manipurburning – Chandrika Daily

മണിപ്പൂരിൽ നോക്കു കുത്തികളായി കേന്ദ്ര സംസ്ഥാന സർക്കാരുകൾ; പുതിയ അക്രമ സംഭവങ്ങളിൽ 24 മണിക്കൂറിനുള്ളിൽ മരിച്ചത് 6 പേർ

webdesk15 — Sun, 06 Aug 2023 08:12:28 +0000

മണിപ്പൂരിലെ രണ്ടാഴ്ചയ്ക്കിടയിലുള്ള ഏറ്റവും മാരകമായ ദിവസങ്ങളിലൊന്നായിരുന്നു ശനിയാഴ്ച. സംഘർഷം രൂക്ഷമായ മണിപ്പൂരിൽ കഴിഞ്ഞ 24 മണിക്കൂറിനിടെ അച്ഛനും മകനും ഉൾപ്പെടെ ആറ് പേർ കൊല്ലപ്പെട്ടു. ശനിയാഴ്ച പുലർച്ചെ മുതൽ ബിഷ്ണുപൂർ-ചുരാചന്ദ്പൂർ അതിർത്തി പ്രദേശങ്ങളിൽ ഒരു ദിവസം നീണ്ടുനിന്ന ആക്രമണങ്ങളിൽ 16 ഓളം പേർക്ക് പരിക്കേറ്റു.ബിഷ്ണുപൂർ-ചുരാചന്ദ്പൂർ അതിർത്തിയിലെ പല സ്ഥലങ്ങളിലും ഇരുവശത്തുനിന്നും കനത്ത വെടിവയ്പ്പിൽ പകൽ മുഴുവൻ മോർട്ടാർ, ഗ്രനേഡ് ആക്രമണങ്ങൾ റിപ്പോർട്ട് ചെയ്തു.ഇംഫാൽ വെസ്റ്റ് ജില്ലയിലെ ലാംഗോളിൽ അജ്ഞാതരായ ജനക്കൂട്ടം വീടുകൾ കത്തിച്ചു.സംസ്ഥാനത്തെ ക്രമസമാധാന നില അനുദിനം വഷളാകുമ്പോഴും കാര്യമായ ഇടപെടലുകൾ നടത്താതെ നോക്കുകുത്തികളാവുന്ന അവസ്ഥയിലാണ് കേന്ദ്രത്തിലെയും സംസ്ഥാനത്തെയും ബിജെപി സർക്കാരുകൾ.

‘കൊടിയ ഭരണഘടനാപരാജയം’ ; മണിപ്പൂർ സംഭവത്തെ അപലപിച്ച് സുപ്രിം കോടതി

webdesk15 — Thu, 20 Jul 2023 06:02:11 +0000

മണിപ്പൂരിലെ സംഭവത്തെ അപലപിച്ച് സുപ്രീം കോടതി, മണിപ്പൂരിൽ രണ്ട് സ്ത്രീകളെ ഒരു കൂട്ടം പുരുഷന്മാർ റോഡിൽ നഗ്നരാക്കി കൊണ്ടുപോകുന്ന ദൃശ്യത്തിൽ ഇന്ത്യൻ ചീഫ് ജസ്റ്റിസ് ഡി വൈ ചന്ദ്രചൂഡ് ആശങ്ക രേഖപ്പെടുത്തി.ദൃശ്യങ്ങൾ കടുത്ത ഭരണഘടനാ പരാജയത്തിലേക്കാണ് വിരൽ ചൂണ്ടുന്നതെന്നും സുപ്രിം കോടതി പറഞ്ഞു. പ്രദേശത്ത് സ്ത്രീകളുടെ സുരക്ഷ ഉറപ്പാക്കാൻ സ്വീകരിച്ച നടപടികളെക്കുറിച്ച് കോടതിയെ അറിയിക്കാനും നടപടിയെടുക്കാനും ചീഫ് ജസ്റ്റിസ് ഡി വൈ ചന്ദ്രചൂഡ് സർക്കാരിനോട് ആവശ്യപ്പെട്ടു.

