Manchester – Chandrika Daily

കാരബാവോ കപ്പ്: ബെന്റ്‌ഫോർഡിനെ വീഴ്ത്തി മാഞ്ചസ്റ്റർ സിറ്റി സെമിഫൈനലിൽ

webdesk18 — Thu, 18 Dec 2025 04:18:18 +0000

ഇംഗ്ലീഷ് ഫുട്ബോൾ ലീഗ് കപ്പിൽ (കാരബാവോ കപ്പ്) ബെന്റ്‌ഫോർഡിനെ മറുപടിയില്ലാത്ത രണ്ട് ഗോളുകൾക്ക് പരാജയപ്പെടുത്തി മാഞ്ചസ്റ്റർ സിറ്റി സെമിഫൈനൽ ബർത്ത് ഉറപ്പിച്ചു. 52-ാം മിനിറ്റിൽ ഫ്രഞ്ച് താരം മാത്തിസ് റയാൻ ചെർക്കിയും 67-ാം മിനിറ്റിൽ സാവിഞ്ഞോയുമാണ് സിറ്റിക്കായി ലക്ഷ്യം കണ്ടത്.

ആദ്യ പകുതിയിൽ ബെന്റ്‌ഫോർഡ് സിറ്റിക്കെതിരെ മേൽക്കൈ നേടാൻ ശ്രമിച്ചെങ്കിലും ശക്തമായ സിറ്റി പ്രതിരോധം അവരുടെ നീക്കങ്ങൾ തടഞ്ഞു. രണ്ടാം പകുതിയിൽ ആക്രമണം ശക്തമാക്കിയ സിറ്റി രണ്ട് ഗോളുകളിലൂടെ ജയം ഉറപ്പിക്കുകയായിരുന്നു.

അതേസമയം കാരബാവോ കപ്പിന്റെ സെമിഫൈനൽ ചിത്രം ഏതാണ്ട് വ്യക്തമായി. മാഞ്ചസ്റ്റർ സിറ്റി സെമിഫൈനലിൽ ന്യൂകാസിൽ യുണൈറ്റഡിനെ നേരിടും. മറ്റൊരു സെമിഫൈനലിൽ ചെൽസി, 23ന് നടക്കുന്ന ആഴ്‌സനൽ–ക്രിസ്റ്റൽ പാലസ് മത്സരത്തിലെ വിജയികളെയാണ് നേരിടുക. എമിറേറ്റ്‌സ് സ്റ്റേഡിയത്തിലാണ് ആഴ്‌സനലും പാലസും തമ്മിലുള്ള പോരാട്ടം.

രണ്ട് പാദങ്ങളിലായി നടക്കുന്ന സെമിഫൈനലുകളുടെ ആദ്യ പാദം 2026 ജനുവരി 12 മുതൽ ആരംഭിക്കും. രണ്ടാം പാദ മത്സരങ്ങൾ 2026 ഫെബ്രുവരി 2 മുതലായിരിക്കും നടക്കുക.

ഇഞ്ചുറി ടൈം ഗോള്‍: ടോട്ടനവും മാഞ്ചസ്റ്റര്‍ യുനൈറ്റഡും സമനിലയില്‍

webdesk18 — Sun, 09 Nov 2025 02:21:14 +0000

ലണ്ടന്‍: ആവേശകരമായ മത്സരത്തില്‍ ടോട്ടനം ഹോട്ട്‌സ്പര്‍സും മാഞ്ചസ്റ്റര്‍ യുനൈറ്റഡും സമനിലയില്‍ പിരിഞ്ഞു. ഇഞ്ചുറി ടൈമിന്റെ അവസാന നിമിഷങ്ങളില്‍ ഡിഫന്‍ഡര്‍ മതിയ്‌സ് ഡിലിറ്റ് നേടിയ ഹെഡര്‍ ഗോളാണ് യുനൈറ്റഡിന് വിലപ്പെട്ട സമനില ഉറപ്പിച്ചത്.

പോയിന്റ് പട്ടികയില്‍ യുനൈറ്റഡ് ഏഴാമതും ടോട്ടനം മൂന്നാമതുമാണ് തുടരുന്നത്.

മത്സരത്തിന്റെ ആദ്യ പകുതിയില്‍ എംബ്യുമോ (32′) നേടിയ ഗോളിലൂടെ യുനൈറ്റഡ് ലീഡ് നേടി. എന്നാല്‍ അവസാന പത്ത് മിനിറ്റില്‍ ടോട്ടനം തിരിച്ചടിച്ചു മതിയാസ് ടെല്‍ (84′) റിചാര്‍ലിസണ്‍ (90+1′) എന്നിവര്‍ ഗോള്‍ നേടി ലീഡ് സ്വന്തമാക്കി. പിന്നീടാണ് ഡിലിറ്റ് (90+6′) നേടിയ ഹെഡര്‍ ഗോളിലൂടെ യുനൈറ്റഡ് സമനില പിടിച്ചത്.

