റെ പ്രമുഖ നടന്‍ മമ്മൂട്ടി. “ഈ പ്രിയപ്പെട്ടവന്റെ വിയോഗം എന്നെ തളര്‍ത്തുന്നു”വെന്നാണ് മമ്മൂട്ടി ഫെയ്‌സ്ബുക്കില്‍ കുറിച്ചത്‌.

മമ്മൂട്ടി-ഐ.വി ശശി കൂട്ടുകെട്ടില്‍ നിരവധി ചിത്രങ്ങളാണ് മലയാള സിനിമയ്ക്ക് ലഭിച്ചിട്ടുള്ളത്. അതിരാത്രം, ആവ നാഴി, മൃഗയ, അനുബന്ധം, കാണാ മറയത്ത്, ഇൻസ്‌പെക്ടർ ബൽറാം തുടങ്ങി, മമ്മൂട്ടി എന്ന മഹാ നടന് ഹിറ്റുകൾ സമ്മാനിച്ച സംവിധായകനാണ് ശശി. 1921 എന്ന ഒരൊറ്റ സിനിമ കണ്ടാൽ മതിയാവും ഐ.വി ശശി എന്ന ഡയറക്ടറുടെ മാസ്റ്റർ ക്രാഫ്റ്റ് മനസ്സിലാക്കാൻ.

സിനിമയിലെ ആദ്യ പ്രതിഫലം വെളിപ്പെടുത്തി മമ്മൂട്ടി; നല്‍കിയത് നടന്‍ ശ്രീനിവാസന്‍

chandrika — Sun, 17 Sep 2017 07:32:08 +0000

തിരുവനന്തപുരം: മലയാള സിനിമയില്‍ ഏറ്റവും കൂടുതല്‍ പ്രതിഫലം വാങ്ങുന്ന നടനാണ് മമ്മൂട്ടി. എന്നാല്‍ ഭരത് അവാര്‍ഡും പത്മശ്രീയും ലഭിച്ച ഈ നടന് ആദ്യമായി കിട്ടിയ പ്രതിഫലം അറിയാമോ?.

ഇന്നു കോടികള്‍ പ്രതിഫലം വാങ്ങുന്ന താരത്തിന് 800 രൂപയാണ് ആദ്യമായി പ്രതിഫലമായി ലഭിച്ചത്. ചെക്കായിട്ടാണ് ഈ തുക ലഭിച്ചത്. അതും നടന്‍ ശ്രീനിവാസന്റെ കൈയില്‍ നിന്ന്.

കെ.ജി ജോര്‍ജ്ജ് സംവിധാനം ചെയ്ത് 1980ല്‍ പുറത്തിറങ്ങിയ മേള എന്ന ചിത്രത്തിലെ അഭിനയത്തിനുള്ള പ്രതിഫലമായാണ് ഈ തുക ലഭിച്ചത്.
ശ്രീനിവാസനായിരുന്നു മമ്മൂട്ടിയെ മേളയിലേക്ക് ശിപാര്‍ശ ചെയ്തത്.

ചിത്രത്തിന്റെ ഷൂട്ടിങ് പൂര്‍ത്തിയായപ്പോള്‍ മമ്മൂട്ടിയുടെ പ്രതിഫലം കെ.ജി ജോര്‍ജ്ജ് ശ്രീനിവാസനെ ഏല്‍പ്പിക്കുകയായിരുന്നു.

നായകനു തുല്യ പ്രാധാന്യമുള്ള സഹനടനായാണ് മമ്മൂട്ടി മേളയില്‍ തിളങ്ങിയത്.

രഘു, ശ്രീനിവാസന്‍, അഞ്ജലി നായിഡു ഉള്‍പ്പെടെ താരങ്ങളുടെ നീണ്ടനിരയും ചിത്രത്തിലുണ്ടായിരുന്നു.

1971ല്‍ അനുഭവങ്ങള്‍ പാളിച്ചകള്‍ എന്ന ചിത്രത്തിലൂടെ ക്യാമറക്കു മുന്നിലെത്തിയെങ്കിലും ദീര്‍ഘകാലം മമ്മൂട്ടിക്ക് പ്രതിഫലമൊന്നും ലഭിച്ചിരുന്നില്ല.

പിന്നെയും ഒമ്പതു വര്‍ഷങ്ങള്‍ കാത്തിരിക്കേണ്ടി വന്നു മമ്മൂട്ടിക്ക് പ്രതിഫലം ലഭിക്കാന്‍.