“ഇന്നലെ പ്രചരിപ്പിച്ച ദൃശ്യങ്ങളിൽ ഞങ്ങൾ വളരെ അസ്വസ്ഥരാണ്. ഞങ്ങളുടെ അഗാധമായ ഉത്കണ്ഠ ഞങ്ങൾ പ്രകടിപ്പിക്കുന്നു. സർക്കാർ നടപടികൾ സ്വീകരിക്കേണ്ട സമയമാണിത്. ഇത് അംഗീകരിക്കാനാവില്ല,” ഡി വൈ ചന്ദ്രചൂഡ് പറഞ്ഞു”അത്തരം അക്രമങ്ങൾക്ക് കുറ്റവാളികൾക്കെതിരെ കേസെടുക്കാൻ സർക്കാർ സ്വീകരിച്ച നടപടികളെക്കുറിച്ച് കോടതിയെ അറിയിക്കണമെന്നാണ് ഞങ്ങളുടെ അഭിപ്രായം. ചീഫ് ജസ്റ്റിസ് പറഞ്ഞു.

സംസ്ഥാന തലസ്ഥാനമായ ഇംഫാലിൽ നിന്ന് 35 കിലോമീറ്റർ അകലെയുള്ള കാങ്‌പോക്പി ജില്ലയിൽ മെയ് 4 നാണ് സംഭവം നടന്നതെന്ന് ഇൻഡിജിനസ് ട്രൈബൽ ലീഡേഴ്‌സ് ഫോറത്തിന്റെ (ഐടിഎൽഎഫ്) പ്രസ്താവനയിൽ പറയുന്നു.

മണിപ്പൂര്‍ സംഘര്‍ഷം; പ്രധാനമന്ത്രി ഇടപെടണമെന്ന് നോര്‍ത്ത് ഈസ്റ്റ് ഇന്ത്യ ക്രിസ്ത്യൻ കൗണ്‍സില്‍

webdesk15 — Thu, 06 Jul 2023 11:16:55 +0000

മണിപ്പൂരിലെ സംഘര്‍ഷങ്ങളില്‍ പ്രധാനമന്ത്രി നരേന്ദ്ര മോദിയുടെ ഇടപെടല്‍ ആവശ്യപ്പെട്ട് നോര്‍ത്ത് ഈസ്റ്റ് ഇന്ത്യ ക്രിസ്ത്യന്‍ കൗണ്‍സില്‍ പ്രധാനമന്ത്രിക്ക് കത്തെഴുതി.ആക്രമണങ്ങളും സംഘര്‍ഷങ്ങളും നാളുകളായി തുടരുന്നത് സംസ്ഥാന-കേന്ദ്രസര്‍ക്കാരുകള്‍ക്ക് നാണക്കേടാണെന്ന് ക്രിസ്ത്യന്‍ കൗണ്‍സില്‍ ചൂണ്ടിക്കാട്ടി. വടക്കു കിഴക്കന്‍ ഇന്ത്യയിലെ 55 ക്രിസ്ത്യന്‍ വിഭാഗങ്ങളുടെ കൂട്ടായ്മയാണ് നോര്‍ത്ത് ഈസ്റ്റ് ഇന്ത്യ ക്രിസ്ത്യന്‍ കൗണ്‍സില്‍.

പള്ളികളും കെട്ടിടങ്ങളും ഉള്‍പ്പടെയുള്ള ആരാധനാലയങ്ങള്‍ തകര്‍ക്കുന്നതും ക്രിസ്ത്യന്‍ കൗണ്‍സില്‍ പ്രധാനമന്ത്രിയുടെ ശ്രദ്ധയില്‍ പെടുത്തിയിട്ടുണ്ട്. ജനങ്ങളെയും ആരാധനാലയങ്ങളെയും സംരക്ഷിക്കുന്നതിനായി വിന്യസിച്ചിരിക്കുന്ന സുരക്ഷാ വിഭാഗത്തിന്റെ എണ്ണം വര്‍ദ്ധിപ്പിക്കണമെന്നും കൗണ്‍സില്‍ കത്തില്‍ ആവശ്യപ്പെട്ടു നോര്‍ത്ത് ഈസ്റ്റ് ഇന്ത്യ ക്രിസ്ത്യന്‍ കൗണ്‍സില്‍ ജനറല്‍ സെക്രട്ടറി റവ. ഡോ റമെംഗ്ലിയാന പ്രസിഡന്റ് റവ. ആര്‍ ലാല്‍നുന്‍സിറ എന്നിവരാണ് കത്തില്‍ ഒപ്പുവെച്ചിരിക്കുന്നത്.