കേസില്‍ കഴിഞ്ഞ ദിവസമാണ് ഇയാളെ പള്ളിക്കല്‍ പൊലീസ് അറസ്റ്റ് ചെയ്തത്. ഇയാള്‍ക്കൊപ്പമുണ്ടായിരുന്ന അഞ്ച് പേര്‍ ഒളിവിലാണ്. ഒക്ടോബര്‍ 16ന് പോങ്ങനാട് കുറിച്ചിയില്‍ ഇടറോഡില്‍ വച്ചാണ് സംഭവം. വിനീത് കേസിലെ മൂന്നാം പ്രതിയാണ്.

ഗുരുതരമായി പരിക്കേറ്റ സമീര്‍ ഖാന്‍ ആശുപത്രിയില്‍ ചികിത്സയിലാണ്. നിരവധി ക്രിമിനല്‍ കേസുകളില്‍ പ്രതിയാണ് വിനീത്. ഒന്നിലധികം സ്‌റ്റേഷനിലും വിനീതിനെതിരെ കേസുണ്ട്. കാറ്, സ്‌കൂട്ടര്‍ ഉള്‍പ്പടെ മോഷ്ടിച്ച കേസില്‍ കന്റോണ്‍മെന്റ്, കല്ലമ്പലം, നഗരൂര്‍, മംഗലപുരം സ്‌റ്റേഷനുകളിലും കേസുണ്ടായിരുന്നു.

മീശവിനീത് ഉള്‍പ്പെട്ട നാലംഗ സംഘം 2 ബൈക്കുകളിലായി മടവൂരില്‍ എത്തി യുവാവിനെ ആക്രമിക്കുകയായിരുന്നു. തുടര്‍ന്ന് ഇദ്ദേഹത്തിന്റെ തല അടിച്ചു പൊട്ടിച്ച ശേഷം സ്ഥലം വിടുകയായിരുന്നു. വിനീത് കേസിലെ മൂന്നാം പ്രതിയാണ്. മറ്റു പ്രതികളെ പിടികൂടിയിട്ടില്ല.

ഇന്‍സ്റ്റഗ്രാം വഴി പരിചയപ്പെട്ട യുവതിയില്‍ നിന്നും സ്വര്‍ണാഭരണങ്ങള്‍ തട്ടിയ കേസില്‍ ആഗസ്റ്റില്‍ മീശ വിനീത് പിടിയിലായിരുന്നു. സ്വര്‍ണാഭരണം വാങ്ങി പണയം വെച്ചശേഷം തിരികെ നല്‍കാമെന്ന് പറഞ്ഞ് യുവതിയെ വിളിച്ച് വരുത്തി ഉപദ്രവിക്കുകയായിരുന്നു ഇയാള്‍.

കിളിമാനൂര്‍ വെള്ളല്ലൂര്‍ സ്വദേശിയും സോഷ്യല്‍ മീഡിയ താരവുമാണ് ‘മീശ വിനീത്’ എന്ന് വിളിക്കുന്ന വിനീത് (26). സ്വര്‍ണ്ണാഭരണങ്ങള്‍ തിരികെ ചോദിച്ച യുവതിയെ പറഞ്ഞു വിശ്വസിപ്പിച്ച് വീട്ടിലേക്ക് വിളിച്ചു വരുത്തിയശേഷം വീടിനുള്ളില്‍ വച്ച് മര്‍ദ്ദിച്ചെന്ന പരാതിയിലാണ് അന്ന് വിനീതിനെ പൊലീസ് പിടികൂടിയത്. സോഷ്യല്‍ മീഡിയ താരമായ മീശ വിനീത് നേരത്തെ മോഷണ കേസ് ഉള്‍പ്പെടെ നിരവധി കേസുകളില്‍ പ്രതിയാണ്.

യൂടൂബിലൂടെ പ്രശസ്തനായ വിനീത് ഒട്ടേറെ കേസുകളില്‍ പ്രതിയാണ്. മംഗലപുരം പൊലീസ് സ്‌റ്റേഷന്‍ പരിധിയില്‍ കണിയാപുരത്ത് പെട്രോള്‍ പമ്പ് മാനേജരില്‍ നിന്നു രണ്ടര ലക്ഷം രൂപ തട്ടിയെടുത്ത കേസിലാണ് ഇയാള്‍ അവസാനമായി അറസ്റ്റിലാകുന്നത്.

2023 ഏപ്രില്‍ മാസത്തില്‍ ആണ് ബാങ്കില്‍ അടയ്ക്കാന്‍ കൊണ്ടു പോകവേ പമ്പ് മാനേജരില്‍ നിന്നും പണം തട്ടിയെടുത്തത്. നഗരൂരില്‍ നിന്നും മോഷ്ടിച്ച സ്‌കൂട്ടറില്‍ എത്തിയാണ് പമ്പ് മാനേജരില്‍ നിന്നും പണം തട്ടിയത്.

ഈ കേസില്‍ വെള്ളല്ലൂര്‍ കാട്ടുചന്ത സ്വദേശി ജിത്തുവും അറസ്റ്റിലായിരുന്നു. തമ്പാനൂര്‍, മ്യൂസിയം, കല്ലമ്പലം എന്നീ സ്‌റ്റേഷനുകളിലായി പത്തോളം കേസുകളില്‍ പ്രതി ആണെന്ന് പൊലീസ് പറഞ്ഞു. കിളിമാനൂര്‍ പൊലീസ് സ്‌റ്റേഷനിലെ റൗഡി ലിസ്റ്റില്‍ ഉള്‍പ്പെട്ടിട്ടുള്ള ഇയാള്‍ നിലവില്‍ കോടതി ജാമ്യത്തില്‍ കഴിഞ്ഞു വരികയായിരുന്നു. പ്രതിയെ കോടതി റിമാന്‍ഡ് ചെയ്തു.