മത്സരത്തിനിടെ സ്ട്രൈക്കര്‍ ഷെസ്‌കോയ്ക്ക് പരിക്ക് പറ്റിയതിനെ തുടര്‍ന്ന് പുറത്തായി. എല്ലാ സബ്സ്‌റിട്യൂഷനും കഴിഞ്ഞതോടെ അവസാന പത്ത് മിനിറ്റ് യുനൈറ്റഡ് പത്ത് പേരുമായി കളിക്കേണ്ടിവന്നു.

പ്രീമിയര്‍ ലീഗിലെ മറ്റ് മത്സരങ്ങളില്‍ എവര്‍ട്ടണ്‍ ഫുള്‍ഹാമിനെ തോല്‍പ്പിക്കുകയും വെസ്റ്റ് ഹാം ബേണ്‍ലിയെ മറികടക്കുകയും ചെയ്തു. എവര്‍ട്ടണിനായി ഇദ്രിസ്സ ഗ്വയ (45+4′), മിഷേല്‍ കീനു (81′) എന്നിവര്‍ ഗോളുകള്‍ നേടി. വെസ്റ്റ് ഹാമിനായി കല്ലം വില്‍സണ്‍ (44′), തോമസ് സൂസെക് (77′), കൈല്‍ വാള്‍ക്കര്‍ പീറ്റേഴ്സ് (87′) എന്നിവര്‍ ഗോള്‍ നേടി. ബേണ്‍ലിക്കായി സീന്‍ ഫ്‌ലെമിങ് (35′), ജോഷ് കല്ലന്‍ (90+7′) എന്നിവര്‍ ഗോള്‍ നേടി.

അന്വേഷണ റിപ്പോര്‍ട്ട് പുറത്തു വിടരുതെന്ന് നിര്‍ദേശം

chandrika — Thu, 25 May 2017 16:42:46 +0000

ലണ്ടന്‍: മാഞ്ചസ്റ്റര്‍ ഭീകരാക്രമണത്തിന്റെ അന്വേഷണം പൂര്‍ണമായും രഹസ്യമാക്കാന്‍ ബ്രിട്ടന്‍ പൊലീസിനു നിര്‍ദേശം നല്‍കി. യു.എസ് അടക്കമുള്ള രാജ്യങ്ങള്‍ക്ക് അന്വേഷണ വിവരം നല്‍കരുതെന്ന കര്‍ശന നിര്‍ദ്ദേശവും നല്‍കിയിട്ടുണ്ട്. അന്വേഷണ വിവരങ്ങള്‍ മാധ്യമങ്ങളില്‍ പ്രത്യക്ഷപെട്ടതോടെയാണിത്. അന്വേഷണ വിവരങ്ങള്‍ പൊലീസ് യു.എസിലെ തീവ്രവാദ വിരുദ്ധ സേനക്ക് കൈമാറിയിരുന്നു. എന്നാല്‍, വിവരങ്ങള്‍ മിനിറ്റുകള്‍ക്കുള്ളില്‍ മാധ്യമങ്ങളില്‍ പ്രത്യക്ഷപെട്ടു. ന്യൂയോര്‍ക്ക് ടൈംസ് അടക്കമുള്ള മാധ്യമങ്ങള്‍ അന്വേഷണ വിവരങ്ങള്‍ റിപ്പോര്‍ട്ട് ചെയ്തു. ചാവേര്‍ സ്‌ഫോടനം നടത്തിയ സല്‍മാന്‍ അബദിയുടെ പേര് മാധ്യമങ്ങളില്‍ ഉടന്‍ തന്നെ പ്രത്യക്ഷപെട്ടതായും ബ്രിട്ടന്‍ ചൂണ്ടിക്കാട്ടി. സ്‌ഫോടനത്തിന് ഉപയോഗിച്ച ഇലക്‌ട്രോണിക്‌സ് ഉപകരണത്തിന്റെ ദൃശ്യങ്ങള്‍ അടക്കം യുഎസ് മാധ്യമങ്ങള്‍ പുറത്തു വിട്ടിരുന്നു. അന്വേഷണം രഹസ്യമാണെന്ന് ബ്രിട്ടീഷ് പ്രധാനമന്ത്രി തെരെസ മെയ്, യുഎസ് പ്രസിഡന്റ് ഡൊണാള്‍ഡ് ട്രംപിനെ അറിയിച്ചു. നാറ്റോ സഖ്യകക്ഷികളുടെ സമ്മേളനത്തിനിടെയാണ് മെയ് ഇക്കാര്യം ട്രംപിനെ അറിയിച്ചത്. വിവരങ്ങള്‍ പുറത്തുവിട്ടാല്‍ അത് അന്വേഷണത്തെ ബാധിക്കും. എന്നാല്‍, തീവ്രവാദത്തിനെതിരെ ഒരുമിച്ചു പോരാടുമെന്നും അവര്‍ ചൂണ്ടിക്കാട്ടി. സ്‌ഫോടനത്തില്‍ പരിക്കേറ്റ് ചികിത്സയില്‍ കഴിയുന്നവരെ ബ്രിട്ടീഷ് രാജ്ഞി എലിസബത്ത് സന്ദര്‍ശിച്ചു. റോയല്‍ മാഞ്ചസ്റ്ററിലെ കുട്ടികളുടെ ആസ്പത്രിയിലാണ് രാജ്ഞി എത്തിയത്. 12 കുട്ടികളാണ് ഇവിടെ ചികിത്സയില്‍ കഴിയുന്നത്.

