Medical Bribe – Chandrika Daily

മെഡിക്കല്‍ കോഴ: ബിജെപി നേതാക്കളുടെ പങ്ക് ലോകായുക്ത അന്വേഷിക്കും

chandrika — Tue, 01 Aug 2017 04:16:36 +0000

തിരുവനന്തപുരം: മെഡിക്കല്‍ കോളജിന് അനുമതി നല്‍കുന്നതിന് ബിജെപി നേതാക്കള്‍ കോഴ വാങ്ങിയെന്ന പരാതിയില്‍ ലോകായുക്ത നേരിട്ട് അന്വേഷിക്കും. ബിജെപി സംസ്ഥാന ജനറല്‍ സെക്രട്ടറി എം.ടി രമേശിന്റെയും സഹകരണ സെല്‍ മുന്‍ കണ്‍വീനര്‍ ആര്‍.എസ് വിനോദിന്റെയും പങ്കാണ് പ്രധാനമായും അന്വേഷിക്കുന്നത്. കോഴ വാങ്ങിയെന്ന പരാതിയില്‍ കഴമ്പുണ്ടെന്ന് കണ്ടെത്തിയ സാഹചര്യത്തിലാണ് നടപടി.

ബിജെപി നേതാക്കളുടെ മെഡിക്കല്‍ കോഴ: വാഗ്ദാനം ചെയ്ത കേന്ദ്രമന്ത്രിസ്ഥാനം നഷ്ടമാകും

chandrika — Sat, 22 Jul 2017 04:44:42 +0000

തിരുവനന്തപുരം: മെഡിക്കല്‍ കോളജ് കോഴയുമായി ബന്ധപ്പെട്ട അന്വേഷണ റിപ്പോര്‍ട്ട് ചോര്‍ന്ന സംഭവത്തില്‍ ബിജെപി സംസ്ഥാന നേതൃത്വത്തിന് തിരിച്ചടി. സംസ്ഥാന നേതാക്കള്‍ക്കു കേന്ദ്രം വാഗ്ദാനം ചെയ്ത കേന്ദ്രമന്ത്രിസ്ഥാനവും ബോര്‍ഡ് കോര്‍പ്പറേഷന്‍ അധ്യക്ഷസ്ഥാനങ്ങളും കോഴ വിവാദമായതോടെ അനിശ്ചിതത്വത്തിലായി. കേരള നേതാക്കളുടെ പ്രവര്‍ത്തനങ്ങളെക്കുറിച്ച് ബിജെപി ദേശീയ അധ്യക്ഷന്‍ അമിത് ഷാ ഉള്‍പ്പെടെയുള്ളവര്‍ക്ക് നിരവധി പരാതികളാണ്. പാര്‍ട്ടി പ്രവര്‍ത്തകര്‍ക്കിടയിലെ വിഭാഗീയതയാണ് പ്രധാന പ്രശ്‌നങ്ങള്‍ക്കു കാരണമെന്നാണ് കേന്ദ്രത്തിന്റെ ആക്ഷേപം. അടുത്തിടെ കേരള സന്ദര്‍ശനത്തിനെത്തിയ അമിത് ഷാ ഇക്കാര്യം തുറന്നടിച്ചിരുന്നു. അഴിമതി ആരോപണം കൂടി ഉയര്‍ന്ന സാഹചര്യത്തില്‍ കേന്ദ്രനേതൃത്വം വാഗ്ദനം ചെയ്ത എല്ലാ കാര്യങ്ങളും സംസ്ഥാനത്തെ ബിജെപി നേതാക്കള്‍ക്ക് നഷ്ടമായേക്കും. പാര്‍ട്ടിക്കുണ്ടായ തിരിച്ചടി രാഷ്ട്രീയമായി മറികടക്കാനുള്ള തന്ത്രങ്ങളാകും ഇന്നത്തെ സംസ്ഥാന കമ്മിറ്റി യോഗത്തിലും കോര്‍ കമ്മിറ്റി യോഗത്തിലും ചര്‍ച്ച ചെയ്യുക.

