അധികാരത്തിനും മന്ത്രിപദത്തിനും തടസ്സമുണ്ടാവുന്ന പലരീതിയിലുള്ള ബാഹ്യ ഇടപെടലുകള്‍ ഉണ്ടാവുന്നതുകൊണ്ടാണ് രാജിയെന്ന് രാജിക്കത്തില്‍ പറയുന്നുവെന്ന് ദേശീയമാധ്യമങ്ങള്‍ റിപ്പോര്‍ട്ടു ചെയ്യുന്നു. രാജിവെക്കുന്നുവെന്ന വാര്‍ത്ത പുറത്തുവന്നെങ്കിലും ഇതിനോട് പാര്‍ട്ടി പ്രതികരിച്ചിട്ടില്ല. ചൊവ്വാഴ്ച്ച മുഖ്യമന്ത്രി തിരിച്ചുവന്നതിന് ശേഷമേ രാജിയുടെ കാര്യത്തില്‍ അന്തിമ തീരുമാമുണ്ടാകൂ.

60 അംഗ നിയമസഭയിലേക്ക് നടന്ന തെരഞ്ഞെടുപ്പില്‍ ബിജെപി 21സീറ്റുകളാണ് നേടിയിരുന്നത്. 33 എം.എല്‍.എമാരുടെ പിന്തുണ അവകാശപ്പെട്ടാണ് ബി.ജെ.പി മണിപ്പൂരില്‍ സര്‍ക്കാറുണ്ടാക്കിയത്. എന്നാല്‍ അധികാരത്തിലേറി ഒരുമാസമാകുമ്പോഴേക്കും ആരോഗ്യമന്ത്രി രാജിവെക്കുകയാണുണ്ടായത്. 26 സീറ്റുകള്‍ നേടിയ കോണ്‍ഗ്രസ് ആയിരുന്നു ഏറ്റവും വലിയ ഒറ്റകക്ഷി.

പരാജയം നേരത്തെതന്നെ ഉറപ്പിച്ചിരുന്നുവെന്ന് ദേശീയ മാധ്യമത്തിന് നല്‍കിയ അഭിമുഖത്തില്‍ ഇറോം ശര്‍മ്മിള പ്രതികരിച്ചു. കിഴക്കന്‍ ഇംഫാലിലെ മന്ത്രിപുക്രിയില്‍ എച്ച്.ഐ.വി ബാധിതരായ കുട്ടികളെ പാര്‍പ്പിക്കുന്ന കേന്ദ്രത്തിലാണ് 44കാരിയായ ഇറോം ശര്‍മ്മിള ഇന്നലെ സമയം ചെലവിട്ടത്. കുട്ടികള്‍ക്കൊപ്പം നില്‍ക്കുമ്പോള്‍ മനസ്സിന് വല്ലാത്ത ആശ്വാസം ലഭിക്കും. അതുകൊണ്ടാണ് ഇവിടെ വന്നതെന്ന് അവര്‍ പറഞ്ഞു. മലയാളികളായ കന്യാസ്ത്രീകളുടെ നേതൃത്വത്തിലാണ് കാര്‍മല്‍ ജ്യോതി കോണ്‍വെന്റിനോടു ചേര്‍ന്ന് കുട്ടികള്‍ക്കുള്ള ഈ അഭയകേന്ദ്രം പ്രവര്‍ത്തിക്കുന്നത്.
ആദ്യ ഫല സൂചനകള്‍ വരുമ്പോള്‍ നോട്ടക്കും പിന്നിലായിരുന്നു ഇറോം ശര്‍മ്മിളയുടെ സ്ഥാനം. പരാജയം താന്‍ അനുഭവിക്കുന്നുണ്ട്. അത് ജനങ്ങളുടെ കുറ്റമല്ല. അവര്‍ നിഷ്‌കളങ്കരാണ്. പണം നല്‍കിയവര്‍ക്ക് അവര്‍ വോട്ടു ചെയ്തു. അത് പലരും എന്നോട് പറഞ്ഞിരുന്നു- ഇറോം ശര്‍മ്മിള കൂട്ടിച്ചേര്‍ത്തു.
പരാജയപ്പെട്ടാലും ലോക്‌സഭാ തെരഞ്ഞെടുപ്പില്‍ ഒരിക്കല്‍കൂടി മത്സര രംഗത്തിറങ്ങുമെന്ന് താന്‍ കഴിഞ്ഞ ദിവസം പറഞ്ഞിരുന്നു. ഇത് തിരുത്തുകയാണ്. ഇനി രാഷ്ട്രീയത്തിലേക്കില്ല. ഇനിയൊരു തെരഞ്ഞെടുപ്പില്‍ മത്സരിക്കാന്‍ ഉണ്ടാവില്ല. ധാര്‍മ്മികമായി ഞാന്‍ പരാജയപ്പെട്ടതായി കരുതുന്നില്ല. അഫ്‌സ്പക്കെതിരായ പോരാട്ടം മറ്റുവേദികളിലൂടെ തുടരും. ജനങ്ങളെ സേവിക്കാന്‍ തയ്യാറുണ്ടെങ്കില്‍ അതിന് എല്ലായിടത്തും അവസരങ്ങളുണ്ട്- അവര്‍ കൂട്ടിച്ചേര്‍ത്തു.