മഥുര നന്ദ്ഗാവിലെ നന്ദ്ബാബ നന്ദ് മഹല്‍ ക്ഷേത്രത്തിലാണ് ഇവര്‍ നമസ്‌കരിച്ചിരുന്നത്. ഇവര്‍ നമസ്‌കരിക്കുന്ന ചിത്രങ്ങള്‍ സാമൂഹിക മാധ്യമങ്ങളില്‍ വൈറലായിരുന്നു. ഇതിനു പിന്നാലെ ക്ഷേത്ര ഭരണസമതി പൊലീസില്‍ പരാതി നല്‍കുകയായിരുന്നു. ഡല്‍ഹിയിലെ ഖിദ്മത്ത് നഗര്‍ സ്വദേശിയാണ് ഫൈസല്‍ ഖാന്‍. മുഹമ്മദ് ചന്ദ് എന്നയാളാണ് മറ്റൊരാള്‍.

ഗാന്ധിയന്‍ നിലേഷ് ഗുപ്ത, അലോക് രത്‌ന എന്നിവര്‍ക്കൊപ്പമാണ് ഇരുവരും ക്ഷേത്രത്തിലെത്തിയത്. ളുഹര്‍ നമസ്‌കാരത്തിന്റെ സമയമായ വേളയില്‍ ഇവര്‍ നമസ്‌കാരം നിര്‍വഹിക്കുകയായിരുന്നു.

നമസ്‌കരിക്കാന്‍ സമ്മതം നല്‍കിയിരുന്നില്ല എന്ന് ക്ഷേത്രത്തിന്റെ ഭരണചുമതലയുള്ള കന്‍ഹ ഗോസ്വാമി പറയുന്നു. ചിത്രങ്ങള്‍ പ്രചരിച്ചതോടെ ഹിന്ദു സംഘടനകള്‍ തീവ്ര നിലപാടുകളുമായി രംഗത്തെത്തുകയായിരുന്നു. ശിക്ഷാ നിയമത്തിലെ വകുപ്പ് 153എ, 295, 505 പ്രകാരമാണ് ഇവര്‍ക്കെതിരെ കേസെടുത്തിട്ടുള്ളത്.

നേരത്തെ, പ്രാദേശിക കോടതി ഈ ഹര്‍ജി തള്ളിയിരുന്നു. ഇതേത്തുടര്‍ന്നാണ് ഹര്‍ജിക്കാര്‍ ജില്ലാ കോടതിയെ സമീപിച്ചത്. നവംബര്‍ 18ന് കേസില്‍ വാദം കേള്‍ക്കും. ജില്ലാ ജഡ്ജ് സാധന റാണി ഠാക്കൂര്‍ ആണ് വാദം കേള്‍ക്കുന്നത്.

17ാം നൂറ്റാണ്ടില്‍ പണികഴിപ്പിച്ച ഈദ്ഗാഹ് മസ്ജിദ് കൃഷ്ണന്റെ ജന്മസ്ഥലത്താണ് നില്‍ക്കുന്നതെന്നാണ് ഹരജിക്കാരുടെ വാദം. പള്ളി നില്‍ക്കുന്നതുള്‍പ്പടെയുള്ള 13 ഏക്കര്‍ സ്ഥലവും കാത്‌റ കേശവ്‌ദേവ് ക്ഷേത്രത്തിന്റെ ഭാഗമാണെന്നും ഇവര്‍ വാദിക്കുന്നു. മുഗള്‍ രാജാവായിരുന്ന ഔറംഗസീബിന്റെ കാലത്താണ് മസ്ജിദ് നിര്‍മിക്കപ്പെട്ടത്. സുന്നി വഖഫ് ബോര്‍ഡിനേയും ഷാഹി മസ്ജിദ് ഇദ്ഗാഹ് ട്രസ്റ്റിനേയും എതിര്‍കക്ഷിയാക്കിയാണ് ഹരജി സമര്‍പ്പിച്ചിട്ടുള്ളത്.

അതേസമയം, പുറത്ത് നിന്നുള്ള ചിലരെത്തി മഥുരയില്‍ പ്രശ്‌നങ്ങളുണ്ടാക്കാന്‍ ശ്രമിക്കുകയാണെന്ന് പൂജാരിമാരുടെ സംഘടനയായ അഖില ഭാരതീയ തീര്‍ത്ഥ പുരോഹിത് മഹാസഭ പ്രസിഡന്റ് മഹേഷ് പതക് പറഞ്ഞു. പള്ളിയും ക്ഷേത്രവും തമ്മില്‍ തര്‍ക്കങ്ങളൊന്നും നില നില്‍ക്കുന്നില്ലെന്നും അദ്ദേഹം വ്യക്തമാക്കി. അയോധ്യയിലെ അനുകൂല വിധിക്ക് ശേഷമാണ് സംഘ് പരിവാര്‍ മഥുരയിലെ പള്ളിയിലും ഇടപെടുന്നത് എന്നതാണ് ശ്രദ്ധേയം.