ബിജെപി നേതാക്കളുടെ മെഡിക്കല്‍ കോഴ: എം.ടി രമേശ് പരാതി നല്‍കും

chandrika — Fri, 21 Jul 2017 05:13:25 +0000

തിരുവനന്തപുരം: മെഡിക്കല്‍ കോളജ് അനുവദിക്കുന്നതിന് കോഴ വാങ്ങിയെന്നാരോപണത്തില്‍ ബിജെപി നേതാവ് എം.ടി രമേശ് ദേശീയ അധ്യക്ഷന്‍ അമിത് ഷാക്കു പരാതി നല്‍കും. എം.ടി രമേശ് തിരുവനന്തപുരത്ത് അറിയിച്ചതാണ് ഇക്കാര്യം. റിപ്പോര്‍ട്ടില്‍ തന്റെ പേര് ഉള്‍പ്പെടുത്താന്‍ ഗൂഢാലോചന നടന്നതായി അമിത് ഷായെ ധരിപ്പിക്കുമെന്ന് രമേശ് പറഞ്ഞു. നാളത്തെ ഭാരവാഹി യോഗത്തിലും അന്വേഷണം നടത്തണമെന്ന് ആവശ്യപ്പെടുമെന്നും അദ്ദേഹം പറഞ്ഞു. സംഭവം വിവാദമായ സാഹചര്യത്തില്‍ പാര്‍ട്ടിയുടെ മുഖം രക്ഷിക്കുന്നതിന് ബിജെപി സംസ്ഥാന അധ്യക്ഷന്‍ കുമ്മനത്തെ ഡല്‍ഹിയിലേക്ക് വിളിപ്പിക്കാന്‍ സാധ്യതയുണ്ട്.

ബിജെപിക്കെതിരെ ആഞ്ഞടിച്ച് ആര്‍എസ്എസ് കേരള നേതൃത്വം

chandrika — Thu, 20 Jul 2017 07:43:22 +0000

തിരുവനന്തപുരം: മെഡിക്കല്‍ കോഴയുമായി ബന്ധപ്പെട്ട് ബിജെപി സംസ്ഥാന നേതൃത്വത്തിനെതിരെ ആഞ്ഞടിച്ച് ആര്‍എസ്എസ് കേരള നേതൃത്വം. സംഭവത്തില്‍ ശക്തമായ നടപടി വേണമെന്ന് ആര്‍.എസ്.എസ് നേതാക്കള്‍ ആവശ്യപ്പെട്ടു. ബിജെപി സംസ്ഥാന അധ്യക്ഷന്‍ കുമ്മനം രാജശേഖരനെ ആര്‍എസ്എസ് അതൃപ്തി അറിയിച്ചിട്ടുണ്ട്. ബിജെപിക്കുള്ളിലെ ഗ്രൂപ്പ് പോരാണ് കേരളത്തിലെ പ്രശ്‌നങ്ങളുടെ അടിസ്ഥാന കാരണമെന്നും ആര്‍എ.എസ്.എസ് ആരോപിച്ചു.
അതിനിടെ, നേരത്തെ മറുപടി നല്‍കാന്‍ തയാറാകാതിരുന്ന കുമ്മനം സംഭവത്തില്‍ സമഗ്ര അന്വേഷണം നടത്തുമെന്ന് പ്രതികരിച്ചു. കുറ്റക്കാര്‍ക്കെതിരെ കര്‍ശന നടപടി സ്വീകരിക്കുമെന്നും കുമ്മനം പറഞ്ഞു.

ബിജെപി നേതാക്കളുടെ മെഡിക്കല്‍ കോഴ: എം.ടി രമേശിന്റെ പ്രതികരണം

chandrika — Thu, 20 Jul 2017 07:28:58 +0000

തിരുവനന്തപുരം: മെഡിക്കല്‍ കോളജ് അനുവദിക്കുന്നതിന് സംസ്ഥാന ബിജെപി നേതാക്കള്‍ കോഴ വാങ്ങിയതു സംബന്ധിച്ച വിഷയത്തില്‍ പ്രതികരണവുമായി ബിജെപി നേതാവ് എം.ടി രമേശ്.

