മട്ടാഞ്ചേരി പാലസ് റോഡിലെ സപ്ലൈകോ മാവേലി സ്റ്റോര്‍ രാവിലെ ജീവനക്കാര്‍ തുറക്കാനെത്തിയപ്പോഴാണ് പ്രതിഷേധവുമായി ഉടമ രാജേന്ദ്ര കുമാര്‍ സ്ഥലത്തെത്തിയത്.

പിന്നാലെ പൊലീസെത്തി പ്രശ്നപരിഹാരം കാണാമെന്ന് ഉറപ്പ് നല്‍കി. സപ്ലൈകോ അധികൃതരുമായി ബന്ധപ്പെട്ടു. ഉടന്‍ കുടിശ്ശിക തീര്‍ക്കാമെന്ന ഉറപ്പിന്‍മേലാണ് പിന്നീട് സ്റ്റോര്‍ തുറക്കാന്‍ കെട്ടിട ഉടമ സമ്മതിച്ചത്.

വാടക മുടങ്ങിയത് മാത്രമല്ല, സ്റ്റോറില്‍ മിക്കപ്പോഴും അവശ്യസാധനങ്ങളും ഉണ്ടാകാറില്ലെന്ന് നാട്ടുകാര്‍ പറയുന്നു. 2 ദിവസത്തിനകം പ്രശ്നപരിഹാരം കാണുമെന്നാണ് സപ്ലൈകോ അധികൃതര്‍ നല്‍കിയ ഉറപ്പ്. ഒരാഴ്ച വരെ താന്‍ സമയം അനുവദിക്കുമെന്നും അനിശ്ചിതത്വം തുടര്‍ന്നാല്‍ സ്റ്റോര്‍ അടപ്പിക്കുമെന്ന നിലപാടിലാണ് രാജേന്ദ്ര കുമാര്‍.

സപ്‌ളൈക്കോയാണ് മാവേലി സ്റ്റോറിൽ സാധനങ്ങൾ എത്തിക്കുന്നത്. ഓണത്തിനു ശേഷം കാര്യമായ തോതിൽ ഒന്നും എത്തിയിട്ടില്ല. സപ്‌ളൈകോയുടെ താങ്ങാനാവാത്ത കടബാദ്ധ്യതയാണ് പ്രശ്നങ്ങൾക്ക് കാരണം. ദ്യാർത്ഥികളുടെ ഉച്ചഭക്ഷണം,​ സാമൂഹിക വകുപ്പിന് നൽകിയ കിറ്റ് ഇനങ്ങളിലായി വേറെയും ബാദ്ധ്യതയുണ്ട്.

കരാറുകാരുടെ കുടിശ്ശിക കുന്നുകൂടിയതിനാൽ അവരും ഒന്നുമെത്തിക്കുന്നില്ല. ഇതാണ് നിലവിലെ പ്രശ്നം രൂക്ഷമാകാൻ കാരണം. നിലവിലെ സാഹചര്യം മറികടക്കാൻ സപ്‌ളൈകൊ നെട്ടോട്ടമോടുമ്പോൾ കാലിയായ ഖജനാവ് കാണിച്ച് കൈ മലർത്തുകയാണ് സർക്കാർ.

സബ്സിഡി ഉത്പന്നങ്ങൾക്ക് നേരത്തെ പൊതുവിപണിയിലെ വിലയേക്കാൾ 55 ശതമാനം വിലക്കുറവുണ്ടായിരുന്നു. ഇപ്പോൾ 35 ശതമാനമാണ് വിലക്കുറവ്. അത്യാവശ്യം വേണ്ട അരി, പഞ്ചസാര, വെളിച്ചെണ്ണ, പരിപ്പ്, മുളക് തുടങ്ങിയ വസ്തുക്കൾ എന്നു വരുമെന്ന യാതൊരറിവും ഒരാൾക്കുമില്ല. ഗതാഗതം പോലും തടസ്സപ്പെടുത്തി വരി റോഡിലേക്ക് നീണ്ട കാലം മാറി അടച്ചു പൂട്ടലിന്റെ വക്കിലാണ് മാവേലി സ്റ്റോറുകൾ.

കൊച്ചിയിലെ പ്രധാന ഔട്ട്‌ലെറ്റായ കടവന്ത്ര സപ്ലൈകോ ഔട്ട്‌ലെറ്റില്‍ സബ്‌സിഡി സാധനങ്ങളുടെ റാക്കുകള്‍ കാലിയാണ്. 13 ഇന സബ്‌സിഡി സാധനങ്ങളില്‍ അരി, കടല, ചെറുപയര്‍, വെളിച്ചെണ്ണ എന്നീ 4 സാധനങ്ങള്‍ മാത്രമാണ് സ്റ്റോക്ക് ഉള്ളത്. പഞ്ചസാര തീര്‍ന്നിട്ട് മാസങ്ങളായി. വിലക്കയറ്റം താങ്ങാന്‍ ആകാതെയാണ് സാധാരണക്കാര്‍ സപ്ലൈകോ സ്റ്റോറുകളില്‍ എത്തുന്നത്. ലോഡ് വരുന്നില്ല എന്നാണ് ജീവനക്കാര്‍ പറയുന്നത്.

സപ്ലൈകോയില്‍ സബ്‌സിഡി സാധനങ്ങള്‍ ഉണ്ടെന്ന് ഭക്ഷ്യവകുപ്പ് മന്ത്രി ആവര്‍ത്തിക്കുമ്പോഴും എറണാകുളത്തെ ഔട്ട്‌ലെറ്റുകളില്‍ സാധനങ്ങള്‍ കിട്ടാതായിട്ട് മാസങ്ങളായെന്ന് ജനങ്ങള്‍ പറയുന്നു. കോഴിക്കോട്ടെ മാവേലി സ്റ്റോറുകളിലും പരിപ്പ്, കടല, ചെറുപയര്‍, മല്ലി, വെളിച്ചെണ്ണ തുടങ്ങിയ അഞ്ചിനങ്ങള്‍ മാത്രമാണ് ലഭ്യമായിട്ടുള്ളത്. പഞ്ചസാര മുളക് എന്നിവ ലഭിക്കാതായിട്ട് മാസം കഴിഞ്ഞു. ലഭിക്കുന്ന സാധനങ്ങളില്‍ പലതിനും ഗുണനിലവാരം ഇല്ലെന്നും തീവിലയാണെന്നുമുള്ള ആക്ഷേപവും ഉയര്‍ന്നു. എന്നാല്‍ സപ്ലൈകോ നടപടികളൊന്നും ഇതുവരെ കൈ കൊണ്ടിട്ടില്ല.