മാഞ്ചസ്റ്റര്‍ ഭീകരാക്രമണം: ആറ് പേര്‍ പിടിയില്‍

chandrika — Thu, 25 May 2017 16:14:43 +0000

ലണ്ടന്‍: മാഞ്ചസ്റ്റര്‍ ഭീകരാക്രമണവുമായി ബന്ധപ്പെട്ട് ഒരു സ്ത്രീയുള്‍പ്പെടെ ആറു പേര്‍ അറസ്റ്റിലായി. വടക്കന്‍ മാഞ്ചസ്റ്ററിലെ ബ്ലാക്ലിയില്‍ അന്വേഷണ സംഘം നടത്തിയ റെയ്ഡിലാണ് സ്ത്രീ അറസ്റ്റിലായത്. ചാവേര്‍ സ്‌ഫോടനം ന ടത്തിയ സല്‍മാന്‍ അബദിയുടെ (22) പിതാവ് റമദാന്‍, ഇളയ സഹോദരന്‍ ഹാഷിം എന്നിവരും അറസ്റ്റിലായവരില്‍ ഉള്‍പ്പെടും. ഇരുവരും ലിബിയയുടെ തലസ്ഥാനമായ ട്രിപ്പോളിയില്‍നിന്നാണ് അറസ്റ്റിലായത്. ഹാഷിം ഭീകരാക്രമണം നടത്താന്‍ ഗൂഡാലേചന നടത്തിയതായി കണ്ടെത്തിയിട്ടുണ്ട്. ആക്രമണത്തിന്റെ എല്ലാ വിശദാംശങ്ങളും ഹാഷിമിന് അറിവുണ്ടായിരുന്നതായും ലിബിയന്‍ സുരക്ഷാ ഉദ്യോഗസ്ഥര്‍ പറയുന്നു.
ടിവി ചാനല്‍ അഭിമുഖത്തിനിടെയാണ് റമദാന്‍ പിടിയിലായത്. ആക്രമണത്തില്‍ സല്‍മാന്റെ പങ്ക് റമദാന്‍ നിഷേധിച്ചു. നിരപരാധികളായ ആളുകളെ കൊല്ലുന്നതില്‍ തങ്ങള്‍ വിശ്വസിക്കുന്നില്ല. ഇത് ചെയ്തത് തങ്ങളല്ലെന്നും റമദാന്‍ അഭിമുഖത്തില്‍ പറഞ്ഞു. ചൊവ്വാഴ്ച തെക്കന്‍ മാഞ്ചസ്റ്ററിലെ കൊയ്ര്‍ട്ടനില്‍നിന്നും മൂത്ത സഹോദരന്‍ ഇസ്മയില്‍ അബദി അറസ്റ്റിലായിരുന്നു.
സല്‍മാന്‍ അബദി ഒറ്റയ്ക്കാണ് തിങ്കളാഴ്ച രാത്രി ചാവേര്‍ ആക്രമണം നടത്തിയതെന്ന് കരുതുന്നില്ലെന്നും ഇയാള്‍ക്ക് കൂട്ടാളികളുടെ സഹായം ലഭിച്ചിട്ടുണ്ടെന്നും മന്ത്രി ആംബര്‍ റഡ് പറഞ്ഞു. അബദിയെക്കുറിച്ചു നേരത്തെ പൊലീസിന് അറിവുണ്ടായിരുന്നുവെന്നും മന്ത്രി വ്യക്തമാക്കി. മാഞ്ചസ്റ്ററില്‍ ലിബിയന്‍ വംശജരായ മാതാപിതാക്കളുടെ മകനായി 1994ലാണ് അബദി ജനിച്ചത്. അബദി അടുത്തയിടെയാണ് ലിബിയയില്‍നിന്നു ബ്രിട്ടനില്‍ മടങ്ങിയെത്തിയത്. നിരവധി കൗമാരക്കാരും കുട്ടികളും പങ്കെടുത്ത മാഞ്ചസ്റ്റര്‍ അരീനയിലെ സംഗീതനിശയുടെ സമാപനത്തില്‍ നടന്ന സ്‌ഫോടനങ്ങളില്‍ 22 പേര്‍ കൊല്ലപ്പെടുകയും 64 പേര്‍ക്കു പരിക്കേല്‍ക്കുകയും ചെയ്തിരുന്നു. ഗായിക അരിയാന ഗ്രാന്‍ഡെയ്ക്കു കുഴപ്പമില്ല.