തനിക്ക് ആരും പണം വാഗ്ദാനം ചെയ്തിട്ടില്ലെന്നും സംഭവത്തില്‍ തനിക്ക് ബന്ധമില്ലെന്നും എം.ടി രമേശ് പ്രതികരിച്ചു. നഴ്‌സറി സ്‌കൂളിനു പോലും അനുമതി നല്‍കാന്‍ കഴിയാത്ത ആളാണ് താന്‍. കോഴ നല്‍കി എന്നു പറയുന്നവരെ താന്‍ ജീവിതത്തില്‍ ഒരിക്കല്‍ പോലും കണ്ടിട്ടില്ല. മറിച്ചുള്ള പ്രചാരണങ്ങളെല്ലാം വസ്തുതാവിരുദ്ധവും അടിസ്ഥാനരഹിതവുമാണെന്നും എം.ടി രമേശ് മാധ്യമപ്രവര്‍ത്തകരോട് പറഞ്ഞു.

മെഡിക്കല്‍ കോഴ: ഓടിയൊളിച്ച് ബിജെപി നേതാക്കള്‍

chandrika — Thu, 20 Jul 2017 06:43:18 +0000

തിരുവനന്തപുരം: ബിജെപി നേതാക്കള്‍ ഉള്‍പ്പെട്ട മെഡിക്കല്‍ കോഴ വിവാദത്തില്‍ പ്രതികരണത്തിന് ഭയന്ന് പാര്‍ട്ടി നേതൃത്വം. സംഭവത്തെക്കുറിച്ച് ചോദിച്ചപ്പോള്‍ ബിജെപി നേതാക്കള്‍ ആരും തന്നെ പ്രതികരിക്കാന്‍ തയാറായില്ല. എന്തിനും ഏതിലും ഫേസ്ബുക്കില്‍ പോസ്റ്റിടുന്ന കെ.സുരേന്ദ്രനെയും ഇപ്പോള്‍ കാണുന്നില്ലെന്ന് പരക്കെ ആക്ഷേപമുണ്ട്.
സംഭവത്തെക്കുറിച്ച് ചോദിച്ചപ്പോള്‍ പാര്‍ട്ടിയുടെ സംസ്ഥാന അധ്യക്ഷന്‍ കുമ്മനം രാജശേഖരന്‍ നടത്തിയ പ്രതികരണം ഇപ്പോള്‍ വൈറലാണ്. അസുഖമാണ് അതിനാല്‍ ഇപ്പോള്‍ പ്രതികരിക്കാന്‍ സാധിക്കില്ലെന്നായിരുന്നു കുമ്മനത്തിന്റെ മറുപടി. നേരില്‍ കാണാനെത്തിയ മാധ്യമപ്രവര്‍ത്തകരോടായിരുന്നു കുമ്മനത്തിന്റെ പ്രതികരണം.
അതേസമയം, വിഷയത്തില്‍ ബിജെപി സംസ്ഥാന നേതൃത്വത്തോട് കേന്ദ്ര നേതൃത്വം റിപ്പോര്‍ട്ട് തേടി. നേതാക്കള്‍ കോഴ വാങ്ങിയതായി ബിജെപി നിയോഗിച്ച അന്വേഷണ സമിതി കണ്ടെത്തിയിരുന്നു. ഇതിന്റെ അടിസ്ഥാനത്തിലാണ് കേന്ദ്ര ഇടപെടല്‍.
അതിനിടെ, ബിജെപി നേതാക്കളുടെ കോഴ വിവാദം ഉന്നയിച്ച് പ്രതിപക്ഷ പാര്‍ട്ടികള്‍ രാജ്യസഭയെ പ്രക്ഷുബ്ധമാക്കി. എം.ബി രാജേഷ് എം.പിയാണ് ഇതുസംബന്ധിച്ച അടിയന്തര പ്രമേയത്തിന് നോട്ടീസ് നല്‍കിയത്.