മാഞ്ചസ്റ്റര്‍ യുനൈറ്റഡിന് യൂറോപ്പ ലീഗ് കിരീടം

ചന്ദ്രിക വെബ് ഡെസ്‌ക്‌ — Thu, 25 May 2017 02:08:38 +0000

സ്റ്റോക്ക്‌ഹോം: യൂറോപ്പിലെ വലിയ രണ്ടാമത്തെ ഫുട്‌ബോള്‍ കിരീടമായ യൂറോപ്പ ലീഗ് മാഞ്ചസ്റ്റര്‍ യുനൈറ്റഡിന്. ഡച്ച് ക്ലബ്ബ് അയാക്‌സ് ആംസ്റ്റര്‍ഡാമിനെ രണ്ട് ഗോളിന് തോല്‍പ്പിച്ചാണ് മുന്‍ ഇംഗ്ലീഷ് ചാമ്പ്യന്മാര്‍ കിരീടത്തില്‍ മുത്തമിട്ടത്. ആദ്യ പകുതിയില്‍ പോള്‍ പോഗ്ബയും രണ്ടാം പകുതിയില്‍ ഹെന്റിക് മിഖത്രയാനും ഗോളുകള്‍ നേടി.

പ്രീമിയര്‍ ലീഗില്‍ ആറാം സ്ഥാനം മാത്രം ലഭിച്ചിരുന്നതിനാല്‍ യുവേഫ ചാമ്പ്യന്‍സ് ലീഗ് യോഗ്യത ലഭിച്ചിട്ടില്ലാത്ത യുനൈറ്റഡിന് യൂറോപ്പ ഫൈനലിലെ ജയം അനിവാര്യമായിരുന്നു. പ്രതിരോധത്തിലൂന്നി അപകടമൊഴിവാക്കിയ അവര്‍ ലഭിച്ച അവസരങ്ങള്‍ മുതലെടുത്തു. അതേസമയം, കൂടുതല്‍ സമയം പന്ത് നിയന്ത്രണത്തിലുണ്ടായിട്ടും കൂടുതല്‍ ഷോട്ടുകള്‍ ഉതിര്‍ത്തിട്ടും അയാക്‌സിന് യുനൈറ്റഡിന്റെ വലയില്‍ പന്തെത്തിക്കാന്‍ കഴിഞ്ഞില്ല.

18-ാം മിനുട്ടില്‍ സ്വന്തം ഗോള്‍ ഏരിയക്കു സമീപം ത്രോ ഇന്നില്‍ പിഴച്ചതാണ് അയാക്‌സിന്റെ വലയിലെത്തിയ ആദ്യ ഗോളിനു കാരണം. പന്ത് തട്ടിയെടുത്ത യുവാന്‍ മാട്ട മര്‍വാന്‍ ഫെല്ലയ്‌നിക്കും, ഫെല്ലയ്‌നി പോഗ്ബക്കും പന്ത് നല്‍കി. പന്ത് നിയന്ത്രിച്ച് ഫ്രഞ്ച് താരം തൊടുത്ത ഷോട്ട് ഡിഫന്ററുടെ കാലില്‍ തട്ടി ഗതിമാറി വലയിലെത്തി.

48-ാം മിനുട്ടില്‍ കോര്‍ണര്‍ കിക്കില്‍ നിന്നുള്ള ഫെല്ലയ്‌നിയുടെ ഹെഡ്ഡര്‍ മെയ്‌വഴക്കത്തോടെ വലയിലെത്തിച്ച് മിഖത്രയാന്‍ ജയമുറപ്പിച്ചു.

യൂറോപ്പ ജയത്തോടെ യുനൈറ്റഡിന് അടുത്ത സീസണില്‍ ചാമ്പ്യന്‍സ് ലീഗ് കളിക്കാം. യുവേഫയുടെ മൂന്ന് കിരീടങ്ങളും നേടുന്ന അഞ്ചാമത്തെ ക്ലബ്ബായി മാറി മാഞ്ചസ്റ്റര്‍. ഇതിനു മുമ്പ് ചാമ്പ്യന്‍സ് ലീഗ്, യുവേഫ സൂപ്പര്‍ കപ്പ് എന്നിവയും അവര്‍ നേടിയിരുന്നു.